ADD-ADHD

די אחראים: זייער נייגעריג, אחראי, thefact

אוועטאר
האנטעך
שר חמישים ומאתים
תגובות: 336
זיך איינגעשריבען אום: מיטוואך פאברואר 04, 2015 12:12 pm

ADD-ADHD

תגובהדורך האנטעך » דינסטאג יוני 21, 2016 2:47 pm

בס"ד
כ'וויל שרייבן פון ADD פון אן אנדערע פערספעקטיוו פון וואס עס ווערט אלגעמיין ארום גערעדט. בדרך כלל רעדט מען אלס וועגן ADHD, איך וויל רעדן ווען ADD אן די H.

עס איז דא וואס מאכן עידידי אלס די עיקר נושא און לויט זיי איז די H א זייטיגע נושא אין די זאך. אנדערע מאכן די עיקר ADHD און לויט זיי איז עידידי א סוב-אישו אין די זאך.

די סיבה פארוואס איך וויל דוקא רעדן קודם פון עידידי איז, ווייל ווען מ'רעדט פון די עידזש רעדט מען פון א פראבלעם א קינד וואס זיצט נישט איין און איז הייפעראקטיוו. משא"כ ווען מ'רעדט אן דעם עידזש איז גרינגער צו כאפן די אויסשטעל פון די קאפ וואס האט עידידי, און מען קען זיך אויך קאנצעטרירן אין די מעלות פון די נשמות מיט עידידי.

[עס איז דא צענדליגע מדריגות און הגדרות אין די נושא, עס איז נאך בכלל נישט קלאר וואס פונקטליך איז די סיבה וואס איז גורם עידידי, און ממילא לויט דעם וואס איז פונקטליך די הגדרה, אויב עס איז בכלל דא א פונטליכע הגדרה. דאס איז זיכער אז יעדע קעיס האט זיך זיין אייגענארטיקייט ס'דא וואס האבן מער פון איין סימפטאם און ס'דא וואס האבן מער פון אן אנדערע].

ווי באקאנט איז די עיקר שוועריקייט פון די עידידי ליידענדע, די צובראכענקייט פון זיך נישט צושטעלן, און לאו סעלף עסטיעם, וואס קומט מכח זה. חוץ פון די עצם שוועריקייט פון זיך אויסלערנען ריכטיג וויאזוי מצליח צו זיין אין לעבן, ווען אלע וועגן פון הצלחה אז דיזיינט פאר מענטשן וואס האבן נישט עידידי, ממילא מוטשעט זיך דער עידידי צו גיין אויף די שווערע וועג, אינדערצייט וואס ווען ער זאל וויסן וואס זיין מהלך המחשבה איז, וועט אים זיין גרינגער צו טרעפן זיין וועג צו הצלחה.

און ווי די מומחים וואס טוען אין עידידי זאגען: זענען א ריזיגע פראצענט פון ארויס געפאלענע פון סיסטעם, מענטשן מיט די עידידי טבע, וואס וועגן מ'האט זיי צוקלאפט און נישט פארשטאנען, און אפגערעדט פון זיי געהאלפן לויט זייער טבע, וועגן דעם זענען זיי ליידער אראפגעפאלען פון וועג, און ווען מ'עפנט אויף זייער הארץ און מ'הערט אביסל וואס זיי זענען דורכגעגאנגען בלייבט נישט די אויגען טרוקן..

אויך זאגען די מומחים אז א גרויס חלק פון די אויפגעקלערטע מענטשן וואס האקן אויפן סיסטעם זענען מענטשן מיט די עידידי טבע, וואס וועגן די סיסטעם האט זיי נישט פארשטאנען און זיכער נישט צוגעשטעלט א וועג פאר זיי צו גיין ממילא זענען זיי בייז אויפן סיסטעם און גלייבן מער נישט קיין איין ווארט די פירערס פון דעם סיסטעם זאגען. און בדרך כלל ווען זיי כאפן אז 'זיי' זענען אנדערש ווייל זיי האבן עידידי, בדרך כלל ווערט די שארפקייט און פארביסנקייט לייכטער...

אויף צו פארשטיין וואס איך מיין וועל איך אביסל רעדן פון די היסטארי פון עידידי.


עידידי האט מען געכאפט אין די סקולס ווען מען האט געזעהן אז ס'איז דא קינדער וואס קענען נישט איינזיצען און זיי האלטען נישט מיט קיין סאך וואס מען לערנט און זיי זענען בכלל זייער ווילד. אין אנפאנג האט מען געהאלטען אז ס'פעלט זיי סתם דיסיפלין אבער מיט די צייט האט מען זיך אריין געלייגט מער און מער, ביז מען האט געכאפט אז ס'איז דא א מחלה א דיסארדער וואס הייסט עטענשאן דעפיציט דיסארדער. דאס הייסט אז די מענטשן וואס ליידען פון דעם האבן ליידער א דעפיציט א שטארקע חסרון אז זיי קענען נישט געבן קיין אטענשאן דאס הייסט זיך צו קאנצערטרירען אין די לימודים אין סקולס.

און מען האט אנגעפאנגען צו טריטען די עידידי קינדער מיט מעדיצין און טערעפי. למעשה רעדן זיך די וואס זענען עוסק אין דעם פעלד אפ, אז די וועלט איז נישט גענוג משקיע אין די פעלט ביחס צו אנדערע דיסארדערס ממילא גייט די ריסוירטש און די אויפטרעפן שטאטער ווי אנדערע דיסארדערס.

למשל אין די פעלד פון מעדיצין אויף די ליידנדע, גייט נאך אן ריסוירטש צו קענען פונקטליך אפמאכן וואס און וויפיל צו געבן, (איך האב נישט קיין עקספיריענס אין די נושא פון מעדיצינען, איך זאג נאר נאך וואס זיי זאגען).
אבער די גאנצע צוגאנג צו די טעראפי איז געווען אז עס איז א מחלה וואס שטערט אנצוגיין און מ'דארף מטפל זיין מיט דעם.

נאר עס איז אנדערש ווי אנדערע דיסארדערס מיט צוויי הויפט זאכן. איינס אז מען קען עס נישט באקומען, נאר מען ווערט געבוירען מיט דעם, ווי אויך קען מען נישט פטור ווערן פון דעם. 2. אז עס איז גענעטיש, בדרך כלל האבן איינס פון די עלטערן אויך עידידי אויב נישט ביידע.

דאס איז די סיבה פארוואס רוב מענטשן מיט עידידי ווייסן בכלל נישט אז זיי האבן עס, די מבינים זאגן אז אין אמעריקע איז דא סאסייעטיס וואס איינס פון צען האט עידידי און ס'דא סאסייעטיס מיט גרעסערע פראצענטען! און די סיבה איז ווייל וויבאלד מען ווערט געבוירן מיט דעם כאפט מען נישט אז עפעס איז ראנג, משא"כ אנדערע דיסארדערס געשעהט אמאל ממילא זעהט מען דעם שינוי, נאך א סיבה ווייל בדרך כלל איז די קינד נישט קיין סאך אנדערש ווי זיינע עלטערן וואס האבן אויך עידידי ממילא זעהט מען נישט אז עפעס איז ראנג, ווייל די עפעלע פאלט נישט ווייט פון בוים.

..

מיט די צייט האט זיך אנגעפאנגן א גרויסע מערכה אין אמעריקע און היינט גייט עס שוין ווארלד ווייד. ווען די קינדער מיט עידידי האבן אויפגעוואקסען האבן זיי אנגעהויבן צו קוקן אויף דעם פון אן אנדערע שטאנדפונקט און זיי האבן אנגעהויבן זעהן אז דוקא די מיט עידידי האבן קוואליפיקאציעס און דערגרייכונגען מער ווי די נארמאלע מענטשן.

