למעשה, ווער איז שולדיג??

אבינו מלכנו מנע מגיפה מנחלתך - אלעס ארום די קאראנא וויירוס

די אחראים: יאנאש,אחראי,געלעגער

אוועטאר
לכתחילה אריבער
שר עשרים אלף
תגובות: 20191
זיך איינגעשריבן אום: זונטאג מאי 09, 2010 7:20 pm
לאקאציע: למטה מעשרה

למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך לכתחילה אריבער »

כ'געדענק נישט אין די אלע יארן אז עס זאל זיין א מער היציגער דעבאטע איבער א נושא וואס איז נישט "פאליטיק" – אידישע אדער גוי'שע (כ'שרייב נישט להבדיל...) – ווי די דעבאטע ארום די "מנינים" און "בתי מדרשים" אין ליכט פון די שרעקליכע וויירוס אויסברוך. זאל דער אויבערשטער העלפן אז די אויסברוך זאל שוין האבן געקומען צו א ענדע, און אלע אידן זאלן זיין, בלייבן אדער ווערן געזונט שנעל און גיך, און זאל שוין משיח קומען אונז אלע אויסלייזן בקרוב ממש בימינו.

און די אמת איז אז עס איז דא גוטע און וואלידע טענות אויף ביידע זייטן, און כאטש איך אליינס האב מיין מיינונג, מיין דעת תורה און וואס איך האב געטאן למעשה, זעה איך און איך הער און פארשטיי זייער גוט פארוואס איינער זאל האבן א פארקערטע מיינונג, כאטש ווי פארשטענדליך האלט איך אז יענע זענען אומגערעכט און אפילו שטארק אומגערעכט, אבער מען קען נישט זאגן אז די אנדערע "גייען מיט'ן קאפ אין וואנט אריין", עס זענען דא גוטע און שטארקע טענות אויף ביידע זייטן, נאר למעשה האלט איך אז איין צד איז גערעכט אין די ענדע, וועלכע צד דאס איז, איז באמת נישט נוגע אינדרויסן פון מיר אליינס, מיין פאמיליע זז"ג. אלע אנדערע זאלן מיר מוחל זיין, און זיי וועלן מוזן ארבעטן אויף זייער נייגעריגקייט און זיך באגענוגן מיט'ן נישט וויסן וואס איך האלט....

איך וויל אבער יא אדרעסירן איין פונקט, און דאס איז נישט "ווער איז גערעכט" נאר "וואס האט געברענגט אז די דעבאטע זאל ווערן אזוי היציג". און דאס אז עס איז געווארן אזוי היציג, איז נישט נאר א פראבלעם אין "סעמענטיקס" – ווי מען זאגט – עס איז נישט נאר "נישט באקוועם" און "א שאד" וכו', נאר עס איז די פונקט וואס האט געמאכט די פראבלעם גרעסער, און האט – ווי מען זאגט "דיפיטעט די פערפעס". אין אנדערע ווערטער, דאס אז די דעבאטע איז געווארן אזוי היציג, האט געמאכט די פראבלעם ערגער – אדער אפשר גאר אינגאנצן גורם געווען די פראבלעם – וואס האט געפירט עס זאל ווערן מער היציג, וואס האט געפירט צו די פראבלעם זאל גרעסער ווערן, ווערן מער היציג אא"וו און ווייטער גרעסער אין גרעסער ווי די "שניי באל" אפעקט.

און דא וועל איך ווייטער שרייבן מיין מיינונג, וואס מיינט נישט אז יעדער מוז אזוי האלטן, נאר וואס איך האלט, און דא ווייטער איז עס יא נוגע פאר אנדערע, ווייל אויב בין איך גערעכט, איז עס עפעס וואס איז נוגע אויך אינדרויסן פון מיין נאענטע צירקול, נאר אסאך מענטשן, טא דארף עס געזאגט ווערן ברבים.

אין מיין ארימע מיינונג, איז די הויפט פראבלעם און גורם פאר די היציגקייט פון די דעבאטע, אז געוויסע מענטשן האבן באשלאסן אויסצונוצן די סיטואציע אויף "סקארן פוינטס" ר"ל.

אז מענטשן האבן רח"ל פארלוירן די גאנצע קאנטראל אויף "זיין א מענטש" "זיין א איד"! באשלאסן אז די יעצטיגע סיטואציע איז פערפעקט אויף "זיך אפצורעכענען" און "ווייזן".

איך רעד דא פון די פונקט פון מנינים, מקוואות, בתי מדרשים וכדו', אבער די אמת איז אז גענוי די זעלבע איז געווען אין – להבדיל – די גוי'שע פאליטיק, און לאמיר דאס אדרעסירן די ערשטע, און צוריק קומען צו אונז.

אפגעזען צו מען האלט אז דער פרעזידענט האט גוט געהאנדלט, האט פערפעקט געהאנדלט ,אדער ביזן אנדערן עקסטרעם אז "דער פרעזידענט האט פלוט אויף די האנט" איז איין זאך זייער פשוט אין מיין מיינונג.

די פאקט אז די פרעזידענטס שונאים האבן באשלאסן "אויסצונוצן" די סיטואציע פון די ערשטע רגע אויף "אפשר יעצט וועט זיין די ענדע פון טראמפ" האט זיכער ערגער געמאכט די סיטואציע.

אויב האבן די פרעזידענטס שונאים טענות אויף וויאזוי די פרעזידענט איז זיך באגאנגען אין די סיטואציע, זאלן זיין צום אלעם ערשטן באדאנקען זיך אליינס פארן שפילן א הויפט ראלע אין דעם!!

איך זאג דאס נישט נאר פאר יענעם, נאר פאר מיר אליינס אויך.... איך וועל נישט לייקענען אז אין די ערשטע רגע פון די אויסברוך, ווען כינע האט אזוי ביטער געליטן, איז עס ביי מיר אין מח געווען ... בדיעבד.... זאל כינע כאפן א פליק... עס איז נישט נוגע מיר... נישט נוגע אידן... – מען האט נאכנישט געכאפט יענע צייט פון וואס מען רעדט דא – און אפילו אין כינע אליינס רעדט מען בעיקר פון עקאנאמישע צרות – אזוי האט מען דעמאלס געמיינט... נא.. זאל כינע כאפן א פליק....

טא, עס איז ביי מיר פשוט אין מיינונג, אז דעם פרעזידענטס שונאים, איידערן כאפן פון וואספארא ביטערע זאך מען רעדט דא – עכ"פ איך האף אז נאר איידערן כאפן... – האבן זיי געהאפט אז "דער פרעזידענט זאל כאפן א פליק".... און דעריבער, האט מען זייער שטארק געהערט פון די קעגנער פון פרעזידענט אויפשפילן די זאך ווי מער.

די אמת איז אז ווען מען האט גערעדט פון די זאך אינדרויסן פון די קאנצעפט פאר פאליטיק, האבן עס זייער אסאך אוועקגעמאכט אנהייב אפילו די קעגנער פון פרעזידענט, און עס זענען געווען פון דעם פרעזידענטס שטיצער וואס האבן יא געשריגן, אבער ווען עס איז אריינגעקומען פאליטיק, האט מען פון די לינקע געהערט ביטערע געשרייען..... און אראפגעלייגט די סיטואציע ביטער.

פארשטייצעך אז די פרעזידענטס שטיצער האבן געטאן דאס פארקערטע... צו אלס א רעאקציע צו די "האפענונג" פון די לינקע... אדער אליינס צוליב די זארג אז עס קען שאדן מאכן דעם פרעזידענט, האבן זיי פרובירט אראפצושפילן די סכנה....

