פארוועם זאל איך שטימען? - לכתחילה אריבער

[נחשון בן עמינדב]

א ארטיקל וואס איך האב באקומען אין אישי פון ׳לכתחילה אריבער׳.
------------

דרייען זיך ארום לאנגע בריווען, גוט געשריבענע אויפאדערונגען, אפילען מיט א רייכע שפראך, וואס פאדערט אויף דעם היימישן ציבור צו וועלן אויסדריקליך נאר פאר "פרוי קלינאטן פאר פרעזידענט", און בשום אופן נישט שטימען פאר "דאנאלד טראמפ".

צו מען זאל יא אדער נישט שטימען פאר איין קאנדידאט איז נישט מיין ציל פון מיין שרייבן דא.

עס איז נישט מיין עסק איינצוטיילן פאר אנדערע וואס צו טאן, און כאטש איך האב א פעדער אין די האנט, און איך קען צוזאמקלאפן אפאר פאראגראפן, מיינט עס נאכנישט אז איך בין קאמפעטענט צו זאגן פאר אנדערע וואס צו טאן.

וואס מען זאל יא טאן, לאז איך פארן אינדיווידואל, און יעדער זאל פאלגן זיין רב, זיין רבי, און די עסקן וועמען ער האלט גיבט זיך אפ מיטן כלל און פארשטייט וואס איז גוט פארן ציבור, וואס איז גוט פאר זיי למעשה, און וואס איז גוט פאר זיי אין די אויגן פון די אמטירענדע פאליטיקאנטן און שכינים.

וואס איך וויל אבער יא דא, איז ארויסברענגן אייניגע פונקטן, און אויסגלייכן עטליכע פאקטן.

"צו זענען די געשריבענע "אויפקלערונגס בריוו" אז מען זאל נאר שטימען פאר פרוי קלינטאן, אויפריכטיג"?

די אמת איז, אז ווען איינער האלט אז מען דארף שטימען פאר איין קאנדידאט איבער א צווייטן, איז עס זיין פולער רעכט. און עס איז זיין פולער רעכט אויך אויפצופאדערן אנדערע צו שטימען לויט ווי ער האלט איז ריכטיג.
ווילאנג עס איז אין אנקלאנג מיט חוקי התורה, און להבדיל אלף אלפי הבדלות מיט חוקי המדינה, קען יעדערער שרייבן וואס און ווען ער וויל.

וואס איז אבער נישט ריכטיג, איז צו שרייבן אז מען דארף וועלן פאר איין געוויסע קאנדידאט, און אנגעבן דעראויף א גאנצע טוץ מיט סיבות, וואס זענען אין א גרויסע פראצענט פשוט ליגנט, אין א קלענערער פראצענט גזמאות, און א טייל פשוטע דעמאגאגיע אן קיין הענט און פוס, נאר פשוט הערליך שיין פארפאקט. און צו די זעלבע צייט, פארדעקן א ענדליכע ליסטע מיט סיבות פון די זעלבע אדער ענדליכע קאליבער קעגן דעם אנדערן קאנדידאט!

ווילסט מען זאל שטומען פאר איינעם? גוט! כל הכבוד. אבער פארוואס ווארפן זאמד אין די אויגן פון מענטשן?
אויב זענט איר באזארגט אזוי שטארק אז מען קען מיט ליגנט און העצע אפפרעגן און אונטערברענגען א געמיינדע, פארוואס שפירט איר זיך באקווען צו טאן טאקע אט דאס צו א קאנדידאט?

"צו איז טראמפ א "ראסיסט"?

דער שרייבער – שרייבערס – ברענגן ארויס זייער שארף אז "דאנאלד טראמפ" טוט "בארעדן געוויסע געמיינדעס" און "העצט קעגן געוויסע עטנישע גרופעס". די צוויי געמיינדעס וואס ער "העצט" און "בארעדט" זענען לויט די שרייבער די "לאטינאוס" און "מוסלעמענער".

וואס ער העצט? וואו ער העצט? ווען ער העצט? די בריוון זאגן נישט!

אבער אז די קעגנערישע פארטיי מיט די הילף פון די מידיע זאגט עס פאר א פאקט.. נאאא איז דאך עס זיכער אן אמת! (כ'האף אז קיינער האלט שוין נישט היינט אז דאס איז א "קאנספיראציע" צו זאגן אז די מידיע ארבעט "פול פארס" פאר פרוי קלינטאן און איר פארטיי).

אלזא, זאגט די אנדערע פארטיי און די מידיע, אז "טראמפ העצט קעגן לאטינאוס".

