לכאורה האט געשריבן:באקומען א הספד בריוועלע אויף ר' אלי' קאהן ז"ל פון "לכתחילה אריבער":
ר' אלי' איז נישטא! ר' אלי' קאהן... ז"ל! וויאזוי עס מען דאס??
וויאזוי עסט מען די פטירה פון א איד וואס האט שוין מיט צענדליגער יארן צוריק געהאט א ביזנעס וואס האט אריינגענומען צענדליגער מיליאנען א יאר, און איז אוועק פון די וועלט אן קיין געלט אין זיין באנק קאנטע?
וויאזוי עסט מען די פטירה פון א איד וואס איז געווען א "פשוט'ע בעל הבית" און איז אויפגעווען יעדע נאכט אין די פריע פארטאגס שטונדן און געלערנט מיט זיין חברותה לאנגע שעות תורה בעפאר'ן דאווענען?
וויאזוי עסט מען די פטירה פון א איד וואס האט געפירט א גרויסע ביזנעס, און זיין איינציגסטע דאגה איז נישט געווען די ביזנעס, נאר אז "די תלמוד תורה זאל זיין געדעקט"?
וויאזוי עסט מען די פטירה פון א איד וואס איז יעדן טאג געפארן אויפפיקן ברויט פאר די ישיבה תלמוד תורה און אנדערע אידן אין ישוב, פאר לאנגע צענדליגער יארן, ניטאמאל..... "שלא על מנת לקבל פרס" אויב דאס איז מעגליך?
וויאזוי עסט מען די פטירה פון א איד וואס איז געווען א "פשוט'ע בעל הבית" און האט יעדן איינציגסטן טאג געדאווענט ווי אידן האפן צו דאווענען כאטש אין די הייליגע טעג?
וויאזוי עסט מען די פטירה פון א איד וואס ווען ער איז געווען נישט געזונט און איז ענדליך אהיים געקומען פון שפיטאל האט ער די ערשטע זאך געבעטן די "טשעק ביכל" ווייל "מען דארף זיכער מאכן אז די תלמוד תורה איז געדעקט"?
וויאזוי עסט מען די פטירה פון א איד וואס האט נישט נאר נישט געווארט אויף "כבוד" פאר וואס ער האט געטאן, נאר האט מיט אן אמת פארשטאנען אז עס קומט אים נישט אפילו קיין "ישר כח", ווייל "ער טוט פשוט וואס ער דארף צו טאן"?
וויאזוי עסט מען די פטירה פון א איד וואס ווען ער איז געווארן קראנק האט ער מיט א רואיגע געמיט געזאגט פאר זיין אייניקל אז "עס איז אוקעי, איים רעדי"!?
וויאזוי עסט מען די פטירה פון א איד וואס איז געווען קראנק עטליכע יאר, און איז אלס ארום געגאנגען מיט א שמייכל, נישט ווייל ער "האט זיך מחזק געווען" נאר ווייל ער האט באמת פארשטאנען מיט א פשטות אז "עס איז אוקעי"!?
וויאזוי עסט מען די פטירה פון א איד וואס האט אויסער זיין חברותא פארטאגס געהאט נאך חברותות איבער'ן טאג, און פארשטייט זיך אז זונטאג אז מען ארבעט נישט.... מיינט דאס אז מען זיצט און מען לערנט א גאנצן טאג?
וויאזוי עסט מען די פטירה פון א איד וואס איז געווען א עלטערער איד, א אוד מוצל מאש, א מיטגעמאכטער איד, א איד א גביר, וואס האט נישט געהאט עפעס אנדערש ווי א שמייכל און א גוט ווארט פאר "יעדעם איינעם" אפגעזען פון די יארגאנג, און פאזיציע?
וויאזוי עסט מען די פטירה פון א איד וואס ווען ער איז שוין נישט געווען געזונט און האט שוין נישט געקענט גיין אין די ביזנעס, אבער גיין צוזאמעננעמען געלט פאר די תלמוד תורה איז נישט געווען אפילו קיין שמועס אפצושטעלן?
וויאזוי עסט מען די פטירה פון א איד וואס האט זיך שווער געשלעפט, מיט א וואלקער, און "נישט גיין אין שול, ווייל "ס'איז שווער" איז בכלל נישט געווען אין זיין ווערטער-בוך?