האבן זיי אנגעהויבן פרעגן: ווער זאגט אז עידידי איז בכלל א דיסארדער? עס האט דאך בכלל נישט די צד השוה צו אנדערע דיסארדערס ווייל עס איז דאך גענעטיש, מ'ווערט געבוירן אזוי און מ'שטארבט אזוי, איז עס דאך נישט קיין מחלה, עס איז א טבע?

איז דאך א חוצפה אז ווייל די רוב האט געמאכט א סיסטעם וואס איז פאסיג פאר די רוב, און די מיעוט פאלט ארויס, איז אנשטאט מאכן א סיסטעם געאייגנט פארן מיעוט, זאגטסטו אז ער איז א פראבלעם א דיסארדער?!!
שטעלט אייך פאר עס וואלט נאר געווען א מיעוט פרויען און וואלטען געדארפט זיך צושטעלן צו די סיסטעם פון מענער זיי וואלטען אויך נישט געקענט, נו, וועסטו זאגען אז זיי האבן א פרויען דיסארדער?!
וועגן דעם פארפירן זיי אז מ'זאל טוישן דעם נאמען פאר די טבע, עס איז נישט קיין דיסארדער און מ'זאל אנפאנגען צו נאכגעבן די רעכטען פאר די מענטשן מיט די עידידי טבע.

יעצט לאמיר צוגיין וואס איז דאס עידידי.

איך וועל עס שרייבן דא אזוי ווי איינער פון די גאר גרויסע אין דעם פעלד איז עס מגדיר, און נאכדעם אין א אנדערע תגובה אויף ADHD וועל איך בל"נ מרחיב זיין די אנדערע מהלכים, וואס איז לאו דוקא אנדערש נאר מער דיטעילד און נעמט אריין אין זיך מער פון די עידיעיזשדי מענטשן.

אין די מוח פון א מענטש איז דא צוויי חלקים איין חלק וואס איז געשטעלט אויף התחדשות, דאס איז א חלק וואס האט אין זיך א שטארקע כח אין חסידות כחסידות בתחילתה! יעדער קען די פעסטקייט און פלייסיקייט פון יעדע התחדשות בפרט פון די יונגע חברה וואס זיי מיינען עס נאך ערנסט...

נאכדעם איז דא נאך א חלק וואס דאס איז די סיסטעמאטישע מוח וואס די מוח נעמט איבער די ארבעט ווען די התחדשות'דיגע מוח האט שוין גענדיגט זיינס.

און דאס איז איינס פון די חסדים פון אייבערשטען. אז אנפאנג ווען עס פעלט זיך אויס די חשק די שטופ די
עקסייטמענט ארבעט די חלק און מוח, און נאכדעם וואס די זאך פארט שוין פעלט דאך שוין נישט אויס די גרויסע ענזשין, לעשט זיך עס אויס און די סיסטעמאטישער חלק נעמט איבער, ער פארט רואיג און געלאסען אויף קראאז.

אבער למעשה איז דער מענטש נישט קיין מאשין! ביי יעדעם איינעם איז דא איין חלק מוח וואס דאס ארבעט בעסער ווי די אנדערע, ס'דא סיסטעמאטישע מענטשן וואס ביי הוק און ביי קרוק זענען זיי די זעלבע, די זעלבע סקונדע טרעט ער אויס שמו"ע טאג איין טאג אויס.. נאכדעם איז דא מענטשן וואס פונקט פארקערט זייער התחדשות מוח ארבעט פולי און די אנדער נישט אזוי גוט, זיי זענען אייביג פול מיט חיות גייען אן מיט א פרישקייט האבן שטענדיג גוטע פלענער וויאזוי אנצוקומען אבער פארשלעפטע חברה..

יעצט רוב מענטשן זענען אינצווישן מער ווייניגער מסודר, ווען זיי האבן אן התחדשות זענען זיי פריש נאכדעם גייען זיי ווייטער מיט זייער סיסטעם און עולם כמנהגו נוהג.

יעצט איז אזוי. די וואס האבן עידידי זייער מוח פון סיסטעם ארבעט נישט! נאר די מוח פון התחדשות ארבעט. יעצט וועגן דעם ווען ס'קומט צו יעדע רוטין פאלען זיי ארויס, ווייל די מינוט וואס זיי פארלירן די התחדשות 'קענען' זיי נישט אנגיין מער. עס איז נישט ווייל עס פעלט זיי רצון!!! נאר זיי קענען נישט! און אויב יא דארפן זיי זיך ברעכן אקעגן זייער טבע ווייל יענע חלק מוח שלאפט! עס איז דא וואס פרובירן מיט טעראפי אדער מיט מעדיצין צו אויפוועקן יענע חלק מוח, אבער סתם אזוי קאן ער נישט נאר מיט מסירות נפש, און קיין איין מענטש קען נישט אנגיין א סיסטעם געבויעט מיט מסירות נפש.

אבער פון די אנדערע זייט אויב זיי לעבן אין דעם וואס זיי טוען און זיי זענען זיך מתחדש אין דעם, נייע איידיעס נייע קאסטומערס, שרייבערס יעדן טאג פרישע נייעס וכדומה זיי זענען פריש און גייען אן מיט א פעסטקייט הונדערט מאל בעסער ווי א אנדער מענטש, ווייל זיי גייען מיט די מוח פון התחדשות וואס ארבעט פול פורס, משא"כ א אנדערע מענטש גייט מיט די סיסטעמאטישע מוח וואס גייט זיך רואיג זיין וועג.

וועגן דעם ווען ס'קומט צו אויעפענען א ביזנעס זענען זיי מורא'דיג גוט אבער צו ראנען די ביזנעס אויב איז עס נישט קיין ביזנעס וואס לעבט, ווי עסקנות אדער קאנסאלטונג וכדומה יעדן טאג נייע טשעלענדזשעס מיט נייע ידיעות, דארפן זיי האבן איינעם וואס זאל זיי איבער נעמען און זיי זאלען זיין ביזי צו פארברייטערן די ביזנעס.
קומט אויס אז בעצם איז דער עידידי מענטש א מוצלח ממש ווען ער קומט צו זיין ריכטיגע פלאץ.

דער עידידי מענטש קען זיך נישט צושטעלן צו קיין סיסטעם צו דורך לערנען יעדן טאג איין בלאט פון א ספר, אבער אויב ציעט אים די ספר איז גארנישט ביי אים זיך צו אראפזעצן און דורך לערנען דעם ספר מדאשקע לדאשקע אין איין אטעם! און פארגעסן פון די גאנצע וועלט ארום.

קומט אויס אז פונקט אזוי ווי מ'קען זאגען אז די עידידי האבן א חסרון אז עס פעלט זיי אטענשען- קאנציטרעישאן צו טאן אדער לערנען זאכן וואס עס אינטרעסירט זיי נישט.

קען מען עס אנקוקון פונקט פארקערט און זאגן אז זיי האבן א מורא'דיגע קאנצעטרעישאן אין די זאכן וואס עס אינטרעסירט זיי יא! אזוי ווייט אז חוץ פון די זאך וואס אינטרעסירט זיי איז די וועלט געשטארבן, דו קענסט זיין נעבן זיי און שרייען און זיי זעהן דיך נישט און הערן דיך נישט! (אנדערש ווי די יודען מיט ADHD וואס זיי ווערן יא לייכט צוטומלט, וועגן א קליינע חילוק אין זייער מוח אנדערש ווי דער ADD).

קומט אויס לויט דעם אז ס'איז סבור להניח אז רוב עילויים און טיפע טראכטערס און מענטשן וואס זענען געווען דורכברעכערס אין די וועלט זענען געווען מענטשן מיט עידידי!!!

אויף איינשטיין איז קלאר אנגענומען אז ער האט געהאט עידידי ווי ערווענט אין אנדערע אשכול.

