בתור הקדמה קצרה איז וויכטיג צו ברענגן די אופן ווי אזוי עס האט געארבייט די שטעלעס אין די בי"ד אין פרעסבורג. (און מן הסתם אויך אין אנדערע גרויסע שטעט)
די בית האט אנטהאלטן פיר מיטגלידער: 1) די רב ואב"ד, 2)די ראש בית דין, 3) די דיין, 4) די דיין וואס איז געוועהן יוצא ונכנס אלץ שטעלפארטרעטער ווען ס'האט איינער האט געפעלט.
די אויפנאמע פאר די שטעלע פון רבנות איז פארגעקומען אין א באזונדערע סיסטעם. אבער די צאמשטעל פונעם בי"ד איז געשעהן ממש ווי עס שטייט אין דער משנה. דהיינו, ווען דער ראש בי"ד איז נסתלק געווארן איז דער דיין געווארן אויפגענומען אלץ ראש בי"ד און דער ערזאץ דיין איז געווארן עמטליך דיין. און דאן האט מען אויפגענומען א נייער ערזאץ דיין.
לעת עתה ווען מיין צייט איז עטוואס קנאפ, וועל איך נאר אנהייבן מיט הגאון הצדיק ר' מרדכי טאסק. מיר בעטען ווער ס'האט צוצולייגען וועגן דעם גדול יבוא ויטל את השם.
הגאון ר' מרדכי טאסק האט געדינט אלץ ראש בי"ד און דער אלץ דיין האט געדינט הגאון המפורסם ר' דניאל פרוסטניץ-שטיינשניידער און הגאון ר' משה טריטש.
הגאון ר' משה טריטש זצ"ל איז אבער נסתלק געווארן בחייו פון די ראש בי"ד בשנת תקצ"א און מען האט דענסטמאל געשטעלט הגאון ר' זלמן באניהארד אלץ דיין.
- חתימת הגאון ר' מרדכי טאסק ביחד עם הגה"ק החת"ס והגאון ר' דניאל פרוסטיץ (בדרך אגב, פסק זה הוא בנוגע ירושת ר' ישעי' מודארן אבי הגאון ר' יודא מורדארן מסיגוט)
מיר וועלן נאך בעזהשי"ת צוריקקומען צו די אלע גדולים נאר קודם אויף הגאון ר' מרדכי טאסק:
הגאון ר' מרדכי טאסק פלעגט כסדר מאכן סיומי ש"ס ברבים. זיין דרך איז אבער געוועהן אנדערש ווי ביי פילע גדולים יענע צייטן. געווענטליך פלעגט מען ביי אזא כינוס לתלמידי חכמים זאגן א הדרן און א פשעטל לכבוד המאורע. ער פלעגט אבער נאר מסדר זיין די שיטות הפוסקים אויף די לעצטע דף אין מס' נדה ברבים ותו לא מידי.
פארציילט מען אז אמאל ביי אזא סיום וואס איז געוועהן אויך בהשתתפות מרן הקדוש החת"ס זי"ע, ווי ער האט פארענדיגט מסדר זיין די שיטות האט די הייליגער חת"ס אנגעהויבן ברבים מסביר זיין: די שיטה וואס די ראש בי"ד האט צולייגט האט ער געוואלט דערמיט פארענטפערן די און די קושיא, און מיט דער שיטה האט ער דאס געוואלט פארענטפערן, א.א.וו. ביז די הייליגער חת"ס האט צאמגעשטעלט פון די ראב"ד'ס סידור השיטות א גאנצער פשעטל.
דארט ביי יענער סגל חבורה איז אויך געזעצן א ת"ח א מחבר ספרים וואס איז אבער געוועהן פארכאפט אביסל מיט מינות און השכלה. (ס'איז מקובל אז דאס איז געוועהן דער מחבר ספר מי באר.
פלוצלינג רופט זיך אן די הייליגער חת"ס און שרייט באש להבה ויראת ה': וואס העלפן אבער די אלע חידושים און חילוקים, דער עיקר איז דאך יראת שמים צו האבען עס זאל ליגען אויפן געזיכט פון מענטש מורא שמים פון פחד השי"ת, און האט שטארק מוכיח געוועהן אין דעם ענין, זייענדיג מרמז דערביי אויף דעם ת"ח אז תורה אן יראת שמים איז גארנישט.
