בתי מדרשים בבית שמש יתן קולו בבכי, ויבכו כל בית ישראל

[יגרסהדותא]

בית שמש - היינט דאנערשטאג פארטאגס - 4:45 לפנות בוקר (זייער זייגער) - זענען געקומען די רשעי עמינו פון די מדינה הטמאה, און צו'זעצט און צובראכן דריי בתי מדרשים אינעם שטאט.

די שטאט וויינט, יא, די שטיינער די העלצער די ציגל אלעס קלאגט אויף אזא חורבן וואס האט פאסירט אין אזא צייט וואס גאנץ כלל ישראל קלאגט און וויינט אויפן חורבן בית המקדש, און דא דארף מען לאזן נאך טרערן אויף די בתי מקדשי מעט.

ס'איז פאררופן געווארן דורך די דארטיגע רבנים אן יום תפלה ואזעקה אויף דעם אומגליק. זאל דער שוכן במרומים שוין רחמנות האבן אויף וואס די אידן מאכן דארט מיט "ברוחניות"! ס'איז א שרעק.

כל המתאבל על "ירושלים" זוכה ורואה בנחמתה

עטעטשמענטס

1.jpg (84.54 KiB) געזעהן געווארן 506 מאל

2.jpg (104.96 KiB) געזעהן געווארן 499 מאל

[צייטליך]

וואס איז די מעשה דארט? די עריה זענען דאך נישט סתם א באנדע גנבים וואס האבן זיך אריינגעכאפט באישון לילה און צובראכן פענסטער און בתי מדרשים וי קריסטאל נאכט, עפעס איז דארט פארגעגאנגען מיסתמא.

יגר, פארש אויס די זאך און ברענג אינז א באריכט.

אינטערסאנט איז, דא קענט איר נישט טרעפן איין איינציגער פון די בילדונג דעפט. זאל אויף זיין אדער גיין אויף א דזשאב נאך פינף אזייגער נאכמיטאג, די חברה דארט ארבייטן אווער-טיים..

[שוועמל]

די ערשטע מאל איך הער עס

וואס הייסט איינגעווארפן? וויאזוי ווארפט מען איין? וועמענס לאט איז עס? טויזענט און איין קושיות!


איין זאך איז זיכער, בבולדאזער התגרו באומות בבולדאזער נידונו! ביג טיים.
זאל דער רבוש"ע אפהיטן אלע אידן וואספארא עונש ערווארט זיי פארן 'בולדאזער הרסו בה"כ'.

ה"י.

[יאנאש]

פונעם ערשטן צעטל וואס יגר ברענגט זעהט אויס אז עס רעדט זיך פון טרעילער שולן וואס מען האט אויפגעבויעט אויף ליידיגע לאטס צוליב דעם וואס די סיטי וויל נישט געבן פערמיטן צו בויען געהעריג.

צייטליך, עס איז נישט קיין נפקא מינה וואס די מעשה זאל נאר נישט זיין, עס איז אן אומדערהערטע חוצפה אז אן אזוי גערופענע ערשטע וועלט 'אידישע' מדינה זאל אומווארפן א שול אינמיטן די נאכט, כ'רעד שוין נישט דערפון אז אויב אזא זאך זאל געשען אין אמעריקא וואלט מען איבערגעדרייט וועלטן אזש וואשינגטאן די סי וואלט זיך געשאקעלט.

שוועמל, א געוואלדיג ווארט, באמת.

[אלעקסיי]

דאכט זיך אז אין דער היינטיגען איד איז באריכטעט די נייעס.

[שוועמל]

א געזעצלאז לאנד

מקויים געווארן דער פסוק בימים ההם אין מלך בישראל איש כל הישר בעיניו יעשה

[מיללער]

מורי ורבותי נאך מיינע תגובות ביי די האלעקאוסטער וועט מיר קיינער נישט חושד זיין פאר קיין ציוני, אבער האמת ניתן להאמר.

די מדינה איז נישט קיין 'געזעצלאזער לאנד' כלשון שוועמל, יאנאש'ס טענה איז אין אמעריקא וואלט אזאנס נישט פאסירט קויף איך אויך נישט (הגם זיי וואלטן ענדערש געשטעלט פאליציי מיט K-9 ענדערש ווי בולדאוזערס, אבער דער שול וואלט געווען פארשפארט) ובאס-מצה-בעקערי יוכיח.

די חרדים אין מדינת ישראל נעמען די מדינה אסאך מאל אויף א רייד און נוצן פראפאגאנדע מיטלען ווי פלאקאטן און הפגנות צו שטערן דעם געזעץ, אלעס מיט אן אויסרייד אז יענע זענען רשעים וציונים ממילא ברויך מען נישט פאלגן, דאס איז לדעתי פאלשע-קנאות און ברויך נישט טעלארירט ווערן דורך די מדינה.

יא, זיי זענען רשעים זיי זענען אומשטאנד צוצוברעכן בתי מדרשים, אבער 'איט טעיקס טו טו טענגל' זאגט מען אין ענגליש.

[לעווי]

איך בין מיך מצרף מיט הרב מיללער, א יעדער איינער וויסט אז איך בין אויך נישט קיין ציוני, און איך פארשטיי אז די מדינה זוכט אויסצורייסן אידישקייט וואו זיי קענען נאר, אבער הפקרות איז אויך נישט קיין וועג, עס זענען דא רעגולאציעס וואס עס איז נישט שווער זיי נאכצוקומען, והא ראי' די טויזענעטע בתי מקדש מעט איבער גאנץ ארץ ישראל.

