From JDM:
בִּקְרֹבַי אֶקָּדֵשׁ: הימל שרייענדע ליסטע פון די 45 "הרוגי מירון" שוידערט אויף יעדע הארץ
1. הרה"ח ר' שרגא געשטעטנער ז"ל פון מאנסי מחשובי חסידי סקווירא. א זון פון ר' חיים הי"ו פון מאנטריאל און איידעם ביי ר' מרדכי דירענפעלד הי"ו מגדולי נגידי בית סקווירא. ר' שרגי ז"ל איז געווען א טייערקייט פון א אינגערמאן במלוא מובן במילה, אין תורה, עבודה און יר"ש. ער האט אויפגעגעבן זיין פאך פון נגינה נאר צו קענען זיך אפגעבן מער מיט די משפחה און מיט עבודת ה'. ער פלעגט לערנען 6 שעה א טאג און איז געווען א מוסטער פאר אלע זיינע באקאנטע. ער איז געפארן קיין מירון צו זיין ביי ר' שמעון און ליידער האט דאס ערגסטע פאסירט. ער איז נטמן געווארן ערב שב"ק אויפן הר המנוחות, 10 שורות פונעם הייליגן בעלזער רב זי"ע.
2. האברך החשוב ר' ישראל אלנקאווא ז"ל פון בית שמש, 24 יאר אלט, טאטע פון צוויי קינדער.
3. האברך החשוב ר' מנחם אשר זעקבאך ז"ל פון בראכפעלד, מודיעין עילית, 24 יאר אלט.
4. הבחור החשוב חיים ראק ז"ל פון בית שמש. ער איז געווען א תלמיד פון ישיבת מיר אין בראכפעלד. זיינע חברים די בני הישיבה רעדן איבער א ספעציעלע חשובע בחור וואס האט זיך איבערגעגעבן פאר תורה בכל לבו ונפשו.
5. הרה"ח ר' דוד קרויס ז"ל פון בית שמש, מחשובי חסידי תולדות אהרן. א איידעלער חסידיש'ער אינגעמאן וואס איז געזעצן על התורה ועבודה. ער האט ליידער איבערגעלאזט 9 יתומים אין שטוב, און א ערשיטערטע אלמנה. די לויה איז ארויס פון שמגר ערב שבת ממש פאר די זמן. חסידים געבן איבער א פלא'דיגע זאך אז דער תולדות אהרן רבי שליט"א האט געהייסן פאר די משפחה אז זיי זאלן פארזיכערן מיט מסירת נפש אז די נפטר קומט לקבורה נאך בעפאר שבת.
6. הבחור החשוב יוסף עמרם טויבער ז"ל פון מאנסי 20 יאר אלט. א זון פון רבי הערשל טויבער שליט"א, איידעם ביי הגה"צ רבי יוסף עמרם וייסמנדל זצ"ל, און א איר אייניקל פון הגה"ק מהרי"ם דושינסקיא זצ"ל. יוסף עמרם ע"ה איז געקומען די דאזיגע זומער זמן צום ערטשן מאל לערנען אין ארה"ק אין ישיבת 'יד הלוי' בריסק, און ליידער האט זיך דאס געענדיגט אזוי טראגיש ל"ע.
7. הבחור החשוב אליהו כהן ז"ל פון ביתר עילית. א 16 יעריגע בחור מחסידי ברסלב. ער איז געווען א תלמיד פון ישיבת היכל אברהם לעלוב. די חברים דערציילן אז ער איז געווען א לעכטיגע בחור, פון די מצטייני הישיבה אין אלע תחומים.
8. דער מחנך הרה"ח ר' שמעון מטלון זצ"ל מחשובי חסידי ברסלב, 37 יאר אלט, א מלמד אין תלמוד תורה 'חניכי הישיבות' נתיבות שלום. מען דערציילט אויף ר' שמעון ז"ל אז ער איז געווען מבני עלייה, א רודף צדקה וחסד און א אמת'ער עובד ה', וואס האט א גאנץ לעבן מיט מסירות נפש געדינט השי"ת מיט קדושה און דבקות, אהבת ישראל, שמחה און אמונה.
9. הרה"ח ר' שמחה בונים דיסקינד ז"ל פון רמה ג' בבית שמש, 23 יאר אלט, פון די חשוב'סטע אינגערלייט ד'חסידי גור אין בית שמש. ער איז געווען א באקאנטער שדכן. ער האט איבערגעלאזט א שטוב פיל מיט יתומים ל"ע.
