וויל איך יעדן איינעם מודיע זיין אז ב"ה מיין "אנגעצויגענע" אידישקיט האט באפוילן גאנץ כלל ישראל צו זיין פריילעך פאר אכט טאג, ניין טאג אין חוץ לארץ.
כידוע אז סשטייט פון גר"א אז ושמחת בחגיך איז די שווערסטע מצוה פון די תורה, ווייל מברויך זיין פרייליך די גאנצע צייט,
אקיצור, דאס איז זיכער אז מברויך זיין פרייליך,
וויל איך בעטן יעדען איינעם מזאל זיך איינקויפען פיינע וויינען און קאכען פיינע פליישען אויף יום טוב און מקים זיין די מצוות היום, זינגען א שיין לידעל און דערביי אינזינען האבען אז מאיז מקיים די מצוות עשה דאורייתא פון ושמחת בחגיך, די תורה וויל מ'זאל זיין פריילעך. יא, די זעלבע "אנגעצויגענע" תורה וואס הייסט אויפזוכן ארבע מינים און בויען א סוכה און ארומלויפן און זיך פלאגען פארען יום טוב הייסט אז יעצט זאל מען זיין פריילעך....
ווי אזוי ווערט מען פריילעך? די ערשטע זאך געבט א שמייכעל... שטייט פון עקספערטן אז אויב משמייכלט אסאך ווערט מען פריילעך אין הארץ, זאל יעדער געבען א שמייכעל און גריסן גוט יאנטעף פאר חברים און ידידים און דאס אליין וועט אים אריינברענגען אין א שמחה מאוד
נאכדעם פארשטייט זיך, מאיז מקיים די מצוות היום מען עסט און מטרונקט לכבוד יום טוב און "מלאזט זיך וואוילגיין" (כיודע די אלטע נוסח ביי שולחן עורך)
מזינגט שיינע ניגונים לכבוד יום טוב, מקען זינגען אלע סארטען ניגונים, מוז נישט האבען דווקא צוטון מיט יום טוב, (צמאה נפשי פון ירמי' דאמען איז גאר פאאפולער ביי מיר אין שטוב, כמיין אין סוכה...) האט נישט מורא אז די שכיינעם הערן ארויס, זיי מעגן אויך הנאה האבען...
ווער ספילט א עונג יום טוב מיט ליינען, זאל זען זיך אנצוגרייטען אינטרעסאנטע תוכנדיגע לייען מאטריאל וואס איר שפירט אז ספאסיג צוצוגיין דערמיט צו די הייליגע מצוות היום
ווער סהאט א העכערע באדייט זאל זען צו לערנען די חינוך אויף מצוות לולב, מוראדיג שטארק און פייערדיג, אדער א חסידיש ספר לכבוד יום טוב (אפשר גאר ביידע...)
אויב איינער איז א שטיקעל למדן קען ער דורכטון א סוגיא אין מסכת סוכה, וואס איז כידוע ממש א הערליכע מסכתא (נישט ח"ו אנדערע זענען נישט, נאר מזעט אז די אורות פון יום טוב שיינען אריין אין די לימודים פון יום טוב, דאכציך אזוי שטייט פון צדיקים).
מזאל זען די בני בית זאלען זיין צופרידען, האבען אלעס וואס מברויך, קליידער וכדו'. די קינדער זאל יעדער האבען עפעס אויף יום טוב, כאטש א קלייניקייט אויב מקען זיך נישט ערלויבען מער.
און די עיקר, מזאל פארגעסען פון אלע דאגות, נישט טראכטן פון די ארבעט, נישט פאוקאוסן אויף די עפל שטראדל וואס איז נישט גלונגען און אוודאי נישט זיך צעבייזערן וואס איז היפך השמחה,
די וואס גלייכען א שיינע דאווענען זאלען פרובירען צו גיין צו א בית המדרש וואו מברענגט א שיינע בעל תפילה, אפילו סנעמט אביסעל לענגער דאס דאווענען, סא חלק פון יום טוב און אייער בעל הבית ווארט נישט אויף אייך, די טאג איז לאנג.
מברויך זיך מתבונן זיין אין אלעס גיטס וואס מיר פארמאגען, א ווייב, קינדער, פרנסה, א קהילה א רבי וכו' אפילו אויב עפעס איז נישט אזוי איי איי איי זאל מען נישט טראכטען פון דעם נאר פאוקאוסען אויף די גוטס
מיר וועלען ענדיגן מיט א ווארט פון חתם סופר: ושמחת בחגיך והיית אך שמח. וואס ברויך שטיין צוויי מאל? שטייט פון חתם סופר, ושמחת בחגיך, אז א מענטש פרייט זיך מיט די יום טוב (און נישט מיט עפעס אנדערש) דעמאלט והיית אך שמח, וועט ער שטענדיג זיין פריילעך
(איך האב געטייטש בדרך צחות ושמחת "בחגיך", אז פון דעם לערענט מען ארויס אז ערב יום טוב איז א מנהג זיך צו בייזערן...... ודוק)
דער אייבערשטער זאל העלפען מיר זאלען מקבל זיין די אורות מיט די ריכטיגע כלים און מזאל שוין זוכה זיין צו שמחתן של ישראל בביאת גואצ במהרה בימינו אמן
יעצט לאמיר געבן א שמייכל לכבוד ערב יום טוב