מיר האט אבער מער געבאדערט די בילדער וואס איך האב געזעהן ווי די מוחים האבן איבערגעדרייט, פארברענט און וואנדעליזירט א טראק (אדער אפאר) בשעת די הפגנה היינט. איז דאס א נקמה? וועט דאס צוריק ברענגען די בתי מדרשים? ועל כולם, אזוי פירט זיך אויף אן ערליכע איד? ווי האט איינער פון די גדולים בזמינינו זיך לעצטענס אויסגעדריקט, אז רבי עמרם זצ"ל און זיינס גלייכן האבן געטון דראסטישע און אפילו ווילדע שריט בשעת'ן מוחה זיין אבער מיט די גרעסטע מאס אהבת ישראל און יראת שמים וואס עס קען נאר זיין.

[יאנאש]

וואס עס איז געשעהן דערנאך ווייס איך נישט, אבער די בילדער פונעם חורבן דארט איז עפעס וואס איר וועט נישט זעהן אין קיין שום פארגעשריטענע לאנד, די האס, די שנאה קעגן די חרדים איז געפערליך אז עס לאזט זיך נישט באשרייבן.

זיכער אז צומאל גייען די חסידים ארויף פון די גדרים, זיכער אז פולע דעמאסטראציע'ס וואלטן געקענט גרינגער פארביי גיין, אבער צו גיין זאגן אז עס איז דא עני תירוץ צו קומען פירע פארטאג'ס מיט טראקטאר'ס צושמעטערן וואס עס קומט אונטער די האנט איז אבסורד, וואס טוט זיך מיט די ספרי קודש ספר תורות, טו"ת וכד', נישט קיין חילוק אויב מען האט געווארענט אדער נישט, עס איז נישט קיין זאך וואס א רעגירונג טוט היינט צוטאג.

סארי פאר מיין ציוניזים...

[מיללער]

אין אנדערע ווערטער יאנאש, ביידע זענען שולדיג, איא?

[יאנאש]

שולדיג זענען מיר אלע, ווען נישט אונזערע חטאים וואלט שוין אודאי משיח דא געווען.

אבער ניין מען קען נישט זאגן דאס מאל אז די חרדים זענען אייניג שולדיג, איך זעה נישט מיט וואספארא שריט א פרייע רעגירונג זאל מעגן ווערן אזוי אנגערייצט סאו נאו מעטער וואט די איינוואוינער דארט האבן געטון טאר אזא זאך נישט געשען.

[מיללער]

פון פראוואקאציעס קומט קיין גוטס נישט ארויס והוא הנותנת אין אזא רעגירונג ברויך מען נאך מער אבאכט געבן, אז נישט איז הקולר תלוי בצאוורם, יענע וועלן פלאקערן אין גיהנם, אבער אנדרייען טאר מען נישט.

[אבאמא09]

אין אמעריקא, און אין אנדערע לענדער וואס זענען אויפן זעלבען שטייגער, טוט די רעגירונג נישט אזעלכע זאכן ווי אנווארפן הייזער, וכ"ש א טרעילער, וואס אויב וויל מען דוקא קען מען עס אוועק שלעפן, עס ליגט זיכער אין דעם א שטארקע מאס פון אימציוויליזירקייט, ווי חכמינו ז"ל האבן שוין געזאגט "ישראל כשיורדין יורדין עד לעפר", ווי פארשטענדליך טו איך נישט בארעכטיגן די אלע ווילדע שטיקעס פון די חרדים, וואס ווי מאנכע געבן איבער טוען עס טאקע געווענטליך נישט די יראי השם, נאר די פסולת פון אונזער מחנה, וואס זענען כמעט דומה צו זיי, אין גייען אויך אריין אינעם פריערדעגן כלל פון חז"ל.

אבער נישט צו פארקריכן "אין א ציווילעזירט לאנד פאסירט נישט אזונס נישט קיין חילוק פארוואס".

[קרעמער]

איך בין שאקירט געווארן צו הערן אויף די היימישע נייעס ליניעס אז מען האט אויסגעשאסן שויבן פון א שטאטישע קאר אין בית שמש. דאס איז אין מיינע אויגן א גרעסערע חילול השם ווי דאס וואס די רשעים צוברעכן שוהלן.

מיר האבן אן אנדערן חינוך געקריגן ווי זיי.

[יאנאש]

האט מען דען נישט ארויסגעריקט א אקסל פאר א פאליס אויף 13 עוועניו עטליכע יאר צוריק? האט מען ווייניג מאל זיך געפראסקעט מיט פאליציאנטן ביי די באגלייטנ'ס הקפות חופה'ס ענד סאו אן, גיוו מי עי ברעיק, עס איז דא פארדארבענע עפל איבעראל, דארט איז דא אביסל ווילדערע מענטשן מען קען נישט דשאדזן א גאנצע עדה וועגן די מעשים פון געציילטע.

[קרעמער]

די גרויל איז אז מען מעלדט דאס אלס א נייעס!

[שוועמל]

קרעמער,
א ווייטאג פאר זיך.
די פרייע פרעסע כאפט זיך צו דערצו און צו יעדן שטיקל נייעס וואס באשמוצט חרדים און צעשפילן דאס ברייט אויפן געוועב. קוק [נישט!] אביסל אין הארץ.קאם אדער אין ענליכע וועסטו יעדן טאג זעהן פרישע נ"ר מעשיות אויף חרדים וכדומה אזוי שיין צושמירט מיט בילדער און ווידיאו.