וואו העצט ער?

וואס הייסט וואו!! ער זאגט מען זאל ווערן שטרענג אויף אימעגראציע!

צו ווייסט איינער ווער נאך זאגט אז מען זאל ווערן שטרענג אויף אימעגראציע?

יעדער!!

ביידע פארטייען, פאליטיקאנטן פון ביידע פארטייען! אלע זענען מודה אז די אפענע גרעניץ איז א ביטערער פראבלעם פארן לאנד. עס איז א ביטערע פראבלעם ווייל אז די גרעניץ איז אפען קומען אריין אומלעגאלע ארבייטער און זיי ברענגען אראפ די וועידזשעס פון די לעגאלע אמעריקאנער בירגער. ווייל אז די גרעניץ איז אפען קומען אריבער די גרעניץ פילע פארברעכערס. ווייל אז עס איז אפען די גרעניץ קומען אריבער פילע וואפן און דראגס. און ועל כולם, אז די גרעניץ איז אפען איז זייער איינגעשטעלט אז עס קענען אריבערקומען טעראריסטן וואס האבן זיך אריינגעכאפט אין מעקסיקאו און ווילן אריינקומען קיין אמעריקע שעדיגען אמעריקאנער אינטערעסן.

אויסער די מעקסיקאנער רעגירונג, די דראג קארטעלן, די גאר עקסטרעם לינקע און די פארברעכער אליין, איז נישטא וואס האלט אז די אפענע גרעניץ איז נישט קיין פראבלעם.

אלזא אז טראמפ זאגט דאס מיט די "טראמפ שפראך" מאכט דאס איז א "ראסיסט" וואס "העצט" קעגן לאטינאוס? ווען אלע זאגן אז מען דארף אפשטעלן די הפקירות ביים גרעניץ, און טראמפ זאגט אז ער גייט בויען א וואנט און מעקסיקאו גייט באצאלן... איז די נקודה שוין נישט א ריכטיגע, און זאגאר ראסיזם?

האסט נישט ליב די "שפראך" פון טראמפ? האלסט אז ער איז נישט גענוג דיפלאמאטיש? כ'הער! און כ'וועל אפשר מסכים זיין מיט אייך, אבער זיין א "גרויס מויל" און א "בדחן"... מאכט נישט איינעם פאר א ראסיסט!

לאמיר גיין צו די מוסלעמענער.

"טראמפ העצט קעגן די מוסלעמענער".

אוואו? ווען? מיט וואס?

אההה... טראמפ האט געזאגט אז מען זאל נישט אריינלאזן די "מוסלעמענער פליטים" קיין אמעריקע!

איז ערשט ער האט דאס נישט געזאגט, ער האט געזאגט אז מען זאל זיי נישט אריינלאזן "בעפאר" מען קומט אויף מיט א סיסטעם וויאזוי זיכער צו מאכען אז מען ברענגט נישט מיט דעם א צרה אויף זיך.

און צום עצם זאגן מען זאל זיי נישט אריינלאזן. איז ער נישט גערעכט? איז ער א "העצער" קעגן א "רעליגיעזע גרופע" פארן דאס אויפפאדערן?

אין די צייט וואס די אינטעלעדזשענס געמיינדע זאגט קלאר אז צווישן די פליטים געפונען זיך טעראריסטן און עקסטראמיסטן, וואס נוצן אויס די רחמנות פון די וועלט צו די אומגליקליכע צושטאנד פון די סירישער בירגער, און כאפן זיך אריין צווישן זיי און אינוואדירן לאנד נאך לאנד מיט פלענער פאר טעראר, איז עס "העצע" צו זיין פארזיכטיג וועמען מען לאזט אריין?

צו זענען די סירישער פליטים א רחמנות? אן קיין פראגע!

צו מיינט דאס אז אמעריקע זאל צוליב די רחמנות איינשטעלן איר זיכערקייט, פארוואס? "מאי חזית דדמא דידך סומק טפי" צו איז נישט " חייך קודמים"? איז מען א "העצער" ווייל מען וויל נישט איינשטעלן די זיכערקייט פון א לאנד?

עס איז באמת א זייער הייקעלע טעמע פאר אידן, און די שרייבער נוצן אויס די פאקט אז אידן זענען אויך געווען פליטים, און אז אידן ווערן אויך גערודפ'ט און זענען געווארן גערודפ'ט אלע יארן, און "אויסנוצן" די פאקט צו פארשטיין געבן די סכנה פון נישט אריינלאזן וויפיל פליטים מעגליך.

