קויפט'ס נאר ביי אידן!!! / ט.ב. שאץ מאץ

געשמאקע ארטיקלן און בילדער וכדו'

די אחראים: אחראי, געלעגער

אוועטאר
שאץ מאץ
שר האלפיים
תגובות: 2891
זיך איינגעשריבען אום: דאנארשטאג מאי 15, 2008 5:01 pm
לאקאציע: איבעראל
פארבינד זיך:

קויפט'ס נאר ביי אידן!!! / ט.ב. שאץ מאץ

תגובהדורך שאץ מאץ » מאנטאג פאברואר 02, 2009 1:08 pm

קויפט'ס נאר ביי אידן!!!, ט.ב. שאץ מאץ

שוין נאך א טאג ביך, נו וועמענ'ס?

גיימיר מאכן א כל הנערים אזוי ווי די בדחנים וואס רופן אויס עטליכע פעטער'ס אויפאמאל, גיימיר מאכן א סך הכל פון עטליכע געשעפטן צוזאמען, און גלייכצייטיג ארום שמועסן איבער דעם פראבלעם וואס היימישע סחורים רעדן זיך אפ אז מ'איז נישט מקיים ביי זיי דעם וחי אחיך עמך, צו איז דאס טאקע אזוי אז דער עולם רעכנט זיך נישט מיטן וחי אחיך, אדער סתם מ'ווייסט נישט די פרטים, צו גאר איז דא א חסרון אין דעם אחיך דערפאר איז נישטא קיין וחי.

וויכטיגע דעקלעראציע איבעראל ווי עס שטייט אין דעם ארטיקל איד נעבן גוי זאל מען פון זיך אליין אריין לייגן א "להבדיל", מיר ווילן פשוט איינשפארן קערעקטער'ס....

יעדער ליינער האט שוין אוודאי באגעגענט אין איינע פון די אויסגאבן און זיכער געליינט דארט עטליכע בריוו'ן פון קאסטומער'ס און געשעפטסלייט ווי עס זענען געווארפן געווארן באשולדיגען איינעם אויפן צווייטן, צו אידן גיבן יא סערוויס און גוים גיבן נישט קיין סערוויס צו פארקערט, און פיל קנעפלעך אויפן קי בארד איז שוין געדריקט געווארן איבער די טעמע, בפרט אין די לעצטערע צייטן ווען די עקענאמיע איז נישט מסודר (גאנץ א איידעלע אויסדריק) איז קלאר אז איינקויפן און זיך שפארן ווערט א שטארקע טעמע.

פארשטייט זיך מיר רעדן פון אזעלכע זאכן וואס קענען ווערן געקויפט סיי ביי אידן און סיי ביי גוים, ווי עלעקטעראנישע כלים, ווייבעריש קליידער, קינדער זאכן, וכדומה, צו אפי' הארוועיר וואס מיר האבן שוין אמאל באהאנדלט.

מיר גייען נישט אריין גיין אינעם חלק להלכה אז מ'מוז איינקויפן ביי א איד ווען די פרייז איז נישט מער ווי א שתות א זעקסטל מער דאס מיינט 16.65 פראצענט מער, און נאר אויב דער איד בעט מער ווי א שתות מעג מען איינקויפן ביי א גוי, וואס אט די חשבונות זאל זיך יעדער מאכן אליין זעהן צו ער טרעט נישט אויף די הלכה, אין די זעלבע צייט מעג מען אויך מאכן א חשבון אז פונקט ווי ווען מ'נעמט צוזאמען צדקה פאר א איד א בעל חוב וואס קען נישט באצאלן די שכר לימוד און קעמפ פון זיינע קינדער, און אידן רחמנים גיבן 20, 30 דאללאר, גיבזשע פרנסה און צדקה בדרך כבוד פאר א היימישן איד, וואס מיט 2$ מער וואס דו צאלסט אויף א אייטעם ביסטו מקיים מצות צדקה וואס דער רמב"ם זאגט אז די גרעסטע מדת הצדקה איז שאפן א איד פרנסה, אבער דאס איז שוין נישט מעיקרא דדינא.

עס ווערט געהערט א טענה ביי אסאך מענטשן (וואס ווילן זיך פארענפערן פארוואס זיי קויפן ביי גוים) אז ביים היימישן עולם איז נישטא קיין סערוויס אזוי ווי ביים גוי, לאמיר קודם פארשטיין פון וואס רעדט מען דא און וואס איז דאס וואס מענטשן רופן אן סערוויס, און וויאזוי טייטשן זיי אפ דעס ווארט.

אם תמצא לומר אז סערוויס מיינט סערווירן דעם קאסטומער, איז דאך קלאר אז אין פעלד פון סערווירן טויג דער איד בעסער ווי דער גוי, קודם רעדט דער איד אידיש, און נאכדעם ווייסט ער דאך וואס דער היימישער עולם דארף, וועלכע טעלעפאן איז גוט פאר א שטוב מיט קינדער, און וועלכע פאר הויזן איז גוט פאר קעמפ, וואס דעם גוי קען מען אפי' נישט פרעגן אזאנס, און אוודאי נישט באקומען קיין תירוץ, דער איד וועט וויסן צו זאגן פאר קאסטומער מ'זאל נעמען אט דעי סעט ווייל דאס קויפט יעדער........, דער גוי ווייסט נישט וואס יעדער קויפט, נו מ'לעבט דאך אין א וועלט ווי מ'דארף זיין ווי יעדער, סאו סערוויס מיינט נישט סערווירן.

אם תמצא לומר אז סערוויס מיינט אנעמען א דריטע פארטי טשעק, וועלכע גוי נעמט א טשעק וואס איז נישט אויסגעשטעלט צו זיין קאמפאני.

אם תמצא לומר אז סערוויס מיינט אז מ'קען האנדלען די פרייזן, גיי האנדל מיט א גוי אין א דיפארטמענט סטאר, ווען דו באקומסט א הנחה קאל מיך....

אם תמצא לומר אז סערוויס מיינט מ'קען שולדיג בלייבן, אנטשולדיגט כאפט א בליק העכער דעם רעדשיסטער אויף די ארויפגעקלעבטע צעטעלעך דארטן ביים אידישן סוחר, איר זעהט דארט וויפיל מענטשן זענען שולדיג געבליבן אפאר דאללאר און גייען דאס אריין ברענגען מארגן?...., דער גוי האט ב"ה א ליידיגן רעדשיסטער.

אם תמצי לומר אז סערוויס מיינט באקומען א רעסיט אפי' אן קויפן, ביטע ברענגט מיר א גוי וואס גליייבט אייך אויפן ווארט א יאר נאכן קויפן אז איר האט געקויפט א חפץ און וועט אייך געבן אויף אייער חשבון א רעסיט.

אלא מאי מוז דאך זיין אז איר מיינט סערוויס איז טייטש, ביליגער, אדער סערוויס מיינט מ'קען צוריק ברענגען.

ראשית אויב דער גוי גיבט טאקע ביליגער ווי א שתות האמיר שוין געזאגט קען מען להלכה גיין קויפן ביים גוי, אבער דאס איז נאר נאכדעם ווען איר רעכנט אראפ די הוצאות הדרך פון פאָרן ביזן גוי'שן סטאר און צוריק, אבער באמת איז דאס איין קייט, פארוואס קען דער גוי בעטן ביליגער ווייל ער אליין קויפט אסאך אויפאמאל גיבט אים דער האלסעילער ביליגער, יעצט אז אסאך אידן וועלן קויפן ביים היימישן ציבור וועט ער אליין מוזן האבן א גרויסע סטאק וועט מען אים אויך געבן ביליגער, קומט אויס דאס איז אזא גלגל החוזר וואס מער מ'קויפט ביי אידן וועט עס ווערן ביליגער, וואס ווייניגער מ'קויפט ביי אידן ווערט אלס טייערער.

