ציטיר
0
צו לייגן א דאנק דארפט איר זיין אריינגעלאגט
תגובה
דורך אני-הק' » זונטאג פעברואר 07, 2021 11:34 am
[align=center]דברי הספד מאת כ"ק מרן רבינו עט"ר שליט"א לפני מיטתה של להבחל"ח אחותו הרבנית הצדיקת מהאדאס ע"ה[/align] [align=center](גענומען פון גליון באור החיים פ' יתרו תשפ"א) [/align] מ'שטיי מיר ליידער דא אפצוגעבן די לעצטע כבוד פאר מיין חשוב'ע שוועסטער. די נביא זאגט שבת משוש לבינו נהפך לאבל מחולינו, סתם פשט איז, ס'האט אויפגעהערט משוש לבינו, ס'האט זיך איבערגעדרייט לאבל. קען מען זאגן א ווארט פון הייליגן רבי ר' מאיר'ל פרימישלאנער זי"ע, שבת משוש לבינו, זאגט ער, שַ בָּ ת משוש לבינו, שבת קודש איז א זמן פון שמחה, ס'טוט דערפרייען די הארץ, אבער וואס קען מען טון, נהפך לאבל מחולינו, ס'האט זיך איבערגעדרייט פון שבת, ס'איז געווארן מחולינו א וואכן טאג, ס'איז געווען א גרויסע ווייטאג, ס'איז אוועקגענומען געווארן די שמחה. זיכער ס'איז געווען אזא דערהויבענע הייליגע שבת, שבת קריעת ים סוף, דער אייבערשטער האט ארויסגעצויגן אידישע קינדער פון מצרים, ער האט זיי ארויסגעצויגן פון די מ"ט שערי טומאה זיי אריינצוברענגען צו קדושה, צו קבלת התורה, ווי אזוי קען זיין אזא טייערע נשמה זאל אוועקגענומען ווערן. יעדער איינער ווייסט, שלמה המלך זאגט, ער רעכנט אויס עת לבכות, עת לשחוק, זאגט ער אויך עת ספוד און עת רקוד. שטעלן זיך די ספרים הק', וואס איז די פשט פארוואס ביי אלע זאגט ער עת לבכות עת לשחוק, פארוואס ביי עת ספוד און עת רקוד זאגט ער נישט מיט א ל'. נאר וואס דען ס'קען זיין אמאל אז ווען ס'איז דא א עת ספוד איז דא א עת רקוד, ס'איז דא א עת ספוד, מיין חשוב'ע שוועסטער, זי איז אוועקגענומען פון אונז, פאר אונז איז א עת ספוד, א גרויסע קלאגעניש, אבער אויבן אין הימל, בשעת דו גייסט ארויף צו טאטי און מאמי, דארט איז א עת רקוד, זיי נעמען דיך אויף, זיי וועלן דיך אויפנעמען און זיי וועלן טאנצן. שלמה המלך זאגט אשת חיל מי ימצא, ווער קען טרעפן א אשת חיל. סתם איז דא א אשת חיל, יעדע אידישע פרוי היינט הייסט א אשת חיל, אז מען גייט אדורך אזא וועלט, אז מען גייט אדורך אזעלכע ביטערע נסיונות, מען האט דאך אזויפיל פראבלעמען איבעראל, יעדע שטוב איז נעבעך דא פראבלעמען, און אז מען גייט דאס אדורך, מען האלט זיך ערליך איז מען טאקע א אשת חיל. אבער די 'מי' ימצא, דער וואס ס'שרייט מי אנכי ווער בין איך, איך בין גארנישט, מ"י ימצא דער וואס טוט אויפהייבן, ארויפנעמען אידישע קינדערלעך צו די מ"י, צו די נ' שערי קדושה, וואס די וואך איז מען ארויסגעגאנגען פון די מ"ט שערי טומאה, מען זאל זיך צוגרייטן צו קבלת התורה, מ"י ווער איז די מ"י, ווי דו האסט געשריגן, דו פלעגסט מיך אנצורופן, פלעגסט צוגיין צו טאטי און זאגן ווען ס'איז געווען עפעס א זאך צי ס'איז געווען עפעס א פירצה, צי עפעס איז נישט געווען אין