פערד און וועגענער!!
אזויווי איר ליינט!! א פרישע עפאכע באווייזט זיך פאר אונז!!
ערשטהאנטיגע קראנטע רעפארטן קומען אריין איבער א מעגא עסקנים קאנווענשן ווי מען איז געזעצן עקסנים פון אלע שיכטן און קרייזן צוזאמען און דן געווען בכובד ראש וועגן דעם נושא פון די אומדערטרעגליכע ענדלאזע הוצאות און די סטאנדארטן נאך וואס מען דארף היינט נאכקומען צו קענען דרייוון,
ווי מען גיבט איבער האבן די עסקנים כולם פה אחד באשלאסן אז דאס איז עס! דא ליגט דער הונט באגראבן! דער קאר איז איינס פון די גרויסע לעכער וואס פירט טאג טעגליך היימישע אידן צו טאטאלע באנקראט! מען גייט דאס מער נישט לאזן פאסירן! עס קומט א רעוואלוציע!
זעענדיג אז ס'נישט מעגליך איינצוצוימען די ענדלאזע הוצאות פון דרייוון א קאר האבן די עסקנים אונטערגענומען דעם דראסטישן שריט און מען גרייט זיך צו מעלדן איבערן נייעם פלאן, נעמליך מען גייט צוריק אריינברענגען פערד און וועגענער אין באנוץ!
גאר אסאך שטיינער ליגן נאך טאקע אין וועג, מען דארף אויסארבעטן וויאזוי מען גייט זיך ספראווען מיט פארקינג, מאנכע שלאגן פאר מען זאל אויפשטעלן צענטראלע שטאלן מטעם יעדע גרויסע קהלה ווי מעמבערס וועלן קענען איבערלאזן די פערד, אנדערע זאגן אז יעדע קהלה זאל צושטעלן א גרופע פערדן מיט די סימבאל פון זייער קהלה דערויף און יעדער מעמבער זאל האבן א אייגענעם וועגעלע און ווען מען ברויך פארן ערגעץ זאל מען בלויז קומען נעמען א פערדל און איינשפאנען צום וואגן, די מער אגרעסיווע שרייען אז עס זאל זיין עטליכע בעלי עגלות אין יעדע שטאט און נאר זיי זאלן זיין ערלויבט מטעם די הנהלת הקהלה והמוסדות צו האבן א אייגענע פערד, בקיצור עס טוט זיך נאך אויף טישן און אויף בענק,
פארקינג איז אבער נישט דער איינציגער פראבלעם, עס קומט צו גאר אסאך, מען דארף זעהן איינצופירן אז הצלה זאל האבן א ספעציעלע פיאקער וואס זאל קענען דורכשניידן די אנגעזעצטע טראפיק, און די גרויסע ריפלעקטארס וועלן אויך דארפן האבן ווי פלאצירט צו ווערן ארום דעם אמבולאנס וואגן, גלייכצייטיג וועט מען דארפן אינוועסטן אין גאר געשולטע פערדן וואס זאלן קענען דורכפירן די קונצליכע מענאווערעס וואס פעלט זיך אויס פאר די חברה הצלה צו קענען,
די רבישע קארעטעס ווערן אויך אויסגעארבעט לשם ולתפארת, די בליטשקעדיגע רעדלעך און גלאנציגע האר פארן פערדס וויידל ווערן באשטעלט,
פארשטייט זיך אז די קאלירן פון פערדן, דעזיינס אויף די וועגענער, און אלעס ארום ווערט גוט באטראכט עס זאל נישט ווערן קיין פירצה אינעם חומת היהדות, שוין אפגערעדט דאס אז עס וועט שטרענג אינפארסירט ווערן דער תקנה אז מען טאר נישט פארן מיט קיין געצליך אפענע וועגענער און אז פרויען מעגן נאר זיצן אינעם הונטערשטן טייל צוליב עניני צניעות,
די טראנספארטאציע דעפארטמענטס פון אלע מוסדות זיצן אצינד אויף פיבערהאפטיגע מיטינגען ווי מען ארבעט אויס די טעכנישע חלקים אנבאלאנגט די נייע פערד באסעס, עפעס רעדט מען וועגן קויפן מצרישע פערד וואס זענען פון די שטערקערע קוואליטעט אז זיי זאלן שלעפן די ריזיגע חדר וועגענער, אבער זיי שליסן נישט אויס די מעגליכקייט אז מען וועט דארפן העכערן די טראנספארטאציע אפצאל פאר די ערשטע פאר חדשים ווילאנג די נייע פערדן זענען נאכנישט אין קראפט,