יעצט לגבי צוריק ברענגען, דאס איז טאקע א גאר אנגעווייטאגטע וואונד וואס מיט וועלכע געשעפט'ס מאן מ'רעדט וועט ער ארויף ברענגען זיין ווייטאג פון צוריק ברענגען, קודם דארף מען וויסן אז א גוי'שע געשעפט וואס איז א ריזיגע געשעפט האט ענדערשט א מעגליכקייט צוריק צו נעמען זאכן וויבאלד עס איז א גרויסע טאפ, ער דערלייגט נישט אזויפיל מיטן צוריק נעמען און האט נישט אזא פראבלעם, אבער א יודישע סוחר וואס איז נישט אזוי גרויס ביי אים מאכט דאך אויס יעדע אייטעם וואס ער פארקויפט ביי אים איז אסאך שווערער צוריק צונעמען.

די מכה פון צוריק ברענגען איז א ממש א מכה אשר לא כתובה בתורה, איך וואלט געזאגט אז די מכה פון צוריק ברענגען איז פארהאן מער ביי די ווייבער שול, ווייל ווען מענער קויפן עפעס איז כמעט נישטא אזא זאך ווי צוריק ברענגען, מ'קויפט א היט מ'קויפט א סוט מ'טראגט עס אהיים און פארטיג, איז אמאל איינעם בייגעפאלן צוריק צו טראגן א היט אדער א סוט, איך ווייס נישט פארוואס אבער ביי די ווייבער איז דאס צוריק טראגן מער עסק ווי דער איינקויפן אליין, עד כדי כך אז א חבר האט זיך מיר אויסגעדריקט אז זיין ווייב וויל זייער שטארק עפעס צוריק טראגן זי האט נאר נישט וואס, מוז זי גיין עפעס איינקויפן כדי צוריק צו טראגן....,
דו דארפסט קויף, דארפסט נישט קויף נישט, וואס קויפסטו און טראגסט צוריק?, אמת, ס'מאכט זיך אמאל מ'האט זיך פארעכנט מיט א סייז ס'איז נישט פונקט וואס מ'האט געדארפט און מ'טוישט עס אויף, אבער עמטליך איינצושטעלן דעם סיסטעם פון צוריק טראגן?..., און ווען דער סוחר גיבט א קרום מיט די נאז כאטש ער נעמט עס צוריק הייסט ער א סוחר וואס גיבט נישט קיין סערוויס.
(אפשר ווען מענער וואלט איינגעקויפט אלע צרכי הבית ווי די ווייבער טוען היינט, וואלט זיי אויך געוועהן אזוי צוריק ברענגעדיג ווי די ווייבער....)

מ'לעבט דאך אויף אינוועטארי, דער יוד זעהט ווי דער קאמפיאטער צייגט אז ער האט פארקויפט 12 פאר שטרימפ, נו אז ס'איז פארקויפט קען מען ניצן דאס געלט צום לעבן און דער סוחר קויפט זיך פיש אויף שבת, יעצט מאנטאג נאך שבת ברענגט מען צוריק די 12 פאר שטרימפ פון ווי זאל דער סוחר נעמען געלט צוריק צו געבן פארן קאסטומער, ער האט דאך געקויפט פיש אויף שבת.

און אז ער לעבט אויף אינוועטארי זאגט אים דער קאמפיאטער נאכן פארקויפן אז ס'איז שוין מער נישטא באשטעלט ער נאך, און יעצט נאכן באשטעלן ברענגט מען צוריק די אפגעקויפטע, האט ער יעצט אין סטאק דאפלט סחורה, און בכלל וויאזוי פילט א סוחר ווען מ'ברענגט צוריק א טאפ און מ'טוישט עס איין פאר א סעט גלעזלעך, איז דען דער סטאר א גמ"ח?

הכל מודים אז דער גוי נעמט נאר צוריק ווען עס איז פונקטליך מסודר אין די זעלבע פעקעדש באגלייט מיט א קלארע רעסיט, משא"כ דער איד ער איז דאך א היימישע, אים מוז מען דאך נישט ווייזן קיין רעסיט און מ'מוז עס נישט צוריק פאקן פונקטליך, און מ'קלערט איך בין דאך גוט מיט אים ער וועט מיר מוזן טון די טובה און צוריק נעמען, אטעדא איז דער פארווייטאגטע פראבלעם, זאל דער סוחר זאגן איך נעם נישט צוריק פאר זיינע פאר אויסגעציילטע קאסטומער'ס, וויל ער נישט זיין דער שלעכטע סוחר וואס גיבט נישט קיין סערוויס, מוז ער צוריק נעמען, ס'איז געווארן א מצב אז ביי אידן ברענגט מען צוריק זאכן וואס ביים גוי וואלט מען נישט צוריק געברענגט, און הערשט איז דא א טענה אז ער גיבט נישט קיין סערוויס.

זאל דער צוריק ברענגער מודה זיין על האמת, וואלט איר אראפ גענומען א זאך פון שעלף וואס קוקט נישט אויס ניי?, אויב האט איר א חשש אז איינער האט דאס שוין געפענט וועט איר נעמען אן אנדערס, אמת?, נו פארוואס זאל עס דער סוחר צוריק נעמען?

א סוחר פון א פרויען קליידער סטאר גיבט א כלל:
א זאך וואס גייט אראפ פון הענגער פארלירט די ווערד, די רגע מ'נעמט א פרויען קלייד און מ'לייגט עס אריין אין א בעג פארלירט עס די גלאטע חן און ווערד, מענטשן כאפן נישט אז ווען מ'טראגט אהיים א קלייד און ס'ליגט אפאר טעג ביי יענעם באקומט די קלייד א שמעק פון יענעמ'ס הויז, (יעדע הויז האט זיך זיין שמעק) נישט חלילה אז ס'איז א שלעכטע גרוך אבער עס איז שוין ווייניגער ווערד ס'איז שוין נישט קנאקעדיג ניי מיטן סטאר גערוך, איינער טראכט אמאל פון דעם?

איך וויל נישט מוציא לעז זיין אויף אידן, אבער א סוחר האט מיר פארציילט אז מיט אפאר יאר צוריק ווען ער האט נישט געהאט קיין קאמפיאטער האט ער נישט געוויסט פונקטליך וואס ער פארקויפט און וואס מ'ברענגט צוריק, אבער איינמאל האט ער זיך געכאפט אויף א קינדער פידשאמע וואס איינער האט צוריק געברענגט אז ער פארקויפט אפי' נישט אט די קאמפאני, און דא קומט אריין א פרוי מיט דעי קאמפאני צוריק ברענגען וואס זי האט כלומר'ש דא געקויפט, דער סוחר זאגט מיר ס'איז אים זייער שווער געוועהן צו זאגן די היימישע פרוי אין פנים אנטשולדיגט איך האב דיר דאס קיינמאל נישט פארקויפט,
צו איז דאס גערעכט?, מעג מען אויסניצן א היימישע סוחר אזוי שטארק? טאקע דערפאר ווייל ער איז א היימישע איד.

