אוהב ספרים האט געשריבן:הרה"ג מנקיי הדעת בירושלים ומפאריה רבי מרדכי אהרן שיינבערגער
איי איי הגה"צ ר' מרדכי אהרן איז שוין אויך נישטא , אויב איז נאך דא היינט אזא זאך אווי ירושלים של מעלה איז ר' מרדכי אהרן זיכער געווען פון די סאמע אויבערשסטע ביים שטייסל
א איד וואס מ'האט געקענט באמת מעיד זיין אויף אים "כל רז לא אניס ליה" צו איז עס געווען ש"ס בבלי ירושלמי ספרא ספרי תוספתא , ד' חלקי שו"ע ראשונים ואחרונים און אפילו היינטיגע לומדישע ספרים האט ער געקענט אויף אויסעווייניג
א איד וואס האט זיך נישט אוועקגערירט כקוצו של יו"ד פונעם שו"ע , חסידא ופרישא שייף על שייף זך ונקי פשוטו כמשמעו , און ווער רעדט נאך פון זיין איידלקייט זיין ענוות חן זיין מאיר פנים זיין פאר יעדעס קליין קינד , געבן א גוטע הרגשה פאר יעדן בר נש , מאכן יענעם פילן אווי יענער איז 10 מאל גרעסער פון עימען , גאר א געוואלדיגע פארלוסט פאר כלל ישראל און פאר ירושלים בפרט
געווען דער באקאנטער פארהערער בה"א הידועה אין ארצינו הקדושה , געקומען פארהערן אלעס און אלסדונג שטייטצעך אומצוגעגרייט בכלל ,מיט א געוואלדיגע הארת פנים , געמאכט יעדן פילן גוט און אז מ'האט גאר גוט געקענט , ס'איז א אמת'דיגע אבידה שאין לה תמורה
זעמיר געזיצן ביינעים א היפשע פאר מאל פארברענגט בדברי תורה און סתם ענינים פאר שעות לאנג ווען מ'האט פארברענגט איבער סתם ענינים האט ער אזוי אביסל מיטגערעדט אבער גאר קורץ און שארף , נישט קיין איבריגע דיבורים , אבער ווען מ'האט זיך גענומען רעדן אין לערנען איז אויפגעשטאנען א נייער מענטש פיל מיט חיות זיך גע'טענה'ט הויעך אויפן קול (אבער קיינמאל געשריגן אפילו בטעות נישט) געברענגט ראיות , צו ווארפן בנינים א.א.וו.
כ'געדענק זעמיר געווען ביינעים א 3-4 יאר צוריק איז ער שוין געווען היפש שוואך , שטייצעך בינעך געקומען היפש צוגעגרייט ( אזוי ווי אלע וואס פרובירן זיך אהערצושטעלן :) געדענק איך האבעך נאכגעזאגט עפעס א גמרא אין סוטה און אויף וועכע דף ס'שטייט , האט ער מיר אזוי שיין געזאגט, כאב שוין נישט געלערנט די גמרא 3 יאר אבער כ'מיין סיז א דף ארויפציהר און מיר אפילו געזאגט וועכע שורה ס'שטייט האבעך אים געזאגט אז כאב עס אקורשט געלערנט און ס'שטייט יא אויפן דף וואס כאב געזאגט איז ער אליינס צוגעגאנגן צום שאפע ארויסגענומען א מס' סוטה ( שטייטצעך ער האט מיר נישט געלאזט אליינס נעמען ווען כאמיר איינגעבעטן ווייל....ס'נישט קיין כבוד, אוי לי ) און וואס מיינט איר , אודאי איז ער געווען גערעכט כאב מיר געהאט פארמישט מיט א דף , ווען מ'וואלט געשטאכן ר' מרדכי אהרן וואלט זיך געגאסן דפים על גבי דפים גמרא.
