יוראפ האט געשריבן:ביקסאד האט געשריבן:איהר ווייסט אפשר עפעס איבער די יחוס פון רבי חיים מאיר טרויב ?
העל איך מעתיק זיין פון ספר 'די שיינע פארגאנגענהייט פון מארמאראש', וואס רעדט איבער אים און איבער ר' יצחק ווירצבערגער און ר' בעריש'ל דיין (אפאר פרטים ווערט שוין דערמאנט דא אין די פריערדיגע תגובות)
אין אויבער-ווישעווא זעלבסט, איז אויפגעוואקסן א תלמיד חכם, הג"ר יצחק ווירצבערגער זצ"ל. ר' יצחק, איז געווען א זון פון הרב אליעזר ווירצבערגער ע"ה, וואס איז געווען דער שוחט פון אויבער-ווישעווא. ר' יצחק, איז געווען א תלמיד מובהק פון הג"ר שמעלקא קליין זצ"ל אב"ד סעליש.
אין יאר תרכ"א, האט ר' יצחק חתונה געהאט אויף ווישעווא, וואו ער האט געוואוינט צען יאר.
אין תר"ל האט ר' יצחק זיך באזעצט, אין א דערפל נעבן דעעש, ווי זיין ווייב האט געהאט א שטיקל קרעטשמע. ר' יצחק האט זיך ווייניג געקומערט מיטטן געשעפט, נאר זיך פארנומען מיט תורה ועבודת הבורא.
ר' יצחק פלעגט אפט פארן אויף צאנז, צום הייליגן "דברי חיים" זי"ע, געווענטליך פלעגט ער פארן צוזאמען מיטן דעעשער רבי, הגה"ק ר' מענדל פאנעטה זצ"ל.
ר' יצחק איז געווען אין דעעש באליבט אויף יעדן, דעריבער האט מען אים גערופן בלשון חיבה ר' יצחק'ל דיין. ר' יצחק'ל איז געווען דיין אין דעעש, אין די צייט פון הגה"צ בעל מעגלי צדק, ובנו הגה"צ ר' משה, ונכדו הגה"צ בעל כנסת יחזקאל זי"ע. ר' יצחק איז געווען אן איידעם בזוו"ר ביי הרבני מו"ה שמשון ז"ל מקאזדאווארע. ר' יצחק איז געווען א תלמיד פון הג"ר מאיר א"ש זצ"ל אב"ד אונגוואר, און פון הג"ר שמואל שמעלקא קליין זצ"ל אב"ד סעליש. ער פלעגט אפט פארן צו די צדיקים בעל "הדברי חיים" און הגה"צ ר' יצחק אייזיק מזידיטשוב זי"ע.
הרבני הישיש ר' משה גרין ע"ה פון דעעש-וויליאמסבורג האט דערציילט, אז ר' יצחק'ל דיין איז געווען א הארציגער בעל תפלה. און ער געדענקט ווי דער "כנסת יחזקאל" זצ"ל, איז שמיני עצרת נאכן אפדאווענען איןדי גרויסע שוהל, געגאנגען הערן די "תפלת גשם" פון ר' יצחק'ל דיין זצ"ל, און הערענדיג דאס ווארימע דאווענען, האט דער "כנסת יחזקאל" געלאזט טרערן פון גרויס התרגשות. אויך האט איבערגעגעבן ר' משה ע"ה, אז דעם צווייטן טאג סוכות, פלעגט דער דעעשער רבי זצ"ל באזוכן ר' יצחק'ל דיין אין זיין סוכה, לכבוד זיין אושפיזא.
דער טעמעשווארער רבי פון ב"פ, הגה"צ ר' משה ארי' לעוו זצ"ל, האט דערציילט: אז יונגערהייט האט ער געלערנט אין דעעש, און ער האט דארט געהערט פון זקנים אז דער "מעגלי צדק" זצ"ל האט געזאגט אויף ר' יצחק'ל דיין, אויף דעם פלאץ וואו ר' יצחק'ל דיין שטייט ביים דאווענען, "קאכט די ערד" פון גרויס עבודה.