זייער אסאך האבן שוין געשריבן אז ווען דער היימישער עולם ברענגט צוריק זאכן אין די דיפארטמענט סטאר'ס איז דאס א חילול ד', די גוים זאגן אז אידן זענען גנבים, מ'ניצט עפעס און מ'ברענגט עס צוריק, און אסאך מענטשן זענען טאקע נתעורר געווארן פון דעי בריוו'ן און מאמרים, און מ'איז זיך מונע נישט צו מאכן קיין חילול ד' און מ'פראבירט נישט צוריק צו טראגן קיין וואל מארט וכדומה, רבותי! לאמיר אייך פרעגן צו איז חילול ד' גולטיג נאר ביי א גוי, און א איד מעג מען דען יא מצער זיין?....

א הארוועיר סטאר פארציילט אז נאך פסח האט אים א פרוי צוריק געברענגט א גרויסן גארביטש קען וואס זי האט גענוצט גאנץ פסח צו האלטן וואסער (ס'איז דא א חומרא אוועק צו לייגן וואסער פון פאר פסח אויף אגאנץ יו"ט כדי צו קענען מבטל מאכן די חמץ פון פריער), דער סוחר האט באמערקט אז מ'האט דאס שוין געניצט, זאגט ער איר אנטשולדיגט מיסיס מיר קענען עס נישט צוריק נעמען ווייל איר האט דאס שוין געניצט, די פרוי קוקט מיט ווינדער און פרעגט איך פארשטייט נישט איך טו דאך דאס יעדעס יאר וואסי יעצט אנדערשט?....., מ'קען פלאצן.....

יעצט וואס געשעהט, די סוחרים זענען דאך פיינע מענטשן אידן מיט אידישע הערצער, נאר די פאר אויסניצער אביוזען דעם סיסטעם, און צווינגען די סוחרים צו מאכן שטרענגע רעגולעישאנ'ס, און די נארמאלע מענטשן ליידן, דאס איז נישט ווייל ביי אידן איז נישטא קיין סערוויס (לייען ריטערנס...), נאר דער הכרח האט אזוי גורם געוועהן, פונקט ווי אין מיין גמ"ח ווי איך האב אייביג געקעשט מיינע טשעק'ס האט מיטאמאל געמאכט א גזירה אז ער קעשט נאר ווער ס'האט ליגן אין גמ"ח אזויפיל געלט וויפיל דער טשעק באשטייט, צו וואס, ווייל אייניגע מענטשן האבן אביוזט דעם סיסטעם, און די נארמאלע מענטשן ליידן.

יעצט לאמיר פארשטיין וואס איז טאקע די סיבה פארוואס א היימישע פרוי זעצט זיך ארויף אויף א באס – טרעין- קאר, און גייט איינקויפן קליידער א.ד.ג. אין א גוי'שע געשעפט אין די צייט וואס מ'קען אויך קויפן ביי אידן, איך האב פיל געקלערט און גע'חקר'נט אין דעם ענין, און דער ארויסקום איז ווינדערלעך.

היימישע פרויען ווילן גיין אנגעטון טייער און ביליג, דאס איז טייטש אז די היימישע קליידער סטאר'ס בעטן אסאך געלט פאר יעדן קלייד, אבער אין מאנטהעטן קען מען באקומען פאר ביליגער, באמת קאסטן נישט די זאכן אזוי טייער פאר קיינעם נישט פארן גוי און נישט פארן איד, איי זאל דער היימישע סוחר בעטן ביליג, וועט דאך קיינער נישט קויפן ווייל יעדער קען דאך די ביליגע זאכן און ווער וויל דעם גיין ביליג אנגעטון, מוז ער בעטן טייער כדי אז ווען איינער טוט זיך אן מיט די טייערע זאכן ווייסט יעדער אז ס'איז טייער, מ'זיכט דאך אבער ס'זאל נישט קאסטן, פארט מען אריבער צום גוי דארטן קויפט מען גוטע זאכן פאר ביליג וואס יעדער מיינט אז ס'איז טייער און דאס איז אזעלכע זאכן וואס מ'האט נישט געזעהן אין היימישן געשעפט און דערפאר ווייסט נישט דער גאס וויפיל מ'האט באמת באצאלט, מ'מיינט אז מ'האט באצאלט אסאך אבער ביזערווייל איז עס ביליג,
איר כאפט א חשבון?, אלעס דרייט זיך ארום וואס יענער זאגט (יענער זאגט אפי' נישט, ער טראכט אפי' נישט, נאר דו נארישע אידענע מיינסט אז יענער טראכט פון דיין קלייד), גייט מען צום גוי פארוואס, ווייל מ'קויפט זאכן דארט וואס קיינער ווייסט נישט די אמת'ע פרייז, דאס איז אזא פאפעריי מ'פאפט די גאס אז מ'גייט טייער אנגעטון אבער עכט איז עס נישט טייער, (אויב איר האלט 10 יאר נאך די חתונה וועט איר פארשטיין דעם חשבון זייער לייכט)
און נאכדעם הערט זיך א טענה אז גוים זענען מיט 50 פראצענט ביליגער...., איר כאפט?....

זהו אחת, והשנית דאס איז שוין יא א ערנסטע פראבלעם, לאמיר נעמען א פשוט'ע סדר היום פון א היימישע מאמע פון וויליאמסבורג, רוב מאמע'ס האבן איין קליין קינד אינדערהיים וואס גייט נאכנישט אין בית חינוך און בדרך כלל אזא קינד שלאפט אין די פארמיטאג שעה'ן א בייטאג שלאף, יעצט איז דינסטאג צופרי 9:30 די מאמע האט ארויף געלייגט איר קינדערגארטען קינד אויף באס, און זי האט אין פלאן צו גיין היינט קויפן א מלבוש ודומה לזה, זאל זי גיין יעצט? איז נישטא ווי, אלע געשעפטן אין וומס"ג זענען צוגעשפארט זיי עפענען אויף הערשט 11 אזייגער, מוז מען גיין שפעטער, גייט מען ארויף אהיים און מ'נעמט זיך צום סדר היום וואשן וועש קאכן באקן וכו', ווערט שוין 11:30 יעצט עפענען זיך שוין די געשעפטן, פונקט יעצט האט דער קליינער געכאפט א דרימל מ'וויל אים נישט אויפוועקן, ווארט מען אויס ביז דאס קינד שטייט אויף, ווערט שוין 2'ע 3'ע, דארף מען שוין אפווארטן די קינדערגארטען באס וואס קומט אהיים, יעצט ווען די גרויסע זענען נאכנישט אינדערהיים לויפט די מאמע מיטן קערידש און באגלייטונג פונעם קינדערגאטען קינד און מ'גייט איינקויפן,
דאס קליינע קינדערגארטען קינד האט לגמרי נישט קיין געדולד צו גיין שפאצירן נאך א טאג אין בית חינוך אבער מ'גייט, דעם נעקסטן טאג באקומט דער מלמד / טיטשער א קאמפלעין ער זאל טון עפעס ווייל דאס קינד האט נעכטן נישט ביהעיווט אין דאסטער סטאר...., יעצט ווער איז שולדיג?, די סוחרים, ווייל זיי עפענען אויף שפעט די געשעפטן.

אויב גלייבט איר נישט וואס איך זאג אדרבה קוקט'ס ענק אום אויף די גאסן, ווען איז לי עוו. די מערסטע פול מיט מאמע'ס און קערידשעס?, צווישן 3'ע און 4'ע.