עכ"פ דאס האט פארשטערקערט די מיינונג און געשרייען אויף ביידע זייטן. ביז די רעאליטעט האט געשלאגן אין פנים. און דאן האבן די שטיצער פון פרעזידענט "געהויבן הענט" – און אנגעהויבן זוכן א שעיר לעזאזל.. – און אסאך פון דעם פרעזידענטס קעגנער – צו זייער קרעדיט – האבן אוועקגעלייגט פאליטיק.

כאטש עס זענען דא אסאך – אויך ליידער אידן – וואס זענען נאך פארנומען מיט די "פאליטיק" פון די אויסברוך, און פרובירן אין די יעצטיגע צייט ווען בלוט גיסט זיך צו "סקארן פוינטס" און "ווייזן" אז זיי זענען "גערעכט" איבער טראמפ....

עכ"פ, איך בין זייער שטארק ביי די מיינונג אז דאס אז מענטשן האבן "פארכאפט" די קאטאסטראפע אויף צו "ווייזן" איז די עיקר – אויב נישט די עקסקלוסיוו – גורם פאר זייער א גרויסע טייל פון די פראבלעם און די נאכפאלגן פון די אויסברוך. עס איז זייער מעגליך אז ווען יעדער איז שטיל, און מען קען אנקוקן די זאך מיט גלייכע אויגן, וואלטן געוויסע שריט געטאן געווארן פריער, וואס וואלט מעגליך געברענגט אז די מצב זאל זיין אנדערש.

יעצט, איך האב א מיינונג אין וועלכע צד איז געווען דער גורם און ווער איז געווען דער "אויב אזוי"... אבער עס איז נישט נוגע פאר יעצט, פאר יעצט איז די עיקר צו כאפן די נקודה, אפגעזען וועלכע צד מען האלט "האט אנגעהויבן" צו פארשטיין אז "דאס" איז טייל אדער די עיקר פון די פראבלעם, צו גאר כמעט די גאנצער פראבלעם.

אצינד צוריק צו אונזער שמועס, און דא וועל איך יא זאגן מין מיינונג און וועלכע צד איז שולדיג. קיינער מוז עס נישט אננעמען, איך זאג וואס איך טראכט, וויאזוי איך קוק עס אן.

אנשטאט קוקן אויף די פראבלעם אביעקטיוו, קוקן "וואס דארף מען טאן למעשה" זענען געגאנגען די וואס האבן "אן אלטן חשבון" מיט די "פרומע" און באשלאסן צו "שפילן קאפיטאל".

עס איז פארשטענדליך – אייגנטליך זייער פארשטענדליך – פארוואס און ווי שווער עס איז פאר ערליכע אידן אויפצוגעבן זאכן אין אידישקייט וואס איז ממש טבע שני. פאר א ערליכע אידן וואס "האט נישט פארפאסט קיין מקוה אין 30 יאר" פאר א ערליכע אידן וואס "האט נישט פארפאסט קיין מנין פאר 40 יאר" פאר א ערליכע איד וואס האט שוין אין זיין לעבן שאדן געהאט אסאך געלט, און זיך זייער אסאך אנגעשטרענגט פאר זאכן ווי מנין, מקוה וכדו', איז זייער זייער שווער דאס אויפצוגעבן.

איך האף אז קודם די פונקט איז פארשטענדליך פאר אלעמען. אפילו פאר אייך איז עס – ליידער – נישט אזוי ביטער שווער אויפצוגעבן, אבער פארשטייט אז פאר אנדערע איז עס יא. ביטער שווער, ממש אויס מענטש שווער.

פארשטייט, אז פונקט ווי פאר אייך זענען דא זאכן וואס אויב נעמט מען עס אוועק פון אייך ברענגט עס צובראכנקייט, איז זייער שווער און קען אפילו ברענגען צו צובראכנקייט און דעפרעסיע ח"ו, פארשטייט – און ווי געזאגט איך האף דאס איז פשוט – אז פאר געוויסע אידן תמימים איז אויפגעבן אויף אזעלכע זאכן ווי מקוה וכ"ש מנין עפעס וואס מאכט זיי שרעקליך "אויס מענטש" און זיי קענען איינפאך נישט פונקציאנירן ח"ו.

איך רעדט נישט צו "עס קומט אזוי", עס קומט נישט אזוי. א מענטש דארף וויסן אז "מען דארף טאן וואס איז ריכטיג" און כשם שמקבל שכר אויף דעם, איז אמאל די רצון פון דעם אויבערשטן פארקערט. און צו די יעצטיגע פאל איז דער רצון השם "יא מנין" אדער "נישט מנין" וועל איך דא אצינד נישט נעמען קיין מיינונג ווי געזאגט, אבער מען דארף וויסן אז "עס איז דא אזא זאך" ווי "דער אויבערשטער וויל אצינד נישט די מצוה" און אויב האלט מען אז אזוי דארף מען טאן, חלילה נישט ווערן "אויס מענטש" אדער ח"ו בעצבות פון דעם.

אבער, טאקע ווייל עס איז אזוי שווער פאר געוויסע מענטשן – צו זיי האלטן אז די ריכטיגע זאך צו טאן איז יא אנהאלטן די זאכן – האט זיך געמאכט אז נישט יעדער האט געפאלגט. מענטשן האבן יא געמאכט ווייטער מנינים און יא ווייטער געגאנגען זייער וועג כאילו גארנישט האט פאסירט.

איז ווען וועלט איז וועלט, וואלטן ערליכע אידן וואס האלטן אז דאס טויג נישט, געדארפט אריבערגיין און רעדן צו די מענטשן, זיי פארשטיין געבן. רעדן צו די רבנים, מעורר זיין, איינרייסן און נישט רוען ביז די ריכטיגע זאך ווערט געטאן.

אבער אנשטאט דאס זאל פאסירן, זענען ארויסגעקראכן פון אלע לעכער די מויז און לויז..... אלע מענטשן וואס האבן א חשבון מיט "די סיסטעם" מיט "די פרומע" פאר סיי וועלכע סיבה, און באשלאסן "כן מצא בעל חוב"!! דא איז א גוטע טאפיק... אצינד וועלן מיר זיך "אפרעכענען" מיט די פרומע... "ווייזן" ווי "פארדרייט זיי זענען"... ווי "פאריקט זייער מיינונג איז" איינמאל פאר אלעמאל!!

און מען האט דאך געהאט א גאר "געשמאקע" ארסענאל מיט וואפן... "גוטע" ווערטער... "רוצח".... "רשעים"..... "שפיכת דמים"... א מחי'...

עס האבן זיך אנגעהויבן גיסן מעסעדזשעס אויף אלע גרופעס... געפארן וואטסעפפ מעסעדזשעס פון אלע זייטן. מענטשן וואס אין פרידנס צייטן זענען זיי פארן געזעלשאפט נישט ווערט אפילו צו פרעגן "וואס איז די וועטער"... מענטשן מיט גאנץ קנאפע השגות איז סיי וואס.. אלע האבן געהאט א מיינונג...

אראפגעקוועטשט די קנעפל.... און אריינגעלאזט א מעסעדזש..... אנדערע האבן – כאילו – געשריגן.... אנדערע האבן געשניטן.. אנדערע האבן "מעורר געווען"... די עיקר איז... "אריינשניידן די חברה".....