ר' יעקב שמואל קאהן פון בארא פארק דערציילט: אז ר' יצחק'ל דיין איז איינמאל איינגעשלאפן זיצענדיג ביי די גמרא. דרימלענדיג, האט זיך ר' יצחק'ל גע'חלומ'ט ווי ער זעהט א גוי שטייט אנטקעגן אים מיט א שווערד אים צו הרג'ענען. ר' יצחק'ל האט זיך פון שרעק תיכף אויפגעכאפט, און טאקע דערזען א גוי שטיין. דער גוי, זעענדיג אז ר' יצחק'ל האט זיך אויפגעכאפט איז זאפארט אנטלאפן.
ר' יצחק'ל דיין ווערט דערמאנט אין שו"ת מאור יהושע סי' ס"ד-ס"ה.
ר' יצחק'ל האט געהאט א טאכטער מרת יוטא פערל ע"ה, וואס האט חתונה געהאט צו הרבני מוה"ר חיים מאיר הכהן טרויב ז"ל (וואס איז געווען א אייניקל פון הג"ר חיים מאיר כהנא זצ"ל אב"ד סיגעט-שפעטער דערמאנט). ר' חיים מאיר טרויב ע"ה איז געווען א תלמיד חכם עצום, ער האט געקענט גאנץ ש"ס בע"פ.ר' חיים מאיר האט געהאט א איידעם, הג"ר מנחם יששכר (דוב) שאנצער זצ"ל הי"ד. ר' מנחם ישכר (דוב) איז געווארן דיין אין דעעש, נאכן פטירה פון זיידן ר' יצחק זצ"ל, ווען ער איז געווען אלט בלויז 25 יאר. מען האט אים גערופן בלשון חיבה, ר' בעריש'ל דיין. ער האט געהאט התרת הוראה פון דעם נאסעד'ער רב זצ"ל בעמח"ס שו"ת מאור יהושע, דער נאסעד'ער רב האט זעלטן ווען געגעבן התרת הוראה, אז ר' בעריש'ל האט ביי אים באקומען, האט דאס געמוזט זיין א גרויסע זאך. ר' בעריש'ל ווערט דערמאנט אין שו"ת מאור יהושע סימן י"ג, און אין ספר מקוה ישראל דף קפ"ה.
פון ר' בעריש'ל דיין זצ"ל הי"ד זענען געבליבן לעבן צוויי טעכטער, איינע איז געווען די רעביצין פון הגה"צ ר' אלעזר ארי' הלוי יונגרייז זצ"ל אב"ד טשענגער, און די צווייט איז די פרוי פון הרה"ח מוה"ר שלמה זלמן הכהן סאנדער נ"י פון פתח תקוה.אין יאר תרמ"ה האט די דעעשער קהלה אויפגענומען ר' יצחק'ן פאר דיין ומורה צדק אין דעעש.
ר' יצחק איז נפטר געווארן אין דעעש כ"ח שבט תרפ"ב, זייענדיג אלט ניין און אכציג יאר.
אויף זיין מצבה איז אויסגעקריצט צווישן דח איבעריגע שבחים, "הרב הצדיק הישיש חסיד ועניו תמים במעשיו... מורה צדק לךעדתינו... קרוב לארבעים שנה הורה צדק לעדתינו..."
אין יאר תקנ"ד איז געווארן רב אין סיגעט הג"ר חיים מאיר הכהן טרויב ב"ר אברהם פון דילאטין (ר' חיים מאיר איז געווען א איידעם ביי הגביר הנכבד ר' מרדכי שטערן פון סלישט). דעמאלטס האט געוואוינט אין סיגעט 37 אידישע משפחות. די קהלה האט זיך מתחייב געווען צו צאלן 100 זהובים פאר א יאר געהאלט. אין יאר תר"? איז ער צוריקגעפארן אויף דילאטין, ער איז נפטר געווארן י"ג כסליו תר"ב.
די נוסח פון זיין מצבה אין סיגעט: כבוד הרב המופלג בתורה, זקן ושבע ימים, מתמיד בתורה, מו"ה חיים מאיר הכהן ב"ר אברהם ז"ל, נפטר ונספד בי"ג כסלו "הרב חיים מאיר כהנא" לפ"ק ת.נ.צ.ב.ה.