נאר די מענטשן מיט עידידי האבן א חסרון אז היות זייער גאנצע מאטאר ווענדט זיך אין זייער געשמאק, ממילא אין די מינוט וואס זייער געשמאק גייט אוועק אדער עפעס אנדערש איז מער געשמאק קענען זיי מער נישט טאן די ערשטע און זיי מוזן טאן די צווייטע, און אויב זיי האבן נישט קיין צווייטע וועלן זיי קלאצען און זיך פילען משוגע שלעכט און נישט גוט מיט זיך אליינס, און עס קען ברענגן ביז טיפע דיפרעשאן!! ווייל פון איין זייט האבן זיי אין זיך א מורא'דיגע מאטאר אבער פון די אנדערע זייט האבן זיי עס נישט ווי צו נוצן.

וועגן דעם כדי זיי זאלן קענען אנגיין פעלט אויס צוויי זאכן. 1. א פלאץ וואס וועט זיי אריין נעמען, דהיינו רוב סיסטעמאטישע פלעצער האט נישט קיין פלאץ פאר די פארשארטע עקסייטעד עילויישע מוחות פון עידידי.
2. א גבאי וואס זאל זיי שטעלן אין פלאץ, און זאל זיי העלפן אין די קליינע פרטים, און זאל אוועק נעמען די שטערונגען. ווייל ווען דער עידידי האלט אינמיטען עפעס טאן און א צווייטע זאך קומט אריין ווי למשל ער האלט אינמיטען שרייבן א אימעיל און אינמיטען באקומט ער א מעסעדזש אז ער קען מאכן א אפדעיט פארן קאמפיוטער , אויב האט ער געווארט אויף די אפדעיט אדער סתם עס געפעלט אים, קען ער תוך כדי דיבור עס טאן אינסטאלען די אפדעיט אין ריסטארטען די קאמפיוטער.. אינמיטען שרייבן די אימעיל, און נאכדעם קען ער זיין ביזי צו זעהן וואס איז בעסער מיט די קאמפיוטער, און אויפמאכן א פייל, און זעהן אז.. אוי.. ער דארף טאקע עפעס מאכן פאר יענקל אין די פייל, און הופס אנגעפאנגען צו טאן דאס און ער האט שוין לאאאאנג פארגעסן פון די אימעיל...

און הוא הדין אין יעדע פעלד, אויב קומט אריין א וויכטיגע אימעיל קען ער פארגעסן פון די גאנצע וועלט און זיין ביזי נאר מיט די אימעיל.. אפגערעדט אז פון ביזנעס שעות קען ער פארגעסן, די זייגער עקזיסטירט נישט ביי אים! אדער דארף מען עס נישט אדער העלפט עס נישט! וועגן דעם פעלט אויס זייער וויכטיג ער זאל האבן א גבאי- סעקרעטאר צו מאכן סדר, ער זאל נישט באקומען סתם אימעילס, מ'זאל נישט קענען סתם אזוי אריין גיין צום רעבין און אים משוגע מאכן מיט יעדע זאך און דער רבי מיט זיין אהבת ישראל זאל ווערן אריין געשלעפט אין יעדע פאליטיק וכדומה.

פונקט אזוי ווי מיר האבן יעצט געשמועסט אז דרויסנדיגע זאכן קענען אים מאכן זיין ביזי. מחשבות קענען אים מאכן אסאך אסאך מער ביזי וואס אויב איז זיין קאפ ביזי צו טראכטען עפעס קען ער גארנישט טאן!! זאל זיך די וועלט איבערדרייען ער איז נישטא!

און הוא הדין ווען ס'קומט צו דורכלערנען א זאך, ער האט זיך זיין אייגענארטיגע וועג פון לערנען א זאך לעמקה ולרחבה און אויב קען ער עס נישט לערנען פונקט אויף זיין וועג, פארלירט ער די חשק און ער קען נישט לערנען, און אויב האט ער יא א חשק קען ער נישט גיין שלאפן ביז ווילאנג ער פארשטייט נישט די סוגיא!

קומט אויס אז בעצם איז גארנישט אזוי שלעכט מיט די עידידי חברה, און אפילו אויב יא אויב וועט מען אריין טראכטען וועט מען אנפאנגען צו זעהן אויף אסאאאך גדולי ישראל אז לכאורה זענען זיי געווען פון די חברה.. און אפילו אויב נישט זייער אסאך גדלוש'ע מעשיות קען זיך דער עידידי אנרופן יא יא איך פארשטיי דעם גדול איך וואלט אויך אזוי געטאן. איי אויב אזוי טו עס דו אויך? נאר די פראבלעם איז נאר אז דער עידידי איז בדרך כלל נישט אין זיין ריכטיגע פלאץ ממילא קען ער עס נישט טאן, און ווען ער וואלט געהאט זיין פלאץ וואלט ער טאקע געווען א גדול...

וועגן די שוועריקייטען וואס די מענטשן האבן.
ווי אויך אויב איז דא אין די יודישע ספרים שאנק עפעס אן עצה פאר זיי

בעז"ה בההמשך
לעצט פאראכטן דורך האנטעך אום מאנטאג יוני 27, 2016 10:53 am, מאל פאראכטן געווארן 1 סך הכל.

אוועטאר
האנטעך
שר חמישים ומאתים
תגובות: 336
זיך איינגעשריבען אום: מיטוואך פאברואר 04, 2015 12:12 pm

תגובהדורך האנטעך » דינסטאג יוני 21, 2016 2:49 pm

פאר הערות ביטע שרייבט דא

גאלדענע פעדער
שר האלף
תגובות: 1360
זיך איינגעשריבען אום: מאנטאג ינואר 05, 2015 9:34 pm
לאקאציע: אין שפיץ פונעם קרעמל

תגובהדורך גאלדענע פעדער » דאנארשטאג יוני 23, 2016 8:32 pm

לאור די מורא'דיגע אינהאלטס רייכע ארטיקעל, פון הרב @האנטעך. האב איך עס מסדר געווען און א שנעלע פדף. אזוי אז ווי מער מענטשען זאלען עס ליינען. א דאנק אייך נאכאמאל הרב האנטעך פארען אוועק געבען פון אייערע חשובה צייט דאס צי שרייבען! און די ארטיקעל לעניות דעתי דארף גייען וויירעל.

די פדף איז גריייט. איך ווייס פשוט נישט ווי אזוי מען לייגט דא ארויף אן עטעשמענט, ווער ס'ווייסט יא ווי אזוי, זאל פליז בעהטען די פדף און אישי, כ'וועל יעמעם שיקען די עטעשמענט דארעך א עימיעל, און יענער וועט עס ארויף לייגען דא לזכות הרבים! איך דאנק שוין יענעם פון פארויס.
מפתחות של זהב
א חסידישע יונגערמאן אן לערנען חסידישע ספרים? זעה דא

אוועטאר
האנטעך
שר חמישים ומאתים
תגובות: 336
זיך איינגעשריבען אום: מיטוואך פאברואר 04, 2015 12:12 pm

המשך ADD

תגובהדורך האנטעך » דאנארשטאג יוני 23, 2016 9:49 pm

אונז האבן שוין אביסל ארום גערעדט פון דעם עידידי טיפ דער וואס פון אין זייט האט ער התחדשות יעדען טאג עפעס אנדערש, אבער ווען עס קומט צו רוטין, צו זאכן וואס ציען אים נישט, קען ער נישט שטיין אין דעם אלס א רעגולער בעסיס.

און די עצה איז פאר אזא מענטש צו זוכן א ארבעט וואס שטימט לויט זיין טבע מיט א גבאי-סעקרעטאר וואס זאל אים צוהעלפן, בדרך כלל איז זיין התחדשות קאפ גענוג פאוערפול אז ער זאל ממילא דארפן נאך אן ארבעטער מיט זיך.

