וויאזוי ווערט מען א שרייבער?

[קרעזי]

מורי ורבותי.

איך שטעל מיך דא אויף דורכצוטון א טעמע וועלכע ליגט מיר שוין אויפן הארץ (אדער אין בויך? אפשר גאר אויפן צינג? איך ווייס אליין שוין נישט...) איטליכע וואכען, און איך האב נאך נישט געפונען דער פאסיגער ענטפער דערצו.

לאמיר אייך נישט דעם קאפ פארדרייען, און צוגיין גלייך צו דער זאך.

ווי איהר ווייסט אוודאי, און ווי איך האב שוין צענדליגע מאל דערמאנט דא ברבים, און ווי איהר קענט אייך אליין איבערצייגען, זיץ איך דא אויפן קאמפיוטער מיינע צענדליגע שטונדן נישט האבנדיג וואס צו טאן מיט די צייט. איך לויף אריין אין קרעטשמע זיך דאס הארץ צו דערכאפן, און איך זוך מיט וועמען א שמועס צו ציען. איך גיי אהער, איך גיי אהין, און איך טוה מיט דער צייט קיין סאך. עס גיבט מיר אמאל א ציפ אין הארץ זעהענדיג ווי איך פארברענג דעם טאג און די טייערע מינוטען מיט אזעלכע מידערוויכטיגע זאכן פון וואס איך האב פון זיי למעשה גארנישט. איך בייזער מיר אויף מיר זעלבסט פארוואס איך פיר מיר אויף אט אזוי וואוסענדיג אז איך טוה נישט גוט. איך נעם מיר אונטער אז דער ערשיינונג וועט נישט מער פאסירן, אבער ככלב שב על קיאו קענט איהר מיר טרעפן דא קעגן דעם שיינענדיגען קעסטל צומארגנס אין די זעלבע צייט. איך האב שוין געשריבען דא אינעם קרעטשמע אז איך זוך אן ארבעט אויפן אינטערנעט, אבער ווי איהר זעהט האב איך דאס נאך נישט געטראפן. אלזא, איז מיר איינגעפאלען אז אפשר קען איך ווערן א שרייבער אין איינע פון די צייטונגען, און אזוי אויסנוצן די צייט און מאכן דערפון אפאר גרייצער איינוועגס.

מיין פראגע איז: ווי אזוי ווערט מען א שרייבער? צו וועמען ווענט מען זיך? ווער איז מחליט, און ווי אזוי גייט דאס צו? איז דא א פארהער פארדעם?

אין אנדערע ווערטער: איך ווייס נישט גארנישט פון דעם פעלד, קענט איהר מיר מיט עפעס העלפען?

א גרויסען דאנק.

[קרעמער]

ווען איך וואלט געוואלט ווערן א שרייבער אין איינע פון די היימישע צייטונגען, וואלט איך אפגעשריבן עטליכע סעמפל ארטיקלן און דאס אריינגעשיקט צו עטליכע צייטונגען, און זיי זאגען: יותר ממה שקריתי לפניכם כתוב כאן, איך פארמאג ב"ה א שרייבערישע טאלאנט וואס - איך האלט - קען אייך צוניצקומען. זענט איר אינטערסירט אין אזא סארט שרייבער?

א פערזענליכע נאטיץ: איך גלייך זייער דיין וועג פון שרייבן, דיינע געדאנקן, אויסדרוקן און אזוי ווייטער. אויב קענסטו טאקע אהערשטעלן עטליכע געלונגענע ארטיקלן, האלט איך - בדעתי הענייה - אז מען וועט זיך צוכאפן צו דיר. די פארלאנג פאר גוטע שרייבער איז גרויס אין די היינטיגע טעג, ווען צייטונגען פארמעסטן זיך ווי די שור הבור און לויתן אויף שענערע און בעסערע ארטיקלן.