"יא יא.... נאכדעם וועלן זיי מיר זאגן אז מיין סמארטפאון איז די פראבלעם"... אז מיין פוצן די בארד איז די פראבלעם".... "דאס איז די זעלבע חברה.... פינסטערע משוגעים..... עקסטרעמיסטן".... "דא ווארפן זיי ארויס קינדער פון חדר... און דא פלוצלינג וויילן זיי נישט פארמאכן די חדר"....

די געוואלדיגע חכמה האט זיך געגאסן... "וואס מיינסטו האט דער אויבערשטער געברענגט אז מען זאל דארפן צומאכן די חדר"?? הא?? ווייל זיי ווארפן זיך מיט בחורים!!

פלוצלינג זענען זיי אלע געווען אין הימל... געצויגן פאראלעלן.... די זעלבע חברה וואס ווען רבנים זענען מעורר איבער א ענין, און זאגן איבער פון חז"ל אדער די ספרים הקדושים וואס זיי זאגן "דאס ברענגט דאס" זענען די מענטשן פארנומען... "אההה... הייסטעס דו ווייסט וואס טיצעך אין הימל.... איז וואס איז די לאטערי נומער"?... כככייכיכיכי.... די זעלבע מענטשן ווייסן פלוצלינג זעלבסט וואס איז געקומען פארוואס.

עכ"פ, עס איז געווארן א "ספארט" פון אויסנוצן די שרעקליכע טראגעדיע פון די וויירוס צו "זיך אפרעכענען" איינמאל פאר אלעמאל מיט די אלע וואס "שטייען אונז אין וועג", פאר די וואס "שטערן אונז" צו אנגיין מיט אונזער שוואוילטאג און טאן וואס מען וויל.

און עס האט זיך נישט אפגעשטעלט דא. אפגעזען צו גערעכט צו נישט, האט זיך אנגעהויבן א סיסטעמאטישע "פאר'מסר'ן" פון די וואס "פאלגן נישט".

ווייטער, איך זאג נישט אז מען טאר נישט מסר'ן, קען זיין מען מעג, קען זיין מען מוז, קען זיין עס איז גאר הצלת נפשות. אבער די פאקט איז געווען אז זייער אסאך פון די מסירות איז געקומען פון אזעלכע מענטשן וואס אין געווענליכע אומשטענדן זענען זיי נישט די וואס זענען פון די עשרה ראשונים, פון די נחשון בן עמינדב'ס פון דור ווען עס קומט צו רוחניות....

קען זיין עס זענען געווען אזעלכע אויך, אבער אסאך פון זיי זענען נישט געווען די "יוזשועל סוספעקטס" פון די עסקנים למען התורה.. און דא זענען זיי שטארק פארפלייסיגט געווארן... ווער ווייסט.... אפשר פון דעם וועט ארויסקומען א גררת מצוה, און די אלע וועלן פון היינט ווערן בעסער.

אצינד, אויב איז נישט געווען גענוג שווער פאר ערליכע אידן "אראפצושלינגען" די ביטערער פיל פון פארמאכן א בית המדרש, פון אויפגעבן א מקוה אא"וו פשוט פאר זיך אליינס, איז עס אצינד געווען טויזענט מאל שווערער.

עס איז געווען א "פארמעסט" צווישן די "פרומע" און די "נארמאלע".....

דער גרויסער חכם נוטן האט אראפגעלייגט אז "יעדע אקציע האט א אייניגע קאנטער רעאקציע" ווי שטארק די געשריי פון די – אזוי גערופענע – קלוגע איז געווען קעגן די "פאנאטישע" אייניג איז געווען די קאנטער רעאקציע.

"אויב ווילן "זיי" אז מען זאל פארשפארן, דאס אליינס דארף אפהאלטן אז מען זאל יא עפענען. אנדערע האבן אפילו עס גענומען צום עקסטרעם און עס אפגעסטעמפלט אלס "שעת השמד" ווייל "די עוכרי ישראל מיינען אידישקייט זעלבסט" און מען דארף אצינד מסירת נפש.

דאס האט געברענגט צוויי זאכן.

ערשטנס די סתם המון עם איז געווען פארכאפט בין פטיש לסדין. פון איין זייט האבן אסאך געהאלטן אז מען מוז פארשפארן זאפארט, און פון די צווייטע זייט, האבן זיי נישט געוואלט ווערן אפגעסטעמפלט אלס "משמודים".... און אסאך האבן טאקע געהאט א פראבלעם אז די אלטגעזעצענע אנטי-סיסטעם לויטע זאלן ארויסקומען די געווינער.

און עס איז ליידער געגאנגען ווייטער.

די רבנים האבן געהאט א פראבלעם. אפגעזען וואס זיי האבן געהאלטן, אויב קומען זיי ארויס מיט א קלארע מיינונג אויף איין זייט, וואלטן זיי פארשריגן געווארן. אז זיי האלטן מען דארף יא עפענען, וואלטן זיי אויטאמאטיש פארזיגלט געווארן אלס "רוצחים" רח"ל. אויב האבן זיי געהאלטן אז מען דארף פארמאכן "לינקע".... "אפגעפארן" וכדו'.

דאס האט געברענגט – אין מיין מיינונג – אז די רבנים זאלן באשליסן אז עת לעשות, און באשלאסן אז אצינד דארף מען לאזן די זאך "אומקלאר" כדאי נישט צו מאכן קיין לאנג טערמין שאדן. אנדערע האבן זיך יא ארויסגעשטעלט, טייל שארף אהער, און טייל שארף אהין. (ביטע נישט מאכן די נקודה די דעבאטע... דאס איז מיין מיינונג "פשט" פארוואס געוויסע רבנים האבן געהאלטן אז "לכל זמן" און אצינד איז "עת לשתוק" אבער עס קען זיין איך בין אינגאנצן אומגערעכט, און דאס איז נאר א זייטיגע נקודה.)

עכ"פ די צדדים זענען געווארן שארפער און שארפער. און ווי מער עס איז געגאנגען שארף איין זייט, האט זיך די צווייטע צד געשטארקט, אזוי מער און מער.

דאס איז מיין מיינונג וואס האט געברענגט די עיקר – אדער ווי געזאגט מעגליך כמעט די גאנצע – חורבן!!

אלזא, דו וואס דו שרייסט אזוי "ביטערליך", וויסן זאלסטו, אז זייער מעגליך, אז ווען דו באשליסט נישט צו "כאפן די געלעגנהייט" און "זיך אצינד גוט אפרעכענען" וואלט עס קיינמאל נישט צוגעקומען צו די מצב.

און אויב אזוי, טו איך באשולדיגן נישט דעם המון עם, זיכער נישט די רבנים, נאר טאקע די שרייער!! עטס זאגסט עטס שרייטס ווייל עטס מיינטס "הצלת נפשות"?? וויסן זאלט עטץ, אז עס איז זייער מעגליך, אז עס איז אינגאנצן אייער שולד די מצב!! און אויב האלטסט עטס אז "די מצב האט געברענגט" אז אידן זענען רח"ל אומגעקומען... טראכטסט גוט אריין צו עטס ווילסט ווייטער גיין מיט'ן חשבון ביזן ענדע....

זייער מעגליך, אז איר וועט טרעפן די "בלוט אויף די הענט" אויף גאר א צווייטע אדרעס ווי עטס מיינטס.... רח"ל.

אצינד נאר צו ענדיגן מיט צוויי נקודות.