ווידער איז דא זייער א גוטע עצה ווען צו גיין איינקויפן, דאס איז טאקע גלייך צופרי גלייך נאכן ארויף לייגן דאס קליינע קינדערגארטען קינד אויפן באס, כאפט מען זיך ארויף און מ'לאזט זיך ארויס קיין ב"פ אדער מאנהעטן, מ'קויפט איין און מ'איז צוריק 2 אזייגער צום באס, און דאס גאנץ קליינע איז איינגעשלאפן זיס אין קערידש, נו א ווינדער מ'גייט צו גוים, ווער איז שולדיג?, די סוחרים אליין, מאכט'ס אויף די סטאר'ס פרי, וועלן מער מענטשן קומען איינקויפן ביי ענק.

אידישע סוחרים דארפן וויסן אז טאקע ווייל דער קונה איז א היימישע איד זאלסטו אים צושטעלן פון דאס בעסטע, נישט אזויווי ס'איז געוועהן א איד וואס איז געשטאנען אין א היט סטאר, איז שוין געוועהן באקאנט אז זיינע קרובים באקומען די שוואכסטע היטן, מיט א חשבון אז בשלמא די קאסטומער'ס מוז ער דאך געבן שיינע היטן ווייל אז נישט קומען זיי נישט צוריק, אבער די קרובים זיי "מוזן" דאך קומען אהער נו אז ער מוז קומען מוז ער נישט האבן א שיינע היט, ער קומט דאך נישט צו האבן א שיינע היט, ער קומט דאך נאר צו שטיצן דעם קאזן...., א היימישע סוחר טאר נישט אזוי שפירן, מ'קומט איינקויפן ביי אים ווייל ער איז א היימישע איד, און ווייל ער פארשטייט צום ציבור, מ'קען קויפן דעם זעלבן חפץ ביים גוי אבער מ'קומט צו אים ווייל ער פארשטייט וויאזוי ס'ארבעט און ער וועט מסביר זיין בטוב טעם אויף מאמע לשון, און טאקע דערפאר פרעגט דער איד אזויפיל קשיות ווייל ער קויפט ביי דיר פילט ער זיך באקוועם צו פרעגן אלע זיינע ספיקות און כמו ספיקות.

אויך דארף מען זיך רעכענען מיט די רעגולעישאנ'ס, צ.ב.ש. עטליכע קליידער געשעפטן פאר קינדער און פאר ערוואקסענע האבן אזא פאלעסי אז זיי לאזן אהיים טראגן, אבער ווי נאר ס'מאכט זיך צו דער רעדשיסטער קען יענער שוין נישט צוריק באקומען דאס געלט, מ'באקומט נאר צוריק קרעדיט, לדעתי איז דאס נישט יושר, צו וואס לאזט דער סוחר אהיים טראגן, דאס איז דאך נאר כדי אריין צו נער'ן יענעם אין זאק אריין, ווייל אז מ'טראגט אהיים איז כמעט נישט מעגליך צוריק צו ברענגען בו ביום, ממילא וועט ער שוין מוזן האבן ריוח ווייל ער גיבט נאר צוריק קרעדיט, זאל ער נישט לאזן אהיים טראגן, דער קאסטומער זאל אויספראבירן דא אז ס'געפעלט דיר איז גוט און אז נישט גיי ווייטער.

שטעלט'ס ענק פאר אויב דשי ענד דשי וואלט געהאט אזא ווירטשאפט ווי די אויבנדערמאנטע סטאר'ס, דער עולם וואלט געקויפט סוט'ס אהיים געטראגן, און אויספבראבירט, און אויב ס'וואלט נישט געפאלן קען מען עס צוריק ברענגען און באקומען נאר קרעדיט...., ער וואלט געוועהן א זיכערע געווינער....,

ס'קומט אויס אז יעדער אשת חיל פארמאגט אין בערזל צענדליגע קרעדיט צעטלעך פון כל ערליי געשעפטן, און לעת הצורך שלעפט מען ארויס א קרעדיט צעטל, און דער סוחר ווערט גאר בייז מיטן טענה אז ער שפירט זיך ווי א גמ"ח.

וואס איז יא די עצה, ווייס איך נישט, איך רעד נאר פון די פאקטן, סך הכל האמיר אראפ געריסן ביידע צדדים סיי די סוחרים און סיי די קאסטומער'ס, און דער סך הכל איז אז מ'דארף נאך אלץ קויפן ביי אידן...

נישט נאר קויפן ביי אידן, נאר אויך ליינען ביי אידן, ליינט'ס ענדערטש אידישע ארטיקלען ווי איידער גוי'שע ארטיקלען, אפי' ווען דער אידישע ארטיקל איז 15800 קרעקטער'ס....

בעל בית
שר העשר
תגובות: 48
זיך איינגעשריבען אום: דינסטאג ינואר 06, 2009 4:46 pm

תגובהדורך בעל בית » מאנטאג פאברואר 02, 2009 1:15 pm

חי אחיך מיינט אויך נישט העכערן די פרייזן מער ווי 10% כדי אז עס זאל איבער בלייבן געלט צו קענען קויפן אויך פון צווייטן

אוועטאר
יאנאש
שר שמונת אלפים
תגובות: 8292
זיך איינגעשריבען אום: מיטוואך יוני 28, 2006 8:40 pm
לאקאציע: וואו בינעך טאקע?

תגובהדורך יאנאש » מאנטאג פאברואר 02, 2009 1:51 pm

דער שץ איז מיר לעצטענס געווארן א חכם, דער שרייבט ביידע צדדים אן נעמען א שטעלונג וואס ער האלט, און דערנאך בלייבן מיר לעזער'ס מיט דעם פראבלעם פון נעמען א צד אינעם דעבאטע וואס ער האט ניטאמאל אנגעהויבן.

וואס זאלעך אבער דאס מאל זאגן, דו רעדסט דאך פשוט דברים של טעם, און איך קען נאר זאגן אזויפיל אז איך בין פון דיעזע וואס קויפן ממש נאר ביים איד (אויסער אויב קיינער האט נישט דעם פראדוקט) אפי' 'אנליין' שאפ איך נישט, און איך קען דיר זאגן אז איך האב נאך כמעט נישט חרטה געהאט, נובאדעי איז דא געשעפטן וואו איך גיי נישט אריין אפי' דו זאלסט מיר צאלן, אבער די זעלבע זאך האב איך א בלעק בוק מיט גוי'אישע געשעפטן.

די סערוויס ביי אונזערע סטאר'ס זענען בדרך כלל דוקא יא גוט, און מיטן רעטורן פאלעסי קומט מען זיך שוין אויס מהיכי תיתי, איך האב אבער יא איין אישו און דאס איז מיט נעמען קרעדיט קארד'ס, יעדעס מאל מאכט מען מיך פילן ווי א חולם פארן צאלן מער ווייל עס איז מיטן קארטל, דאס איז נישטא ביי קיין גוי'אישע סטאר'ס, אויס ביי געז סטעישענס און דארט אויך נאר די פראצענט וואס מען צאלט אראפ פארן קארד קאמפאני, נישט פאר טעקססע.

סאו ביטע פיקסט דעם פראבלעם און איך בין א גאנצער חסיד.

אוועטאר
שוועמל
שר עשרת אלפים
תגובות: 14186
זיך איינגעשריבען אום: מיטוואך יולי 19, 2006 8:40 pm
לאקאציע: גידולו בכל מקום

תגובהדורך שוועמל » מאנטאג פאברואר 02, 2009 2:36 pm

יאנאש אויב צאלסטו נישט קיינע טעקסע איז דאך גוט, קענסטו דאך ערוועלט ווערן פאר ראש הקהל...
א שטייגער ווי דעשעל, און אנדערע.
שוש אשיש בה', תגל נפשי באלקי! (ישעיה סא)

אוועטאר
צוביילטער
שר חמש מאות
תגובות: 539
זיך איינגעשריבען אום: מאנטאג סעפטעמבער 01, 2008 1:09 pm
לאקאציע: אין בעט

תגובהדורך צוביילטער » מאנטאג פאברואר 02, 2009 3:08 pm

הערליך אראפגעלייגט. אבער פאר א אינגערמאן וואס פלאגט זיך אויף לחם לאכול קען מען דען זאגן אז ער זאל נאר קויפן ביים איד?