קרעזי דו שרייבסט זייער גוט, ברך השם . קרעמער די עיקר פרובלעם ביי צייטונגן אלס אפיצילער שרייבער אז דו מוזט זיין מיט אפאר טעג פריער ד.ה. דו מוזט אין פרשת לך שרייבן ווי כאילו דו געפינסט זיך יעצט אין סאמען ערב שבת וירא דו"ק

[קרעמער]

דאס איז לכאורה א פראבלעם מיט וואס מען קען לעבן, והא ראיה, הונדערטער אידן לעבן אזוי.

ובכלל, בלויז די וואס שרייבן תורות אויף די פרשה אדער עדיטאריעלס וואס ברויכן האבן שייכות מיט די סדרה, האבן דעם "פראבלעם", משא"כ ווען דו באשרייבסט "עסיג" אדער "באק-סאדע".

[שוועמל]

לויט ווי איך ווייס, פארלאנגען צייטונגען פון פאראויס די באשרייבונגען נאר אויב ס'יז א פארזעצונג, אדער א רעגלמעסיגער ארטיקל וואס מוז לויפן כסדר.

ביי סתם ארטיקלען, אויב איז דאס פאסיג און גוט באשריבן גייט נישט אן ווען און וויפיל דו האסט אפגעשריבן.

ביי פארזעצונגען הייבן זיי נישטאמאל אן בעפאר דו האסט נישט גרייט דעם גאנצן מעשה אפגעטייפט. זיי ווילן נישט בלייבן שטעקן אינמיטן, בלויז ווייל דער שרייבער האט באשלאסן צו קאפיטולירן......


ואם בפארזעצונגען עסקינן, איך זוך די מעשה וואס איז געלאפן אכט יאר צוריק בערך, אין דער איד אדדער צייטונג, 'דער שפיאן וואס האט געראטעוועט אמעריקע'.

איינער ווייסט וואו מען קען דאס באקומען?

[מעסטערמיינד]

שוועמעל
איך מיין אז עס איז געלאפן אין דער איד, געשריבען דורך הערשל פריעדמאן, און עס איז דערנאך ארויסגעקומען דערפון א ביכל, כ'האב דאס ביכל אינדערהיים און כ'וועל אי"ה שפעטער דאס פעסטשטעלן,

קרעזי,
דאס וואס קרעמער האט דיר געשריבען און זיין ערשטע תגובה איז ריכטיג, אגב איך האב זייער הנאה פון דיין סטיל אין שרייבען, און איך גלויב אז עס וועלן זיין בעלנים דערויף, נאר דו דארפסט ביי דיר אפמאכן וואס דו ווילסט שרייבען, צו נייעס צו אנאליזען צוסתם ארטיקלען צו מעשיות וכדומה, און אזא ארטיקל אריין שיקן,
און אז מ'רעד שוין יא דערפון, דערמאן איך מיך אז נישט לאנג צוריק האב איך געהאט א שמועס מיט א צייטונג פירער, זאגט ער מיר אז זיי זוכען טאקע שרייבער, זאג איך אים אז ער קען נעמען פון פארק אדער קרעטשמע שרייבער, ענטפערט ער מיר אז שרייבען אויף די אינטערנעט איז גאר א צווייטע מין געשרייבעכץ ווי צייטונג שרייבעריי, אבער אויב איינער האלט אז ער קען איז אדרבה ואדרבה זאל ער אריין שיקען,
צו א גרויסער עושר קען מען דערפון נישט ווערן, אבער פאר א סייד דזשאב, איז עס זיכער כדי צו פראבירען,
דער עיקר אז דו זאלסט האבן הצלחה,

נ.ב. מיט די צייט, ווען די וועסט שוין זיין פון די גרעסטע שרייבער פון לאנד, זאלסטו אבער ביטע נישט פארגעסען פון אונז פשוטע מענטשעלעך, און זאלסט אריין קומען אונז אויך מהנה זיין דא, מיט דאנק פון פאראויס.

