אין צייט פאר ספרינג, פייגלעך טראדיציענאל קומען אָן אין אוקריינע.
מיג־29 דשזעטס פון סלאװאקיי װעלן האבן אסאך ארבייט צו פארטיידיגן אייראפע, שכוח צו רב האגער און די סלאװאקישע מענטשען.
אונזער לופט כח איז גרייט צו ערהאלטן מער דזשטעס און באשיצן אונזערע הימלען.
אלעקסי רעזניקאװ
ישראל_הלוי האט געשריבן: ↑מאנטאג מארטש 20, 2023 8:06 am
דרום אפריקע זאגט אז זי איז באוויסטזיניג איבער אירע לעגאלע התחייבות'ער צו די אינטערנאציאנאלע קרימינאלע געריכט, בנוגע די ארעסט ווארענט פאר פרעזידענט פוטין.
די BRICS סאמיט קומט פאר אין דרום אפריקע אין אוגוסט.
זאלענסקי האט נעכטן באזוכט כארסאן, שפאצירט אין די ארטיגע גאסן און געשמועסט מיט די איינװאוינער, דאס קומט א טאג נאכדעם װאס ער האט באזוכט די פראנט ליניעס אין באכמוט אומגעגנט די װאך.
בעת זיין באגעגענישן מיט די טרופן אין באכמוט האט ער פארטיילט פאר יעדן װארעמע קאװע און טיי און געזאגט בדרך צחות: טרינקטס צו האבן מער כח װי דער פיינט.
זיינע כסדרדיגע באזוכן זענען אין שארפן קאנטראסט צו פוטין װעכע האט בלויז איינמאל זיך אריינגעכאפט קיין מאריופאל אינמיטן די נאכט (אם במחתרת ימצא הגנב) צו שמועסן מיט אפאר אלטע לויטע (אקטיארן) און לויט א סטעימענט פון די גלות קאנסול פון מאריאפעל, האט זיך פוטין אריינגעכאפט, כדי זיך צו געזעגענען פון די שטאט, בעפאר די אוקריינע קאונטער אפענסיװע, װעלכע װעט צוריקנעמען מאריופאל.
זאלענסקי צו טרופן אין באכמוט: טרינקט צו האבן מער כח װי דער פיינט..
פריגאהאזין האט עפעס געטאן דא וואס דארף הסבר, פון איין זייט האט ער אנגעפאנגן חנ'דלן די מיליטער, ער האט צום ערשטן מאל אויסגעלויבט די מיליטער און געלאזט קריטיק בלויז אויף קלייניגקייטן, און פון די אנדערע זייט האט ער זיך ארויסגעשטעלט -צום ערשטן מאל- אין א דירעקטע און אפענע סתירה צו פוטינ'ס סטעיטמענט'ס, פוטין זעלבסט נוצט כסדר די דינאציפייען פראפעגאנדע און האט עטליכע מאל געזאגט אז די קריג איז זיך צו ראטעווען פון נאטא, אבער ווי נארמאליזם שרייבט האט ער נעכטן עפעס געפינען פאר וויכטיג מבטל צו זיין די גאנצע קרעמלין פראפעגאנדע, עפעס א חשבון האט ער דא, ברויך מען עס בעסער אפלערנען.
אבער דאס איז כמעט ברור אז זיין אמאליגע חן וואס ער האט געהאט ביי פוטין האט ער שוין פארלוירן פארגאנגענע חודש, די מיליטערישע פירער האבן א שטארקע טענה אז וואגנער האט שוין געלאזט שטארבן טויזענטער קעמפער אויפן פראנט און האט נאך אלץ נישט באוויזן איינצונעמען באכמוט, וואס איז ער ווערט דעמאלט'ס? פארוואס זאל מען אפילו אויסהערן זיין קריטיק אויך די מיליטער ווען ער אליין האט בכלל נישט קיין סוקסעס?