בשייכות מיט די יעצטיגע מעשה, עס פעלט נאך פרטים און מ'קען נישט סתם אזוי לאזן אומנויטיגע סטעיטמענטס. קלאר איז אז אין אמעריקע וואלט מען קיינמאל נישט איינגעווארפן אן אומלעגאלע טרעילער 4 פארטאגס, אפשר אוועקגעשלעפט נאך יארן פון ווארענונגען, מיט א קארט ארדער וכדומה. אין מאנגאליע, פאקיסטאן, קובא און איזראעל קומט דאס יא פאר. דאס איז דער הונטערשיד וואס איך רוף 'געזעצלאז'.

[לעווי]

עס איז דא דא צוויי באזונדערע נושאים וואס מען טאר נישט צוזאממישען.

איינס איז אז די פרייע ממשלה זוכט אויסצורייסן א יעדע טראפ אידישקייט אין ארץ ישראל, און ווי זיי וועלן האבן די מינדעסטע תירוץ און פארענטפערונג וועלן זיי עס טון. און פארדם ארבייטען זיי אזוי שווער אויף די תכנית הליבה געזעץ א.ד.ג.

עס איז דא נאך א נושא. די שטאט בית שמש איז פארוואנדלט געווארן אין א שטאט פון הפגנות אין די לעצטערע יארן. א יעדע צווייטע טאג ברענט די שטאט. א יעדע צווייטע טאג שלאגט מען זיך מיט די פאליציי, און די מעין גאסען זענען פארמאכט. הונדערטער היימישע משפחות וועלעכע האבן זיך אהין געצויגן מיט יארן צוריק ווייל זיי האבן געזוכט א רואיגע היימישע אטמאספער צו וואוינען אויסער די טשאלענט און קעץ טאפ וואס רופט זיך מאה שערים ווילן אנטלויפן היינט פון די שטאט. יא! די קדושה שיינט ארויס פון א יעדעס ווינקל, אבער אזוי שרייט ארויס די וויילענס און חוליגאניזם אויך. קען זיין אז די ווילדע מעשים ווערן געטון דורך שבבניקים, דורך די אספסוף שבקירבינו, קען זיין, אבער די וועלט און די גאס זעהט עס נישט אזוי. און דאס איז טאקע גורם אז מען זאל קומען אין מיטן די נאכט און ציברעכן בתי מדרשים. זיי האבן זיך זיכער געמאכט א חשבן אז עס איז נישט דא צו וועם צו רעדן דארט, ווייל די חברה וואס וואוינען דארט הרג'נן זיך דאך ארום מיט זיי טאג טעגליך, און פארדעם האבן זיי געטון די מעשה וואס זיי האבן געטון. זיי זענען נישט גערעכט, אבער די סבה וואס האט גורם געווען צו דער פאקט איז אויך נישט קיין ריכטיגע. און אויב מען וויל פאררעכטן יענעם, אדער זאגן אז יענער איז א רשע וכדו' דארף זיך קודם בודק זיין. מיר דארפן צו זיין די מוסטער פאר די פרייע, דערווייל אבער איז דא א גרופע פון יענע געגענט וואס זענען מבאיש ריח די ערליכע אידן בעיעני העם.

[צייטליך]

לעווי, גערעכט.

דאס איז אמאל זיכער און קיינער לייקענט דאס נישט אז די מדינת ישראל זיכן זיך צו פארטשעפן מיט די פרומע, עס איז פאר זיי א דארן אין אויג און פראבירן צו שטערן וואס מ'קען. דאס אלעס איז אמת און נישט קיין נייער זאך.

פאר די וואס טענה'ן אז אין אמעריקע וואלט מען דאס נישט געטוען, זאלן קוקן אויף די אנדערע זייט, אויב אין אמעריקע טוט מען יא דאס, דאס הייסט, אין ניו יארק, אויב זאל די סטעיט אפפמאכן אז עס איז נישט ערלויבט אויפצוהענגען סיינט אין די פובליק אן א פערמיט און עס וועלן זיין ווואס הענגן יא, די DOT וועט קומען און זיי וועלן דאס אראפנעמען, אפילו עס שטייט דארט אז מ'טאר נישט טראגן מיטן עירוב, דאס איז טאקע אידישקייט, אבער עס איז דא א געזעץ. לאמיר זאגן אז די אידן וועלן נישט זיין צופרידן פון דעם אז די DOT האט עס אראפגענומען, הלמאי זיי נעמען זיך אן פאר די עירוב טראגער, זיי זענען קעגן די וואס ווילן נישט טראגן מיט די עירוב, וואס מיינט איר גייט געשעהן? חוץ דעם וואס יעדער וועט שעלטן בלובערג וועט גארנישט זיין.

ווואס ס'האט זיך געטוען לעצטענס אין בית שמש ווען די שטאט-ראט האט אראפגענומען סיינס וועגן גיין אנגעטוען צניעות'דיג דארף איך אייך נישט דערציילן, איך ווייס אז ביי אנדערע עטווערטטייזמענט'ס וואלטן זיי עס נישט אראפגענומען, אבער די וועג וויאזוי מ'ריספאנט איז טאטעל ראנג.