איך האב בכלל נישט געקאווערט אלע עספעקטען פון דעם עידידי, נאר באופן כללי, און אויב מ'וויל עס אביסל מער מפרט זיין רעדט מען פון די מענטש וואס לעבט זיך זיין לעבן, זיינע פרישקייטען זיינע איידיעס, א מענטש פאר זיך, וואס מענטשן קענען אים אמאל אנקוקן מאדנע אבער ער אליינס טרעפט זיך בכלל נישט מיט די מענטשן וואס קוקן אים אן מאדנע ער איז אין אן אנדערע וועלט אינגאנצען, אויב האט ער מצליח געווען... אין א וועלט וואס ער פארשטייט און אמאל אין א וועלט וואס פארשטייט אים, יענע וועלט איז נישט געבויעט אויף הצלחות און סיסטעם, נאר אויף די איכות פון די זאך.

אין לערנען איז ער אדער דער עמקן אדער דער מתמיד אדער סתם איינער וואס קען אלע טשיקאווע ספרים, אין עבודה איז ער דער וואס טרעפט זיך זיין מהלך בדרך כלל נישט אין די פשוטע היימישע קהילה חסידות, נאר אין מער א טיפערע און איכות'דיגע חסידות אדער טיפע מחשבה, אדער טיף געפילישע, און אפילו אנדערע האלטען אז ער איז אביסל מאדנע אבער ער לעבט זיך זיין לעבן כאילו קיינמאל גארנישט. וויאזוי האט מיר איינער לעצטענס געפרעגט א הארבע קשיא, וויאזוי קען זיין אז כמעט יעדע כלי וואס וואס אין ישיבה האלט מען אז ער וועט אויפוואקסען און פארשיינען די וועלט מיט זיין תורה, פלוצלונג ווערט ער ערגעץ פארכאפט.. אדער ווערט ער א שארפע קנאי אדער א מקובל אדער עפעס אנדערש, פארוואס קען ער נישט בלייבן נארמאל? כ'מיין אז ווי מיר שמועסן ווערט אביסל פארענטפערט די קושיא..

און ווען מ'קוקט מיט 'די' גלעזער אויף די יודישע היסטאריע מחלוקת און מאוומענטס אין כלל ישראל, ווי חסידים און מתנגדים, און בכלל אלע מאוומענטס, האט מען אסאך חומר למחשבה..

אין ביזנעס איז ער דער אויפטרעפער וואס זוכט עשירים אים צו העלפן אויספירן זיינע פלענער, און אויב האט ער הצלחה און ווערט נישט צובראכן פון זיינע ארומיגע קען ער ווייט אנקומען בתנאי אז ער האט העלפ א גוטע גבאי וואס העלפט אים נישט צו ווערן אווער עקסיידעט פון זיינע פלענער, און זעהן אז אלע דיטעילס זאלען ווערן מסודר. אין עסקנות איז ער דער וועלטס עסקן וואס לייגט זיך אריין אין א געוויסע מקצוע און ער לעבט עס 24/7 נאן סטאפ יומם ולילה לא ישבותו, ביז ער קראכט פאר א שטיק צייט, רוהט זיך אפ א וואך און היידע צוריק אין די עבודה..

איך האף נאך צוקומען צו נאך נקודות ווען מיר וועלן רעדן פון דעם ADHD און פון די חילוקים צווישן די צוויי.

עכ"פ וואס איך האב געוואלט ארויס ברענגן ביז דערווייל איז אז מען זאל כאפן די מאדעל פון די מענטש, אז ווען דער מענטש מוטשעט זיך, וואס כמעט יעדער וואס האט עידידי מוטשעט זיך אין אלע הינזיכטען ער איז מודי! עליות און ירידות אויף א שטארקע אופן, דמיונות, שוועריקייטען מיט מענטשן וואס פארשטייען אים נישט, שוועריקייטען מיט א דזשאב, ער קען בדרך כלל נישט ארבעטען ביי יענעם, און אליינס קען ער אויך נישט אן קיין העלפ.. שווער צו זיין אינדערהיים ווען זיין מוח איז ערגעץ אנדערש.. ער מוטשעט זיך מיט דעם יעדן טאג ובפרט שבת און יום טוב, און דארף זיך אויסלערנען אז זיינע מוד טשעינדזשעס זאלען נישט אפעקטען זיינע ארומיגע ווייל אויב יא זאל איין באשעפער אפהיטען, ער וועט נישט זעהן קיין מענטש נאר זיך אליינס! און נאך ואי אפשר לפורטם כי רבים הם.

ווען דער יוד מוטשעט זיך ארום און ווען ער כאפט אן התחדשות מאכט ער עקסטער אפ אקעי פון היינט און ווייטער גיי איך זיין א נארמאלע מענטש, און פאנגט אן מיט א התחדשות און ציעט אפאר טעג און אודך מפטירין כדאתמול, אדער ווען עס ציעט אים א געוויסע געדאנקען גאנג און די ארומיגע פארשטייען אים נישט זאל ער זיך נישט פילען ווי א נישט נארמאלער און אויך זאל ער נישט אנפאנגען צו האקען אויפן סיסטעם!

נאר ער זאל אנפאנגען זיך צו פארשטיין מיט הילף פון א מומחה, און מינומים פון א חבר וואס אפילו ער וועט אים נישט קענען העלפן מיט עקספיריענס, אבער דאס איז וויכטיג פשוט כדי ער זאל קענען זעהן די גאנצע בילד, וואס גייט פאר מיט אים, וואס אליינס קען ער נישט, ווייל ער איז דאך יעדן טאג אן אנדערע מענטש אינגאנצען! געוואנדן לויט זיין מוד סווינג!

אבער ווען ער וועט זוכן די וועג צו הצלחה זאל ער זיך אויפהערן זוכן צו אריין קוועטשן אין סיסטעם נאר אנפאנגען צוביסלעך בויען א אייגענע סיסטעם, פון זאכן וואס ציעט אים, און בויען נארמאלע לעבנ'ס שטייגער געבויעט לויט זיין געשמאק, אז זיין מוח פון החדשות זאל האבן ווי צו לעבן און אנגיין מיט א פעסטקייט.

און פון די אנדערע זייט זאל ער וויסן אז היות ער גייט מיט א מורא'דיגע כח פון התחדשות זאל ער נישט אפמאכן קיין שום החלטה אויף א ענין וואס וועט אים טוישן זיין לעבן, אן זיך דורכטראכטען און זיך דורכרעדן מיט מומחים וואס פארשטייען זיין נפש, ווייל ער איז עלול צו ווערן אווער עקסיידעט און אריין שפרינגען אין רייגע פריאקטען און באגראבן ווערן דארט ח"ו, נאר ער זאל כסדר טאנצען ממדריגה למדריגה, ער וועט טאקע נישט גיין נאר שפרינגען, אבער נאר פון היינט פאר די נעקסטע פאר חדשים וכן הלאה.

און מיט די צייט וועט ער זען אז ער האט אויך א סיסטעם, און ער וועט שטייגען אין אלע הינזיכטען לויט זיין דרך בעז"ה.

נאר די עיקר איז נישט צובראכן ווערן פון דעם ווייל ער איז אנדערש, ער איז נישט קראנק און נישט אנדערש ער איז פון די מיעוט פון די אויבערשטייסל, פון די מיעוט וואס יעדער טויש לטובה איז געקומען דורך זיי!

און איך וועל ענדיגען די תגובה מיט א מעשה, אז אמאל אין א ישיבה האט געלערנט א עילוי, (געהערט די מעשה אויף אסאך גדולי ישראל) וואס האט זיך אמאל מתחצף געווען קעגן די הנהלת הישיבה און נישט געהאלטען די תקנות הישיבה, זענען די הנהנלה אריין צום ראש ישיבה, און געזאגט אז הגם היות ער איז א עילוי וואלטן זיי נישט געגאנגען מיטן חומר הדין, אבער למען ישמעו ויראו ווילן זיי אים משלח זיין.