די ערשטע, חס ושלום צו זאגן אז מיינע ווערטער מיינען אז "קיינער" האט עס נישט געמיינט ערנסט. זיכער זענען דא ערליכע אידן וואס האבן געשריבן – און שרייען ווייטער – ווייל זיי מיינען ערנסט די זאך, און האבן חלילה נישט קיין נגיעות. דאס רעכנט אריין צווישן אנדערע די מסירת נפש יונגעלייט פון הצלה, די ערליכע עסקנים, אנדערע ארגאניזאציעס אא"וו. מיין נקודה איז אז די אלע זענען ליידער "דעטראנקען געווארן" און זייער קול האט נישט געקענט דערהערט ווערן, ווייל עס איז געווען מיט א מעסעדזש וואס שלעכטע מענטשן האבן "גענוצט" צו "פאטשן" און "טאטאלן".

נאך א פונקט וואס מען מוז זאגן. כאטש ווי געזאגט איך האלט אז די שולד ליגט ביי די פארפירער וואס האבן געוואלט "אויסנוצן די געלעגנהייט" אבער איך האלט אז די אנדערע צד האט עס אויך גענומען צו אן עקסטרעם.

אפגערעדט צו זיי זענען שולדיג אדער נישט, ווי געזאגט איך האלט אז עס איז געווען א נאטירליכע "קאנטער רעאקציע" אבער דאס "צוריק שרייען" מיט אזא וועג העלפט נישט. עס העלפט נישט אויף יעצט, און עס העלפט נישט אויף די צוקונפט.

אויב האלט עטס אז די שרייער און פארפירער זענען א סכנה פאר כלל ישראל – און זיי זענען לע"ד – אויב שרייט מען צוריק "ווילד" מען נוצט שפראך אזוי ווי זיי נאר פארקערט, אפגערעדט פון פראטעסטירן אין די גאסן, אדער שרייען אויף האטליינס קעגן רבנים און עסקנים, נאר אפילו סתם דאס אראפ זיגלען אלע מענטשן וואס האלטן אצינד אז מען דארף יא פארשפארן די בתי מדרש און תלמוד תורות אלס "פושעים" "אפגעפארן" "רשעים" וכדו'.. איז נישט נאר טוט איר גארנישט אויף, עטס גיטס כח, עטס שטארקטס די פארפירער!!

די יעצטיגע פאל איז זייער א שווערער. און עס זענען דא זייער אסאך מענטשן וואס זענען פון די – אזויגערופענע – "פרומע זייט" און האלטן אז מען דארף אצינד יא פארשפארן, און מיט ענקער שרייען ווילד און שארף, טוט עטס גאנץ מעגליך "שטופן" די מענטשן צו "איבערטראכטן"....

אפגערעדט פון די טיפשות און שלעכטיגקייט פון "פארבינדן"..... און פונקט ווי די שוואכע וואס "נוצן אויס" די יעצטיגע געלעגנהייט צו שמייסן באשמיצן די "פרומע", גייען געוויסע און "נוצן אויס" די געלעגנהייט זיך אצינד אפצורעכענען מיט אנדערע וואס זיי האבן חשבונות פון פריער, אנדערע זאכן וואס זיי האלטן געוויסע האבן געטאן "אומריכטיג" אדער "אומאויסגעהאלטן" און אצינד נוצט מען די געלעגנהייט צו שרייען און "נוצן" די יעצטיגע צייט אויף יענע צו ארונטעררייסן, נאר אפילו סתם שרייען אזוי ווילד איז אזא פאל איז קאנטער פראדוקטיוו.

אלזא, ביידע עקסטרעמען זענען נישט גוט און קאנטער פראדוקטיוו. שולדיג – ווייטער אין מיין מיינונג – זענען די וואס האבן אנגעהויבן פארפירן קעגן די פרומע וואס זענען אפילו מעגליך געווען אומגערעכט, און דורך דעם עס געמאכט א "פארמעסט צווישן ערליכע און פרייע" און הארטער געמאכט די זייטן.

מאכטס א שטארקן חשבון הנפש. צו די אומגעקומענע רח"ל, די חילול השם, די שנאת ישראל, די אלע שווערע נאכפאלגן ליידער, מאכטס א גוטן חשבון, א אמת'ע חשבון, צו עס איז נישט געווען אייער נארישע, ביליגע און נידריגע "כאפן די געלעגנהייט" וואס האט דאס אלס געברענגט.

איך מיין אז יא... עס איז אומבאקוועם... אבער איך באשולדיג אייך.
"די וועלט זאגט אז מען קען ניט ארונטער דארף מען אריבער, און איך האלט אז מ'דארף לכתחילה אריבער" - אדמו"ר מהר"ש
אוועטאר
חושב מחשבות...
שר האלפיים
תגובות: 2814
זיך איינגעשריבן אום: מיטוואך מארטש 16, 2016 9:25 pm
לאקאציע: בין שמים לארץ

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך חושב מחשבות... »

זייער גוטע פוינט, פיין ארויסגעברענגט.

און שכח פארן נישט זאגן דיין פערזענליכע מיינונג, א קלוגע שריט, אז ס'זאל זיין מתקבל על הלב.



אלזא, סוף כל סוף האסטו ארויסגעברענגט זייער א טיעפע פראבלעם מיט וואס כלל ישראל ספראוועט זיך אין יעצטיגע טעג, און האסט שיין מסביר געווען אז אש און פארעך פייער און שפיזן זענען נישט די מהלך.
ס'ברענגט היפך ישוב הדעת און מ'פארלירט די באלאנס צו קענען זאגן א קלארע דעת תורה אנע חשבונות.

למעשה וואלט איך יא געווען נייגעריג צו הערן פון דיר דיין הסתכלות און צוגאנג וויאזוי מ'דארף באהאנדלען די עצם פראבלעם, צו די קאלטע קריג וואס איז שוין אנגעגאנגען א לענגערע תקופה צווישן די 'נארמאלע' און די 'פרומע', וואס יעצט האט עס בסך הכל נאר אויפגעפלאמט און פורץ געווען מן ההעלם אל הגילוי, אבער בעצם איז די קאנפליקט גאר אן אלטע, אפשר גאר נאך פון די צייטן פון חת"ם סופר ווען ס'געווען וואס האבן געשריגן היה יהודי בביתך ואדם בצאתך ודי
סוף מעשה במחשבה תחילה.
אוועטאר
מי יודע
שר שמונת אלפים
תגובות: 8715
זיך איינגעשריבן אום: מאנטאג אוגוסט 31, 2009 4:35 pm

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך מי יודע »

דברים כדרבונות ;l;p- ;l;p- ;l;p-
אידעלע זיי פרייליך, שטארק דיך שטארק דיך אצינד, ווייל דו ביסט דאך א בן מלך, דעם באשעפער'ס קינד.
אוועטאר
פעיק ניוז
שר עשרים אלף
תגובות: 24206
זיך איינגעשריבן אום: דינסטאג יוני 13, 2017 8:49 pm
לאקאציע: אנאנימע סאורסעס

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך פעיק ניוז »

מי יודע האט געשריבן:דברים כדרבונות ;l;p- ;l;p- ;l;p-
עס איז מיר בעסער צו זיין אן אנעדיוקעטעד חכם ווי איידער אן עדיוקעטעד טיפש
אוועטאר
מחשב
שר שלשת אלפים
תגובות: 3563
זיך איינגעשריבן אום: דינסטאג יולי 17, 2018 3:57 pm

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך מחשב »

זייער גוט געשריבן!

מסכים מיט דיין עצם פונקט. און מיט רוב פאראגראפן.