ס'איז פאריאר געווען א גאנצער מהומה ווען צווישן די טעגליכע פראטעטן האט מען אנגעפאנגען צו ווארפן שטיינער אויף די פאליציי, א זאך ווואס איר וועט נישט הערן אין ניו יארק, אפשר אין הארלעם, די פאליס איז נאכגעלאפן דעם אינגערמאן און ער איז אריינגעלאפן אין סאטמאר'ן ביהמ"ד אויף רחוב יואל, די פאליס איז אנגעקומען אינווייניג און עס האט זיך אנגעפאנגען א געשלעג, איר ווייסט וואס די פאליס וואלט דא געטוען אויב איינער זאל ווארפן א אייזערנער באנק אויף זיי? בלי שום ספק האט ער די רעכט צו נעמען זיין רעוואלווער און שיסן אויף אום. און אזוי וואלטן די ניו יארקער פאליציי געטוען, אויב זענען זיי אין דעינדזשער דארפן זיי זיך פראטעקטן. דארט איז עס אבער א נארמאלער זאך, דארט האט מען זיך געשלאגן מיט די פאליס ארגער ווי סיי ווען, מ'האט אין ווירקלעכקייט געווארפן בענק אויף זיי, (ס'איז דא דערפון א ווידיאו) וואס איז דער ויצעקו דערנאך? מ'האט געמאכט פלאקאטן, פראטעסטן און פארפירט. און די צייטונגען שרייבן נאך אינטערן בילד "מדינת ישראל פאליציי מיט נאגייקעס שלאגן בארבאריש די פרידליכע מוחים"..

אין בארא פארק איז פאר צוויי יאר צוריק אנשטאנען א גאנצער מהומה ווען די פאליס האט געגעבן א טיקעט און אראפגעווארפן א עלטערער איד אויף דער ערד, בחורים און אינגעלייט זענען געווארן צוהיצט און אנגפאנגען מיט פראטעסטן, מ'האט געמאכט פייער'ס און אפגעבלאקט גאסן, ס'איז געווען ששון, א זאך וואס איז שוין נישט געווען יארן זינט איך געדענק, א טאג נאך די גאנצע זאך זענען אלע חרדישע עסקנים ארויפגעקומען און זיך אנטשולדיגט און שטארק פארדאמט די גאנצע אקציע, מ'האט געמאכט מיטונגען מיט די פאליציי זעהן אז עס זאל מער נישט פארקומען אזא זאך. און דאס איז געשעהן איינמאל און ווייסעך וויפיל יאר.

איר פארשטייט די חילוק?

ס'איז אמת אז מ'דעסקרימענירט קעגן די חרדים, אבער די ריספאנד פון די חרדים אין ארץ ישראל איז ארגער ווי די ריספאנד פון די - להבדיל - שווארצע אין הארלעם. שטעלט אייך פאר עס זאל פארקומען א מעשה אזויווי די שאן בעלל פרשה, נאר אין ירושלים, איך דארף אייך נישט שרייבן וואס עס וואלט זיך געטוען.

בייידע זענען זיך ווערט דאס געלט.

[גרויזאמער]

איך האב מחשבות זרות אויף דעם גאנצן ענין דארט וואס טוט זיך אין ארץ ישראל וועגן די באנעמונג פון חרדים און די מדינה.

ביי יעדע אזא נייעס נאך א פראטעסט אדער באלאגאן, זעט מען קלאר אז די חרדישע פרעסע איז מגלה טפח ומכסה טפחיים, זיי שרייבן אפענע ליגנט וואס זענען זיך סותר. אזאלכע אומפארשטענדליכע פראזן, ווי למשל "ברוטאל באהאנדלט בלויז פאר'ן חטא פון מוחה זיין אויף...."... דער זאץ איז אזאלכע בעלאני וואס מאכט מיך ברעכן יעדעס מאל.

אז א שטיקל נייעס קען נישט אראפגעגעבן כמות שהוא, אן קיין שטותים פון ערשטן קלאס, ברענגט דאס ארויף שטארקע חשדות אז דא ליגט באהאלטן פיל טיפער.

דאס מיינט אז לכבוד דעם וואס איך האלט אז דער מדינה איז א ניאוץ בה' ובתורתו, ווערט פארלאנגט פון מיר בכל התוקף צו האלטן אויך אז יעדעס מאל וואס די פאליציי ארעסטירט חרדים נאך פראוואקאציעס האבן זיי עס געטון אלץ שנאה צו חרדים און ריינע אנטיסעמיזם.

אין א דעמאקראטישע מדינה ווי אונזער מלכות של חסד וואלט ווען געקענט געשען די זעלבע מעשיות וואס טייטשט זיך די ערשטע רגע אויס אלץ "אנטיסעמיזם", און עס 'האט' שוין פאסירט. נאר וואס? אז מען האט די ריכטיגע איינפלוס, מען קומט צו פארשטענדעניש מיט די אינסטאנצן, מען רעדט צו זיי זייער שפראך, ווערט אלע פראבלעמען געלייזט. נעמט נאר דעם משל ווי דער פאליציי וואס האט גאר מיאוס באהאנלדט דעם פרוי אין מאנסי, אין א טאג צוויי איז מען געקומען צו א קלארע עמק השוה מיט די אינסטאנצן, מען רעדט, מען פארשטייט זיך.

די ווארט "דעמאקראטיע" איז נישט קיין דאמי, עס געשעט נישט אליין קיין פארשטענדנישן לכבוד דעם ווייל עס איז "דעמאקראטיע", עס ווערט נישט אליינס סטאביליטעט ווייל עס איז דעמאקראטיע, יעדעס ענין פאר זיך דארף ווערן דורכגעארבעט, און יעדער פאליטישען און קולטור האט זיך זיינע פארלאנגן אינעם ראם פון דעמאקראטיע. דאס איז אין אמעריקא, און סיי וועלכע מערב וועלט לאנד.

