רבי משה נתן נטע לעמברגר זצ״ל
גאב״ד ור״מ מאקאווא
קרית אתא
נולד לאביו הגה״צ רבי מנחם מענדל זצ״ל אב״ד טיסא פאלגאר בחודש תמוז שנת תרס״ט.
וקרא שמו בישראל משה נתן נטע ע״ש זקינו אבי אמו הגה״צ רבי משה נתן יונגרייז בן מרן ה״מנוחת אשר״ מטשענגער זצ״ל.
רבו המובהק וקנין התורה:
אנגעהויבן זיין אייביגער דביקות בתורה איז געווען ביי זיין טאטען אין די ישיבה אין פאלגאר, שפעטער בימי בחרותו איז ער געגאנגען לערנען אין די בארימטע ישיבה פונעם מהרש״ג און סעמיהאלי, דארט איז ער געווארן דבוק בלב ונפש אין רבו המובהק פון וועמען ער האט קונה געווען רוב חכמתו ודרכו הלימוד מתוך עיון צו פארשטיין יעדע סוגיא על בוריו בשכל וסברא ישרה לאמיתו של תורה ועל מנת לשמור ולעשות ולקיים. נישט נאר דעם דרך הלימוד בסוגיא ובפולפול האט ער גענומען פון זיין רבין נאר אויך די קנינים שהתורה נקנית בהם זיין געוואלדיגע התמדה בלימוד האט ער אויך קונה געווען דארט ביי זיין רבין אין סעמיהאלי וואס פון דאן איז געווען ביים רב כל ימי חייו איין חתיכה אחת של לא פסוק פומיה מגירסא, ומשים ימים כלילות און לימוד התורה אפי׳ מתוך הדחק ומתוך צער איז די תורה הק׳ געווען זיין איינציגסטער מנוחת הנפש, און געלערנט תורה מיט די זעלבע חיות און די זעלבע שמחת התורה מיטן כח החידוש שבה כל יום עד יומו האחרון.
אויך יעדע הנהגה ועובדא מרבו הגדול האט ער זיך מתעמק געווען צו פארשטיין און אפלערנען דעם טיעפקייט הדבר, ביז עס איז געווארן נפשו קשורה בנפשו מיט זיין רבין אזוי אז ביז יומו האחרון האט ער געקאכט מיט זיין רבי׳נס תורות און חידושים עס איז נישט דורך א טאג וואס ער זאל נישט בויען עפעס א דבר חידוש בתורת רבו, און זיין גאנצער מהות איז געווען אריינגעטון צו גיין ע״ד רבו, אזוי ווייט אז ביי די פטירה פונעם מהרש״ג האבן די תלמידים געזהן אין אים ממש א דוגמא פון זייער רבין און ווען ער איז דאן צוריק לבית אביו האט ער געפענט א ישיבה במחיצת אביו האבן זיי אים געקרוינט פאר זייער וועג ווייזער אויף ווייטער נאך זייענדיג א בחור צעיר לימים.
זיין רבי דער מהרש״ג פלעגט זיך אויסדריקן אויף אים ״אם נטע בתוכינו... דאן וועט זיין הוא יפתח ליבינו בתורתו!
די רב האט זיך אמאל אויסגעדריקט אין די שפעטערע יארן אז די איין זאך קען ער אויף זיך מעיד זיין אז ער האט זוכה געווען יורד צו זיין לעומק דעתו של רבו המהרש״ג בכל דבר הלכה...
ער פלעגט צומאל פארן להרה״ק רש״א מראצפערט זי״ע און צו די רבי פון אונגארן הרה״ק רבי ישעי׳לע מקרעסטיר זי״ע להסתופף בצילם הק׳, אבער עיקר רבו שממנו למד תורה וחסידות ועבודת ה׳ איז געווען המהרש״ג.
על כן שם העיר; בעיר מאקאווא:
בשנת תרצ״ד נאך זיין חתונה מיט בת הגה״צ רבי אפרים ראזענפעלד זצ״ל אב״ד סענדרא, וחתן הגה״ק רבי משה פארהאנד זצ״ל - אב״ד ור״מ מאקאווא האט ער זיך באזעצט בצל זיין גרויסן זיידן אין מאקאווא און איז געווען זייער חביב ביים זיידן אין דארט אין מאקאווא איז שטארק מפורסם געווארן דעם רב׳ס חלק הפסק וההוראה וביתו נעשית לתל תלפיות ווי ער איז געווארן אויפגענומען לשרת בקודש כדיין ומורה צדק. אויך האט אים די זיידע ממנה געווען ארויסצוהעלפן בהנהגת הישיבה ווי ער האט פארגעלערנט טעגליכע שיעורים, און משפיע געווען מהודו על צעירי הצאן.