זיי האבן אויסגעפירט ער האט פארלוירן צוטריט צו די טורמעס און מען האט געזען אז פוטין האט מרמז געווען צו פריגהאזין אז ער גייט שוין צו ווייט, און לכאורה האט פוטין אליין באקומען א נעגאטיווע בליק אויף פריגהאזין ווען דער לעצטער האט אנגעפאנגן ווייזן פאליטישע אמביציעס אויף א היבש דראמאטישע וועג און האט געשטעלט פוטין אין זיין שאטן אנווייזענדיג אז ער איז כסדר אויפן פראנט, ער האט גערעדט א שפראך וואס איז נאנט צו זאגן אז ער גייט האבן א אייגענע פארטיי וואס זאל זיין באזירט אויף עכטע רוסישע פאטריאטן, און ער האלט אז מען דארף אפן זאגן אז די קריג אין אוקריינע איז טאקע פשוט צו מאכן רוסלאנד גרעסער, אן קיין שום תירוצים, לאז אפ דינאציעפיקאציע, לאז אפ די אלע מארקעטינג, ער וויל זען רוסלאנד אלץ א מעכטיגע כח וואס קען איינעמען אוקריינע פלעין ווייל עס שמעקט זיי!
פוטין האט נישט קיין פראבלעם מיט זיין פיליזאפיע אבער ער האט יא א פראבלעם ווען מען זעט כסדר בילדער פון פריגהאזין אויפ פראנט און ווען פריגהאזין איז דער פנים פון די מלחמה, און בעיקר ווען פריגהאזין הייבט אן צו ווייזן אפענע פאליטישע אמביציע, דאס איז שוין צופיל פאר פוטין, און דאס איז לכאורה די סיבה פארוואס מען האט גענידערט גענעראל סוראווקין און צוריקגעברענגט געריסאמאוו מיט א שטארקייט, שאוגאו מיט געריסאמעוו זענען בלינד לויאל צו פוטין און זיי דארף ער, אפגעזען זייערע אומבאלומפערטע פעלערן אין די ערשטע חדשים פון די מלחמה.
וואס דא איז אינטערעסאנט איז וויאזוי פריגהאזין האט עפעס אנגעפאנגן מיטאמאל אוועקצומאכן ברבים פוטינ'ס סטעיטמענט'ס, און בד בבד אנגעפאנגן צו רעדן שיין פון די מיליטער, וואס גייט דא פאר?
--
אינעם זעלבן אונטערוויו האט פריגהאזין אויך דראמאטיזירט וויאזוי די אוקריינער האבן שוין גרייט אכציג טויזענט זעלנער אין די באקומט אומגעגענט, און מיט צוויי הונדרעט טויזענט ריזערוו סאלדאטן אויפגעריסטעט און גרייט פאר א מאסיווע קאונטער אטאקע, פריגהאזין זאגט בדרך כלל דעם אמת, אבער ס'איז צום גלייבן אז דא האט ער איבערגעטריבן, ער ברויך נאך וואפן און שטיצע פון די מיליטער און ער פראבירט מן הסתם צו העצן דעם עולם אז די אוקריינער קומען! מען מוז שנעל טאן עפעס! גיט'ס מיר שנעל וואפן! גיטס מיר די נויטיגע שטיצע צו קעמפן!
--
עס איז דא מוזיק וואס איז צוגעפאסט פאר שמחת בית השואבה, מוזיק פאר א רבישע חתונה, מוזיק פאר פורים, מוזיק וואס ישיבה בחורים ברויכן צו טאנצן הארא, וכו' וכו'
אזוי אויך איז דא פארשידענע סארטן שלאכטן, יעדע שלאכט האט זייער אויסשטעל און מהלך, מלשל עס איז פארהאן א בליץ קריג, עס איז א געוויסע סארט מהלך פון א קריג, אויב וויל מען נעמען דעם מהלך דארף מען עס אויסרעכענען און אנגרייטן לויט די פארשריפטן פון א בליץ קריג, און אנאליסטן וועלן קענען אויסרעכענען וויאזוי זאכן גייען זיך אויסשפילן ווייל עס איז דא היסטאריע וויאזוי א בליץ קריג לאזט זיך געווענליך אויס און מען קען אפשאצן צו די אטאקירער טוען די ריכטיגע זאכן וואס עס פעלט זיך אויס פאר זיי צו טאן, געווענטליך איז די ערווארטונגן אז זאכן פארן זייער שנעל און מען זאל איבערוועלטיגן די מעגליכקייטן פון די באשוצער און פארן מיט אזא שנעלע ספיד און מאכט אז דער באשוצער זאל נישטאמאל האבן צייט זיך צו אריענטירן און שטעלן א ווידערשטאנד.