האט דער ראש ישיבה גענטפערט, די גמרא זאגט אלף נכנסין לביהמ"ד ואחד יוצא להוראה, פון טויזנט תלמידים קומט ארויס איינער צו הוראה, קומט אויס אז די גאנצע ישיבה איז בעיקר נאר אז דער איינער זאל קענען אויסשטייגען, [איין חפץ חיים אדער ר' חיים עוזר האט געראטעוועט א וועלט], יעצט ווען דער איינער האלט נישט די תקנות הישיבה ווילן ענק אים ארויסווארפן אן אים דארף מען דאך נישט די ישיבה?!

אוועטאר
האנטעך
שר חמישים ומאתים
תגובות: 336
זיך איינגעשריבען אום: מיטוואך פאברואר 04, 2015 12:12 pm

1 ADHD- די מוח פון א מענטש!

תגובהדורך האנטעך » זונטאג יוני 26, 2016 10:05 am

ביז יעצט האבן מיר גערעדט פון דעם עידידי, יעצט לאמיר אביסל רעדן פון די ADHD. ווען מ'זעהט א מענטש וואס האט די טבע פון עידידי נעבן א מענטש וואס האט עידיעידזשדי, קען מען אמאל בכלל נישט זעהן אז די צוויי טבעיים זאלען האבן אפילו א עפעס שייכות. ווייל למעשה די עידזש וואס קומט אריין מאכט זייער אנדערש דעם מענטש פון דעם עידידי. אבער ווען מ'לערנט אביסל אפ די יסוד הדבר זעהט מען אז עס איז יא דא א שטארקע שייכות און ענדליכקייט.

אויב דער עידידי האט פאטענציעלס צו שטייגען אלס גאון אדער מוצלח אין יעדע פעלד ווי עס ציעט אים, האט
דער עידיעידזשדי 'אסאך' א גרעסערע פאטענציאל צו שטייגען זייער גרויס, אבער פון די אנדערע זייט, וואס גרעסער די פאטענציאל צו שטייגען איז, אלס מער דארף מען פארשטיין די וועג וויאזוי צו ארבעטען מיט די כשרונות.

אזוי ווי ווען איינער קויפט א פשוטע צוזאמלייג בענקל דארף ער נישט קיין אינסטראקשענס עס אויפצושטעלן, אבער ווען איינער קויפט א מער א קאמפליצירטע זאך ווי א טרעדמיל דארף ער שוין יא אינסטראקשענס. ווי מער קאמפליצירט און סאפיסטיקעיטעד די זאך איז, אלס מער דארף מען פארשטיין וויאזוי עס צו נוצען, אבער ווען מ'פארשטייט איז עס מורא'דיג נוצלעך.

אויף צו פארשטיין בעסער וויאזוי א עידיעידזשדי מוח ארבעט, לאמיר קודם זעהן אביסל מער דיטעיל"ד וויאזוי א יעדע מוח ארבעט, און וואס זענען למעשה די צוויי חלקים אין מוח וואס זענען פאראנטווארטליך פאר די התחדשות און סיסטעם.

(די הסבר איז מיסודו גענומען פון די ספר 'להכיר ולהצליח' די ערשטע שער, וואס לייגט עס זייער גוט אראפ. (כ'האב מיך אביסל צוברייטערט).

איינס פון די גרעסטע וואונדער עלי אדמות איז די מענטשליכע מוח. אנדערש ווי מען טראכט פשוט אז די מוח איז ווי א בעטערי פאר די גוף, וואס מאכט אלעס זאל ארבעטען, איז די מוח מער אזוי ווי א ריזיגע נעטווארק סיסטעם, ווי ס'קומען און גייען יעדע מינוט ביליאנען מעסעדזשעס! און די מוח איז די קאמענד סענטער, וואס באקומט אלע אינפארמעשאן, און לערנט עס אפ, און טיילט באפעלען פאר אלע איברים וויאזוי צו רעאגירן.

די וועג וויאזוי עס גייט איז, אז אין די גאנצע גוף איז אויסגעשפרייט סענסארס וואס נעמען אויף יעדע רגע אינפארמעישאן, סיי אינערליכע ווי אזוי די גוף זאל ארבעט, און דאס איז כולל יעדע קלענסטע דיטעיל אין די גוף, פון די הארץ קלאפען ביז די נעגל זאל וואקסען. און סיי אויף אויסערליכע זאכן, וואס די ה' חושים כאפן אויף, קודם צו פארשטיין וואס זיי זעהן הערן פילען וכדומה, און נאכדעם פארשטיין וואס האט דאס מיט די מענטש.

און נאכדעם וואס די מוח פארשטייט שוין די מצב, שיקט ער א קאמענד וויאוזוי דער מענטש זאל ריספאנדען צו דעם, דאס מיינט אז יעדע פון די איברים וואס גייען אנטייל נעמען אין די קומנדיגע אקט, באקומט א מעסעדזש וואס ער האט צו טאן.

למשל ווען א מענטש טרעפט זיין חבר וואס זאגט אים א שמייכלדיגע גוט מארגען, די ערשטע זאך איז געשיקט געווארען א מעסעדזש צום מוח מיט אינפארמעישאן מיט 'עפעס' א געגנשטאנד, וואס די אויגן האט געזעהן, און אינפארמעישאן פון 'עפעס' א קול וואס די אויערן האבן געהערט, מיט 'עפעס' א ווארימע געפיל וואס די הארץ האט געשפירט. און די מוח דארף קודם צוזאם שטעלן אלעס און כאפן אז דא האט איינער געזאגט גוט מארגען, ווער איז דאס? וואס מיינט גוט מארגען? פארוואס איז מיר געשמאק דאס צו הערן? שיקט די מוח שנעל סענסארס צו די זכרונות קעסטעל און שלעפט ארויס די אינפארמעישאן, אז דאס איז יענקל מיין חבר, און ער גריסט מיר גוט מארגן וואס דאס גרוסט מען צופרי, און מיט דעם ווייזט ער מיר אז ער איז אינטרעסירט אין מיר און דאס מאכט מיר גוט שפירען. יעצט ווען דער מוח פארשטייט שוין די סיטועישאן, שיקט די מוח א קאמענד צו די מויל, מוסקלען פון שמייכלען און צו אלע אנדערע חלקים וואס נעמען א חלק אין דעם גוט מארגען, צוריק צו ענטפערן גוט מארגן גוט יאר, און זיך נעמען רעדן וועגן געוויסע זאכן וואס די מוח האט געשיקט צו די זכרונות אז מ'זאל שנעל שיקן די אנפארמעישאן וואס איז דא דארט וועגן יענקל.

דאס קומט פאר יעדע רגע, און נישט נאר איין זאך אויף אמאל, נאר יעדע רגע קומט דאס פאר מיט צענדליגע זאכן, ווייל בשעת מעשה וואס יענקל זאגט אים גוט מארגן, ארבעט די גאנצע גוף ווייטער פון די הארץ ביז די נעגל, וואס אלעס גייט מיט מעסעדזשעס, און אויך ארבעט א גרויס חלק פון דעם מענטשן'ס מחשבות ווייטער, ער ווייסט פונקטליך ווי ער שטייט און וואס ער דארף טאן יעצט, און די מחשבות שיקן מעסעדזשעס צום מוח פרעגן ווי לאנג דארף איך רעדן מיט יענקלע'ן, וכדומה און לויט די גאנצע בילד שיקט די מוח כסדר מעסעדזשעס וואס צו טאן.

און אויב יענק'ל דערציילט אים בתוך הדברים א פרייליכע אדער טרויעריגע אדער סתם אזוי א אינטרעסאנטע נייעס, און די אויערן און אויגען און מחשבות און זכרונות און געפילען וכדומה שיקן כסדר מעסעדזשעס צום מוח מיט די אינפארמעישאן, און די מוח לערנט אלעס אפ, מיט די הילף פון מעסעדזשעס וואס ער שיקט כסדר ארום פרעגן וואס דער עולם ווייסט וועגן די געשענישען, און ווי נאר ער באקומט די גאנצע פיקטשער, לערנט עס די מוח אפ, און מאכט א באשלוס וויאזוי צו ריספאנדען, און שיקט מעסעדזשעס פאר די אברים וויאזוי צו ריספאנדען.