אלא מאי? אז איך פארשטיי אז מען טאר נישט צוזאמענארבעטן מיט די ציונים? אז מען טאר נישט גיין צו די בחירות און ווייזן א וואלן וואנט? וועגן דעם מוז איך בעל כרחך האלטן אז יעדע אינצידענט מקטן ועד גדול קומט פון אנטיסעמיזם ושנאה ליהדות? די שכל הישר זאגט אז דאס קומט פון יארן אומפארשטענליכקייט, פון יארן וואס מען ארבעט נישט צוזאם, און עס ווערט ערגער און ערגער. און ווען מען ארעסטירט איינעם "פאר'ן בלויזן חטא פון מאכן פראוואקאציעס", אדער ווען א פרייע רעגירונג צעווארפט אן אומלעגאלע שול ווען זיי שפירן אז די חרדים פירן זיי ביי די נאז יעדעס מאל באזונדער און מען קען נישט רעדן צו זיי אויף מאמע לשון, דאן פארלאנגט זיך נישט א בליק בלויז אויף דעם אינצידענט אליינס, עס איז א שורש'דיגע פראבלעם, מען דארף קוקן אויף די "ביג פיקטשער". ווייל איך וואלט פארשטאנען אמעריקא אויך אין אזא פאל, און גאנץ אמעריקא וואלט זיך אנגענומען פאר די רעגירונג ווען די מצב איז דא אזויווי דארט, גארנישט וואלט נישט אויפגעשאקלט געווארן! הייבט זיך נישט אן!.

און זאלן מיר זיי מוחל זיין, די חרדישע פרעסע, וואס זיי האבן שוין א פון פריערדיגע תירוץ אויף מיין קשיא, רפואה קודם למכה, אז דער מדינה איז סתם אז נארישע מדינה, משוגעים, פארברעכערס, די ערגסטע מדינה אין די וועלט, און אזאלכע בטלנים אז די האר פון קאפ קען זיך אויפשטעלן.

זאלן זיי מיר מוחל זיין. דער מדינה איז א פעסטע מדינה. די וועלט שאקעלט זיך מיט דעם מדינה. עס שטייט פעסט עקאנאמיש, מיליטעריש, קולטור, ציוויליזאציע און דעמאקראטיע, און וואס נישט.

און דאס איז נישט קיין שום סתירה מיט דעם פאקט אז דער מדינה איז א ביטערע מרידה במלכות שמים, און מעגליך די גרעסטע אין די היסטאריע.

און אז חרדישע אידן "טארן" זיך נישט פארשטיין מיט די רעגירונג דארט, - וואס איך ווייס נישט די גדר דערפון - זאלן זיי אדער ליידן דערפאר, אדער אפטראגן פון דארט און גיין צו א רעגירונג וואס מען מעג זיך יא פארשטיין מיט זיי.

[צייטליך]

גרויזאמער, נאך דין תגובה וויל איך שוין אויסמעקן מיינס. האסט עס גאר גוט ארויסגעברענגט.

[בני היכלא]

די מדינה האט נישט קיין שום דינא דמלכותא, דער חזון איש און איך רעד שוין נישט דער בריסקער רב האבן אויך אזוי געהאלטן, מ'איז נישט מחויב צו פאלגן זייערע געזעצן, זיך אויפפירן בכבוד צו זיי, מ'מעג פון זיי גנב'נן, און טון כל מה שלב חפץ, מיטן תנאי אז מ'וועט האבן שכל נישט אליינס ליידן דערפון.

די מדינה האט א ציל צו פירן א מלחמה און אויסרייסן די פרומע אידן עד חרמה, אן קיין שום ציוויליזאציע און דעמאקראטיע, יעדער וואס וואוינט דארט און ווייסט וואס דארט טוט זיך וועט נישט חלומ'ן מדמה צו זיין מדינת ישראל צו אמעריקא, ס'עקזיסטירט בכלל נישט קיין געזעץ און משפט ווען ס'קומט צו פרומע אידן, אויסער וואס דאס איז סתם איינע פון די קארופטירטע לענדער צווישן דעמאקראטישע לענדער.

נאכמער, די אלע געזעצן וואס מ'דארף מכלומר'שט אויספירן, זענען טאקע באשאפן געווארן פאר דעם איינעם ציל, אויסצורייסן דעם יהדות החרדית, און אפצו'שמד'ן אלע אידן, נישט צולאזן בתי מדרשות ביי אידן, וואס איז א שרעקליכע גזירה, די אידן וואס וואוינען דארט ליידן זיך צוזאם כל מיני גזירות, מיט אידישקייט מיט פרנסה מיט שבת קודש מיט חינוך מיט צניעות, וואס יעדע אנדערע גויאישע מדינה אויף די וועלט פארשטייט און רעכנט זיך מיט פרומע אידן און זייערע רעליגיעזע געברויכן, אבער נישט אין די אידישע מדינה, די פרומע אידן זענען שונא נומער איינס, ס'איז ממש הותר דמם, און די צוקלאפטע אידן וואס ליידן זיך צוזאם כל מיני צרות, די זענען נאך אויף וועם מ'טייטלט מיט די הענט, ווי גלייך זיי דארפן טאקע בלינדערהייט פאלגן די מינים וכופרים וואס זוכן זיי אויסצו'שמד'ן. ווייל דאס הייסט דאך א מדינה און מ'דארף פאלגן.