איין הערה קטנה, דאס באטיטלען איין זייט קעגן די צווייטע אלס "פרומע" קעגן די "קעגן די סיסטעם" מענטאלעטי, איז נישט אינגאנצן ריכטיג, ס'איז רעלאטיוו. און איך פארשטיי פון דיינע ווערטער אויך אזוי...

מ'דארף נעמען אין באטראכט, אז די וואס לאזן הערן זייערע מיינונגן מיט רעש און געשרייען זענען בדרך כלל אויף די עקסטרעמע זייט פון זייער שיטה. איידעלע מענטשן וואס קענען הערן פארשידענע צדדים אין די פאלעמיק, כאטש זיי האלטן אויף איין צד אז דאס איז דער גערעכטער, איז זייער טאן איינגעהאלטן און איידל. עס האט זיך אוודאי אויסגעשטעלט אז די "בעד" "שרייערס" זענען די פרומע, און די "נגד" מיטן "עקסטרעם" זענען די אנטי סיסטעם חברה. אבער ס'איז בהחלט נישט קיין כלל.
פינחס
שר חמישים ומאתים
תגובות: 327
זיך איינגעשריבן אום: דאנערשטאג יולי 20, 2017 12:03 am

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך פינחס »

הנאה געהאט שכח
קיסריה
שר האלף
תגובות: 1603
זיך איינגעשריבן אום: מאנטאג סעפטעמבער 12, 2016 6:26 pm

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך קיסריה »

הלכה׳דיג:
טרעף מיר איין דיין וואס זאל פסק׳ן אז מ׳דארף נישט בלייבן אין שטוב, מ׳דארף נישט אויספאלגן די הוראות פון די העלטה פראפעשאנעלס, ווען ס׳איז א שאלה פון פיקוח נפש ממש.

מציאות׳דיג:
די הצלה האט אריינגעפירט מערערע אידן פון בתי מדרשים, וועלכע זענען שוין ליידער נישט בעולם.

פראקטיק:
דעם גוי האט מען אוועקגענומען זיין טבע שני;
זיין זשים
זיין ספארטס שפילן
זיין פארק
זיין טעאטער
זיין רעסטאראנטן
זיין פרעס און שוואוילטאגן.

דעם קריסט האט מען אוועקגענומען זיין קירכע, זיין שמייליגע איסטער:

להבדיל: אונז אידן האט מען אוועקגענומען אונזערע בתי מדרשים.

אנשטאט צו פאלגן די הוראות פון אלע רבנים / דיינים איבער די וועלט איז מען ביזי צי פארשטיין צי דאס האט מיטן פרעזידענט אדער אנדערע.

אין היסטאריע:
כבר היה לעולמים;
בימי הרה״ק רבי רבי מענדעלע וויטעבסקער זי״ע איז געווען א מגיפה בעיה״ק צפת איז דער צדיק וקדוש געווען איינגעשפארט פון פורים ביז שבועות אן קיין מקוה, אן מנין וכו׳ וכו׳ ווער איז דעמאלט געווען שולדיג ווייסט מען שוין?

יא, מ׳ווייסט:
איינער פון די הייליגע תלמידים איז יא געגאנגען אין מקוה
ונסתלק מן העולם רח״ל

ואמר עליו הרה״ק שזה בשביל שלא האמין מש״כ בתורה הקדושה: אני ה׳ השוכן אתם בתוך טומאתם!


יא זיי האבן געוואוסט ווער ס׳שולדיג.
שיעלע בהמה
שר האלפיים
תגובות: 2366
זיך איינגעשריבן אום: דינסטאג דעצעמבער 10, 2019 11:59 am

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך שיעלע בהמה »

איך האב געליינט דעם ארטיקל.. מה אומר ומה אדבר..
אני הקטן האב ב"ה קיינמאל קיין פראבלעם מיטן סיסטעם נישט געהאט אבער ווען כהאב מיר דערזעהן אז אידן איגנארירן דעם פשוטן שכל און די ווארענונגען פון יעדער איינער וואס האט נאר אפילו אביסל שייכות מיט רפואה (מיט כמעט קיין איין יוצא מן הכלל) איז מיין מסקנה געווען קליפ און קלאר, די דאזיגע "אידן" דינען דעם "עגל הסיסטעם" און פון דעם קענען זיי זיך נישט אוועקרירן קיין סוס כל שהוא... זהו!!
ביז יעצט איז אלץ געווען די פראבע פארן מעריב וואנט... און יעצט האט מען געשטעלט די מזרח וואנט צום פארהער... און די דאזיגע האבן קלאר געוויזן וועמען און וואס זיי דינען.. ואין להאריך.

און יא.. ליידער כאן מצא בעל חוב לגבות את חובו.. די בלוטיגע הענט איז נישט געווען פון קיין קדשים..

דיסקלעימער, איך מיין נישט די סיסטעם בכלליות און אזוי אויכעט מיין איך נישט קיינעם בפרטיות... אבער ווער סשפירט זיך באטראפן אים מיין איך טאקע.
לעצט פארראכטן דורך שיעלע בהמה אום דאנערשטאג אפריל 23, 2020 10:14 am, פארראכטן געווארן 2 מאל.
אוועטאר
מי יודע
שר שמונת אלפים
תגובות: 8715
זיך איינגעשריבן אום: מאנטאג אוגוסט 31, 2009 4:35 pm

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך מי יודע »

קיסריה האט געשריבן:הלכה׳דיג:
טרעף מיר איין דיין וואס זאל פסק׳ן אז מ׳דארף נישט בלייבן אין שטוב, מ׳דארף נישט אויספאלגן די הוראות פון די העלטה פראפעשאנעלס, ווען ס׳איז א שאלה פון פיקוח נפש ממש.


דו געסט אזא מיש אויס צוויי זאכן פון בלייבן אין שטוב און אויספאלגן הוראות פון די העלטה פראפעשענעלס

צו מיין דיין, וואס האט אונטער זיך א קהלה פון טויזענטער אידן, איז געקומען די הצלה מיט א צעטל אונטערצושרייבן אז מען איז מחויב צו דאווענען ביחידות, האט דער דיין געענטפערט, ווי לאנג די גראסערי און די דעלי מעג זיין אפן, קען איך אזא צעטל נישט אונטערשרייבן

ווער זיין דיין פסק'נט אנדערש זאל פאלגן זיין דיין, ותבא עליו ברכה, אבער אז א אנדערע דיין פסק'נט נישט אזוי איז נאך נישט עק וועלט
אידעלע זיי פרייליך, שטארק דיך שטארק דיך אצינד, ווייל דו ביסט דאך א בן מלך, דעם באשעפער'ס קינד.
אוועטאר
לכתחילה אריבער
שר עשרים אלף
תגובות: 20191
זיך איינגעשריבן אום: זונטאג מאי 09, 2010 7:20 pm
לאקאציע: למטה מעשרה

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך לכתחילה אריבער »

ביטע האלטן די דעבאטע איבער יא אדער נישט פארשפארן די שולן אינדרויסן פון די אשכול. עס זענען שוין דא גענוג אשכולות איבער דעם. מנהלים, ביטע אריבערפירן. ישר כח.
"די וועלט זאגט אז מען קען ניט ארונטער דארף מען אריבער, און איך האלט אז מ'דארף לכתחילה אריבער" - אדמו"ר מהר"ש
אוועטאר
פעיק ניוז
שר עשרים אלף
תגובות: 24206
זיך איינגעשריבן אום: דינסטאג יוני 13, 2017 8:49 pm
לאקאציע: אנאנימע סאורסעס

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך פעיק ניוז »

@שיעלע דער 'סיסטעם' איז דער וואס ווארנט דא.
עס איז מיר בעסער צו זיין אן אנעדיוקעטעד חכם ווי איידער אן עדיוקעטעד טיפש
שיעלע בהמה
שר האלפיים
תגובות: 2366
זיך איינגעשריבן אום: דינסטאג דעצעמבער 10, 2019 11:59 am

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך שיעלע בהמה »

פעיק נוז האט געשריבן:@שיעלע דער סיסטעם איז דער וואס ווארנט דא.