10. הרה"ח האברך ר' אליעזר צבי יוזשעף ז"ל, 26 יאר אלט, מחשובי אברכי סאטמאר פון קרית יואל. ר' אליזער צבי איז געווען א זון פון ר' יום טוב הלוי יוזשעף. א טייערע אינגעמאן, פון די סלתה ושמנה פון די אינגערלייט אין קרית יואל. ער לאזט איבער 4 יתומים מיט זיין צובראכענע אלמנה. ער איז געקומען לקבורה מוצאי שבת אויף הר מירון, און די צובראכענע משפחה און גוטע פריינט האבן מיטגעהאלטן די לויה פונדערווייטענס אין קרית יואל.
11. הרה"ח ר' חנוך סלוד ז"ל מחשובי חסידי גור אין שטאט אשדוד, 52 יאר אלט. ער איז געווען באוויסט אלס א אינגעמאן א ירא שמים און א באקאנטע שדכן. ער איז געווען א פייערדיגע גורער חסיד, אדור ומקושר צום גורער רבי'ן שליט"א. ער איז געווען א שוואגער מיט ר' ישראל אייכלער נ"י חה"כ מטעם יהדות התורה.
12. הבחור החתן פנחס מנחם קנאבלאוויטש ז"ל פון בארא פארק, 23 יאר אלט. ער איז געווען א תלמיד פון ישיבת מיר אין ירושלים, און ער איז בלויז א חודש צוריק געווארן א חתן. די הימל שרייענדע לויה איז ארויס במעמד א גרויסן עולם פארנט פון בית המדרש הגדול גור אין ירושלים אויפן וועג צו הר המנוחות.
13. הרה"ח ר' אלעזר מרדכי גולדברג ז"ל, 37 יאר, פון ביתר עילית. ער איז געווען פון די חשובע שידלובצא חסידים, א מלמד אין ת"ת 'אדרת אליהו' אין ביתר. ער האט איבערגעלאזט 4 יתומים ל"ע.
14. הבחור החשוב משה בן-שלום ז"ל, 20 יאר, א תלמיד ישיבת פאניוועזש אין בני ברק. א אייניקל פון הגאון רבי ישראל ברוך בן-שלום זצ"ל ראש ישיבת פאניוועזש לצעירים.
15. האברך החשוב ר' יונתן חברוני ז"ל, 27 יאר, א יושב אוהל אין גבעת שמואל, א טאטע פון 3 קינדער. זיינע באקאנטע דערציילן איבער א טייערער אינגערמאן א צדיק מיט אויסערגעווענליכע מדות תרומויות.
16. הבחור החשוב ידידיה אשר פוגל ז"ל, 22 יאר, א תלמיד ישיבה אין רמת גן, און תושב פון קרית משה אין ירושלים.
17. הרה"ח ר' יהודה לייב רובין ז"ל, 27 יאר, פון בית שמש. איידעם ביי הרה"ג רבי יצחק מאיר האגער שליט"א אב"ד חניכי הישיבות רמת בית שמש ב'. ער האט איבערגעלאזט 3 יונגע קינדער, און ער איז באקאנט געווען אלס א תלמיד חכם עצום.
18. האברך החשוב ר' חיים עוזר סאלער ז"ל, 24 יאר, פון שכונת נוה יעקב אין ירושלים. בלויז 2 וואכן צוריק איז אים געבוירן זיין ערשטע - און איינציגסטע - טאכטער.
19. הרה"ג רבי שמואל צבי קלאגסבאלד ז"ל, 43 יאר, פון ביתר. ער איז געווען דער ראש כולל ראחמיסטריווקא און מגיד שיעור אין ישיבת 'מאור עיניים' ראחמסיטריווקא. ער האט איבערגעלאזט נאך זיך 8 קינדער.
20. הבחור החשוב משה נתן נטע אנגלארד ז"ל, 14 יאר אלט, און זיין ברודער - - -
21. הילד הנחמד יהושע'לע אנגלארד ז"ל, 12 יאר אלט.