[אלץ-ווייסער]

איך בין נישט קיין נטורי קרתא'ניק, אבער איך האלט קלאר אז אין מדינת ישראל כאפט זיך די פאליציי און דער גאנצער יורידישער סיסטעם צו, ווי א געבראטנס ווען מ'קען אונטערברעכן און חרוב מאכן דת תוה"ק און כל הקודש לנו.
עס איז ביי מיר קלאר אז להבדיל אלף אלפי הבדלות, פאר די אראבער וואלט מען אזוינס נישט געטאן, דארט וועט מען גענוצט זיידענע הענטשקעס, צו די חרדים קען מען אננעמען ווילדע אקציעס און אלערליי פאסקודענס.

איך בין אביסל ערשטוינט צו זעהן דעם גלייכגילטיגקייט, פונעם ציבור דא, ווייל אויף זיי איז נישטא קיין שום ענין פון דן זיין לכף זכות, אפילו זיי זאלן טאקע האבן א פאינט. עאכו"כ ווען זיי זענען באקאנטע רשעי עמנו, עוקרי דת, עוכרי ישראל, ריכטיגע פושעים יודעים רבונם ומכוונים למרוד בו.

[אבאמא09]

אויב האסטו מיטגעהאלטן די נייעס, גייט מען יעצט צוריק לייגן צוויי פרישע קאראוואנען, און די חברה דארטן שרייען אז זיי וועלן עס נאכאמאל איינווארפן, אין זיי ווארענען מ'זאל נישט לאזן דארט קיין טייערע חפצים.

נא פרעג איך דיר דאס איז אויסגעהאלטן, בשעת ווען זיי שרייען לייגט נישט נאכאמאל ווייל אונז העל מיר עס אנווארפן, שטייט מען און מען פייפט אריין, הא! רשעי ישראל!

[זארעכפעפער]

איך ישוב מיך שוין אפאר טאג צי איך זאל יא אריינווארפן דא מיין תגובה צי נישט.

ס'נישט אזוי גרינג און לייכט צו נעמען א שטעלונג אין די ענינים. פון איין זייט האנדלט מען מיט א מוניציפלאציע וועלכע האבן לכל הדיעות א דין רודפים, א מוניציפילאציע וועלכע זייער גאנצער ציל און שטרעבן איז עקירת התורה ועקירת הדת, א רעגירונג אויף וועלכער דער בריסקער רב זצ"ל האט געזאגט אז זיי שמד'ן נישט אידן ווייל זיי האבן א מדינה נאר זיי האבן א מדינה ווייל זיי ווילן אויספירן זייער בייזוויליגער פלאן פון אויסשמד'ן דעם כלל ישראל. לעומת זה, פון דער אנדערער זייט, שטייען אידן יראים ושלמים, אידן שומרי תורה ומצוות מדקדקים בקלה כבחמורה, וואס על פי הלכה ווערט געפסקנט אין רמב"ם אז אויף אזעלכע פעלער איז מען מחוייב נאכצוגיין און מלמד זכות זיין צו זעהן וואו מ'קען אפיר זוכן א לימוד זכות אויף זיי. און דאס איז שוין געזאגט געווארן סתם אזוי אויף אן ערליכן איד, ווער רעדט נאך אויף א פאל ווען עס שטייען פאר די אויגן זדים נגד עוסקי תורתיך, איז דאך זיכער אז א איד א שומר תומ"צ איז מען מחויב מלמד זכות זיין אויף די ערליכע אידן.

דאס אלעס איז געזאגט געווארן אפילו אין פאל וואס עס שטעלט זיך קלאר ארויס אז דער מציאת הזכות לצדיקים ליגט אין אזא פארטונקלטן מצב און מ'דארף זיך מוטשן און זוכן צו טרעפן א זכות, און אפי' דאן פסקנט דער רמב"ם אז מ'איז דאס מחויב צו טוהן און מ'איז מחויב מלמד זכות צו זיין, כל שכן ווען עס האנדלט זיך אין א פאל וואס מ'דארף נישט ארומגיין זוכן בחורין ובסדקין קיין לימוד זכותים. און כל שכן וכל שכן ווען עס האנדלט זיך פון פאל פון עוקרי הדת בזדון ובכוונה נגד יראים ושלימים שומרי תורה ומצוות.
*

די אלע צדדים וועלכע זענען אויבן פארגעלייגט געווארן ארונטערצורייסן די חרדים אין בית שמש איז מיר פון דער ערשטער מינוט אן געווען אביסל מאדנע. הלמאי, מיר זיצן דא אין אמעריקע טויזנטער מיילן אוועק מיר האבן נישט קיין אנונג אינעם אמת'דיגן פאקט וואס דארט גייט פאר, אונזער גאנצע ידיעה קומט פון די מידיע אין מדינת ישראל וועלכע איז אנגעפיקעוועט מיט שנאת הדת און מעלדט פארשטייט זיך נאר איין צד פון דער מטבע, און לויט דעם האט מען אנגעהויבן צו פירן וויכוחים. ולא זו אף זו, מ'האט גאר באשולדיגט די חרדים אז נישט נאר ביי די היצטיגע פרשה זענען זיי זיך ווערד דאס געלט נאר אפילו ביי די אלע אנדערע פארגאנגענע פרשות צוגלייך זענען זיי זיך אויך גאנץ גוט ווערד דאס געלט. האט אפשר איינער דא אויפגעהויבן א טעלעפאון אנצורופן די איינוואוינער אדער די עסקנים דארט אין בית שמש צו הערן זייער צד פון דער מטבע אויך? זענען טאקע די שונאי הדת באגלייבט אזוי בלינדערהייט איבערהויפט ווען דער צד השני זענען אידן יראים ושלימים?