לגבי 11 אזייגער טוען דאס די סוחרים בעיקר צו שפארן אפאר טאלער פון צאלן ארבייטער.

יאנאש, פריי דיר אז אנעם קארטל בעטן זיי ביליג, ווילסט אז זיי זאלן שטענדיג צובעטן? איך האף אז די פארשטייסט אז ס'נישט שייך נישט צו צובעטן מיטן קארטל, ווארום די געלט פארט דאך גלייך אריין אין באנק.

אוועטאר
איך_הער
סעקרעטאר
תגובות: 18577
זיך איינגעשריבען אום: דינסטאג יולי 04, 2006 6:47 pm
לאקאציע: אין אפיס
פארבינד זיך:

תגובהדורך איך_הער » מאנטאג פאברואר 02, 2009 4:00 pm

יאפס, זייער גוט אראפגעלייגט, כ'האמעך פארגעשטעלט אז ווען דו זאגסט אז ס'קומט א גוטס, קומט א גוטס.

באט עניוועי, איך קויף אויך געווענליך איין ביי אידן, ווייל איך האנישט אלץ געדולד צו גיין שאפינג, און ניטאמאל טרעפט מען וואס מ'זוכט.

אבער למשל ווען מ'דארף א פלאמבער, וואס א גוי רעכענט פארן אראפ קומען 35 דאלער, און א איד רעכענט 75 דאלער, וויזוי קען איך פילן גוט, און טראכטן אז אנשטאט אים צו געבן פערציג דאלער ביי א טיי אווענט זאלעכעס יעצט געבן, איך טראכט יעצט פון א עצה, אז די איבריגע פערציג, זאלעך געבן פון מעשר, מסתמא מעג מען, ניין?

יישר כח, כ'האב שטארק הנאה געהאט ביים ליינען.

אוועטאר
צוביילטער
שר חמש מאות
תגובות: 539
זיך איינגעשריבען אום: מאנטאג סעפטעמבער 01, 2008 1:09 pm
לאקאציע: אין בעט

תגובהדורך צוביילטער » מאנטאג פאברואר 02, 2009 4:22 pm

איךהער, האסט נישט קיין געדולד? וויאזוי זאגסטו נאר? האב כאטש אינזין אז די טוסט א מצוה.

איך ווייס נישט די הלכה, אבער אויב יענער פלאגט זיך (ווער פלאגט זיך נישט?) גלייב'ך אז מ'מעג.

פארשטייט זיך אויב האסטו פרנסה ברוח פארוואס זאלסטו אוועקנעמען דעם מעשר פון יענעם צוועק וואו די געלט וואלט געגאנגען. טאקע פאר דעם טעם ניץ איך נישט די מעשר געלט פאר אלע זאכן וואס "מ'מעג".

ברוך
שר חמש מאות
תגובות: 643
זיך איינגעשריבען אום: דאנארשטאג מאי 08, 2008 4:13 pm
לאקאציע: וואקאציע

תגובהדורך ברוך » מאנטאג פאברואר 02, 2009 4:26 pm

זאליך נעמע א שטעלונג? איך האלט דאך אווי ש"צל. א יעדע מינוט טויש איך מיין מיינד!
ווידערום זאליך טאקע האלטן ווי ש"צל? ווי נעמט מען 15800 קערעקטערס זיך אפילו שטיין ביי די עק סטעידש?

סאו וועלך שטיין פון אונטן מיט א קליין פענדעלע און שאלן צו דיר ;l;p-

אה!! שכוח פארן מקרב זיין אל השכל, דברים של טעם.

אוועטאר
קרעמער
שר עשרים אלפים
תגובות: 28306
זיך איינגעשריבען אום: זונטאג יוני 25, 2006 12:34 pm

תגובהדורך קרעמער » מאנטאג פאברואר 02, 2009 4:30 pm

איך האב ממש גארנישט וואס צוצוגעבן, העמיר דאס געבן צו לעזן פאר די איבריגע בני בית און זיי וועלן שוין עפענען א אויער מיט מיילער (אה יא, איין קריטיק, אינמיטן ארטיקל דרוקסטו זיך אויס "דו נארישע אידענע" וטעות לעולם גולם).

אוועטאר
צייטליך
מ. ראש הקהל
תגובות: 12470
זיך איינגעשריבען אום: מיטוואך נובעמבער 01, 2006 6:13 pm
לאקאציע: ערגעץ דא אין די געגענט.

תגובהדורך צייטליך » מאנטאג פאברואר 02, 2009 5:06 pm

שאץ. גאר א ברייטער און רייכער אפהאנדלונג. אזוי שמירנישדירניש האטסו אריינגעגעבן דא פאר אלע צדדים, די איינקויפער, דעם סוחר, מיין רעבעצין.. און אירע פריינדינעס.. אא"וו.

ביי יעדע זאך איז דא א עקסטערע מעשה. מ'קען אייביג זאגן א אנדערע פוינט, למשל דאס וואס איך הער ברענגט ארויס. אקעי, דאס איז א זאך וואס שאץ האט שוין דערמאנט אז ע"פ הלכה מעגסטו קלאר גיין צום גוי. (הגם אויב געדענקסטו די מעשה מיט מיין פלאמער וואלסטו שוין געטראכט צוויי מאל..)

שאץ, ברענגט ארויס א גוטע הסבר, אז די פרויען ווילן גיין טייער אנגעטוען פאר א ביליגן פרייז. ס'קען זיין, ס'איז א גוטער דערהער. אבער דאס הייסט אז דער זעלבער קלייד קען מען האבן פאר אסאך ביליגער ביים גוי טאקע ווייל ער האט נישט דעם פראבלעם פונעם אידישן סוחר אז ער מיז מאכן א טייערער פרייז כדאי מ'זאלעס קויפן. נו, וואספארא טענות קען מען האבן אויפן פרוי אז זי פארט קיין מאנהעטן?

די טענה וואס די האסט קעגן געוויסע סוחרים וואס זיי האבן א פאלעסי אז מ'קען אהיימנעמען א זאך נאר צוריקברענגען אין יענער טאג איז גראדע זייער א גוטער זאך און ס'איז זייער גערעכט.

זיי ווילן נישט אז די זאלסט נעמען א קליידל און דאס אנטוען ביים שוועסטער'ס וואך נאכט און א טאג דערנאך צוריק ברענגען, אויב יא זאלסטו צאלן דערפאר. זיי זאלן אויסדריקלעך נישט אויפהערן מיט די סערוויס. עס זענען דא עלטערען וואס האבן גרעסערע קינדער וואס בעבי-סיטן און זיי קענען נישט מיטברענגען די קינדער אין געשעפט, אזוי קענען זיי דאס אהיימנעמען און דאס אנפראבירן אויף די קינדער. זייער גלייך.

שאץ, כה לחי!
איך בין צייטליך און איך האב עפראווד די תגובה.

אוועטאר
וויכטיג מאכער
שר עשרים אלפים
תגובות: 24576
זיך איינגעשריבען אום: מיטוואך מארטש 12, 2008 6:21 pm
לאקאציע: צווישן טרעק 4 און טרעק 5.