צוויי הייליגע לעכטיגע נשמה'לעך אומגעקומען אזוי טראגיש רח"ל. הב' משה נתן נטע האט געלערנט אין ישיבת 'מאור עיניים' ראחמיסטריווקא אין ירושלים, און יהושע'לע אין ת"ת באבוב. די טאטע איז הרה"ג רבי יצחק מענדיל אנגלארד שליט"א ראש הכולל באבוב ירושלים, א זון פון דאברא רב הגה"צ רבי חיים מאיר אנגלרד זצ"ל, און איידעם ביי הגאון הגדול רבי נפתלי הירצקא פרענקל זצ"ל חבר ביד"צ עדה החרדית און נו"נ להרה"ק רבי שמואל מדאראג זי"ע. די משפחה האט געדארפט צו וויילן אויף שבת אין צפת, און די טאטע האט געזוכט די קינדער מיט לעכט א גאנצע נאכט, נאר אויסצוגעפינען אז זיי זענען ליידער ארויף לשמי מרום. די הארץ רייסענדע לויה פון ביידע אינאיינעם איז פארגעקומען ערב שבת בהשתתפות א גרויסן ציבור, מיט בכיות נוראות וואס האבן געשפאלטן די הימלען.
22. הבחור החשוב משה לוי ז"ל, 14 יאר אלט, פון בני ברק. א מתמיד עצום וועלכע איז געפארן קיין מירון אלס 'פרס' פאר זיין התמדה אין חדר.
23. הבחור החשוב נחמן קירשבוים ז"ל, 16 יאר אלט, פון בית שמש, מחשובי בחורי ברסלב.
24. הבחור החשוב יוסף דוד אלחדד-שארף ז"ל, 18 יאר, א תלמיד אין ישיבת 'עמלה של תורה' ירושלים, און זיין ברודער - - -
25. הילד הנחמד משה מרדכי אלחדד-שארף ז"ל, 12 יאר, געלערנט אין ת"ת מאחנובקא בעלזא אין ירושלים.
בחייהם ובמותם לא נפרדץ. צוויי נשמות טהורות אינגע צויייגלעך, חסידישע תמימות'דיגע קינדער בני עליה. די טאטע איז הרה"ח ר' מאיר נחמן אלחדד-שארף הי"ו, א באקאנטער איד אין ירושלים. די הארץ רייסענדע לויה פון ביידע ברודער אינאיינעם איז פארגעקומען מוצאי שבת אין מירון, ווי זיי זענען נטמן געווארן איינע נעבן צווייטן סמוך ונראה צום מערת רבי שמעון.
26. הבחור החשוב דובי שטיינמעץ ז"ל, 12 יאר, א תלמיד ישיבת מיר ירושלים, פון מאנטריאל קאנאדא.
27. הבחור החשוב יוסף מאסטאראב ז"ל, א תלמיד פון ישיבת 'רינה של תורה'.
28. הבחור יעקב אלחנן סטרקובסקי ז"ל פון אלעד, 20 יאר, ער האט געלערנט אין ישיבת 'באר ישראל'.
29. הבחור החשוב יוסף יהודה לוי ז"ל, 17 יאר אלט פון רכסים, א בן זקונים צו זיינע עלטערן. א תלמיד פון ישיבת אוהלי שמואל אין רכסים.
30. הבחור ישי מועלם ז"ל, 17 יאר אלט. אויך א תלמיד פון ישיבת אוהלי שמואל אין רכסים. א נאנטע חבר מיט יוסף יהודה לוי ז"ל.
31. הבחור אברהם דניאל אמבון ז"ל פון ארגענטינע, 21 יאר, א תלמיד פון ישיבת 'היכל יצחק' אין קרית יובל אין ירושלים.
32. הילד הנחמד אליעזר יצחק קולטי ז"ל, 13 יאר, פון ירושלים.
33. הרה"ח ר' אריאל צדיק ז"ל, 56 יאר, מחשובי חסידי חב"ד, און תושב אין בית וגן, ירושלים.
34. הרה"ח ר' יוסף גרינבוים ז"ל, א יונגע וויזניצער אינגערמאן פון חיפה, 22 יאר אלט. א זון פון הרה"ג ר' ברוך צבי גרינבוים שליט"א פון אלעד און א איידעם ביי הרה"ג ר' שמואל ווייס שליט"א פון אשדוד, א אייניקל פון הגר"א ווייס רב חסידי וויזניץ אין לאנדאן. ער האט איבערגעלאזט א 1 יעריגע יתומ'ל און א ערשיטעטע יונגע אלמנה.
35. הבחור החשוב אלקנה שילה ז"ל, 28 יאר, פון שכונת נווה יעקב אין ירושלים, א תלמיד פון ישיבת 'תפארת הלוי' און ישיבת 'קיבוץ חנניה'.