איך וויל זיך דא אפשטעלן קודם אויף דעם ענין פון די מערכות בכלל און דערויף צוריק קומען צו די ספעציפישע פאסירונג. עס איז קיינער נישט מסופק דערין אז מיר האנדלען דא אין פאקט פון א מדינה וועלכע איז געבויט מיט א שנאה עמוקה קעגן חרדים, א מדינה וועלכע האט זיך מיום הווסדה נישט גערעכנט מיט גארנישט; אמאל איז דאס ניתוחי מתים, אמאל איז דאס חיטוטי שכבי, אמאל אהער אמאל אהין, הצד השווה שבהן זיי האבן לכתחלה אלעמאל געזוכט צו טוהן אזעלכע זאכן וועלכע זאלן ארויסברענגען יעדן נארמאלען חרדי פון די כלים. זאכן וואס אין קיין שום צוויליזירטער מקום אין דער וועלט קומט דאס נישט פאר האבן זיי דיירעקט, מיט א ציל לנגח את החרדים, דאס דייקא יא פראקטאצירט. יעדן צווייטן טאג מיט פרישע גזירות און רדיפות, והדברים ארוכים וידועים.

לפי דבריכם וואלט איך ארויסגענומען אז ביי די אלע מחאות ומערכות, אנגעהויבן פון גיוס בנות און געענדיגט ביי תמונות תועבה'ס, זענען אלעמאל די חרדים געווען די וועלכע זענען שולדיג געווען דערין. ס'הייסט אזוי, קלעפ און רציחות זענען ביי די מחאות אלעמאל געגאנגען אין די גדולות אריין, די בלוטיגע היסטורי' פון די מחאות וועלכע זענען אלעמאל געווען באגלייט מיט טראפן יודיש מסירות נפש בלוט פשוטו כמשמעו, איז לפי דבריכם גאר פארהאן א שטיקל בארעכטיגונג דערפאר, הלמאי די חרדים זענען די וועלכע האבן אנגערייצט די פאליציי, איז דאס טאקע אזוי ביי אייך? און יא, עס פלעגן דאן, סיי ביי די מערכה'ס פון חיטוטי שכבי סיי ביי די מערכה פון נתוחי מתים אא"וו, אויך פארקומען ווילדע מעשים אשר לא יעשו מצד חרדים. טא פרעגט זיך מיר: ווען פונקטליך, ביי וועלכע מערכה, האט מען אנגעהויבן אביסל מלמד חוב זיין אויף די חרדים און מ'האט אנגעהויבן צו ווייזן מיט די פינגער אז די חרדים זענען אויך גאנץ היבש שולדיג מכח זייערע מעשים אשר לא יעשו. ווען פונקטליך האט מען אנגעהויבן איינצוזעהן אז די מדינה איז א צוויליזירטע נארמאלע מדינה אפי' ווען עס האנדעלט זיך אין זאכן וועלכע שרייען פון זיך רדיפת הדת, אזש אויף אזוי ווייט אפי' צו געבן רעכט פאר די מדינה און מצד שני גאר באשולדיגן די חרדים? מה נשתנה מערכה זו מהמערכות אחרות???

איך וועל זיך ערלויבן צוגיין מיט א טריטקעלע ווייטער. עס האט דא אויבן איינער דערמאנט דעם נאמען ר' עמרם בלוי מיט זיינע מערכות. עס איז ברור כשמש אז אין געוויסע מערכות וואס ר' עמרם בלוי האט געפירט, זענען נישט אלע גדולי הקנאים צוגעשטאנען. לאמיר אנכאפן, אלס משל, די מערכה למען השבת וואס ער האט געפירט. ער האט אנגעפירט מיט מסירות נפשו ודמו ממש א מערכה למען קדושת השבת, אזאך וואס אסאך האבן געהאלטן אז מ'דארף זיך נישט צוטוהן מאכן דערפון. די טענה איז געווען אז אויף די אלע גזירות ורדיפות הדת זענען מיר מחוייב אפצושרייען און טוהן כל מה שביכולת דאס אפצושטעלן, אבער אויף צו גיין ארויס אין די דרויסנדיגע גאסן און שרייען אויף חילול שבת איז נישט אזוי זיכער אז מ'איז מחוייב. ר' עמרם האט זיך אבער נישט אפגעשטעלט, זיין פייערדיג הארץ האט געברענגט למען קדושת השבת, און האט זיך געלאזט שלאגן און הארגענען. פארשטייט זיך אז אפילו די וואס זענען בשיטה נישט מיטגעשטאנען מיט ר' עמרמ'ן ביי די סארט מערכות, האבן אבער קיינמאל אין וויסטן חלום נישט אויפגעברענגט דעם געדאנק אז ר' עמרם איז זיך זעלבסט שולדיג אויף די קלעפ. היעלה על הדעת אז מ'זאל אפילו זאגן אז ער רייצט זיך מיט די פאליציי? ווער הייסט אים גיין זוכן חילול שבת אין די דרויסנדיגע געגנטער?