תגובהדורך וויכטיג מאכער » מאנטאג פאברואר 02, 2009 5:11 pm

אוי שאצי, האסט ארויסגעכאפט געוויסע ווערטער פון מיין מויל. (נעקסטיים וועלעך וואטשען וואס איך רעד)

עניוועי, איך האב דיר נישט אלעס געזאגט, איך האב נאך אסאך צו פארציילן....

ווי באקאנט, דריי איך מיך אסאך אין געוויסע געשעפטן, איינע פון די טעג קומט אריין א פרוי אין א סטאר, זי ברויך א רעסיט פאר א קעמערע, אויף די פראגע צו זי האטעס דארט, אין יענעם געשעפט, געקויפט, זאגצע ניין, כאבעס געקויפט אויף די מאשין, (ח"ו נישט זאגן אינטערנעט) און דא קומט די חוצפה, זי זאגט, אבער אלץ שכן, וועט איר מער געבן א רעסיט..... אנטשולדיגט! איינקויפן דא, ווייל איר זענט א שכן, איז אייך נישט איינגעפאלן, אבער סערוויס דארפט איר, אמער, איר זענט א שכן, איא?

ווידער, א צווייטע פרוי, זי האט געקויפט א טעלעפאון, און זי וויל ס'זאל גייו אויף די וואנט, און ס'גייט נישט, זי וויל עס צוריקגעבן, דער ארבייטער ווייזט איר אן, אז ער האט איר צוגעגעבן א שטיקל, וואס ווען מ'לייגטעס צו, קען מען עס ארויפלייגן אויף די וואנט,... נאך א טאג קומצע צוריק, זי האט געמיינט אז ס'גייט אויף די וואנט געהעריג, און יעצט מיט דעם שטיקל שטעקט זיך עס זייער שטארק ארויס, זי האט געמיינט אז ס'גייט שטיין גראד און ס'שטייט שיף..... דער ארבייטער, וואס מסתם האט ער יעדן טאג אזעלעכע מעשיות, גייט צו צום שעלף, און געט איר א אנדערע טעלעפאון, אבער די באקס איז געווען אפען, די פרוי הייבט אן בעטן אז ס'איז נישט גוט, זי וויל א אנדערע וואס איז נאכנישט געווען אפען...... דער ארבייטער איז איר מסביר, אט אזוי גייט פאסירן מיט די טעלעפאון וואס זי וויל צוריקברענגען, קיינער גייטעס נישט וועלן קויפן, ווייל ס'איז שוין געווען אפען..... זי הייבט אן שרייען אז דאס איז נישט קיין סערוויס, ווען זי גייט ווען צום גוי, וואלט זי עס ווען געקענט צוריקטראגן...... דער יוד זאגט איר, מיסיס, איר קענט מיר זאגן וואס איך זאל טוהן מיט דעם טעלעפאון? ס'גוט, ס'ארבעט, כ'קען עס נישט צוריקשיקן צו די קאמפאני..... קיינער וועט עס נישט קויפן, אמער, ס'איז שוין געווען אפען.... סאו איך דארף דערלייגן געלט ווייל דו האסט געמיינט אז ס'איז גראד...........

און דא קומט אריין נאך א זאך, דאס ענין פון רעסיט, זאל איינער פראבירן אריינגיין צו וואלמארט מיט א אייטעם וואס ער האט געקויפט פאראיאר, און בעטן א רעסיט דערפאר... קלעפ וועלן פליען, מ'וועטעס ארויסטראסקענען בשן ועין, ווען איר קויפט איין ביים יוד און איר האט א גאראנטי פון די קאמפאני, אויף אייער אייטעם פאר א יאר.... ס'איז שוין א דערעך די יאר, ס'איז 14 חדשים, ס'האצעך צובראכן.... ווען איר קויפט ביי א גוי, קענט איר גיין בארן קלאפן, איר קענט שוין גיין קויפן נאך איינס, אבער אויב קויפט איר ביי א יוד, וועט ער אייך געווענדליך מאכן א רעסיט, ס'זאל זיין אין די יאר, און איר וועט באקומען א נייע פון די קאמפאני, (חוץ אויב איר קויפט ביי א גוי, און גייט בעטן פון די געשעפט אייגענטומער ער זאל אייך מאכן א רעסיט אלס שכן....) לויט דעם לוינצעך צו קויפן ביי א יוד אייביג, אפילו ער איז טייערער, ווייל צום סוף קומטעס אויס ביליגער.....

נאך איין מעשה, קומט אריין א בחור, מיין ברודער האט געקויפט א טעיפ, און ווען ער איז אהיימגעקומען, האמער באמערקט אז אונז האמער שוין איינס, און ער וויל צוריק די געלט, די טעיפ איז געווען א טעיפ וואס איז ארויסגעקומען 10 יאר צוריק, און ס'איז שוין צו באקומען פאר 2.99, די סטאר האטעס געגעבן פאר פרי, פאר יעדע סידי וואס מ'קויפט..... און ער וויל צוריק זיין 10 דאללער.......

פון די אנדערע זייט, איז דא געשעפטן, אזוי ווי שאץ האט שוין ארויסגעברענגט, ווען די קאסטעמער קומט אריין, זי וויל אנטרייען א געוויסע קלייד, זאגט די סטאר מענטש, נע! מ'קען נישט אליין זעהן, נעמטעס אהיים, ווייזט דאס פאר אייער מאמע/שוועסטער... זיי וועלן אייך שוין זאגן, א טאג שפעטער, זי קומט צוריק, ס'איז נישט גוט, ס'איז צו גרויס/קליין/טונקל...... (רוב קליידער סטאר'ס האבן אינטערעסאנטע לייט'ס און שפילעך אין די דרעסינג רום'ס, כדי ס'זאל אויסקוקן גוט אויף די קאסטומער) נאו פראבלעם, איך קען אייך אבער נישט צוריקגעבן קיין געלט..... ס'איז א סטאר פאליסי.....

מיין ווייב איז געפארן צו א געשעפט קויפן א ראופ, זי האט געזעהן איין ראופ, ס'איז איר זייער גאפאלן, ס'איז אבער נישט געווען די ריכטיגע סייז, די סטאר מענטש האט איר געזאגט אז ס'איז יא גוט, עניוועי, מארגן באקומען מיר אריין א אנדערע סייז, אויב ס'איז נישט גוט, קענט איר עס קומען טוישן, ס'איז דערעך איין וואך, און נאך א וואך, יעדן טאג קומט "מארגן" אריין די אנדערע סייז, כ'רעד שוין נישט פון טראנספארטעישן, וויפיל ס'קאסט, ווייל דאס איז נישט זייער שולד, אבער צוריקגעבן די געלט?... סארי... סטאר פאליסי.... איר האטעך מיר צוגעזאגט אז איר גייט אריינבאקומען די אנדערע סייז?....... די חוצפה גייט נאך ווייטער, ס'איז שוין זייט דעמאלטס דערעך געגאנגען 4 חדשים, מיין ווייב קאלט אריין אין די סטאר יעדע צוויי וואכן,........................... נישט לאנג צוריק האט די סטאר געהאט א סעיל, (ביי די עקספאו) מיין ווייב איז אהין געגאנגען, און געבעטן אויב זי קען נעמען עפעס אנדערש, זאגן זיי, (איידעלערהייט, שטייצעך) סארי, אבער מיר קענען נישט נעמען קיין קרעדיט'ס דא, מיר האבן נישט דא אונזערע פיילס.....(איי מיין ווייב האט א צעטל אין די האנט?.....)