מען קען אריינגיין אין א לענגערע שמועס פארוואס עס איז בכלל נישט קיין צוגלייך די צוויי זאכן, פארשטיין געבן אז אידן ווערן גערודפ'ט און געפייניגט באמת אל לא דבר, עפעס וואס יעדע אינטולעקטואלע נישט איד וועט מסכים זיין, און אז די גרעסטע "שרעק" וואס די לענדער פון די וועלט האבן געקענט האבן פון די אידן אין די צייטן פון די צווייטע וועלט מלחמה איז באמת געווען א בילבול און אויפגעבלאזן, און אפילו אזוי א געלעכטער קעגן די שרעק וואס די וועלט האט היינט פון די מוסלעמענער. אבער דאס איז א "שמועס פאר א צווייטן טאג".

איינע פון די שרייבער ברענגט ארויס אז %99 פראצענט מוסלעמענער זענען פרידליך. לאמיר זאגן עס איז טאקע אזוי - כאטש וואס אלע "פאולס" פון צווישן מוסלעמענער ווייזן אנדערש – אבער צו פארשטייט איר וואס "איין פראצענט" פון "2 ביליאן איז"?

איין פראצענט פון 2 ביליאן איז ..... 20 מיליאן!! דאס הייסט אז די שרייבער איז מודה אז עס זענען דא 20 מיליאן מוסלעמענער וואס זענען ראדיקאלן און מעגליכע טעראריסטן. און דאס פארשטייט יעדער בר שכל אז די מוסלעמנער וואס וואוינען אין די פרידליכע לענדער זענען א קלענער פראצענט טעראריסטן. די מוסלעמענער אין אמעריקע צום ביישפיל אין א קלענערע פראצענט ראדיקאל. קומט אויס אז אין א לאנד ווי סיריע איז די פראצענט מער ווי איין פראצענט, און א שיינע נומער – נישט מעגליך צו וויסן וויפיל – פון די סירישער איינוואינער זענען טעראריסטן, און אויב האבן זיי די מינדערסטע פארשטאנד וועלן זיי אויסנוצן אזא צייט און מעגליכקייט פון א "פליטים" מצב זיך אריינצודרינגען אין מערב וועלט לענדער.

איז אז דאנאלד טראמפ זאגט ער וויל דאס נישט צולאזן, איז ער א "ראסיסט"?

די פאקט איז אז דאנאלד טראמפ האט נישט קיין היסטאריע פון "ראסיזעם".

עקסטער וואס זיין טאכטער איז א איד, זי האט זיך מגייר געווען און האט חתונה געהאט מיט א איד וואס איז אנגעבליך א שומר תורה ומצות, זענען זיינע אנדערע דריי קינדער [ליידער] אלע געהייראט צו אידן!

דאס איז עקסטער וואס זיין הויפט ביזנעס אדוואקאט איז א איד מיט א קאפל! ער טרעפט זיך גערן ער שמועסט זייער גערן מיט אידן אן קיין אנטערשיד צו יענער איז א פרייער צו להבדיל א איד מיט א בארד און לאנגע פיאות.
איי אפשר "אידן" האט ער נישט פיינט, און אנדערע מינאריטעטן יא? עס קען זיין, אבער די היסטאריע און סאטיסטיקס ווייזן, אז א "ראיסט" צו סיי וועלכע ראסע, פאלק אד"ג וועט צום אלעם ערשט פיינט האבן "דעם איד"! עכ"פ "ליב האבן אידן" דאס זיכער נישט.

טראמפ האט אויפגענומען ארבייטער אין זיינע ביזנעסער פון אלע סארטן. און ווען עס איז נאך נישט געווען "פאפיולער" אויפצונעמען פרויען אויף גאר הויכע פאזיציעס אין ביזנעס, האט טראמפ דאס שוין יא געטאן! עפעס וואס די מידיע וואלט ארויסגעלייגט אין שיינעדיגע אותיות פאר סיי וועלכען מענטש זיי וועלטן געוואלט ארויסברענגן אז ער איז דוקא נישט קיין ראסיסט.

טראמפ האט נישט קיין היסטאריע פון נישט וועלן אויפנעמען קיין ארבייטער מינאריטעטן, אין פאקט איז קאמיש ווען די זעלבע מידיע וואס באשולדיגט טראמפ אין זיין א ראסיסט און ספעציעל קעגן לאטינאוס, זאגן אויך אז ער האט איז א היפאקריט פארן זיין שטרענג אויף אימעגראציע, ווייל ער אליין האט געהאט "אומלעגאלע אימעגראנטן" פאר ארבייטער....