ווייסטע וואס.. רוף עס וויאזוי דו ווילסט..

די באגריף פון כוח היחיד איז נישט אז "יעדער" זאל זיך צושטעלן צום קאמפיין..
די עיקר איז, "ניצן דעם קעפעלע"

דער הייליגער ראפשיצער רב פלעגט זאגן, איך האב נישט פיינט קיין נעראנים ווייל זיי זענען נעריש... דער אויבערשטער האט דאך זיי אזוי באשאפן.. אבער דאס אז ער האלט זיך פאר א גאנצע חכם דאס איז דאך זיין אייגענעם בייפאל.. פארדעם האב איך אים טאקע פיינט!!

בקיצור מדארף האבן אייגענע "שכל" נישט צו האבן קיין "אייגענע" שכל אין אזאלעכע קריטישע ענינים (וה"ה ביי די וואקסין סומאטוכע.. ואכהמ"ל).. בקיצור, ווער ספארשטייט פארשטייט און ווער נישט נישט..



בנוגעה דיין עצם נקודה, די סיסטעם איז דא טאקע טיעף צימישט.. די וואס דארפן פעיסן דעם גוי ווייסן נישט וואו זיך אהינצוטאן... במילה די ראציאנאלע עסטעבלישמענט איז גענויגט אויף אפצושפארן וכו'
אבער איך האב באמערקט אז די מנינים מאכערס באשטייען עפ"ר פון די דאזיגע דעת תורה וואס נעמט אויף זייער אחריות די הייליגע מבצות פון ונקדשתי "בתוך" בני ישראל און טאקע נישט מיט קיין קריסטליך בלוט..
(און ניין איך בין אן אייניקל פון שטרענגע ארטאדאקסן און איך האב זעראו שייכות צו השכלה)
אוועטאר
שאינו יודע
שר ששת אלפים
תגובות: 6762
זיך איינגעשריבן אום: דאנערשטאג מארטש 24, 2011 1:27 pm

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך שאינו יודע »

יישר כח לכתחילה. זייער זייער גוט און קודאס פארן אזוי קלאר אויסשמועסן.

עס איז דא נאך עטליכע גורמים. איך בין נישט זיכער ווער עס האט אנגעפאנגען

1- די וואס האלטן אז מען דארף צושפארן האלטן אז יענער איז דיר פערזענליך מזיק - נישטא ביי א דזענערעל דעבאטע

2- די אנטי ק״ק און אנטי וואקסינען זענען די לעצטערע צייטן אין א פייט מיט די סיסטעם און די גאווערמענט. ווארשיינליך גייען זיי אנהייבן צו פארן ביי רויט און שטיין ביי גרין, און די עיקר העצע קומט בעיקר פון אזוינע. ודו״ק

3- היות עס איז שוין דורך אפאר יאר פון ווען דאס האט זיך אנגעהויבן געדענק איך נישט צו די שולי המחנה האבן אנגעהויבן אדער די אנדערע האבן אנגעהויבן צו פארפירן, הגם עס איז מעגליך אז זיי האבן עס גענומען צו די נעקסטע לעוול

4- היות די וואס האבן קודם נישט געוואלט צושפארן איז עפ״י רוב געקומען מחוסר ידיעה זענען רוב געווען אן אינטערנעט און אן קול מבשר ודו״ק
אז דו ווייסט נישט, רעד נישט!
מטעמים
שר תשעת אלפים
תגובות: 9180
זיך איינגעשריבן אום: זונטאג מאי 04, 2014 10:06 pm

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך מטעמים »

טענקס לכתחילה פאר די אויפריכטיגע פונקטען!

שולדיג איז נישט די ווארט וואס איך וואלט געניצט, איך וואלט געפרעגט וואס וואלט מען געקענט בעסער טוהן? די עיקר אחריות ליגט אויף די לאנד פירער וואס האבען זיך נישט געקענט פאראייניגען אינטער א קלארע מעסעדזש, די געזינטהייט עקספערטען לויפען פון איין עקסטרעם צו צווייטען לאזענדיג די מענטשהייט צוחושט און צומישט, סאו ווען מען האט געזעהן אז עס איז ערענסט איז דער עולם אריינגעלאפען אין די הייזער און ווארטען אויף א ישועה.

אז אונזערע רבנים האבען גענומען די מהלך פון נישט רעדן דאס ווייס איך אבער ״לדעתי״ דעת השפילה והעני׳ איז אז דאס איז נישט געקומען מחמת ערליכקייט נאר מחמת פארלוירנקייט און דאס איז א גרויסע פראבלעם, עס איז מיר א חידוש נפלא, איך וויל נישט מאריך זיין דערין אבער ווען יעדער איד זיכט וויכטיג א דעת תורה און עס קומט ארויס צושפליטערט און צופיצעלט איז נישט דא קיין גרעסערע בזיון התורה פון דעם.
האב שכל און גיב א שמייכעל!
ביללער
שר חמישים ומאתים
תגובות: 496
זיך איינגעשריבן אום: מיטוואך אקטאבער 10, 2018 1:47 am

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך ביללער »

מטעמים
עתידה תורה שתשתכח מישראל דאס איז דער אמת.
אבער נאך אלעם קיינער קען נישט און וויל נישט נעמען אחריות בדיני נפשות, נישטא די סארט היינט וואס קען דאס. אוודאי איז מען צעשפליטערט, ווי איז שייך נישט צו זיין.
די גרעסטע יתמות הערשט בגוף הדבר, בשלמי ה... הזאת. אין אלע דורות די ערשטע זאך האט מען געזוכט על מה עשה ה' ככה, ביי אידן וואס אינם הולכים בקרי, שאלת חלום, וכו'. מ'האט געזוכט ביז מ' האט געטראפן מגלה געווען.
א מגיפה קומט דאך נישט פאר גארנישט, און אויך נישט וועגן ידיעת ה' במשפט בראש השנה מי במגפה, אז די בחירה פון מאנכע לעתיד גייט זיין מיעוט קיום מצות ונשמרתם כבר בעידן רותחא, נאר א חרון אף ממרום אויף עפעס שרעקליכס וואס לאו בכל יומא מתרחיש, און דא זעמיר יתמי דיתמי יעדער איד פאר זעך צו געקומען צום תכלית הידיעה שלא נדע, בינו לבין קונו בדד ישב, מה נאמר ומה נדבר, א בירור פלאי
נאטרוליסט
שר האלף
תגובות: 1335
זיך איינגעשריבן אום: דינסטאג נאוועמבער 06, 2007 2:40 pm

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך נאטרוליסט »

איך בין נישט אזוי באקאנט אין אלע פלעצער, אבער לאמיר נאר א קוק טאן וואס טוען אונזערע ברודער בכל מקומות מושבותיהם, סדני דארעא חד הוא. א קליינע וועלט:

- 1 -
וויאזוי איז מען זיך נוהג אין ירושלים עיה״ק?
איז מען זיך דארט נוהג אנדערש ווי דא?