36. הרה"ח המחנך ר' אלעזר געפנער ז"ל פון די חשובע דזיקוב וויזניץ'ער חסידים, פון הר נוף געגנט אין ירושלים. ער איז געווען 52 יאר אלט. ר' אלעזר איז געווען א שטיק חסד, ער האט אנגעפירט מיט א קבוצה משמחים וואס פלעגן איבערגיין צו מענטשן אין שפיטעלער זיי משמח צו זיין. ער איז אויך געווען מקורב בלב ונפש צו כ"ק אדמו"ר מסאסוב שליט"א.
37. הבחור ידידיה משה חיות ז"ל, 13 יאר, פון קרית הערצאג אין בני ברק. זיין טאטע הרב אביגדור חיות, א מלמד אין תלמוד תורה 'אמרי דוד' אין קרית הערצאג, איז אויך געשעדיגט געווארן און ערהוילט זיך אין שפיטאל. ער איז געקומען צו די לויה מוצאי שבת מיט א אמבולאנס.
38. הבחור החשוב דניאל מאריס ז"ל, 19 יאר אלט, פון טינעק ניו זשורזי. א תלמיד שיעור א' אין קרית חינוך שעלבים. אין די ישיבה דערציילט מען אז דניאל ז"ל איז געווען א מצויין פון א תלמיד, א שקדן און שטארק באליבט ביי יעדן.
39. הבחור החשוב שלמה זלמן לעבאוויטש ז"ל, 19 יאר, פון צפת, א תלמיד פון ישיבת 'כנסת יחזקאל' אין אלעד.
40. הרב משה צרפתי ז"ל, 65 יאר אלט, א תלמיד מובה פון הגאון רבי שלום ארוש שליט"א ראש מוסדות 'חוט של חסד'. ער האט איבערגעלאזט 4 קינדער און 25 אייניקלעך. ביי די לויה מוצ"ש האט ר' שלום ארוש מספיד געווען מיט אומבאשרייבליכע בכיות נוראות.
41. הבחור החשוב אריאל אחדות ז"ל, 21 יאר, א תלמיד אין ישיבת 'יסודות התורה'.
.
42. הרה"ח האברך ר' מרדכי פעקעטע ז"ל, א 24 יעריגע סאטמארער אינגערמאן פון ירושלים. ער איז געבוירן אין ירושלים, און שפעטער געלערנט אין די סאטמארער ישיבה גדולה אין קווינס. באקאנטע דערציילן אז עס רעדט זיך פון א אויסנאם איידעלר אינגערמאן, פיל מיט תורה און יר"ש. ער לאזט איבער נאך זיך צוויי אומגליקליכע יונגע קינדער און א צובראכענע אלמנה. די הארץ רייסענדע לויה איז ארויס מוצאי שבת ביי ביהמ"ד סאטמאר אויף רחוב יואל אין ירושלים, וואו דער יונגע נפטר ע"ה איז געווען א קביעות'דיגע מתפלל, מיט די באטייליגונג פון הונדערטער סאטמארער חסידים פון ארה"ק.
43. הבחור החשוב חן דורון ז"ל, 41 יאר פון שכונת תל גיבורים אין חולון ווי ער האט זיך געלערנט הוראה.
44. האברך החשוב ר' משה בערגמאן ז"ל, 24 יאר, פון ענגאלנד. א בוגר פון ישיבת מיר אין ירושלים. אין אנהייב האט מען נאר געהערט אז ער פעלט, און ער איז געווען פון די לעצטע צו ווערן קאנפימירט אז ער איז ליידער אוועק ל"ע.
45. הבחור החשוב יוסף קאהן ז''ל, וועלכער איז קוים דאס יאר געקומען לערנען קיין ארץ ישראל פון זיין היימשטאט אין קליוולאנד, אהייא. עטליכע יאר צוריק האט ער ליידער פארלוירן זיין טאטע.
כלל ישראל בכל מקומות מושבותיהם נעמען זיך אונטער אין די טעג צו שטיין צו די האנט פאר די אומגליקליכע משפחות. כלל ישראל וועט טון אלעס נאר מעגליך זיי עטוואס גרינגער מאכן די אומגעהויערע יסורים. כלל ישראל וועט ווייטער אנגיין מיט א שטארקייט אויף די פיסטריט פון די עם הנצח אין אלע שווערע צייטן במשך די לאנגע גלות. כלל ישראל שרייט אויס צו אבינו שבשמים: אָבִינוּ מַלְכֵּנוּ עֲשֵׂה לְמַעַן הֲרוּגִים עַל שֵׁם קָדְשֶׁךָ; אָבִינוּ מַלְכֵּנוּ שְׁלַח רְפוּאָה שְׁלֵמָה לְחוֹלֵי עַמֶּךָ אכיה"ר.