און עס איז דא אזא סארט מהלך אין קריג וואס הייסט א וואר אוו אטרישען (war of attrition), ווען מען רעדט פון א אזא סארט מהלך איז געווענליך די ערווארטונג אז קיינער זאל נישט מאכן קיין גרויסע מאסיווע פארשריט פון איין טאג צום צווייטן, די מהלך און ערווארטונג פון יעדע צד איז אז מען זאל אנציען נאך א טאג און נאך א טאג אונטער ביטערע אומשטענדן ווי מען מאלט פלייש, "ביז דער אנדערער וועט שוין נישט האבן קיין כח און וועט מוזן אויפגעבן"
די פלאן איז נישט אז מען וועט אזוי לאנג קעמפן ביז מען וועט דורעכברעכן די שוץ ליניע'ס און זיך נעמען מארשירן אין דעם שונא'ס טערעטאריע, דאס איז בכלל נישט די ערווארטונג, די ערווארטונג איז אז יענער זאל ווערן פריער אפגעמוטשעט, דעציט. ווער עס גיט אויף די ערשטע יענער איז די פארלירער.
די איצטיגע שלאכטן אין די טרענשעס איז אזא סארט שלאכט, ווען מען רעמפט אין טרענשעס איז נישטא כמעט קיין מעגליכקייט זיך צו רירן הונדרעט מעטער אנע ביטערע פארלוסטן, ערפארונג וועט נישט ערמעגליכן צו מאכן פארשריט אן ביטערע פארלוסטן, אוודאי וועט עס מינימיזירן די פארלוסטן אבער עלימינירן פארלוסטן איז אוממעגליך אין דעם איצטיגן אויסשטעל.
די רוסן האבן אנגעפאנגן מיט א בליץ קריג אבער זיי זענען געווארן פארברענט אינעם פייערדיגן בליץ, זיי האבן נישט געהאט די נויטיגע קראפט און טאקטיקן וואס עס פארלאנגט זיך פאר א בליץ קריג, אויך זיי האבן זיך מיאוס פאררעכנט מיט די וויליגקייט פון אוקריינער צו קעמפן, נאך עטליכע חדשים האבן זיי זיך געמוזט צוריקציען.
דערנאך איז מען געווען אין א פאזע ווי די רוסן האבן פראבירט צו קאנצעטרירן אומגעהויערע פייער קראפט אויף ליסיטשאנסק און סווערידאנעטסק, זייער מהלך איז געווען צו שיסן אבנארמאלע סכומים פון באמבעס אויף די אוקריינער און זיי איבערגעוועלטיגן מיטן כח פון פייער, זיי האבן ממש אראפגעברענגט דעם גיהנום אויף די אוקריינער, און זיי האבן געהאט סוקסעס, אבער זיי האבן נישט אויסגענוצט דעם מאמענטום נאכן פארכאפן ליסיטשאנסק, מעגליך ווייל זיי זענען שוין געווען אויסגעלאפן פון די גרויסע אמנוציע זאפאסן, און אויך ווייל די אוקריינער האבן דעמאלט'ס אנגעפאנגן ערענסט צו נוצן די היימארס און דערמיט פארניכטעט די רוסישע וואפן סטאריזשעס וואס זענען געווען נאנט צום פראנט, און אויך ווייל די רוסן זענען שוין געווען זייער אפגעמוטשעט און האבן געמוזט האבן א שטיקל וואקאציע, פוטין האט דעמאלט'ס דערקלערט ברבים אז די זעלנער אויפן פראנט זאלן באקומען א שטיק צייט וואקציע, דאס איז פון די גאר געציילטע מיליטערישע באשלוסן וואס פוטין האט פערזענליך געמאכט ברבים.
