[align=center]זעלטן גייסטרייכער מעמד מפואר כינוס התלמידים "ממשיך זיין די ברען" פאָרגעקומען אין עיר הבירה לאָנדאָן הונדערטער תלמידי הרה"ג ר' ישראל זאב בלום זצ"ל ראש ישיב"ק דסאטמאר לאנדאן צונויפגעקומען לפונדק אחד מחזק זיין משאת נפשו, "קופת רבי וואלף" שע"י הישיבה[/align]אַ גאָר זעלטענער און גייסטרייכער מעמד איז פאָרגעקומען אין שטאָט, פארלאפענעם מיטוואָך פרשת שמיני, כ"ו ניסן, ווען עס האָבן זיך צונויפגעקליבן די פילע הונדערטער תלמידים פון דער אומפארגעסליכע ראש ישיבה פון די סאטמארער ישיבה קטנה אין לאָנדאָן, הרה"ג המפו' רבי וואלף בלום זצ"ל, שטייענדיג נאך די ערשטע יארצייט פון ווען ער איז פּלוצלינג נסתלק געוואָרן לגנזי מרומים, איבערלאזנדיג אַזויפיל נאנטע תלמידים צובראָכן און פארקלעמט. דער ציל פונעם גרויסן מעמד איז געווען געווידמעט לטובת די ברייטפארצווייגטע קאסע "קופת רבי וואלף" וואס איז נאך נתייסד געווארן דורכ'ן ראש ישיבה ז"ל ארויסצוהעלפן די בחורים וואס דארף סיי וועלכע הילף זאלן קענען שטייגן במעלות התורה והיראה, און געלט זאל קיינמאל נישט זיין קיין אפהאלט לטובת די בחורים. דער ראש ישיבה ר' וואלף ז"ל האט זיך מוסר נפש געווען פאר זיינע תלמידים כל ימי חייו, ער האט פערזענליך געטראגן על לוח לבו די עול פון די בחורים יעדן פריוואט, און אצינד נאך זיין פטירה איז געבליבן א גרויסע חלל אין דעם קאסע אויסער די הנהגת הישיבה. דעריבער האט די געטרייע ראש ישיבה הרה"ג ר' פנחס בענעדיקט שליט"א איבערגענומען דעם עול פון די קופה, און געטוהן וואס נאר מעגליך עס אוועקצושטעלן כמקדמת דנא, צוזאמען מיט די חשוב'ע אנפירער הרב יואל שווארטץ שליט"א ר"מ בישיבה. דאס האט צוגעברענגט אז די תלמידים זאלן זיך צוזאמנעמען און ארויסהעלפן די גרויסע קאסע וואס די ראש ישיבה ז"ל האט מייסד געווען, זאל ווייטער קענען האבן קיום ביתר שאת. צום באשטימטן זמן איז דער גאַס אַרום דעם פראכטפולן און מאיסטעטישער זאַל "גרענד פעלעס" געוואָרן מער און מער אָנגעפילט, ווען עס האָט זיך דערקענט אַ פלייץ פון פילע באטייליגטע, וואָס האָבן שוין וואָכן פריער ארויסגעקוקט אויפן מעמד, וואו מען וועט צוזאַמען זיך דערמאַנען די לעכטיגע טעג, ווען רבי וואלף ז"ל האָט געלעבט און געווירקט, מיט זיין געטריישאפט און ערליכקייט. באַלד אריינקומענדיג איז געווען אַ גרויסער און צענטראלער מנין מנחה איז דער פאדערשטער זאַל, וואו מען האָט אינאיינעם געדאווענט מנחה ברוב עם הדרת מלך, מיט אַ חסיד'ישער ברען. אריינטרעטנדיג אינעווייניג אין די עלעגאנטע אינעווייניגסטע זאַלן, איז געווען צוגערישט פון דאָס שענסטע און דאָס בעסטע, וואו נישט וואו האָט זיך דער ציבור מטריח געווען בטירחא דגופי' צו קומען אין דעם געגנט וואָס איז היבש ווייט פון וואו דער היימישער ציבור וואוינט. דאָס אָרט איז געווען צוגערישט לעילא ולעילא, אויף אַ שיינער, סאלידער, און אויגפארכאפנדער פאַרנעם, אהערגעשטעלט דורך דעם מייסטער-ארגאניזירער און קעטערינג, ר' שמשון גליק הי"ו ובנו ר' חיים הי"ו. אַלס יושב ראש המעמד האָט געדינט האברך הר"ר יואל פריעדמאן הי"ו מיוצאי הישיבה, וואָס האט אנגעפירט מיטן פראגראם און דורכאויס דעם אווענט כסדר אונטערגעהאלטן דעם ציבור, מיט זיינע הערליכע פערל ווערטער און בליציגע געדאנקען, וואָס האָבן עלעקטיריזירט דעם ציבור און אהערגעשטעלט א הערליכער אטמאספערע. דאַן האָט מען צוערשט געהערט א געוואלדיגע דרשה, פון הרב הגאון רבי אשר זאב הלוי בערגער שליט"א, ר"מ בישיבה רבות בשנים, וואָס האָט מעלה געווען דברי זכרון און פארפלייצט די הערצער מיט הרגשים, זיך דערמאנענדיג וויאַזוי עס האָט אויסגעזען אַ טאָג אין ישיבה און די קשר התלמידים מיט רבי וואלף, אַ זאַך וואָס איז חבל על דאבדין ודלא משתכחין. בתוך דבריו האָט ר' אשר שליט"א שטאַרק ארויסגעברענגט אַז דאָס איינציגסטע