די מערכה דא, וואס איך ווייס נאך אפילו נישט די פונקליכע דעטאלן וואס דא איז פארגעקומען, איז זיכער הונדערט פראצענט מער א פארגלייך צו מערכה'ס וועלכע זענען אינעם כלל פון גזירות ורדיפות הדת ווי איידער אינעם כלל פון אזא סארט מערכה ווי למען השבת. טא פרעגט זיך: אויב האבן גדולי ישראל פארשטאנען אז ר' עמרם האט מעגליך רעכט ביי זיינע מערכות, און קיינמאל נישט געטייטלט אויף אים זעלבסט שולד, איז דאך דאס א ק"ו בן בנו של ק"ו ביי אזא סארט מערכה וועלכע איז לכל הדיעות מער אונטערן כלל פון א מערכה נגד רדיפת הדת, און מ'טייטלט נישט אין אזא פאל א שולד אויף די חרדים. פונקט ווי מיר האבן דאס פארשטאנען ביי ניתוחי מתים, ביי חיטוטי שכבי, ביי תמונות תועבות און ביי די אלע צענדליגע אנדערע מחאות און מערכות, איז דאס ביי דעם פאל גארנישט אנדערשט.

ושלשה תמיהות בזה: קודם, מ'גיט רעכט פאר א חילוני נגד חרדי. ולא זו, מ'גיט גאר רעכט פאר א מדינה וואס איר ציל איז עקירת הדת נגד אידן יראים ושלמים. ולא זו אף זו מ'רייסט גאר אראפ די חרדים. אתמהה?!
*

אצינד אביסל איבער אונזער פאל.

קודם, ווי אויבן געזאגט, איר האט בלויז איין צד פון די מטבע. איך בין נאך גארנישט אזוי זיכער אז עס שטעקט נישט דערין עפעס א רשעות אדער א פריוואונג צו שטערן די חרדים. אבער עוד יותר מזה, איך פארשטיי מיך נישט, איר וואוינט אין האנעלולו? אין יעדע דעמאקראטישע מדינה בכלל, און אין די פאראייניגטע שטאטן בפרט, ווייסט מען אז געבעט הויז איז דער סימבאל פון רעליגיע און דארט פארקוקט מען אלע לעגאלע פראצעדורן און געזעצן. גאנצעטע משפטים אין אמעריקע האבן זיך שוין איבערגעדרייט איבער בתי מדרשים אדער להבדיל בית תיפלתם וועלכע זענען געבויט געווארן אדער אהערגעשטעלט געווארן אומלעגאל, און אין ס'רוב אזעלכע פלעצער האט דאס געריכט גערעכט געגעבן פאר די אומלעגאלע געביידעס. צענדליגע און צענדליגע לאקאלע מוניציפילאציעס לענג אויס אמעריקע האבן זיך שוין פרובירט צו פארמעסטן מיט די טויזנטער אומלעגאלע רעליגיעזע געביידעס, מיטן אויסרייד פון געזעץ (ווען אין רוב פעלער זענען זיי אפשר מכח בילדונג געזעץ אויס גערעכט געווען), און זענען רוב מאל מיאוס דורכגעפאלן. ווער רעדט נאך אז ס'נאך פאר קיין פאליציי אין חלום נישט איינגעפאלן אפילו צו רירן די געביידעס אדער טיילן שטראפן פאר די מיטגלידער אדער בעאמטע פארן זיך באנוצן מיט אן אומלעגאלער בנין פאר רעליגיעזע געברויכן.

דא קומט אן אומפארשעמטע אזוי גערופענע אידישע מדינה, כלומרשט א דעמאקראטישע מדינה וועלכע שטיצט און שיצט אלע רעליגיעס צוגלייך, א מדינה וועלכע איר ציל איז עקירת הדת, און נישט נאר וואס זי האט זיך נישט אפגעגעבן צו שעצן די רעליגיעזע אומלעגאלע געביידע (כמנהג וכנוסח אבי הדעמאקראטיע הנקרא ארצה"ב), נאר פשוט און גראד זיך אויפגעפירט ווי חיות פון גאס, ווי עפעס א היציגע כאמאס גרופע, קומענדיג מיט בולדאזערס צעווארפן און צעטראסקענען בנינים און געביידעס.

איך פרעג נאכמער, דארט איז געווען ספרי קודש? אויב יא וועלכע נארמאלע דעמאקראטישע רעגירונג וואלט זיך אפי' געטרויט צוצורירן מיט א בולדאזער און צעווארפן אזא געביידע? און יא ס'איז אומלעגאל, אלעס פיין און וואויל, אבער זאגט מיר נשט אז איר וואוינט אין האנעלולו און איר ווייסט נישט וויאזוי אמעריקע וואלט רעאגירט אין אזא פאל! ביטע, איך גלויב נישט אז אין אמעריקע וואלט זיך א מוניציפילאציע רעגירונג געטרויט אפי' דאס אנצורירן, ווען יא וואלט זיך אמעריקע איבערגעדרייט. קיינעם וואלט נישט איינגעפאלן צו טייטלען אויף די חרדים אז זיי זענען שולדיג דערין. פארקערט, אין אזעלכע פעלער פילט זיך די רעגירונג טויזנט מאל מער שולדיג ווי איידער די וועלכע האבן בשאט נפש אויפגעשטעלט אן אומלעגאלע געביידע.

*
אגב, בשייכות צו בני היכלא'ס געדאנק אז מדינת ישראל האט נישט קיין דין פון דינא דמלכותא דינא, האב איך אמאל ערגעץ געזען א שמועס פונעם תולדות אהרן רבי'ן זצ"ל, וואו ער פרעגט אן דעם רבין וואס ער זאל אינזין האבן ביי די תפילה פון "ותטה לב 'המלכות' עלינו לטובה". איך דענק נישט דעם תי'. ווער עס ווייסט אדער דענקט, זאל ארויפקומען אופן פאדיום און אונז מהנה זיין. יישר כח.