אידישע וועלט האט געשריבן: ↑זונטאג פעברואר 19, 2023 1:02 pm
שפראך:
אלס א גרויסער פראיעקט און א זייטיגער טייל פונעם אפדעיט, האט מען אריינגעלייגט גרויסע כוחות איבערצוגיין די גאנצע שפראך פונעם סייט, וואס האט געהאט פילע טעותים און צומאל אומפארשטענדליכע איבערזעצונגען, און מען האט דאס אלעס פארבעסערט און פארשענערט, קלאר און געשמאק. אן ארבעט וואס האט זיך געצויגן וואכן און חדשים.
בנוסף לזה, האט מען צום ערשטן מאל איבערגעטייטשט די 'אפט געפרעגטע פראגן' צו אידיש. שאלות וואס מען באגענגט זיך כסדר נאכאמאל און נאכאמאל, וועט פון היינט זיך געפינען אויף יעדן בלאט א לינק צו אלע ענטפערס אויף א קלארער שפראך. וזאת למודיע, אז צוליב די פיל ארבעט וואס דאס נעמט אריין, פעלט נאך אויס געוויסע תיקונים דא דארטן, אבער אזויווי מיר ווילן דאס נישט צוריקהאלטן פונעם ציבור, לייגן מיר עס ארויס מיט'ן אפדעיט, און מיר האפן עס צו פארענדיגן אין די קומענדיגע תקופה.
אזוי אויך די אימעילס וואס ווערן ארויסגעשיקט דורכ'ן סיסטעם, ווערט אצינד איבערגעארבעט אויף אידיש, און אין א קורצע צייט וועט דאס בעזר ה' ארויפגעלייגט ווערן אויפ'ן סיסטעם.
כשם שאי אפשר לבר בלי תבואה כך אי אפשר לספר בלי שגיאות, ווי פארשטענדליך איז נישט מעגליך אז עס זאלן נישט פארט אריינפאלן געוויסע טעותים, און מען קען אלעמאל מאכן די לשונות נאך קלארער און באקוועמער, בעטן מיר אז אויב מערקט איר טעותים, לאזט אייך הערן אינעם אשכול וואס מען וועט דעזיגנירן ספעציעל פאר דעם, און מען וועט עס בעז"ה פארריכטן.
קלארשטעלונג:
דער אשכול ווערט נישט געעפנט פאר גראמאטיק דעבאטעס, צי מ'שרייבט זען אדער זעהן וכדו', די זאכן זענען שוין דיסקוטירט (אדער דיסקוסירט...) געווארן במשך לאנגע חדשים צווישן די טרענסלעישאן שטאב, און דאס קען מען דעבאטירן אינעם דעזיגנירטן שפראך פארום.
בעיקר זאל מען קאמענטירן אויף בפירוש'ע טעותים וואס זענען אריינגעפאלן, אדער שורות וואס זענען נישט גענוג פארשטענדליך, און קענען בעסער ארויסגעברענגט ווערן.
אויב מעגליך וואלט געווען בעסער מיטצולייגן א שקרינשאט אדער א לינק, מען זאל כאפן פון וואס מ'רעדט.