[קרעזי]

א הערצליכן דאנק פאר אייך אלע פארן מיר ארויסהעלפן, און פארן מיר קאמפלימענטירן בשפע רב אפגעקוקט צו איך בין ראוי לאותה איצטלא צו נישט. איך האף אי"ה אין די נאנטע תקופה מקיים פסק צו זיין, און אריינשיקן פאר די צייטונגען איטליכע אויסצוגן פון מיין אוצר המנוצר.

איך וואלט געוואלט וואוסען צו איינער ווייסט מעגליך וואס זענען די פרייזען וואס מען צאלט היינטיגע צייטען פאר א שרייבער, און וואו אזוי דאס ווערט אויסגערעכנט. ווערט דאס געשאצט מיט וויפיל אותיות עס געפינען זיך אין דער ארטיקל, צו וועלכע אנדערע וועג?

איך וואלט געווען זייער דאנקבאר פאר יעדע ביסל אינפארמאציע וואס קען מיר צונוץ קומען אין אנטשיידן מיין צוקונפט.

א גרויסען דאנק פון פאראויס.

[3x0]

זיי באצאלן טאקע לויט די אותיות, א יעדע שרייבער האט זיך זיין פרייז.

אויב מען וועט דיר אנעמען וועסטו אונז לאזן וויסן ווי די גייסט שרייבן?

[קרעמער]

אינמיטן זומער האט זיך עפעס א דורכגעפאלענע אויסגאבע אדווערטייזט אין די וויליאמסבורגער שאפערס ראוט, אז זיי צאלן הונדערט דאלער פאר יעדע פייל (צען טויענט כאראקטערן) וואס מען שיקט זיי אריין.

איך ווייס נישט אויב די פרייז איז פארן איבערטייטשן פונעם אסאשיעטעד פרעס נייעס באריכט, אדער פארן אליין צוזאמשטעלן אן ארטיקל פון ארבל ארויס.

[shtilerheit]

קרעמער איז גערעכט מען שיקט קודם אריין אפאר ארטיקלען און אויב עס געפעלט זיי וועלען זיי בעטן פאר נאך, מיין חבר נאט אזוי געטוען און... יא האסט גוט געוויסט מען האט אים נישט אנגענומען אבער האב נישט מורא די שרייבסט פיין דזשאסט גיוו איט עי טריי אוןהאב אסאך הצלחה.

[זארעכפעפער]

בנוגע די שאלה פונעם קעפל פון דעם אשכול וויאזוי ווערט א שרייבער?
אין מיינע אויגן איז דאס שרייבעריי איינגעטיילט אין עטליכע חלקים. דהיינו, ס'דא שרייבער'ס וואס זייערע ארטיקלען אינעם שריפט זענען בעצם נישט דאס בעסטע, נאר וואס? זיי האבן גוטע טעמעס, גוטע געדאנקען וכדומה. ווידעראום איז דא שרייבער'ס וואס האבן דאס אויך נישט, זיי פארמאגן נישט אין זיך קיין שום אייגנשאפטן אינעם שרייבעריי פעלד, זייער גאנצער שרייבן באשטייט פון נאכשרייבן ביכער. און דערנאך איז פארהאן שרייבערס וואס האבן טאקע נישט קיין אייגענע איינפעלער, אייגענע רעיונות, אבער זיי זענען שריפט שטעלער; דאס הייסט זיי פארמאגן אין זיך דעם שרייבערישן טאלאנט, און ווען עס קומט אן צו זייערע הענט אן ארטיקל, לייגן זיי דאס אראפ מיט'ן גאנצן געשמאק.

[מאשקע]

זאג מיר שטילערהייט, ס'איז געווען דיין חבר, אדער דו?...
קרעיזי, איך שטעל מיך צו צום עולם דא, אז דו שרייבסט זייער גוט.
די פרייזן פון די צייטונגען גייען טאקע לויט די צאל קערעקטערס (אותיות), אבער ס'ווענדט זיך אין די קוואליטעט פונעם שרייבער.

[קרעזי]

איך פארשטיי נישט דיין פראגע "ס'איז געווען דיין חבר, אדער דו?..." אדער מעגליך איז דאס נישט געוואנדען צו מיר?