אין קורצן, די סטארס טארן נישט אביוזען די קאסטומערס, און די קאסטומערס טארן נישט אביוזען די סטאר'ס....

און יעצט צו שאצי, זאג נאר, וואס איז נעקסט? באלד גייסטעך נעמען צו מיינע ביינער? זאג מיר פארדעם, כ'וויל מיך אנטוהן בלעכענע הויזן.................

דזשאסט פאר יור אינפאו, דו ווייסט אליין נישט ווי גוט דו האסט געשריבן......
הכונו ל'מעמד אדיר איום אסיפת ה''ניקס'' לטוהר המחנה!!!

אוועטאר
וויכטיג מאכער
שר עשרים אלפים
תגובות: 24576
זיך איינגעשריבען אום: מיטוואך מארטש 12, 2008 6:21 pm
לאקאציע: צווישן טרעק 4 און טרעק 5.

תגובהדורך וויכטיג מאכער » מאנטאג פאברואר 02, 2009 5:22 pm

אויש! פארגעסן איין מעשה, א היימישער סוחר פארציילט מיר, אז ער פארקויפט א געוויסע זאך, וואס ער אליין פאברעצירטעס אין זיין פעקטערי, ס'איז דא אנדערע געשעפטן וואס פארקויפן די זעלבע פראדוקט, אבער פון א צווייטע קאמפעני, זייענדיג די מענופעקטשער אליין, קענער עס פארקויפן פאר ביליגער ווי זיינע קאמפעטישען, און אזוי פלעגט ער טאקע טוהן..... ביז..

ביז ער האט באמערקט, אז ביזנעס איז נישט וויזוי ס'דארף צו זיין, האטער ארינגענומען א קאנסאלטינג פירמע, און זיי האבן געטשעקט די פרייזן, און זיי זעהען אז דאס איז נישט די פראבלעם, כ'מיין זאכן וואס אנדערע פארקויפן למשל פאר 1000 דאללער, פארקויפט ער פאר 500 דאללער, סאו זיי האבן זיך אריינגעזעצט ביי עם אין געשעפט, און זיי האבן געווארט אז א קאסטומער זאל אריינקומען.... די קאסטומער באטראכט די אייטעם, ס'געפעלטעם, ער פרעגט א פרייז, און די ארבייטער זאגטעם ס'קאסט 500 דאללער, וואס? אזוי ביליג? ס'איז די זעלבע קוואליטי וואס די אנדערע האבן? זאגטער יא, נאר וויבאלד מיר מאכן עס אליין, קענען מיר זיין ביליגער,.... אקעי... כ'הער.... העמער זעהן..... און ער גייט ארויס.....

די קאנסאלטינג קאמפאני האט געזאגט פארן בעל בית, הייב די פרייזן, זיי נישט אזויפיל ביליגער ווי די אנדערע סטאר'ס, פארקויפעס למשל פאר 850 דאללער, וועטעס גיין בעסער,... איבעריג צו זאגן, זייט ער האט געהויבן די פרייזן, האצעך סעילס אין די סטאר געהעכערט פילפאכיג..........

ווי זאגט נאר שאץ?....יעדער וויל האבן די טייערע פאר ביליג..... אוי ווי גוט ער זאגט....
הכונו ל'מעמד אדיר איום אסיפת ה''ניקס'' לטוהר המחנה!!!

אוועטאר
צוביילטער
שר חמש מאות
תגובות: 539
זיך איינגעשריבען אום: מאנטאג סעפטעמבער 01, 2008 1:09 pm
לאקאציע: אין בעט

תגובהדורך צוביילטער » מאנטאג פאברואר 02, 2009 7:12 pm

לגבי דעם פונקט אז יעדער וויל טייער, האט מיר א בעל בית פון א פרוכט געשעפט אמאל פארציילט א געשיכטע.

פרעגט אים א קליג איד פארוואס ער האט נישט 2 מיני טאמאטן (יענע צייטן איז מען נאכנישט געווען אזוי געספויעלט), זאגט ער אז ס'נישט דא צובאקומען נאך א מין, זאגט אים דער איד אז וויבאלד מענטשן האבן ליב אן אויסוואל, צוטייל די טאמאטן אין צוויי, און ביי איינס שרייב א גרעסערע פרייז. וכך הוה, ער האט אים געפאלגט, און קאסטומערס הייבן אן צו פרעגן וואס דאס מיינט צוויי ערליי טאמאטן, זאגט ער אז ס'איז די זעלבע זאך. און וואס מיינט איר? 90 פראצענט האבן פון דאן און ווייטער אנגעהויבן צו קויפן די טייערן טאמאטן...

אוועטאר
איך_הער
סעקרעטאר
תגובות: 18577
זיך איינגעשריבען אום: דינסטאג יולי 04, 2006 6:47 pm
לאקאציע: אין אפיס
פארבינד זיך:

תגובהדורך איך_הער » מאנטאג פאברואר 02, 2009 10:46 pm

אן עקסטערע יישר כח פאר וויכטיג מאכער, פארן אהער שטעלן אזא לאנגע אינהאלטסרייכע תגובה.

פארשטייצעך אז פארן ראש הקהל קומטצעך אויך זיינס.

אוועטאר
ראמני 08
שר האלף
תגובות: 1911
זיך איינגעשריבען אום: פרייטאג אוגוסט 22, 2008 12:29 pm
לאקאציע: אויפן קאמפיין באס
פארבינד זיך:

תגובהדורך ראמני 08 » דינסטאג פאברואר 03, 2009 11:59 am

שאץ מאץ זייער גוט אראפ געלייגט שוין נישט איבער געלאזט פלאץ פאר א צווייטן אריין צורעדן
מיר ווארטן שוין אפן נעקסטן ארטיקעל

אוועטאר
farshlufen
שר עשרים אלפים
תגובות: 23975
זיך איינגעשריבען אום: פרייטאג נובעמבער 16, 2007 8:26 am
לאקאציע: אויף די פאליצעס אין ספרים שאנק

תגובהדורך farshlufen » דינסטאג פאברואר 03, 2009 4:47 pm

הרב המו"ץ, צווישן די שובבים שיעורים האסטו נאך געטראפן צייט אונז אריינצושמירן אזא זאפטיג זאכליך און אמת'דיג ארטיקל?

מיר טוען עס ריכטיג אפריציעטירן, א ישר כח

איבערן עצם ענין, וויל איך צולייגן איין קלייניגקייט נאר, פרעגט אייך נאך ביי די היימישע סוחרים וועט איר הערן אז די זעלבע טראבל מאכערס גייען ארום צו אלע סטארס עס איז נישט אזויפיל מענטשן אבער דורכן יאר דערגרייכן זיי איבעראל, טייל פון זיי האבן א שטרענגע פאלעסי אז קויפן קויפט מען וואו עס איז ביליג אבער צוריק טראגט מען צו די נאענסטע סטאר, אויסער די אפענע זאכן וכדו'.

אינטערעסאנט איז ווען עס קומט צו שידוכין טאן וועלן די סוחרים נישט וועלן הערן אפילו פון געוויסע שידוכים וואס קוקן אויבן אויף אויס אלס א גוטע מעטש און וועלן נישט אלעמאל זאגן די סיבה, אבער די סיבה איז דאס, נעמליך אז זיי קאנען די אידענעס צו גוט און זיי ווילן נישט אז זייערע קינדער זאלן ביי זיי אריינפאלן, אדרבה פרעגט אייך נאך ביי די סוחרים.
זמירות יאמרו ותשבחות ישמיעו כי הוא לבדו בורא רפואות.