דערנאך איז מען אריין אין א פאזע פון stalemate, דאס הייסט ביידע זייטן זענען געווען זייער אפגעמוטשעט און קיינער האט נישט געהאט די כוחות צו קעמפן און מאכן פארשריט, מען האט יוצא געווען מיטן ווארפן אביסל שעלס איינער אויפן אנדערן און צומאל שיקן א פאר זעלנער זאלן דירעקט גיין אטאקירן דעם שונא, אבער קיינער האט נישט עכט געפירט קיין קאמפן פאר א שטיק צייט, די ערווארטונג פון א אזא מהלך איז אז ביידע זייטן בלייבן שטיין אויף זייערע ליניעס און מען פראבירט צו האלטן די כבוד און נישט אויפגעבן, אזוי וועט מען שטיין ביז עס וועט זיין א טויש, די טויש קען זיין אז מען וועט בלייבן שטיין אזוי א פאר יאר ביז א אפעציעלע אדער אומאפעציעלע פייער שטילשטאנד און יעדער האלט זיך מיט זיין רויב, אדער וועט זיך עס ענדיגן ווען איין זייט וועט אנזאמלן פרישע כוחות און צוריק אנהייבן מיט א אייפער.
דא איז געווען א פחד אז מען וועט בלייבן שטעקן און צום סוף וועט די מערב וועלט נישט האבן קיין געדולד מער צום קריג און די רוסן וועלן אומאפעציעל ווערן אנערקענט אלץ די בעלים פון כערסאן און ליימאן וכו'
די אוקריינער האבן אבער יא געהאט באקומען שטיצע פון די מערב וועלט, און בשעת די סטאלמעיט ווען קיינער האט נישט פראבירט ארויסצוגיין אויף א אפענסיווע האבן זיי פארגעזעצט צו שיסן און ציהלן מיליטערישע פונקטן אינערהאלב כערסאן, זיי האבן צושטערט די כערסאן בריק, און שפעטער געמאכט שאדן פאר די קריימיע בריק, דערנאך האבן זיי אנגעפאנגן א קאונטער אפענסיווע אויף כערסאן, ווען די רוסן האבן אנגעפאנגן אהינשלעפן אלע זייערע כוחות האבן זיי זיך א לאז געטאן אויף איזיום און פארטריבן די רוסן וועט פון כארקיב, פארכאפט ליימאן, און געגאנגן ביז קאפיאנסק.
די רוסן האבן נישט געהאט די נויטיגע כוחות דארטן, אבער די אוקריינער האבן נישט פארגעסן פון כערסאן און ווייטער פראבירט צו מאכן א קאונטער אפענסיווע, זיי האבן דורעכגעבארכן עטליכע שוץ ליניע'ס און דורעכגעפאלן אין עטליכע ערטער, אבער זיי האבן ווייטער געשטופט די רוסן, ביז די רוסן האבן געמוזט פארלאזן דעם ארט זייענדיג אין א שווערע נויט אן קיין געהעריגע סופליי ליניע פון איין זייט, און אונטער אטאקעס פון די אוקריינער אויף די צווייטע זייט.