די גרעסטע תורה צענטער בעולם
ירושלים עיר הקודש מיט אירע הונדערטער רבבות ערליכע אידן,
די גרויסע צדיקים שרי התורה, זקני תלמידי חכמים וועלכע לאזן אייביג הערן דעם דבר ה׳ - און דא? וואס?

מיר הערן נישט קיין אות אחת פון קיין שום רב אז מ׳זאל קומען דאווענען אין שול מיט מנינים כנהוג?

איז טאקע אויס וועלט?

די קאלטע טשאלמער איד אין זייערע מאה שערים שטיבלאך וואס ווירבלט מיט רבבות אידן, די בית ישראל שטיבלאך, די הייליגע מירער ישיבה מיט אירע רבבות לומדים - די גרעסטע בעולם התורה וכו׳ וכו׳

קיינער האט נישט ארויס דעם ענין?

לאמיר גיין אקטפיטשקע ווייטער:

די הייליגע כותל מערבי שריד בית מקדשינו - וואס א יום דוכנ׳ען דארט צענדליגער טויזנטער כהנים, איז טאקע נישטא קיין שום ערנסטע כח התורה אין גאנץ ארץ ישראל וואס זאל זאגן; געוואלד דאס איז נישט דער דרך; מיר האבן מקבל געווען אנדערש - מ׳דארף האבן מסירות נפש!!!


נא, לאמיר א קוק טאן שנעל,
הייסט מען דארט יא אנגיין מיט די מקוואות / מנינים?

איז דארט אפען געהעריג כאטש איין שול, איין מקוה, איין מקום תורה,
וואו זענען די ירושלימער גדולים וצדיקים, פארוואס שרייט נישט קיינער אויס דעם דבר ה׳ אז מ׳דארף האבן אביסל מסירות נפש!!!



- 2 -
די גרויסע שטאט בני ברק מיט אירע בתי דינים, וועלכע זענען מקפיד בקלה כבחמורה, די חזון איש׳ניקים, די ליטאים, חסידים, ספרדים, אשכנזים.
זענען טאקע אלע פארלוירן?

איז דארט אפען געהעריג כאטש איין שול, איין מקוה, איין מקום תורה,
וואו זענען די בני ברקער גדולים וצדיקים, פארוואס שרייט נישט קיינער אויס דעם דבר ה׳ אז מ׳דארף האבן אביסל מסירות נפש!!!

- 3 -

וויאזוי קוקט אויס מירון, דאס הייליגסטע מקום וואס איז דאס הארץ פון די וועלט.
אידן לויפן אהין זאגן תהלים ווען מ׳קען נאר - איז יעצט ליידער סגור ומסוגר. ווו איז יעדער?

וואס דארט וועט זיין ל״ג בעומר - כ׳וויל נישט טראכטן.
כ׳האף אז דער בוכ״ע זאל זיך מרחם זיין. ווי עס קוקט אויס יעצט ווייסט איר אלע אליין.

- 4 -

א שארפע לינקס ארויף 3500 מייל קיין עיר הבירה לאנדאן.
לאנדאן, די עיר הבירה פון חכמים וסופרים, וויאזוי איז דארט די לאגע?

איז דארט אפען געהעריג כאטש איין שול, איין מקוה, איין מקום תורה,
וואו זענען די לאנדאנער גדולים וצדיקים, פארוואס שרייט נישט קיינער אויס דעם דבר ה׳ אז מ׳דארף האבן אביסל מסירות נפש!!!

- 5 -
גייט א קליינעם קיין בעלגיע, די גרויסע שטאט אנטוורפען, מיט אירו גרויסע רבי׳ס און רבנים וועלכע שאקלען א וועלט?

איז דארט אפען געהעריג כאטש איין שול, איין מקוה, איין מקום תורה,
וואו זענען די אנטווערפער גדולים וצדיקים און רבי׳ס - פארוואס שרייט נישט קיינער אויס דעם דבר ה׳ אז מ׳דארף האבן אביסל מסירות נפש!!!

- 6

מיר גייען אריבער דעם אטלאנטיק אקעאן - קיין קאנאדא
די זעלבע ליידער.

אין אלע פראווינצן, אלעס איז ליידער סגור ומסוגר.
און אלע גרויסע צדיקים פון מאנטרעאל, טאהש, קיינער זאגט נישט קיין אות אחת.

גיט נאא א קוק: איז דארט אפען געהעריג כאטש איין שול, איין מקוה, איין מקום תורה, אוואו זענען די קאנאדער גדולים וצדיקים, פארוואס שרייט נישט קיינער אויס דעם דבר ה׳ אז מ׳דארף האבן אביסל מסירות נפש!!!


- 7 -

מיר קומען קיין ניו דזשוירזי...

די וועלטס אימפיריע לעיקוואוד וואס איז די גרעסטע מקום תורה בגולה, ליידער סגור ומסוגר -

לאמיר א קוק טאן אין די גרויסע לעיקוואוד, איז דארט אפען געהעריג כאטש איין שול, איין מקוה, איין מקום תורה, וואו זענען די לעיקוואודער גדולים וצדיקים, פארוואס שרייט נישט קיינער אויס דעם דבר ה׳ אז מ׳דארף האבן אביסל מסירות נפש!!!

- 8 -

נא, ווי זאלן מיר גיין נעקסט
מאנסי, קרית יואל, צי ברוקלין, בארא פארק, פלעטבוש צי גאר אין וויליאמסבורג

פון די האלב מיליאן אידן דאהי בליעה״ר - איז נישטא קיין שום דעת תורה פון קיין איין רב, קיין איין בית דין אז מ׳דארף עפענען די שולן מיט מנינים כרגיל. קיינער. קיינער!

האלאו,
אלע צדיקים, פוסקים ומורי הוראה ווילן עפענען די שולן מ׳זאל לערנען און דאווענען - פיל פיל מער ווי מיר אינטערנעט שרייבער!

נעמט עס אלע גוט אין קאפ.
קיינער וויל אבער נישט - חלילה וחס - אז איין אידיש נפש זאל - אפשר - אוועק פון דעם עולם צוליב דעם.

דאס איז די שיינקיינט פון אונזער הייליגע תורה.
דאס איז די שיינקייט פון כלל ישראל. אז א אידיש נפש איז ביי אונז ווערט די גאנצע וועלט.

אין ארץ ישראל, אין אייראפע און דא ביינונז בעמא-ריקא.

ודי בזה.
אוועטאר
לכתחילה אריבער
שר עשרים אלף
תגובות: 20191
זיך איינגעשריבן אום: זונטאג מאי 09, 2010 7:20 pm
לאקאציע: למטה מעשרה

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך לכתחילה אריבער »

ווי שווער איז פאר מענטשן זיך צו האלטן צו עטוואס א ליניע? פארוואס דארף מען דעבאטירן אין דעם אשכול זאכן וואס מען האט שוין דעבאטירט אין פילע אנדערע אשכולות, איבערהויפט אז מען בעט מען זאל לאזן די אשכול פאר די נושא וואס מען רעדט?