איך ווייס נישט אויף וויפיל מען מעג שוין ארויסגעבן, אבער לויט ווי איך פארשטיי האבן די קאר סערוויסעס פארשטענדעניש מיט דעם נייעם תקנה, טראץ וואס זיי זאגן אז עס וועט זיין אין א וועג שווערער ווי נעמען געז דאס אפרוען דעם פערדל און געבן צועסן שטרוי, זעהט אבער אויס ווי זיי פארשטייען יא דעם נחיצות הענין און זיי פארשפרעכן אפילו צו זיין פון די עשרה ראשונים דאס איינצופירן אויף א אפיציעלן פארנעם,
די אראבער ביי די גאז סטאנציעס זאגן אז מיט די צייט וועלן זיי עפענען א קרעטשמע אנשטאט, ווי מען וועט קענען קומען אריינלייגן דעם פערדל אין שטאל מיט אביסל שטרוי זיך צו דערקוויקן, און דערווייל גיין כאפן א שאשקע פונעם באטל ברוינפן וואס דער מאשקע – דער וואס פלעגט אמאל גיסן געז ביים פאמפ – וועט גיסן בשפע,
א נאטורליכע רייץ האט זיך אנגעהויבן דעוועלאפן ביי די וועגענער קאמפעניס, די סטאקס הייבן זיך, זיי זאגן אז מען קען שוין האבן וועגענער מיט גאר פארגעשריטענע סענסארס וואס וועלן נישט לאזן דעם פערד אריינגיין אין א זומפ, און א ווארענונג סיגנאל וועט ארויפשפרינגען אויף די רוקן פונעם פערד ווען איר וועט בטעות אריינטרעטן אין א וואלד רויבער טעריטאריע,
---אייגנטליך, ווער זאגט אז די עסקנים האבן אזוי באשלאסן? קען גאר זיין אז דער נייער מאוומענט קומט פון א 'כח היחיד' קאמפיין, נישט געטראכט אין דעם דירעקציע,
ווייסט וואס? יעצט אז איך טראכט אריין זעה איך אז עס מאכט אפילו מער סענס עס זאל זיין געפירט מיט א כח היחיד, נעמליך דער נייער תקנה איז שוין אין גאנג און מען זעהט נישט אז די אלע אויבנדערמאנטע פראבלעמען זאלן זיין קעיר גענומען, זעהט זיך אויס אז עס איז נישט פארבינדן מיט קיין אפיציעלע עסקנים,
ווייס איך שוין נישט.
איין זאך ווייס איך, איך זעה אז דער רעוואלוציע איז אין קראפט, מענטשן גייען צוריק צו פערד און וועגענער, דעריבער האט זיך אויפגעבויט אין מיין קאפ אזא שטיקל שפעקולאציע אז די גרויסע עסקנים שטייען דערינטער, און אז מען ארבעט אויס די אלע טעכנישע פראבלעמען ווי פריער דערמאנט – פשוט ווייל אנדערש קען דאך נישט זיין, האלטסט איין מינוט מען גייט איינפירן פערד און וועגענער אן אויסארבעטן די אלע זאכן?
וואס הייסט? איר האט נישט באמערקט לעצטנס דעם אויפשטייג?
לאמיר צונעמען די זאך צושטייט,
אין די לעצטערע תקופה זינט איך ארבעט היבש אוועק פון מיין שטוב, האב איך זיך אנגעטון א קארעלע און זיך א לאז געטאן אויף די גאסן ביינונז אין שטעטל,
פאר וואס וואו ווען, האבן אנגעהויבן זיך שטעלן פראגעס אין קאפ;
- -וואס טראכט דער נערוועזער וואס פייפט אינטער מיר ווען איך שטיי אין די ליין ביי א סטאפ סיין?? וואס מיינט ער, איך האב זיך אראפגעשטעלט דא עסן מיין טונא סענדוויטש? כאפן א ציגארעטל? משוגענער איינער, זעהסט נישט דא איז דא א ליין פון קארס וואס שטייען ביי די סטאפ סיין און ווארטן אויף זייער שאנס צו פארן??? וואס פייפסטו??!!
-פארוואס האט דער טעקסי דרייווער באשלאסן אז ווען ער גייט ארויסבעקן ווילדערהייט פונעם דרייוו-וועי אן קוקן, זיך יאגענדיג צום נעקסטן טריפ צו קענען דערנאך כאפן נאך א טריפ, גיי איך נאך האבן א געלעגנהייט צו מאכן דעם גורלדיגן שארט סטאפ??? זאג נאר, דו ביסט אויסשליסליכער בעה"ב אויף דער ראוד?? איז דיר בייגעפאלן אז ווען דו שפארסטיך די צענטל סעקונדע פון געבן א קוק אין שפיגל האסטו געלייגט אין א סכנה מיין לעבן און די לעבן פון אלע רייזנדע אין מיין קאר???