בעסטן, האסטו אכטונג געגעבן אויפ'ן שטעטל, אשת חיל מי ימצא, ווי וועל מיר נאך האבן אזא סאלדאט וואס וועט אונז אויפהייבען אין די קדושה. האסט אויפגעשטעלט ברוך השם א שיינע דור, א דור יראים ושלמים. מיט דיין חשוב'ן רבי'ן ביסטו אריבער אזויפיל יארן א גאנץ לעבן. די שכינה הקדושה האט גערוהט אין די שטוב. טאטי פלעגט צו זאגן אז דער זיידע האט געזאגט: יעדע שפענדל פון זיין ביהמ"ד איז אויסגעארבעט. טאטי פלעגט צו זאגן דא אין טאהש, אין ביהמ"ד איז אויסגעארבעט יעדע שפענדל. און איך קען זאגן, און טאטי האט עס איבערגעזאגט אסאך מאל אז צירעלע איז א חשוב קינד, ער האט עס נישט געזאגט אויף אלע קינדער, ער האט עס געזאגט אויף דיר, זאלסטו וויסן דו האסט א כח. דו פלעגסט מיר צו זאגן: טאטי האט געזאגט די תהלים'ל איז מיינס. וואס האט ער געמיינט די תהילים'ל איז מיינס, אז מען קען בעטן און מתפלל זיין פאר אידישע קינדער, מ'קען זיך אויסוויינען ביים תהלים. דו האסט אלעמאל געבעטן פאר כלל ישראל, דו האסט אלעמאל געבעטן פאר יעדן איינעם, דו האסט אינזין געהאט דיין רבי'ן, דו האסט אינזין געהאט דיינע קינדערלעך, האב זיי ווייטער אינזין, בעט ווייטער פאר זיי, בעט פאר מיר און פאר אלע שוועסטער'ס, זיי זענען אזוי געטריי געווען צו דיר אלעמאל, מען האט זיך געהאלטן אזוי נאנט. לעולם יראה אדם את עצמו, חציו חייב וחציו זכאי. רבונו של עולם, די חציו חייב איז שוין אוועקגענומען געווארן, מיין טאטע, מיין מאמע, מיין ברודער, מיינע צוויי שוועסטער'ס, די אנדערע חציו זאל זיין זכאי, זאל שוין זיין לויטער, ס'זאל בלייבן זכאי, מען זאל שוין נישט וויסן מער פון קיין צרות, הייליגער באשעפער אידישע קינדער מאכן דאך אזויפיל מיט. א נשמה קדושה, א חלק אלקי ממעל, דבר איז דאך א זאך, א חפץ איז דאך א חשוב'ע זאך, ס'שטייט פון הייליגן מונקאטשער רב, מען זאגט יעדן טאג ביים דאווענען, כל דבר שהיה בכלל, וואס איז געווען צווישן כלל, ויצא מן הכלל און ס'גייט ארויס פונעם כלל, לא ללמד על עצמו יצא, גייט מען נישט ארויס פאר זיך, אלא ללמד על הכלל כולו יצא, גייסט דאך ארויף אויבן לשמי מעל פאר'ן גאנצן כלל, דו ביסט דאך א קרבן עולה, מ'האט צוגענומען די חשוב'סטע וואס מיר האבן געהאט, אזאנס האמיר נישט נאך, ס'איז דאך אזא חשובע זאך געווען דא ביי אונז אין טאהש, האט מען גענומען די שענסטע קרבן, די חשוב'סטע קינד פון מיין הייליגע טאטע. גייסט ארויף אויבן, טאטי ווען ער האט מספיד געווען מאמי'ן האט ער געזאגט די מעשה פון הייליגן ר' מרדכי'לע נאדבורנער. דער הייליגער ר' מרדכי'לע נאדבורנער, זיין רעביצין איז אוועק ווען ער האט נאך געלעבט, ווען מען האט איר אריינגעלייגט, האט דער הייליגער ר' מרדכי'לע געזאגט, - ער האט נישט גערעדט קיין ווארט ביז דעמאלטס - האט ער געזאגט: דו גייסט ארויף, גיי רואיג, גיי גראד, ס'וועט קומען א פלאץ וואו מען וועט דיך אפשטעלן זאלסטו זאגן האסט