אלזא וואס איז עס? איז ער א ראסיסט וואס האט פיינט לאטינאוס און וואלט זיי נאטורליך נישט אויפגענומען פאר ארבייטער, אדער איינער וואס נעמט אויף לאטינאוס פאר ארבייטער?

"איז דען טראמפ נישט פערזענליך א ביליגער ווילדער מענטש, און צו וועט דאס נישט ברענגן א סכנה אויב זאל ער וועלן פרעזידענט"?

אז איינער וויל באשולדיגען טראמפ פארן האבן א מיס מויל א מיסע הנהגה, קען איך זיך מיט יענעם נישט דינגן.... אז איינער וועט באשולדיגן טראמפ מיטן זיין א עגאיסט פון הימל גרייכענדע פראפארציעס... וועל איך זיך מיט יענעם ווייטער נישט דינגען. אז איינער וועט באשולדיגען טראמפ אין זיין אימפאלסיוו מיטן מויל, וועל איך זיך מיט יענעם ווידער נישט דינגען.

צו איז ער אבער אויך אימפאלסיוו אין "פראקטיק"? דאס איז שוין א גוטע פראגע.

ווייל די מענטש איז סוף כל סוף א ביזנעסמאן שוין לאנגע יארן, און די "באנק" דערשרעקט זיך נישט פון א "טוויט"... אויב האט ער אדורכגעפירט גרויסע געשעפטן, מוז מען זאגן אז עפעס א קוואלעפעקאציע פארמאגט ער יא. און דאס איז אפגעזעהן צו ער איז באמת אזוי רייך ווי ער איז, און צו ער האט טאקע געהאט אזא הצלחה ווי ער לייגט עס אראפ. ווייל וויאזוי מען זאל נישט וועלן טענה'ן אויף זיין רייכטום און זיין אלגעמיינע הצלחה, האט ער דורך די יארן הכל מודים אדורכגעפירט גאר גרויסע ביזנעס, און פארהאנדעלט מיט די גרעסטע ביזנעסלייט אין די וועלט, מיט די גרעסטע בענק אין די וועלט, מיט רעגירונגען ארום די וועלט, און דאס קען נישט זיין אויב איז מען א "פאלנער גאסן משוגענער".

די גלייכסטע וועג צו טראכטן לע"ד איז אז ער איז "א גרויס מויל" וואס רעדט אסאך – מילד געזאגט – אן רעדט "ברייט" – גאר מילד געזאגט... – א שטייגער ווי סטראשענען יעדען מאנטאג און דאנערשטאג, יעדן מעכל און רעכל אז ער וועט יענען "קלאגן אין געריכט".... ווען למעשה טוט ער דאס נישט. אלזא עס איז נישטא קיין סיבה צו קלערן אז ווען ער זאל אנקומען אין ווייסן הויז זאל ער פלוצלינג ווערן פארקערט.

אלזא ווען עס קומט למעשה איז ער פיל מער דיסצפלינירט און "צום זאך" ווי עס זעהט אויס פון זיין רעדן.
דאס האט מען געקענט זייער בולט'דיג זעהן ווען ער איז געלאדענט געווארן אויף א דיפלאמאטישע באזוך קיין מעקסיקא דורך די מעקסיקאנער פרעזידענט, ווען דער "ווילדער" "אימפאלסיווער" מענטש איז פלוצלינג געווארן א "אויסערגעווענדליכע דיפלאמאט"!

עקסטער וואס ווען מען קוקט אויף זיינע ארומיגע, די וואס פירן זיינע ביזנעסער, זענען געלונגענע ביזנעסלייט, און נעמען גוט אויס ביי מענטשן. און אלע זענען מודה אז זיינע מענטשן מאכען א גוטער ארבעט, און פירן די ביזנעס ווי עס געהער צו זיין. און עס איז נישטא קיין שום סיבה אז ער וועט נישט טאן די זעלבע אין רעגירונג.

"צו איז נישט די "דעמאקראטישע גענויגטע" פאליטיק בעסער פאר אידן?

דאן איז דא צווישן די שרייבער וואס ברענגן ארויס א קעגנערשאפט צו טראמפ, ווייל "אידן דארפן וועלן דעמאקראטיש", ווייל מיר זענען א מינאריטעט, און די דעמאקראטן זענען די וואס זענען "נעמען זיך אן" פאר די מינאריטעטן.