וויאזוי עסט מען די פטירה פון א איד וואס ווען ער איז געגאנגען נאך געלט פאר די תלמוד תורה, און איד האט אים געזאגט "איך האב יעצט נישט, איך דארף אצינד חתונה מאכן צוויי קינדער", האט ער אוועק געלייגט די "רעסיט ביכל" און ארויסגענומען די "טשעק ביכל", געפרעגט דעם אידן "וויפיל פעלט דיר" און אויסגעשריבן א טשעק'ל מיט טערמינען צו באצאלן וואס איז געווען ממש א געלעכטער יעדע מאנאט?
וויאזוי עסט מען די פטירה פון א איד וואס האט געהאט א פורניטשור ביזנעס וואס האט צווישן אנדערע זאכן פארקויפט קאוטשעס און "ריקליינערס" און ביי זיך אינדערהיים האט ער נישט געהאט קיין ריקליינער! נישט ווייל ער האט געקארגט, נאר ווייל ער האט נישט פארשטאנען "פארוואס מען דארף דאס האבן"!?
וויאזוי עסט מען די פטירה פון א איד וואס האט אנגעפירט און זיך געזארגט פאר די גראסערי אין ישוב און די געלט וואס איז אריינגעקומען מיט א פשוטות אוועקגעגעבן פאר די תלמוד תורה?
וויאזוי עסט מען די פטירה פון א איד וואס האט זיך אויסגעצייכנט אין "תורה", "עבודה" און אין "גמילת חסדים" פשוטו כמשמעו אויף א גאר דערהויבענע פארנעם?
אזוי קען מען שרייבן און שרייבן און שווער קומען צו א ענדע, און די פראגע וועט ווייטער זיין "וויאזוי עסט מען די פטירה פון אזא איד"?
און די צווייטע פראגע וועט זיין "מי יתן תמורתו?
און די דריטע פראגע וועט זיין "וואס וועט מען ווייזן פאר די קינדער"? "וויאזוי וועט מען זיי פארשטיין געבן וואס מיינט "אן אמאליגע "בעל הבית"?
און אזוי ווייטער פראגע נאך פראגע!
עס וועט אפשר זיין שווער פאר איינעם וואס איז נישט קיין נייטרא תלמוד צו פארשטיין, אבער פאר א נייטרא תלמוד איז גענוג צו זאגן אויף ר' אלי' ז"ל עטליכע ווערטער וואס ברענגט ארויס די גאנצע בילד, און די גאנצע פארלוסט:
"ווידער האבן מיר פארלוירן איינע פון די לעצט פארבליבענע טיילן פון מרן רחמ"ד זצ"ל"! "נעכטן איז מרן רחמ"ד זצ"ל ווידעראמאל נפטר געווארן"!
ר' אלי' איר זענען געווען א מוסטער פון א "תלמוד פון רבי מיכאל בער"!
ר' אלי' איז זענט געווען א מוסטער פון א איד וואס מרן זצ"ל האט געוואלט אהערשטעלן!
ר' אלי' איר זענען געווען א מוסטער פאר אייערע קינדער, אייניקלעך און איר אייניקלעך, איר זענען געווען א מוסטער פאר אלע אייערע ארומיגע, איר זענט געווען א מוסטער פאר גאנץ כלל ישראל!!
איי איי ר' אלי' ר' אלי'! "אבד חסיד מן הארץ"! "חבל על דאבדין ולא משתכחין"!
זאל דער אויבערשטער טרייסטן דיין חשוב'ע אלמנה פונאנדערגעשיידט, וואס איז דיר אזוי געשטאנען געטריי צו די רעכטע האנט, און אזוי געטריי געשטאנען אין די גראסערי שלא על מנת לקבל פרס.
זאל דער אויבערשטער טרייסטן דיין חשוב'ע לאנגיעריגע חברותא ר' בנימין זאב לעווי זז"ג פונאנדערגעשיידט, עוד ינובון בשיבה דשנים ורעננים יהיו, בבריאות השלימות.
זאל דער אויבערשטער טרייסטן דיין חשוב'ע משפחה פון קינדער, אייניקלעך און אור אייניקלעך וואס האבן באמת פארלוירן אן פערזענליכע אוצר.
זאל דער אויבערשטער טרייסטן אונז אלע תלמידי נייטרא בפרט און כלל ישראל בכלל וואס האבן פארלוירן אזא וויכטיגע "מוסטער".
און זאל דער אויבערשטער שוין בקרוב טרייסטן זיין פאלק מיט די אמת'דיגע אייביגער און פולקאמער טרייסט פון יקיצו וירננו שוכני עפר בביאת גואל צדק בב"א.
איך האב געהערט פון איינער אז סהאט זיך געדרייט קאפיס פון דיין הספד ביי די שבעה די משפחה האט זייער הנאה געהאט