זינט דאן האבן די רוסן געטוישט זייער מהלך, זיי האבן אנגעפאנגן איינזען אז זיי קענען נישט בייקומען די אוקריינער ווייל די אוקריינער זענען איינגעגעבן אין טרענטשעס, משא''כ די רוסן פון מזרח האבן נישט געהאט קיין שוץ ווענט און איינמאל זיי האבן אנגעפאנגן צו פאלן האבן זיי נישט געקענט אפשטעלן די אוקריינע פארשריט
גלייך נאכן פאלן פון כערסאן און די מאסיווע פארלוסטן אין מזרח האט וואגנער, ווי אויך די מיליטער אונטער די פירערשאפט פון סוראווקין אנגעפאנגן בויען שוץ ווענט, שוץ ווענט איז שוין אוודאי געווען פריער נאר עס געווען שוואכע מעשיות, אבער נאך די שווערע פארלוסטן האבן זיי עס שוין גענומען זייער ערענסט, פאר עטליכע חדשים האבן זיי געבויט אומאויפהערליך נייע טרענטשעס, צעמענטענע פיראמידן וואס זאלן אפהאלטן טאנקן, זיי האבן צוגעלייגט נאך א ליניע און נאך א ליניע, די גאנצע מיליטערישע כח וואס האט זיך געפינען אין די פארכאפטע שטחים האבן זיך אפגעגעבן מיט א נייע הויפט פריאריטעט! בויען שוץ מיטלן! חוץ מזה האבן די רוסן געהאט א מיליטערישע מאבעליזאציע ווי זיי האבן געצילט צו באקומען 300,000 נייע זעלנער, זיי האבן אוודאי נישט דערגרייכט זייער ציהל אבער זיי האבן פארט היבש פארשטערקערט זייער מיליטער און אנגעפילט א סאך לעכער.
מיט ארום אנדדערהאלבן חודש צוריק האט זיך אומאפעציעל אנגעפאנגן די רוסישע מאסיווע קאוטער אפענסיווע, ווער עס ליינט אייוועלט האט יא באקומען א מעלדונג פון נקדימון אז די לאנג געפלאנטע רוסישע אפענסיווע האט זיך שוין ווארשיינליך אנגעפאנגן, אבער די אוקריינע מיליטער האט נאר גערעדט פון די בעפארשטייענדע אפענסיווע, זיי האבן עס אויפגעבלאזן, עס איז אבער נישט געווען ממש אזוי שטארק ווי זיי האבן געוואלט איינרעדן די מערב וועלט (כדאי צו באקומען מער וואפן).
און דא שטיי מיר איצט, ווי מען זעט איז עס פארוואנדעלט געווארן אין א וואר אוו אטרישען, וואגנער האט געהאט קיין פראבלעם צו שיקן זיינע רעקרוטן אין א טויט זאונע און פראבירט זיך אריינצורוקן אין די טרענטשעס, זיי האבן זיך בכלל בעסער צוגעגרייט פאר טרענטשעס שלאכטן אבער דא איז בעיקר געווען א באשלוס צו גיין אין א וואר אוו אטרישן און אריינשיקן די אייגענע כוחות אין די באשוצטע ערטער ווי דער שונא איז איינגעגעסן, די אוקריינער האבן אריינגעהויבן מאסיווע פארלוסטן אבער זיי זענען פארט געשטאנען אין א בעסערע פאזיציע זינט זיי זענען אויף דיפענס, משא''כ די רוסן וואס זענען געווען אין אפענסיווע.
א סאך אין די מערב וועלט -אריינגערעכנט מיסטער דערבארומדיגער- האבן געהאלטן אז די אוקריינער מאכן א טעות מיטן באקעמפן באקמוט, זיי האבן פארלוירן צופיל כוחות דארטן.
למעשה קוקט אויס ווי עס איז יא געווען א גוטע באשלוס (אויב מען איז על כל פנים גרייט צו פארלירן די לעבנס פון די אייגענע זעלנער כדאי צו געווינען די שלאכט) עס לאזט זיך משער זיין אז אט אט וועט מען זיך ווידער טרעפן אין א שטיקל סטאלמעיט, על כל פנים אז די רוסן וועלן פארלירן זייער מאמענטום און אנפאנגן קעמפן בלויז יוצא צו זיין.