וויפיל צאלט מען פאר איין בוכשטאב? וואס איז דער דורכשניטליכע פרייז?

דאנקע שעין (נוסח הכפר...)

[מאשקע]

מיין פראגע "ס'איז געווען דיין חבר אדער דו?" איז געווען געוואנדן צו "שטילערהייט", ווי ס'איז געווען מרומז אין אנפאנג פון די שאלה., וזל"ק: זאג מיר שטילערהייט וכו' עכל"ק.
דורכשניטליכע פרייז איז צווישן 70 און 100 דאלאר פאר 10,000 אותיות, אבער ס'איז דא אמאל מער אויך, צ.ב.ש. ווען מ'מאכט א גוטן דזשאב, אדער ווייניגער, ווען מ'טייפט נאך ווארט ביי ווארט פון א געשריבענע צעטל.
אבער בעסער זאל איינער וואס איז "אין די ליין" קומען און עדות זאגן.

[קרעזי]

איך וויל וואוסען וויפיל שטונדען עס ווערט אריינגעלייגט אין אן ארטיקל, און צו די פרייזען וואס מען צאלט דערפאר זענען פאסיג צום דורכשניטליכע פרייז פון א שטונדע ארבעט. למשל, אויב נעמט עס פינף שטונדען צו צוגרייטען אן ארטיקל פון צען טויזענט בוכשטאבן, דאן קומט אויס אז אויב דער שרייבער וועט פארדעם קריגן הונדערט דאלער, איז דאס געארבעט פאר צוואנציג דאלער א שטונדע. דערפאר וואלט איך געוואלט זייער וואוסען ווי לאנג עס דארף נעמען פאר א דורכשניטליכע שרייבער צו צושטעלן אן ארטיקל פאר א צייטונג.

דאנקא.

[מעסטערמיינד]

קרעזי,

דאס ווענד זיך שוין מער אינם שרייבער, זיינע בייפאלן, ווי שנעל ער טייפט, וויפיל טעותים, וכדומה,

אשר על כן אויב ווילסטו וויסען ווילאנג עס דויערט, מאך אן עקספערימענט, זעץ זיך אוועק, שרייב אפ אן ארטיקעל, פון לאמיר זאגן צען טויזענט בוכשטאבן, און קוק ווילאנג עס האט דיר גענומען,

(אפשענעל) דאס אפגעשריבענע עקספערימענט, קענסטו ביי אונז אריין לייגען, טאקע אין קרעטשמע,

בהצלחה.

[יגרסהדותא]

איך האב אויך אזוי אנגעהויבן...

[קרעזי]

יגר'ל,
ביסט א שרייבער ערגעץ וואו? אדרבה, לאמיר זיך דערקוויקען מיט דיין ערפארונג.

[קרעמער]

לויט מיין אינפארמאציע שרייבט יגר'ל אויף היידפארק אויך, אויסער די קרעטשמע.

[cano]

לויט מיין אינפארמעישאן שרייבט יגערעל טעגליך צעטליך פאר די טישערס פון זיינע קינדער

[קרעזי]

און מען צאלט אים אויך לויט די מאס בוכשטאבן?...

[יגרסהדותא]

קרעזי, כדאי דיר צו מאכן אויס נייגעריג, הערזשע צו:

איך שרייב פארשידענס אבער שלא על מנת לקבל, קהל'ס צעטליך, בריוו'לעך (זאג נישט פאר קיינעם, קיינער טוט עס מער נישט).