-וואס טראכט דער קאר אין פראנט פון מיר ווען ער באשלוסט זיך אויסצודרייען אינמיטן די גאס, אן צייגן סיי וועלכע סיגנאלן בעפאר, ווען איך קום צופליען אויף פערציג מייל פער שטונדע??? העלאאאאו?? וואס טראכסטע??? אה, אין ערגסטן פאל וועט אינשורענס באצאלן... ער האפט אז איך האב לייף אינשורענס אויך...
-וואס טראכט דער גרויסער יוקאן דרייווער וואס שמייסט דורך דעם סטאפ סיין אן קיין בלינק מיט די אויגן זייענדיג זיכער אז איך מיט מיין נעבעכדיגן מיני ווען וועל מוזן אפטרעטן פאר אים??? מיינט ער טאקע אז די אינסטאנצן האבן געשטעלט דא א סטאפ סיין בלויז מיטן ציהל אים שווער צו מאכן ס'לעבן?? וועמען שפילסטו אויס???
-וואס טראכט ער דער בלויע קארעלע מיטן פרישן דרייווער אינעווייניג? קענסט מיר זאגן פארוואס ער איז יעצט דורכגעפארן דעם רויט לייט ווען ביי מיר איז שוין געווען פעסט גרין??? אהה, ווייל ווען ער איז געווען די אנדערע זייט גאס האט ער געזען אז די לייט איז געל, האט ער געגעב א סטעיפל אראפ דעם געז פעדל צו דער ערד, און... ער פליט!!! ער האט אין זיין מיינד געסעיווט די געלע לייט אזויווי די כעלעמע האבן געסעיווט די לבנה אין די פאס! ער איז זיך ווייטער מצייר דעם לעכטיגן צורה פונעם געלן לייט און אזוי מיט די הוט אראפגערוקט ביז די אויגן ברעמען שמייסט ער אדורך אויסמיידנדיג מיין באמפער מיט א אינטש!!
-וואס טראכט דער דרייווער פון דעם גרויסן פארד טרענזיט וואס זיצט געפארקט אינמיטן א שמאלע געדרייטע גאס, און טאקע ביים געדרייטסטן פונקט??? אזויפיל שכל האט ער נישט אז די דרייווערס פון ביידע ריכטונגען פארן יעצט אין די בלינדעניש אדאנק זיין גרויסע ווייסע ווען מיט די לייטער קאלעקציע אויפן דאך???
-וואס טראכט דער אינגערמאן וואס פארקט נאר פאר 'איין מינוט' פארנט פון מיין דרייוו-וועי ווייל ער גייט כאפן א מעריב'ל ביי מיין שכן - זיין ברודער וואס האט אים גערופן פאר א ברכו לרגל הולדות בנו למז"ט??? האלאו, דו ווייסט אז מיין קאר איז יעצט איינגעשפארט פאר א דרייפערטל שעה ביז דיין 'איין מינוט' גייט זיך ענדיגן?? דו ווייסט איך דארף גיין כאפן מנחה??
כהנה וכהנה פלעגן מיר אויפקומען אזעלכע שאלות אויף דרייווערס וואס פירן זיך אויף ווי פערדן אויף די ראוד, און עס פלעגט מיר אויפרעגן יעדעס מאל עקסטער,
ביז מהאמיר זיך שטערקער אריינגעלייגט אין די זאך, און נאכן זיך איבערצייגן אז עס קען פשוט נישט זיין אז פון א ילוד אשה זאל אויסוואקסן אזאנע אוממענטשן, זעמיר געבליבן ביים לעצטן אויסוואל אז ווארשיינליך זיצט ביים רעדל א פערד!!! נו שוין, אויף א פערד האסטו טענות??
אלזא, דא איז מיין מקור וואס אויף דעם האב איך געבויט מיינע אפשאצונגען איבער די נייע פערד און וואגן תקנה,
מעגליך אז איך בין נישט גערעכט, אדרבה אויב איינער ווייסט א צווייטע סיבה פארוואס פערדן דרייוון קארס, אדער אויב איינער ווייסט מער אינפא בעהיינד די סינס איבער דעם נייעם תקנה זאל מען ביטע מיטטיילן מיט די חברים דא אויפן וועלטל,
זייטס געזונט, און דרייווטס קעירפול!!