מיך ערליך באדינט. דאס איז געווען ווען ר' מרדכי'לע נאדבורנער איז דא געווען, יעצט האסטו דיין טאטע, האסט דיין מאמע, מאמי און טאטי זענען אויבן, דיין ברודער, די זיידעס, די אבות הקדושים פון אלע צדדים, פון דיין רבי'ס צדדים און פון אונזערע צדדים האסטו אויבן, זיי גייען דיר אקעגן, קיין איינער וועט דיך נישט אפשטעלן, דו האסט געטון אזויפיל, מכבד געווען דעם כבד את אביך ואת אמיך, ווער קען עס אראפלייגן, ווער קען עס פארציילן, מען קען עס נישט פארשטיין, מען ווייסט עס נישט גענוג. נאך ווען מען האט געוואוינט אין מאנטריאל, מען האט קוים געקענט זיך רירן דארט, די געוואלדיגע צניעות דיינע, וואס דיין רבי האט פריער מספיד געווען און ער האט געזאגט אויף דיר, דאס איז געווען דארט אין אזא קליינע הייזעלע ווען מען האט געוואוינט דארט, דו ביסט געווען די עלטסטע שוועסטער, דו האסט באדינט מאמי'ן און טאטי'ן אלע יארן, דא און דארט, ביסט געווען אזוי געטריי. איך בין זיכער כבד את אביך ואת אמיך למען יאריכון ימיך, טייטשט אמאל, יאריכון ימיך אויף שפעטערדיגע יארן אויף עולם הבא, דו וועסט האבן אריכות ימים דארט, קענסט זיין רואיג, האסט איבערגעלאזט א דור קדוש יראים ושלמים, יעדע קינד איז א דיימאנד פאר זיך. איך בין זיכער אז זיי בעטן פאר דיר און דו זאלסט בעטן פאר זיי, פארגעס נישט פון זיי, יעדער איינער גייט דאך אדורך פארשידענע זאכן, כלל ישראל בכלל, ובפרטיות פאר יעדן איינעם באזונדער. זאלסט אינזין האבן דעם שטעטל, זאלסט בעטן, גייסט ארויף צום בית דין של מעלה, גייסט ארויף צו טאטע און מאמע, בעט זיי: ס'איז שוין גענוג, שוין גענוג גענוג, מענטשן גייען אדורך אזויפיל, בעט פאר דיין חשוב'ן מאן, פאר דיין רבי'ן, ער זאל האבן כח, די שענסטע יארן, איז ער יעצט אליין, בעט ער זאל האבן כח דאס דורכצוטראגן, בעט פאר דיינע קינדער, זיי האבן זיך אזויפיל אפגעגעבן, אזויפיל כבוד געגעבן פאר דיר, זיי זענען דא געווען טאג און נאכט, ביסט געווען אין שפיטאל האט מען דיך נישט געלאזט קיין איין מינוט נישט אליין, מען האט נישט גערוהט קיין איין מינוט ווי לאנג מען קען דארט זיין, און דאס איז ליידער געשען, אבער אזוי האט דער אייבערשטער געוואלט, גלייב מיר מיט אמונה שלימה אז דאס איז גוט, אזוי וויל דער אייבערשטער איז דאס דער רצון השם. אבער זעה דו גייסט ארויף, דו ביסט א חשוב'ער קרבן פאר'ן כלל מער זאל נישט זיין קיין קרבנות, זאג פאר די זיידעס און פאר'ן עלטער זיידן אז זיי האבן געוויזן אז ווען ס'איז אוועק א צדיק האט זיך אויפגעהערט די זאך, ס'זאל זיך שוין אויפהערן די אלע זאכן דא. טייערע שוועסטער, דו גייסט ארויף, רייס איין פאר דיינע קינדער, בעט פאר יעדן איינעם, ובלע המות לנצח ומחה ה' אלקים דמעה מעל כל פנים ובא לציון גואל במהרה בימינו ונאמר אמן.
אני הק' - קטן הרוצה להיות קדוש
איך פרוביר נישט צו גיין "אויף יענער וועלט" פריצייטיג,