נישט נאר זאכן וואס דער מענטש כאפט אויף, ווערט געשיקט צום מוח, נאר אפילו אזעלכע קליינע זאכן וואס דער מענטש כאפט אפילו נישט, ווערט אויך געשיקט צום מוח און די זעלבע פראצעדור גייט אן מיט די זאכן אויכעט.

דהיינו בשעת דער מענטש שמועסט מיט יענקל שיקן די חושים און מחשבות כסדר מעסעדזשעס פון יעדע קליינע זאך וואס גייט פאר, יעדע מענטש וואס גייט דורך, יעדע קליינע קול וואס הערט זיך, ווערט גראד געשיקט פאר די מוח די אינפארמעישאן, און די מוח לערנט עס אפ, מיט די הילף פון אלע אינפארמעישאן וואס די מוח ווייסט וועגן דעם, וואס דאס באקומט די מוח דורך דעם וואס ער שיקט מעסעעדזשעס צו יעדן איינעם צו ענטפערען אויב זיי ווייסן עפעס וועגן דעם, און ער ענטפערט פאר די מענטש קודם אויב עס איז גענוג וויכטיג אז דער מענטש זאל עס אויפכאפן! און אויב עס איז גענוג וויכטיג דער מענטש זאל עס אויפכאפן, יעצט ווי וויכטיג איז עס אז עס זאל בכלל באקומען א תגובה, און אויב יא ווי א שטארקע תגובה.

די סיסטעם ווערט אגערופן די נערווען סיסטעם, און די סענסארס ווערן אנגערופן ניוראן'ס וואס זענען קליינטשיגע נערווען צעלן, און די אינפארמעישאן ווערט אנגערופן ניוראן- טראנסמיטערס, יעדע ניוראן איז צוזאם געשטעלט פון דריי חלקים: 'דיסאומע', וואס דאס איז די עיקר סעל. 'דענטרייטס' וואס דאס איז די חלק וואס כאפט אויף און ברענגט אינפארמעישאן, צום קאמענד סענטער וואס איז אין די עצם סעל די דיסאומע. און 'עקסאן' וואס דאס איז די חלק וואס איז די רעדנער וואס טראגט די קאמענד צו די נעקסטע סעל, און אזוי ווייטער ביז צום מוח און צוריק.

עס איז דא נאך א סיסטעם אזוי ווי די נערווען סיסטעם, וואס ווערט אנגערופן די ענדאקריין סיסטעם, וואס ארבעט מיט גלענדס און די מעסעדזשעס ווערן אנגערופן הארמאנ'ס, דאס ארבעט אסאך שטייטער פון די נערווען סיסטעם, אבער די עפעקט בלייבט אסאך לענגער, און איז געשטעלט אויף מער יסודות'דיגע זאכן ווי אנטווקלונג און מוד'ס און נאך.

די מוח אליינס האט ביליאנען סענסערס און קעיבעל קאנעקשאן'ס, עס איז ווי די אינטערנעט וואס איז א מעכטיגע אינפארמעישאן סיסטעם וואס מיליאנען קאמפיוטער'ס און טענעלאגישע כלים קאנעקטען זיך צו דעם. די דאקטורים זאגן אז עס איז דא מער קאנעקשאן'ס פון קעיבלס אין די מוח, מער פון אלע קאנעקשאן'ס צו די אינטערנעט פון די גאנצע וועלט. און אויב זאל מען אויסשפרייטען אלע דינטשיקע קעיבלס פון די מוח אין די לענג, וואלט עס אנגעקומען ביז די לבנה און צוריק!

עד כאן אביסל פון די מוח פון א מענטש. די חילוקים פון א עידיעידזשדי מוח, אין א קומענדיגע תגובה בעז"ה.

אוועטאר
האנטעך
שר חמישים ומאתים
תגובות: 336
זיך איינגעשריבען אום: מיטוואך פאברואר 04, 2015 12:12 pm

אביסל די טבע און די מעלות פון דעם מענטש מיט ADHD

תגובהדורך האנטעך » דינסטאג יוני 28, 2016 12:36 pm

כדי די מוח זאל קענען אנגיין מיט די גאנצע סיסטעם, איז דא א ספעציעלע אפטיילונג וואס מאכט סדר, עס טוט די ארבעט פון יעדע סעקרעטאר, עס טיילט אפ וואס איז וויכטיג און וואס נישט, און פון די וואס איז וויכטיג, מאכט ער א סדר וואס וועט מען מאכן פריער און וואס שפעטער.

פאר דעם דורכשניטליכן מענטש איז שווער צו טאן נייע זאכן, וואס ער ווייסט נאך נישט אויב עס וועט מצליח זיין. ווייל ער האט שוין א סיסטעם און א געוויסע סארט געדאנקען גאנג, וואס דאס קען ער און דאס קען ער גרינג מסדר זיין. די זעלבע זאך האט ער נישט ליב קיין נייע סארט געדאנקען גאנג, זיין סיסטעמאטישער חלק מוח ווערט באדראעט פון חידושים, ווייל די חידוש איז גרעסער פון זיין יכולת עס צו מסדר זיין. אזוי ווי יעדע סעקרעטאר האט ליב רוטין וואס ער ווייסט אז ער קען הענדלען.

אבער ביי די עידידי ארבעט נישט גוט די חלק סעקרעטאר אין מוח. וועגן דעם יעדע זאך וואס קומט אן צו זיין אויפמערקזאמקייט, גייט גלייך צו די הויפט אפיס אין מוח וואס גיבט באפעלן, און דרייט א קאפ. אמאל קען ער ציען אויפמערקזאמקייט אסאך מער ווי ער דארף באמת באקומען, און גלייכצייטיג מאכן אז דאס וואס דארף יעצט באקומען די אויפמערקזאמקייט זאל עס נישט באקומען.

אבער בעיקר יעדע רגע ציעט א צווייטע זאך די גאנצע אויפמערקזאמקייט זיינע, און ווען די זאך קומט אים אריין אין מוח ארבעט די גאנצע סיסטעם פון לב ומוח אויף די פראיעקט.

למשל ווען ער האלט אינמיטען לערנען און א יוד, וואס ער האט אמאל געארבעט מיט אים אויף א געוויסע וויכטיגע ענין, גייט אדורך, פליעט ער גלייך אריין אין יענע פרשה מיט זיין גאנצע לב ונפש, און דאס קען אים ברענגען גלייך צו מאכן יעצט אפאר טעלעפאנען וכדומה.

און דא איז די חילוק פון דעם עידידי און דעם עידי עיטשדי. ביי דעם עידידי איז יא דא א געוויסע סדר, נאר די סדר איז געבויעט אויף נישט סדר, למשל א גרויסע עסקן וואס איז איבער געגעבן בלב ונפש צו העלפן יודען, אבער אויב האט ער נישט קיין סעקרעטאר, וועט ער ארבעטען אויף וועלכן קעיס עס כאפט אים , אבער מיטן גאנצן לייב און לעבן. אבער אויב עס וועט אנקומען שוועריקייטן, ווי אנדערע עסקנים וועלן זיך אריינמישן און האלטען אנדערש ווי אים וכדומה, אדער סתם עס וועט זיך אויספעלן א רוטינע ארבעט וואס עס פעלט אים די התחדשות, וועט אים שוין זיין שווער צו ארבעטען ווייטער, ווייל די סיסטעם וויאזוי ער ארבעט איז לויט די מוט און התחדשות וואס ער האט, נישט לויט די צעטל וואס ער האט זיך נעכטן אנגעגרייט וואס צו טאן.