אזוי אויך געדענק איך זעמיר געוען א היפשע פאר יאר צוריק אויף סוכות אין ירושלים זעמיר אים געווען באזוכן מיט מיין ב"ב , האט ער זיך אנטשולדיגט אז זיין ווייב פילט זיך נישט גוט סאו זי קען נישט ארויסקומען (מיר זענען געזיצן ביינעים אין די סוכה אין חצר ) האט ער אפגעשיילט א עפל פאר מיין ב"ב און געבעטן אז זי זאל מאכן הויעך א ברכה אז ער זאל קענען ענטפערן אמן (פארגעסטס ניש אז דא רעדט מען פון א איד וואס איז געעוען פון די גאר געהויבענע ירושלימע'ר קנאים , א עכטער אמאליגער פרומער מיט אלע פיטשיווקעס)
נאכער האט ער מיר פארציילט וויזוי ער האט געלערנט תורה מתוך הדחק בשנת תש"ח ווען די הארמאטן פון די ירדנ'ער זענען געפאלן העכער זיין קאפ , איז ער געזעצן אונטערן טיש פון זיין ד' על ד' דירה בינעזאם מיט זיין ווייב און געהאקט שטיקער ער האט מיר געזאגט אז ער האט יעמאלטס מסיים געווען אפאר מסכתות אזוי אונטערן טיש (ער האט מיר זיי אלע אויסגערעכנט צווישן זיי יבמות און קידושין אבער כ'געדענק נישט אלע ) נאכדעם האט ער צוגעלייגט אז ער דערציילט מיר עס ניש חלילה זיך גרויס צוהאלטן ער וויל נאר אריינגעבן א חשק פון תורה פאר אינגעלייט וואס קומען ארויף צו אים !
אויך האט ער מיר דערציילט אז ווען ער איז געקומען די ערשטע מאל קיין אמעריקע צום סאטמאר'ן רבי'ן ז"ל ( א עקסטערע שמועס פארלאנגט זיך אויף זיין געוואלדיגע התקשרות צום רבי'ן ממש אווי די אמאליגע געהויבענע חסידים וואס מ'ליינט אין די מעשה ביכלעך) איז ער געזיצן אין 500 בעדפארד און געלערנט איז צוגעקומען צונעים ר' אביגדור יאקאבאוויטש ע"ה און אים געפרעגט צו ער הייסט מרדכי אהרן שיינבערגער האט ער אים גע'ענטפערט , יא פארוואס , זאגט אים ר' אביגדור אז די רבי האט אים יעצט געלאזט רופן און האט אים געזאגט , ס'דרייט זיך דא ארום א איד ער הייסט ר' מרדכי אהרן שיינבערגער כ'קאן אים גוט און ער איז א איד וואס מ'קען אים נישט כאפן ביי א תוס' אין ש"ס מילא זאל ער אים ארויסהעלפן און ער האט אים טאקע געהאלפן צוזאםשטעלן א שיינער סכום פאר יענע צייט , האט ר' מרדכי אהרן אויסגעפירט, "אזוי האט סאמארער רב געזאגט אויף מיר , איך אליינס ווייסעך ניש צו סיז אזוי ווייט אמת" ........
אויך געדענק איך האמיר דעמאלטס דורכגעטוהן אויב סיז געווען א סוכה בעזרה פאר די כהנים (א באקאנטע מחלוקת הראשונים ) איז ער אריין אין זיין הויז און ארויסגעברענגט צו די סוכה א גאנצע פאק מיט ספרי אחרונים וואס טוען דורך די סוגיא ער האט נישט געדארפט מישן קיין איין ספר צו סאך ער האט גראד געוואוסט אווי ס'שטייט , כאב אים יעמאלטס נאכגעזאגט פון רבי ר' יונתן א שיינע ראי' פון רמב"ם אז סיז פשטות נישט געווען קיין סוכה בעזרה , ער האט נישט געהאט געוואוסט דערפון האט ער זיך באדאנקט אפאר מאל פארן עס נאכזאגן , געגעבן די הרגשה אזוי ווי כ'וואלט אים ממש מחי' נפש געווען , אה מי יתן לנו תמורתו
סיז נאך דא אסאך צושרייבן וועגן דעם אדם גדול בענקים וואס אונז האמיר נאך געהאט די זכי' צו האבן בדורינו, א צדיק אמת וואס האט גארנישט געמאכט פון זעך, זאל ער זיין א מליץ יושר פאר אונז אלע אכיה"ר