אוועטאר
שאץ מאץ
שר האלפיים
תגובות: 2891
זיך איינגעשריבען אום: דאנארשטאג מאי 15, 2008 5:01 pm
לאקאציע: איבעראל
פארבינד זיך:

תגובהדורך שאץ מאץ » מיטוואך פאברואר 04, 2009 9:57 am

פארשלאפן!!!
דאס געהערט שוין צום ארטיקל ווי זענען די שדכנים....

פיין, אז די לערנסט תורת השילוב איז גוט, ביז משלב און מקשר איינס צום צווייטן...

אוועטאר
bailout
שר האלפיים
תגובות: 2208
זיך איינגעשריבען אום: דינסטאג נובעמבער 25, 2008 10:27 am

תגובהדורך bailout » מיטוואך פאברואר 04, 2009 11:23 am

וויכי האסט מיר דערמאנט די 'לי עוועניא פאטא סידי' וואס האצעך ארומגעדרייט עטליכע יאר צוריק, ווי ער האט עם געבעטן 'משה גאלדמאן'ס' נומבער.

ייש''כ ש''ץ.

איין נקודה. ס'אידענע טענה'ט, אז די לאקאלע קליידעלעך און סטרעטשיס, צורייסן זיך שנעלער, מיין נישט אז זי האט צוויי ברירות, אבער פון די ביסל וואס ס'קומט שוין יא אויס צוקויפן ביים גוי ווי למשל א סטרעטשי פון סענטשורי 21 וועסטו קענען מאכן ארבן פארן נעקסטן קינד.

לעווי
שר האלף
תגובות: 1918
זיך איינגעשריבען אום: זונטאג יוני 22, 2008 12:04 pm

תגובהדורך לעווי » מיטוואך פאברואר 04, 2009 1:05 pm

זייער שיין ארויסגעברענגט אלע סברות. ספעצעיעל האב אי הנאה געהאט פון די פשט'ל וואס די פרויען מאכן ווען זיי קויפן טייער פאר ביליג, ס'אמת ויציב.
ארויף קריכט מען פאוואליע, אבער אראפ קוילערט מען זיך שנעל!

3x0
המכונה 'טריאו'
תגובות: 9146
זיך איינגעשריבען אום: מיטוואך יוני 28, 2006 11:29 am
לאקאציע: חבוי

תגובהדורך 3x0 » מיטוואך פאברואר 04, 2009 3:06 pm

יישר כח שאץ.

די ארטיקל דערמאנט מיר ווען ווען פרוי האט געקויפט עפעס פאר שבת, און די פרוי אין די סטאר האט איר געזאגט אז זי זאל קיינעם נישט זאגן ווי ביליג עס האט געקאסט, ווייל זי וועט עס מערנישט קענען ניצן פאר שבת...

bilke
שר חמישים
תגובות: 52
זיך איינגעשריבען אום: דאנארשטאג אוקטובער 30, 2008 2:22 pm

תגובהדורך bilke » מיטוואך פאברואר 04, 2009 3:15 pm

עס איז א הלכדיגע שאלה, עד חומש דארף מען קויפען ביי א יוד

אוועטאר
לאז געמאכט
שר האלפיים
תגובות: 2465
זיך איינגעשריבען אום: פרייטאג דעצמבער 14, 2007 11:55 am

תגובהדורך לאז געמאכט » מיטוואך פאברואר 04, 2009 6:13 pm

bilke האט געשריבן:עס איז א הלכדיגע שאלה, עד חומש דארף מען קויפען ביי א יוד

אוואדי איזעס א הלכה'דיגע שאלה אווי שאץ האט ארויס געברענגט און ארטיקל רעדט ער אפילו ווען ס'קאסט מער ווי א חומש (וואס איז זייער מצוי).

לעצם הענין איז עס פון די דברים הצריכין חיזוק טאקע ווייל ס'קומט אמאל אן שווער איז די מצוה גרעסער כידוע.

מיר איז די נסיון בעיקר דאס גיין אין געשעפט! (דאס האט נאך קיינער נישט דערמאנט אבער כ'מיין אז אסאך אידן האבן די פראבעלם) דהיינו עס איז דא אסאך געשעפטן וואס ווערן קאנטראלירט דורך די ווייבער שול אזש מען לאזט מיך קוים אריין...

עס איז נישט אזוי געפערליך ווי כ'לייג עס אראפ אבער ס'מאכט אומגעשמאק דאס איינקויפן לאקאל.

דאס איז שוין חוץ וואס מ'האט שוין דערמאנט דאס צוריק געבן. הגם איך געב בכלל נישט קיין סאך צוריק איז מיר אבער פיל גרינגער צו קויפן ווען איך ווייס אז אויב וועט דאס נישט זיין צוליב מיין געשמאק אדער פאר סיי וועלכע סיבה וועליך עס קענען גרינגערהייט צוריקגעבן, (אין דאס איז די סוד פארוואס די גרויסע סטאר'ס לאזן צוריק געבן, נישט ווייל זיי האבן נישט אזויפיל שאדן ווי איינער האט געזאגט פריער, נאר ווייל דאס מציאות ווייזט אז מען קויפט אסאך גרינגער ווען מען ווייסט אז מען קען צוריק געבן, אבער נאר א קליינע פראצענט ברענגט פאקטיש צוריק ע"כ צאלט זיך זיי אויס דעם שאדן פון די קליינע פראצענט קעגן דעם ריווח אז אלע איינקויפער'ס קויפן מיט א רויאגקייט וואס דאס איז אלעס וואס דארפן כמובן...)

עני וועי אונטער א חומש מוז מען זיכער קויפן ביים אידן אויב דער איד האטעס שטייצעך און נאך אפאר יוצא מן הכלל'ס ווען מען מוז נישט ואכמ"ל.

אוועטאר
שאץ מאץ
שר האלפיים
תגובות: 2891
זיך איינגעשריבען אום: דאנארשטאג מאי 15, 2008 5:01 pm
לאקאציע: איבעראל
פארבינד זיך:

תגובהדורך שאץ מאץ » דאנארשטאג פאברואר 05, 2009 2:03 pm

עס ווערט נישט דערמאנט אין ערגעץ וועגן א חומש, א חומש דארף מען געבן ווען מ'איז מועל בקדשים,
ביי מקח וממכר ווערט נאר דערמאנט די סכום פון א שתות, דאס איז א זעקסטל, מ'דארף ניצן א קאלקילעיטאר דאס אויסצורעכענען,
א פיפטל מיינט 20 פראצענט,
דאס מיינט 20$ אויף א הונדערטער
א זעקסטל איז בערך 16 אהאלב פראצענט, רעכן עס אליינס אויס...

אבער חומש מאן דכר שמי???

לעווי
שר האלף
תגובות: 1918
זיך איינגעשריבען אום: זונטאג יוני 22, 2008 12:04 pm

תגובהדורך לעווי » דאנארשטאג פאברואר 05, 2009 2:06 pm

א חומש מלבר איז א שתות מלגו. (אדער פונקט פארקערט?)
ארויף קריכט מען פאוואליע, אבער אראפ קוילערט מען זיך שנעל!

bilke
שר חמישים
תגובות: 52
זיך איינגעשריבען אום: דאנארשטאג אוקטובער 30, 2008 2:22 pm

תגובהדורך bilke » דאנארשטאג פאברואר 05, 2009 8:27 pm

א חומש מלגו איז א שתות מלבר
בקיצור, פון 100 צו 120


צוריק צו “היימישע קרעטשמע”

ווער איז אונליין

באנוצערס וואס דרייען זיך דא: Google [Bot] און 8 געסט