אבער ביי די עידי עיטשדי ארבעט די חלק פון דעם סעקערטאר בכלל נישט, ביי אים איז אלעס אויסגעשטעלט לויט די מוט וואס ער האט. אבער אפילו ווען ער וועט שוין אנפאנגען צו ארבעטען, אבער יעדע רגע וועט נאכאיינער אנקומען צו זיין אויפמערקזאמקייט און אים אוועקשלעפן. אזוי ווי דער נדבן איז אנגעקומען צו א זאל ווי נצרכים שטייען, און יעדער פאנגט אן צו שרייען און ציען זיין אויפמערקזמקייט צו זיך, און אויב דער נדבן וועט נישט מאכן א געוויסע סדר, וועט אויסגיין די גאנצע געלט און קיינער וועט נישט זיין צופרידן.

אבער אויב טרעפט ער א זאך וואס ער האט א שטארקן אינטרעס. און אויך פעלט זייער וויכטיג אויס אז כסדר זאל זיין טשעינדש אוו סין, יעדע רגע א צווייטע סצענע, כדי זיין לויפנדיגע מוח זאל קענען אנגיין. און פון די אנדערע זייט פעלט זיך עס אויס אז עס זאל זיין א ארבעט וואס עס שטערט נישט אז יעדע פאר מינוט קען ער אוועקפליען ערגעץ למשל אז ער דרייווט צו א געוויסע פלאץ יעצט זיין מוח קען רואיג פליען ווי עס פליעט כל עוד ער קומט אן ווי ער דארף און ער מאכט נישט קיין עקסידענטן וכדומה. דעמאלס וועט ער זיין בריליענט, ער וועט טאן אין איין טאג זאכן וואס דורכשניטליכע מענטשן טוען אין אפאר וואכן, אן קיין גוזמא!

ווי אויך האבן די עידידי מוחות האבן נישט די בלאקעדזש פון צו הערן און לערנען נייע זאכן, וואס זענען אינגאנצען אנדערש פון וואס זיי האבן געטראכט ביז יעצט, ווייל זייער סעקעטאר ארבעט נישט, די סאבקאנטשעס איז מער אפן ביי זיי. די חלק וואס פילטער נישט אזוי יעדע זאך וואס ער הערט צו עס שטימט מיט וואס ער האט געוויסט ביז יעצט.

נאך א מעלה וואס די מענטשן האבן איז זייער פרישקייט, יעדע זאך וואס זיי טוען, איז עד הסוף, אויב ער איז א פראדזשעקט מענעדזשער וואס האט הילף אויף צו ערלעדיגען די פרטים,קען ער אריין ברענגען א מורא'דיגע התחדשות אין פלייסיקייט אין די פראייעקט.

נאך א זאך איז שעפערישקייט. היות זיין מוח ארבעט כסדר, און יעדע זאך וואס ער זעהט, לינקט אים צו אנדערע אינפארמעישאן וואס האט א שייכות צו דאס וואס ער זעהט יעצט, ממילא קען ער טרעפן מורא'דיגע עצות אויף יעדע פראבלעם וואס א צווייטע מענטש פאלט נישט ביי.

ווי אויך היות זיין מוח איז זייער מקיף'דיג און שפרינגעדיג, ממילא קוקט ער א מצב פונדרויסן, און וועט באמערקן אסאך קלייניקייטען אבער וויכטיגע איינצעלהייטען, וואס א צווייטער מענטש וועט נישט באמערקן. ווי אויך קען מען אים נישט אפנארען ווייל ער האט א דרויסנדיגע בילד אויף די מצב.

ער איז מורא'דיג אמת'דיג און אפען, און א שטיק הארץ, דאס קומט ווייל יעדע זאך קומט גלייך פון די קאמענד סענטער און עס גייט נישט דורך די אלע פילטערס אויפן וועג פון דעם סעקרעטאר און אלע חשבונות וואס קומען, נאר ער איז זייער קאמפאלסיוו ער איז זייער ספאנטאניש, טוט און ענפערט גלייך אויפן פלאץ אן אדורך טראכטען אלע חשבונות וואס די אנדערע מוח'ס סעקערטאר טוט.

און פון די אנדערע זייט איז ער זייער סענסעטיוו ווייל ער האט נישט די פילטער נאר יעדעס ווארט קומט גלייך אן צו די עצם נשמה זיינע.

זיין סענס אוו יומער איז זייער שטארק, ווייל א וויץ קומט פון זעהן זאכן אין א אנדערע פארום ווי געווענדליך, און דער עידי עיטשדי זעהט זאכן פון אסאך פערספעקטן ווייל זיין מוח לויפט אים.

וועגן דעם קען אזא מענטש פארגעסן אויך קליינע פרטים, ווייל געדענקען די פרטים קומט פון די חלק מוח וואס איז די סעקרעטערי, וואס גיבט זיך אפ מיט געדענקן די אלע פרטים און זיי מסדר זיין און אויספירן.

פאר אזא מענטש איז גרינגער צו אליינס טאן די 'גאנצע זאך' אפילו עס איז אסאך א גרעסערע און שווערערע ארבעט, ווי צו 'העלפן' און טאן נאר אפאר פרטים. אים איז גרינגער צו אריין קומען אין קאך און אפקאכן די גאנצע שבת, אדער אוועק וואשען די גאנצע שבת וכדומה ווי צו געדענקן צו ערלעדיגן צוויי דריי זאכן, אדער ווי צו זיך שפילען מיט די קינדער זאכן וואס עס ציעט אים נישט און ער פילט אז ער שפרינגט פון די הויט.

ווען ער לערנט איז אים גרינגער צו אפלערנען א גאנצע ספר און נאך א שטיק צייט עס נאכאמל עס איבערלערנען, ווען ער האט עס שוין אביסל פארגעסן און ער באקומט נאכאמאל דעם חשק, (וואס אויב האט ער נישט דעם חשק קען ער עס די ערשטע מאל אויך נישט לערנען), ווי איידער מסכם זיין די זאך נאכן לערנען, אדער חזר'ן יעדען טאג אביסל.

א סיסטעמאטישע זאך קען ער נאר האלטען אויב עס איז א זייטיגע זאך אין די טאג, א עמטליכע זאך דארף גיין פול פורס מיט עליות און ירידות.

ווען ער האלט חשבון אויף אלעס וואס ער טוט כאפט ער אז ער האט אויך א סיסטעם בערך אזוי: איינמאל אין צוויי וואכען לערנט ער פינעף בלאט גמרא. און אזוי ווייטער די אנדערע שיעורים. וואס למעשה קומט אויס אז ער לערנט עני טיים אזוי סאך און פלייסיג ווי א צווייטער נאר אנשטאט יעדן טאג א בלאט, איז עס צוטיילט לויט דעם חודש.

אדער לערנט ער יעדן טאג 10 מינוט גמרא, און אזוי ווייטער אלע אנדערע שיעורים וואס דעמאלס קומט ער אן ווייניגער אבער סאך מער מיני זאכן.

בדרך כלל איז דא ביידע סיסטעמס ווענדט זיך ווי שטארק עס ציעט אים.

די מענטשן האבן ליב בדרך כלל צו עוסק זיין אין אסאך זאכן אויפאמאל פון איין זאך צום אנדערען, און קענען נישט זיין אין איין זאך צו לאנג. אבער ווען ער פארשטייט וויאזוי צו מאכן זיין סיסטעם קומט ער אן זייער פיל בעז"ה.

וועגן דעם קענען די אלע מענטשן אמאל האבן ספיקות: בין איך קלוג אדער נאריש, האב גאר א גוטע קאפ אדער גאנץ א שוואכע בינוני קאפ, בין איך פויל אדער א זריז, בין איך טויגליך אדער א גרויסע חולם, און די תירוץ איז אז ביידע! עס ווענדט זיך נאר צו ער ווייסט די וועג וויאזוי צו נוצן זיינע מעכטיגע מאטארען אדער נישט!

דער ספר ברענגט אז איינמאל זאגט אים איינער. דו קענסט דעם יענקל? ווען איך האב געלערנט מיט אים אין חדר האט ער בכלל נישט פארשטאנען צו חשבון. היינט איז ער א מארגעדזש לויער, איך בין געווען ביי אים ער האט מיר געזאגט אזעלכע טיפע און אייגנארטיגע חשבונות אז איך האב קוים געקענט מיטהאלטען!