ביטע שיין, אלע דעבאטעס איבער "יא מנין און נישט מנין" לאזט אינדרויסן. דא איז נישט דאס די נושא. ישר כח. (מנהלים, אויב איז נישט שווער, ביטע אריבערפירן די תגובות וואס האבן דא פארבלאדזשעט צו זייער ריכטיגע מקום, ישר כח.)
"די וועלט זאגט אז מען קען ניט ארונטער דארף מען אריבער, און איך האלט אז מ'דארף לכתחילה אריבער" - אדמו"ר מהר"ש
קעדילעק
שר האלף
תגובות: 1130
זיך איינגעשריבן אום: דאנערשטאג אוגוסט 30, 2018 3:31 pm

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך קעדילעק »

לכתחילה אריבער, יענע אשכולות פון וועלכע דו רעדסט זענען שוין לאנג נישט אויף דעם עולם, זיי זענען מיטגעפארן מיט די ברוך דיין האמת..
נאטרוליסט
שר האלף
תגובות: 1335
זיך איינגעשריבן אום: דינסטאג נאוועמבער 06, 2007 2:40 pm

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך נאטרוליסט »

א איד פרעגט א קשיא אויף א קשיא

ווער איז שולדיג אין ירושלים
ווער איז שולדיג אין בני ברק
ווער איז שולדיג אין לאנדאן
ווער איז שולדיג אין בעלגיע
ווער איז שולדיג אין קאנאדא
ווער איז שולדיג אין לעיקוואוד
ווער איז שולדיג אין דז. סיטי

ווען מיר וועלן אי״ה האבן א תירוץ אויף די אלע מקומות

דעמאלט וועט מסתם פארענטפערט ווערן די הארבע שאלה:
ווער איז שולדיג אין וויליאמסבורג / בארא פארק / מאנסי / סקווירא / קרית יואל וכו׳ וכו׳
אוועטאר
farshlufen
שר שלשים אלף
תגובות: 35238
זיך איינגעשריבן אום: פרייטאג נאוועמבער 16, 2007 8:26 am
לאקאציע: אויף די פאליצעס אין ספרים שאנק

  • ציטיר
  • צו לייגן א דאנק דארפט איר זיין אריינגעלאגט

תגובה דורך farshlufen »

ווער ס'איז שולדיג?

ווייס מיר דען ווער ס'האט געטאן די קליינע עבירה'לע אדער די מחשבה'לע וואס האט מכריע געווען כל העולם לכף חובה?

יעדער דארף רעכענען אז ער אליין, און זעך פארעכטן, טאמער מיינט מען אז מען האט נישט וואס, האט מען הערשט.

כ'רעד צו זיך אליין.
דאע"ג דכבר למד הרבה פעמים כל התורה והמצות, מ"מ כשיגיע המועד חייב לשאול ולדרוש בהלכות כל מועד ומועד בזמנו [ב"ח]
אוועטאר
farshlufen
שר שלשים אלף
תגובות: 35238
זיך איינגעשריבן אום: פרייטאג נאוועמבער 16, 2007 8:26 am
לאקאציע: אויף די פאליצעס אין ספרים שאנק

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך farshlufen »

קיסריה האט געשריבן:בימי הרה״ק רבי רבי מענדעלע וויטעבסקער זי״ע איז געווען א מגיפה בעיה״ק צפת איז דער צדיק וקדוש געווען איינגעשפארט פון פורים ביז שבועות אן קיין מקוה, אן מנין וכו׳ וכו׳

תיקון טעות, ר' מענדעלע וויטעבסקער זי"ע שרייבט דאך אז זיי האבן געדאווענט מיט מנין.
דאע"ג דכבר למד הרבה פעמים כל התורה והמצות, מ"מ כשיגיע המועד חייב לשאול ולדרוש בהלכות כל מועד ומועד בזמנו [ב"ח]
willibugy
שר חמישים
תגובות: 97
זיך איינגעשריבן אום: דאנערשטאג אפריל 29, 2010 11:41 am

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך willibugy »

farshlufen האט געשריבן:
קיסריה האט געשריבן:בימי הרה״ק רבי רבי מענדעלע וויטעבסקער זי״ע איז געווען א מגיפה בעיה״ק צפת איז דער צדיק וקדוש געווען איינגעשפארט פון פורים ביז שבועות אן קיין מקוה, אן מנין וכו׳ וכו׳

תיקון טעות, ר' מענדעלע וויטעבסקער זי"ע שרייבט דאך אז זיי האבן געדאווענט מיט מנין.


אמת. אבער ער איז געווען אויסבאהאלטן מיט די זעלבע 10 מענטשן א גאנצע צייט,
וויליאמסבורג...א מחי' גאר...
אוועטאר
צו געזונט
שר שבעת אלפים
תגובות: 7049
זיך איינגעשריבן אום: מוצ"ש נאוועמבער 21, 2009 6:24 pm
לאקאציע: חשש גילוי

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך צו געזונט »

אין מיינע אויגן איז עס א עקסטרים, אין פילע פעלער, צו אלע זייטען, מענטשן גייען מיט דעם קאפ אין וואנט אריין.
דער וואס זיין דיין/קהילה/רב האט געזאגט עפעס, אדער גארנישט און מען טייטשט עס אויס אוואו א ר' שמעון אדער ר' חיים.
דיין רב באט געזאגט אז מען מעג/מוז דאווענעו מיט מנין? איך בין זיכער אז ער האט עס געמיינט אז דערביי זאל מען האלטן סאשעל דיסטענסינג.
דיין דיין האט געזאגט צו דאווענען אינדערהיים? ער דארף נישט זאגען אז אויך גראסערי א.ד.ג. איז נאר אהינצוגיין ווען וויכטיג.
ער האט געזאגט אז מען "טאר" נישט דאווענעןן "מיט" מנין?
ער האט געזאגט אז מען "טאר" נישט דאווענען "אן" מנין?
איצטערט די וואס נעמען דיינים לויט דעם מצב. א דיין וואס ער האט קיינמאל זיין נאמען געהערט, אבער דא איז ער אים עפעס וועלט באוואוסטער דיין וואס האט "אפען" געזאגט עפעס.
אויב ווייסט ער פון א דיין וואס האט אויך מעדיצינישע ערפארונג אין איין פעלד, אדער אפילו עטליכע מעדיצינישע וויסענשאפטן, דאן נוצט ער אים אויף אלע פראנטען. אויב וועל איך אים ווייזען א בילד וויאזוי יענער קוקט אויס, וועט ער ניטאמאל וויסען ווער די באשעפעניש איז.
עס איז אלעס עקסטרעמיסטן!!! ווייל די מערהייט "פשוטי עם" וואס טוען וואס "זייער" דיין/רב/קהילה האט באפוילן. די צווינגען נישט ארויף זייער דעה אויף אנדערע.
לערנט אייך אויס סקול באס סעיפטי. דאן פראקטיצירט עס מיט אייערע קינדער.
צו קאנען בעיסיק ערשטע הילף איז נישט א אויסוואהל. עס איז א מוז פאר יעדע טאטע, מאמע און ערוואקסענער.
אוועטאר
נשמת השכל
שר ארבעת האלפים
תגובות: 4649
זיך איינגעשריבן אום: מיטוואך מאי 02, 2018 1:04 pm
לאקאציע: ערגעץ וואו, נאכנישט באשטימט...

Re: למעשה, ווער איז שולדיג??

  • ציטיר
  • צו לייגן א דאנק דארפט איר זיין אריינגעלאגט

תגובה דורך נשמת השכל »

פעיק נוז האט געשריבן:
מי יודע האט געשריבן:דברים כדרבונות ;l;p- ;l;p- ;l;p-
יעדע גוטע באגריף וואס גייט אן פאר צו לאנג ווערט צום סוף אויס גוטע באגריף
שרייב תגובה

צוריק צו “קאראנא וויירוס”