די שאלה ווערט וואס די אוקריינער וועלן קענען באווייזן, מיין השערה איז אז די אוקריינער וועלן נישט מסכים זיין צו גיין אויף זעלבסטמארד מיסיעס ווען זיי גייען אין אפענסיווע, און זיי פלאנען דאך צו גיין אויף א קאונטער אפענסיווע, מען נוצט נאך נישט די ברעדליס מיט די לעמפערט'ס ווייל מען לאזט עס איבער ביז אלעס איז גרייט פאר די גרויסע שלאכטן, איז די שאלה אבער וויאזוי זיי וועלן זיך אן עצה געבן מיט די רוסישע שוץ ווענט, סאטעליט בילדער ווייזן ערענסטע שוץ גרובער אויף די רוסישע זייט, וועלן די אוקריינער מסכים זיין צו פארבלייבן אין א וואר אוו אטרישן? וועלן זיי מסכים זיין צו אריינגיין אין די רוסישע טרענטשעס? אדער האבן זיי א גוטע מהלך איבערצוקומען די טרענטשעס?
אזוי צו אזוי, אויב האבן די אוקריינער געהאט א חשבון אז זיי וועלן נאך האבן גענוג זעלנער פאר א קאונטער אפענסיווע טראץ זייערע פארלוסטן ביי די באקמוט שלאכטן, איז עס זייער אימפרעסיוו, און די רוסן וועלן געוויס זיין אביסל אפגעמוטשעט אין די קומענדיגע שטיק צייט, הגם זיי מוזן נישט זיין געפרליך אפגעמוטשעט, די עיקר פארלוסטן זענען געווען ביי וואגנער רעקרוטן פון טורמע ארויס, אבער די גאנצע מיליטער איז לכאורה אויך אפגעשוואכט און ליידט מעגליך פון א מאנגל אין אמנוציע.
די רוסן וועלכע האבן פראבירט אויסצומוטשענען די אוקריינער האבן אין זייער מהלך פון אטרישען פראבירט צו ארבעטן אויך אויפן ציווילע פראנט מיטן אטאקירן די אוקריינע ענערגיע פלענט'ס, די ציהל איז געווען צו לאזן די אוקריינער ערשעפט פון אלע זייטן, די פרויען אידערהיים און די מענער אויפן פראנט, איצט זאגט די אוקריינע מיליטער אז ווי עס קוקט אויס האבן די רוסן אויפגעגעבן אויף די ענערגיע אינפראסטראקטור אטאקעס, ביי די לעצטע מיסיל און דראון אטאקעס האבן די רוסן בעיקר געצילט מיליטערישע איינריכטונגן, דאס איז א אפנויג פון זייער פריערדיגע מהלך, און עס איז פשוט פארוואס, די רוסישע ציווילע אטאקעס האט זיי נישט געהאלפן קיין כי הוא זה.
עס הייבט אן אויסצוקוקן אז די רוסן וועלן שנעלער מיד ווערן, אבער מען ברויך געדענקן אז די אוקריינער האבן דערווייל קיינמאל נישט געקעמפט קעגן דעם רוס ווען דער רוס איז געווען באשוצט מיט אזא שטארקע שוץ מויער ווי זיי האבן איצט, אלזא מען קען נישט ברענגן קיין ראיות פון די פארגאנגענע אוקריינע סוקסעסן צו די בעפארשטייענדע קאונטער אפענסיווע, מעגליך אז די אוקריינער וועלן אריינפאלן אין א מצב ווי זיי וועלן נישט קענען מאכן קיין מאסיווע פארשריט און וועלן בלייבן אין א וואר אוו אטרישען צושטאנד.
אזויפיל האפענונג איז יא דא, די אוקריינער האבן גאנץ זיכער אויסגעפלאנט א אנדערע מהלך, זייער פלאן איז זיכער נישט צו בלייבן קעמפן מיט א לכתחילה'דיגע סטראטעגיע פון פארלירן שווערע זעלנער, די שאלה איז נאר צו זייער פלאן וועט זיך אויסארבעטן.