אנהייב יאר תש״ד איז חו״ז נסתלק געווארן לחיי העולם, און דאן בעת מסע ההלויה האט מען אויפגענומען דעם ״עטרת משה״ פאר אב״ד ור״מ מאקאווא. אבער ליידער גלייך דערויף איז אנגעקומען די מלחמה צייטן און ער איז פארטריבן געווארן צוזאמען מיט זוגתו הרבנית הצ׳ למחנות העבודה (דער מאקאווא רב שרייבט אראפ זיין השתלשלות הדברים בעת המלחמה בטוב טעם בקונטרס ״כלי גולה״)
נאכן קריג איז ער צוריק צו די שטאט מאקאווא ווי ער האט געדינט אלס רב און געשטאנען צו די האנט פון די אודים מוצלים מאש.
תהלה בארץ:
בשנת תשי״ב איז ער ארויף קיין ארץ ישראל און זיך באזעצט קודם בירושלים און בעצת הצדיקים מגור ומבעלזא איז ער געגאנגען זיך באזעצן אין ״כפר אתא״ היינט ״קרית אתא״ ווי ער האט משכלל געווען און מייסד געווען קהילת מאקאווא און געפענט זיין ישיבה ״נחלת משה״ ווי דער רב איז געשטאנען אין שפיץ אלס ר״מ מיט די טעגליכע שיעורי תורה פאר די בחורי חמד בכל מקצועות התורה.
די תלמידים פארציילן אז מיט זיינע שיעורים סיי בגמ׳ תוס׳ והראשונים, סיי בהלכה שולחן ערוך האט דער רב פאר זיי אריינגעשיינט אן אור מופלא מיט זיין אהבת התורה ובמהלך הלימוד מיט זיין חיות ושמחת התורה, און נאר צו זיין במחיצתו האט עס געברענגט צו יראת ה׳ טהורה וואס האט באגלייט ווי א נר תמיד להם.
כי אם בתורת ה׳ חפצו:
דער מאקאווער רב איז געווען א אדם גדול בענקים א מהות פון אן אמאליגער אונגארישער רב מיטן גאנצן פּראכט און גלאנץ א גדול מובהק בהוראה וגדול בכל מכמני התורה א מתמיד עצום יעדע רגע איז געווען מיט א חשבון, תמיד האט מען אים געזהן נאר שקוע בלימוד, זיינע שיעורי תורה איז געווען מיט א געוואלדיגע בקיאות און חריפות בכל חדרי התורה. הניח ברכה בספריו הק׳ בכל מקצועות התורה והמה נדפסים בספרי ״עטרת משה״ ועוד.
כי בך חסיה נפשי:
זיין התמדת התורה איז געווען געבינדען מיטן צוגאב פון נאך א רינגל אין זיין דביקות בה׳ מיט די מהות פון עבודה.
בעת שקוע בלימודיו האט מען שטענדיג געזהן דעם רוח ה׳ חופף עליו ווי ער איז דבוק ביוצרו. און אזוי ביי יעדע הנהגה בין במחשבה בין בדיבור בין במעשה איז ער געווען א מתנהג בקדושה בחסידות ופרישות, אבער אלעס האט אויסגעקוקט בסדר העולם נישט ארויסשטארענדיג מיט קיין באזונדערע עבדות׳דיגע הנהגות, כאטש וואס דער רב האט מען כמעט נישט געזעהן ביי גשמיות׳דיגע ענינים אפי׳ ווי עסן און שלאפן דאך האט מען דאס נישט באמערקט ביי אים איז אלעס געווען אויסגעשטעלט מיט אן אופן פון מכסה טפח וטפחיים אן לאזן וויסן יעדעם פון זיינע הייליגע התנהגות בחסידות ופרישות.
כל ימיו פונעם מאקאווער רב זצ״ל איז געווען איין חטיבה אחת פון התעלות בקדושה עילאה ועמל בתורה הק׳ בלי הרף מיט יגיעה ופרישות, און איבעראל איז געווען בארימט און מפורסם גודל צדקתו וכח תורתו.
נסתלק ביום שב״ק פ׳ וירא כ׳ לחודש חשון תשמ״ג לפ״ק
והובא למנוחה בעיר מגוריו קרית אתא.
בנו מ״מ כ״ק הגה״צ המפורסם חו״פ רבי שמעון לעמברגר שליט״א - גאב״ד מאקאווא.
יתר בניו:
רבי אפרים ז״ל, אב״ד מאקאווא ארה״ב
רבי אברהם יחיאל ז״ל רב הקהלה בני ברק
רבי מנחם מענדל ז״ל - רב הקהילה בירושלים
יבלחט״א, רבי אשר אנשיל שליט״א - רב הקהלה באלעד
רבי מאיר שלמה שליט״א - רב הקהלה באשדוד