יא! אויב לערנט ער עס אויף די נארמאלע וועג פון טריקענע מאטעמאטיקס כאפט ער עס נישט, אבער ווען ער טוט עס דורך מיט זיין אייגענע מהלך צו פארשטיין די זאך פונקטליך וויאזוי עס ארבעט, כאפט ער עס שוין איינמאל, און נאך סאך בעסער ווי דער גוטער יונגל אין חדר!

אוועטאר
האנטעך
שר חמישים ומאתים
תגובות: 336
זיך איינגעשריבען אום: מיטוואך פאברואר 04, 2015 12:12 pm

תגובהדורך האנטעך » דאנארשטאג יוני 30, 2016 11:42 am

נאכדעם וואס אונז האבן שוין אביסל ארום גערעדט וואס עידידי איז, וויל איך צוקומען צו דאס וואס האט מיך געמאכט שרייבן וועגן דעם.

איינס פון די הויפט שטערונגען פאר די יודען מיט די טבעיים איז לאו סעלף עסטיעם, ווייל למעשה האבן די מענטשן שוועריקייטען אנצוגיין מיט די געהעריגע פשוט'ע לעבן, און זיי קענען אנקוקן די מעלות זייערע ווי זייטיגע זאכן.

די ווארט לעולם יהא אדם קודם זיי א מענטש נאכדעם ירא שמים, קען צוברעכן די מענטשן עד הסוף! זיי שפירען זיך אויסגעשפילט און לא יוצלח'דיג אויף א מורא'דיגע אופן. זייער אסאך מאל ווייסן זיי נישט זייערע מעלות בכלל, און אמאל קוקן זיי עס גאר אן ווי חסרונות!

א טאטע פון גאר א חשובע בחור וואס לערנט זייער פלייסיג ממש א מתמיד עצום, א בחור צו גאט און צו לייט, שטארק אנגענומען צווישן די חברים, ממש א כליל המעלות, וואס האט אין ישיבה דריי שוועריקייטען, איינס ער קומט נישט אן יעדן טאג צום פארטאגס סדר, (ווייל ער לערנט גאנצע נעכט בהתמדה עצומה), ס'איז אים שווער צו גיין צו שיעורים, און עס איז אים גרינגער צו לערנען אליינס.

די טאטע האט עס נישט אנגעקוקט ווי קיין חסרון ווילאנג דער בחור איז זיך גוט מסדר און גייט אן ב"ה. איז צוגעקומען איינע פון די הנהלה צו דעם טאטען, אז דער בחור ליידט פון עפעס א חולי נפש, (דער טאטע האט נישט אפילו געוויסט נאכצוזאגען וועלכע אותיות!), און מ'דארף גיין צו העלפ ווייל די בחור קען אריין פאלען ח"ו אין מרה שחורה, מ'זעהט שוין אז ער איז נישט סאושעל, און ווער ווייסט ווי עס קען נאך אנקומען!

לכאורה האט ער געמיינט צו זאגן עידידי, אבער די וועג וויאזוי דער יוד קוקט אן עידידי, און די וועג וויאזוי ער האט גערעדט כאילו דאס איז א מחלה, צוברעכט סתם די מענטש, און שטערט אים צו אויסנוצען זיינע כחות.
איך גיי נישט אריין אין די נושא פון מעדיצינען וואס די אנדערע האבן שוין מרחיב געווען בדיבור אויף די נושא, און איך האב גארנישט מער וואס צוצולייגען, אבער אויב זאל זיין פילען וואס העלפן מענטשן דורכצוגיין נסיונות, מיינט עס אבער נישט אז יעדער וואס האט נסיונות איז קראנק!

עידידי איז א טבע וואס גייט אן פון אייביג, און אפילו ווען עס איז נישט געווען קיין מעדיצינען אויף דעם זענען אויסגעשטיגען גאונים וקדושים אפילו און וועגן זייערע טבע פון עידידי. עס איז אין די בחינה פון כל הגדול מחבירו יצרו גדול הימנו, און אויב קען מען זיך העלפן מה טוב ומה נעים, אבער די עצם זאך עס אנצוקוקן ווי א מחלה אפילו ווען מען שטעלט צו א רפואה, איז א זאך וואס צוברעכט מורא'דיג שטארק די סעלף עסטיעם פון די מענטש און לאזט אים נישט אויסנוצען זיינע פאטענשעלס, און שטייגן באמת לויט זיין כחות הנפש.

איז אוודאי איז זייער גוט אז די יודען זאלען וויסן פון זייער טבע, און נישט זיין צובראכן און אויפגעבן אויף זיך אליינס וועגן ער איז פעלערהאטיג ח"ו, נאר פארקערט ער זאל קוקן אויף זיינע מעלות, און זיך לערנען זיך צו מסדר זיין מיט זיינע שוועריקייטען. אבער פון די אנדערע זייט זאלן זיי וויסן זייער קלאר, אז זיי ליידען נישט פון עידידי! נאר זיי האבן די טבע פון עידידי וואס ברענגט זיי אסאך מעלות און אויך געוויסע שוועריקייטען, און בעז"ה מיט די ריכטיגע הילף קענען זיי אויסשטייגען מיט גרויס הצלחה אין זייער לעבן.

ווי אויך מיין איך, אז עס קען זיין א הכרעה אין די דעבאטע אין די ערשטע אשכול, צו א געוויסע סארט פנימיות'דיגע מהלך אין חסידות קען העלפן די עידידי, עס איז קלאר איז געוויסע סארט מהלכים אין ספרים ביי כלל ישראל רעדן דייקא צו די עידידי סארט תכונת הנפש, וועגן דעם איינער וואס האט בעז"ה זיין ריכטיגע פרנסה וכדומה, נאר עס פעלט אים די ריכטיגע מהלך החיים ווי ער זאל קענען אויסשטייגען מיט זיין עידידי, ווען ער קומט אן אין אזא פלאץ וואס קוקט נישט אזוי שטארק אויף סדר און אנדערע זאכן וואס דער עידידי מוטשעט זיך מיט דעם, נאר פארקערט רעדט חיזוק און אנצוגיין אין יעדע מצב, און שטעלט צו מזון הנפש צו טיפע חלקים און מוח און אין הארץ, (און עס איז לאו דוקא נאר איין חסידות נאר אסאך), ווען א עידידי קומט אן אין אזא פלאץ קען עס אים אמאל העלפן זייער שטארק.

אבער פון די אנדערע זייט זענען דא אסאך עידידי מיט אנדערע תכונת הנפש וואס וועלן נישט געהאלפן ווערן פון דעם אליינס, און די חסרונות וואס זיי זעהן אין די פלעצער שטערט זיי פון זי מתחבר זיין צו יענע פלעצער, זיי דארפן זיך טרעפן זייער מהלך חיים געבויעט לויט זייער תכונת הנפש.

אוועטאר
האנטעך
שר חמישים ומאתים
תגובות: 336
זיך איינגעשריבען אום: מיטוואך פאברואר 04, 2015 12:12 pm

תגובהדורך האנטעך » דאנארשטאג יוני 30, 2016 1:29 pm

פי די עף פון די אשכול
צוגעלייגטע
ADD-ADHD.pdf
(109.59 KiB) דאונלאודעד 216 מאל

זיידענע בעקיטשע
שר חמישים ומאתים
תגובות: 285
זיך איינגעשריבען אום: מאנטאג מאי 17, 2010 8:00 am

תגובהדורך זיידענע בעקיטשע » מיטוואך פאברואר 22, 2017 4:29 am

הק' זיידענע בעקיטשע מיושבי ארץ הקודש


צוריק צו “געזונטהייט”

ווער איז אונליין

באנוצערס וואס דרייען זיך דא: נישטא קיין איינגעשריבענע באנוצערס און 6 געסט