זאַך וואָס מען קען נאָך טון צו אָנהאַלטן דעם קשר לעילוי נשמתו, איז צו שטיצן דעם "קופת רבי וואלף" וואָס איז געגרינדעט געוואָרן לשמו ולזכרו, פאַר די זעלבע צוועק פאַר וואָס ער האָט זיך מוסר נפש געווען אַלע זיינע יאָרן אַלס מנהל, ארויסצוהעלפן בחורי חמד מיט אַביסל שוואכערע כשרונות, צו קענען שטייגן און בליעהן על פי דרכם. דאַן האָט מען געהערט די "דבר התלמידים", וואָס איז געזאָגט געוואָרן דורך א חשובער תלמיד הרב ר' שמואל בהגר"ש לעוו שליט"א, ר"מ בישיבת מיר בעיה"ק ירושלים ת"ו וואָס האָט געשילדערט מיט זיינע טרעפליכע רעיונות, וויאַזוי די ישיבה האָט אויסגעזען אין די אלטע גוטע צייטן אונטער רבי וואלף זצ"ל, און וואָס עס איז אצינד די חיוב פאַר די תלמידים, פּשוט צו "ממשיך זיין דעם ברען" און אַ טובה טון פאַר די נשמה פון דעם אומפארגעסליכן ראש ישיבה. דורכאויס דעם אווענט האָט זיך געהערט בין הפרקים הערליכע פרקי שיר, וואו אַ קאפעליע פון אינגעלייט האָבן אהערגעשטעלט גאָר מייסטערהאפטיגע פיל-הארמאנישע ספירה'דיגע געזאנגען, אונטערן פירערשאפט פונעם באקאנטן נגינה מייסטער הר"ר יעקב ערלאנגער הי"ו, באַגלייט מיט די הארציגע שטימע פון אַ ילד הפלא, וואָס האָט באגייסטערט די אנוועזנדע, און בארירט ביז די טיפסטע סטרונעס. אַלס "הכרת הטוב" האָט מען פארטיילע הערליכע אויסצייכענונגען פאַר די צוויי ענערגישע מנהלי הקופה, הלא המה האברכים החשובים הר"ר יחיאל קרויס הי"ו און הר"ר יושע פרענקל הי"ו, וואָס געבן זיך אַוועק יומם ולילה צו ממשיך זיין די הייליגע אַרבעט וואָס רבי וואלף זצ"ל האָט אָנגעהויבן, און געטון אַזוי געטריי במשך כל ימיו, ביז ממש צו זיין לעצטן טאָג. די משא המעמד איז געהערט געוואָרן דורכן נואם הכבוד, די חשובע גאסט רעדנער הרב הגאון רבי עמרם בלום שליט"א, וואָס איז אַ ברודער פון דעם אומפארגעסליכן ראש ישיבה, און אַ מרביץ תורה אין ישיבת אהל תורה אין באָראָ פּאַרק, וואָס האָט שטאַרק ארומגערעדט איבער יבלח"ט זיין ברודער, און וואָס ער האָט אַלס אויפגעטון אינעם עולם הישיבות דורכאויס זיינע פילע יאָרן אינעם פעלד, כולם שוים לטובה, אויספירנדיג אז מ'דארף מחזק זיין די קופת הישיבה וואס איז געגאנגען בנפשו כל ימי חייו, און יעצט ליגט עס אויף די פלייצע פונעם חשוב'ן ראש ישיבה הרה"ג ר' פנחס בענדיקט שליט"א, וואס בנוסף צו די גאנצע עול הישיבה, האט ער גענומען אויף זיך דעם עול הקופה. דאַן האָט מען געהערט די רעזולאציע פון דעם מעמד, מיט זיין רעטארישער און מאכטפולער שטימע, האָט הרה"ג ר' יוסף יוזפא ווייסמאן שליט"אַ - א שוואגער פונעם ראש ישיבה ז"ל - האָט ער אויסגערופן בקול אדיר אַז דער עולם זאָל נישט אַרויסגיין פון אָרט אן זיך אונטערנעמען אַ גאָר שיינע און גרויסע סכום. דער הויכפונקט פון דעם מעמד איז בלי ספק געווען, ווען דער וועלט בארימטער מוזיק קונצלער און מלך הבדחנים, הר"ר פּנחס מרדכי וועבער הי"ו, - וואס איז געקומען ספעציעל צופארן ממרחקים - האָט ארויפגעברענגט דברי זכרונות פונעם אומפארגעסליכן ראש ישיבה, מיט וועמען ער איז געווען פערזענליך באפריינדעט, לערענדיג אינאיינעם בימי הבחרות אין ישיבת נייטרא מאונט קיסקא, און האָט פארגאפט דעם ציבור זינגענדיג גאָר הארציגע חרוזים, דער ציבור איז געווען צוגענאגלט צום בענקל, און עס איז נישט געווען זעלטן צו זען אַ טרערעלע ביי די אויגן פון די פארזאמלטע, וועלכע זענען געווען געשפאנט פאַר אַ לענגערע וויילע. מיט ברכת המזון איז מכובד געוואָרן הרה"ג ר' שמואל דוד בלום שליט"א, זוהן פון דעם אומפארגעסליכן רבי וואלף און אַ מגי"ש בישיבה. נאָכן בענטשן איז זיך דער עולם צוגאנגען, בארירט ביז די טיפסטע סטרונעס, און מיט אַ פעסטן באַשלוס צו ווייטער שטיצן דעם קופת רבי וואלף, און זיכער מאַכן אַז זיינע הייליגע פעולות גייען ווייטער אָהן, אפילו לאחר אשכבתי'. לשמו ולזכרו.