איך שרייב היינט-צו-טאג "נישט" אין קיין אויסגאבע'ס, צוליב דעם סיבה: איך קען נישט שרייבן אינטער פרעזשער, עס קומט ארויס אן "אנגעזעצטע" ארבעט, און פארדעם פלעג איך אמאל באקומען א נישטיגע אנגעזעצטע מטבע

ב"ה איך פארמאג א פלאץ אין וואס דער כל-יכול געט מיר צום לעבן, אויב האסטו דאס נישט שארץ ארויף די ארבעל, מאך אן ארטיקל פון נישט קיין חילוק וואס, וואלקענעס, דערפער אינדערהיים, (אונזער קרעטשמע זאלסטו נישט באשרייבן, קיין איין צייטונג וועט דאס נישט אננעמען), שיק עס אריין צו די חברה, טוה דערין, דו שרייבסט דא געוואלדיג גוט, און ס'איז א מאנגל אין שרייבער'ס.

איך וואונטש דיר, זיי מצליח און וואס דו שרייבסט, קיין איין קלאפ אויפן קיבארד זאל דיר נישט גיין לטמיון, וברכתיך בכל אשר תעשה זאגט די פסוק (קרעמער/סאכדעס שרייעטס נישט, איך ווייס ס'איז נישטא אזא פסוק, אבער אזוי שרייבט מען אויף די שרייבערישע שפראך, ס'מוז נישט קלעבן מיטן אמת, מ'שרייבט מ'באקומט באצאלט און געגאנגן ווייטער), ויהי רצון שתשרה שכינה במעשה ידיך.

[קרעמער]

יגר'ל; (די וואך איז טאקע דיין אושפיזין)

ווען דו שרייבסט נישט "ס'איז נישטא אזא פסוק" וואלט איך נישט גע'חלומ'ט אז אזא פסוק עקזיסטירט טאקע נישט, און נאך א זוכעניש אין תקליטור תורני, מערק איז אז דער "קדושת לוי" (פ' תשא) דער "אוהב ישראל" (פ' תרומה) און דער "מאור ושמש" (פ' בשלח) באנוצן זיך פעסט מיט דעם פסוק "וברכתיך בכל אשר תעשה" אנשטאט די ריכטיגע "וברכך ה' אלקיך בכל אשר תעשה" (דברים ט"ו, י"ח).

ובאמת געפונען מיר שוין אין די גמרא אליין אז תנאים ואמוראים האבן זיך באנוצט מיט ענליכע אויסדרוקן פון פסוקים, "ונתן הכסף וקם לו" וכדומה.

[תהוובהו]

קרעזי,

עס ווענדט זיך וואס דו קענסט און וואס דו ווילסט.
געווענליך איז דא עפעס א געוויסע פעלד וואס מ'קען בעיקר, אדער שיינע ארטיקלעך, סתם נייעס, פאליטיק, אפהאנדלונגען וכו'. יעצט אויב האלטסטו אז קענסט שרייבן ארטיקלעך, איז לכאורה נישטא דערפאר אין א צייטונג קיין פול טיים דזשאב, וואס ווי איך האב פארשטאנען זוכסטו דאס. ווייל יעדער ארטיקל שרייבט א צווייטער, יעדער דארף דאך א ווערייעטי פון ארטיקלעך. סאו דו קענסט אפשר שרייבן איינס אדער צוויי ארטיקלעך, אבער דעציט, און אויף צו מאכן א גרייצער אין דער זייט איז עס גאנץ גוט, ווייל האסט דאך סייווי ליב צו שרייבן. וואס קענסט אפשר טון איז שרייבן עטליכע ארטיקלעך אבער פאר עטליכע צייטונגען און אויסגאבעס.
אויב אבער האסטו אויך ליב נייעס און קענסט שרייבן פאליטישע ענינים, דאן קענסטו אפשר יא פרובירן זוכן א פול טיים ארבעט .

הצלחה מרובה

[שוועמל]

מיין אדווייס פאר קרעזי:

שרייב אפ א לאנגער פארזעצונג וואס זאל זיין צוציהענד און דראמאטיש, א שטייגער ווי די אמאליגע פארזעצונגען פון די קעי זשי בי צייטן.

קענסט איבערשרייבן פון אן אנגלישן בוך, אבער דו מוזט אריינשיקן די גאנצע מעשה פערטיג.

באקומסט באצאלט לויט די קאראקטערס