עס איז נישט דא דאס פלאץ אין אריינגיין אין א לאנגע דיסקוסיע איבער וועלכע פארטיי האט א בעסערע היסטאריע פון העלפן מינאריטעטן, צו די וואס האבן באפרייט די שווארצע זענען געווען די דעמאקראטן.... צו די וואס האבן געהאט סענאטארן – נאך ביז לעצטנס – וואס זענען אין די אינגע יארן געווען אנהענגער אין אפענע ראסיסטישע גרופעס זענען געווען די ריפאבליקאנער אא"וו....

די שרייבער ברענגן ארויס אז אידן דארפן אסאך אנקומען צו רעגירונגס פראגראמען און מען דארף צוליב דעם וועלן פאר די לינקע.

אפגעזעהן אז די סעקשאן אכט פראגראם – צום ביישפיל - איז געווארן א געזעץ אונטער א ריפאבליקאנער פרעזידענט.....

אבער לאמיר אביסל אריינטראכטען.

די פאקט איז אז געלויבט צום אויבערשטן זענען דא א גאר שטארק וואקסענדע פראצענט צווישן היימישע אידן וואס זענען שוין היינט גוטע פארדינער, פירן אייגענע ביזנעסער און זענען איינגעשטעלט אין ביזנעסער פאר גרעסערע געהאלטן אז זענען שוין נישט בארעכטיגט צו געניסן פון די אלע פראגראמען.

די פאקט אז מען קען שוין נישט באקומען אזוי גרינג א פראגראם ווי "סעקשאן אכט" האט אסאך געהאלפן אין דעם, אז אסאך יונגעלייט האבן זיך ערלויבט צו "קוקן ברייטער" און געפענט אייגענע ביזנעסער און אקטיוו געזוכט בעסערע פאסטענס, באטראכט און געטאן למעשה צו קויפן אייגענע הייזער, ווייל די "שטריק" פון "פראגראמען" איז שוין נישט אזוי שטארק צוגעבינדן ארום זייערע הענט.

טא, היינטיגע צייטן קען מען זייער רואיג זאגן, אז די פראגראמען וואס העלפן די אזויגערופענע "רייכע", "מיטל קלאס" און די "ביזנעסער" זענען א זייער וויכטיגע טייל פון לעבן פאר חרידישע אידן. דאס היייסט "נידריגע טעקסעס" אויף ביזנעס, אינקאם און עסטעיט, איז א זייער וויכטיגער פאקטאר אין לעבן.

די געדאנק פון ווינציגער רעגולאציעס וואס זענען א גרויס טייל פיל מער שאדן ווי רווח פאר ביזנעס, איז א זייער וויכטיגער געדאנק פאר א וואקסענדע צאל חרידישע אידן.

א פראגראם פון "מינימום וועדזשעס" עפעס וואס שטערט שטארק ביזנעסער, און העלפט גאר ווייניג ארויס חרידישע אידן, איז עפעס וואס אלע ביזנעסלייט אריינגערעכענט חרידישע ציטערן דערפון.

די אלע פראגראמען פאר די "רייכע", ביזנעסלייט אא"וו זענען פראגראמען וואס דוקא די רעכטע שטופן. אלזא עס איז אמת אז ליידער א גרויסע טייל פון היימישע אידן זענען "ארים" און דארפן פראגראמען, טייל ווייל זיי פארדינען זייער ווייניג, און טייל ווייל זיי האבן ב"ה גרויסע משפחות וכדו', אבער עס וואקסט די פראצענט היימישע אידן וואס האבן געלויבט צום אויבערשטן שוין די "פראבלעמען" וואס עס פלאגט די מיטל קלאס און די ביזנעס קלאס.

לאמיר גיין א טריט צוריק.

א פראגראם ווי "סקול טשויס" וואס איז א געדאנק וואס די רעכטע שטופן, און וואלט געברענגט אז רעליגיעזע מוסדות זאלן קענען ווערן אויסגעהאלטן דורך די רעגירונג פונקט ווי "פאבליק סקול", איז א פראגראם וואס וואלט געהאלפן אלע אידן ארימע און רייכע.

לאמיר אנכאפן "אבאמאקעיר". א פראגראם וואס אלע זענען שוין אצינד מודה אז עס איז א ערנסטער דורכפאל, עפעס וואס וועט אדער קראכען אדער מאכן די בירגער קראכען.... עס האט ארויפגעשרויפט די פרייז פאר העלטקעיר פאר די מיטל קלאס מיט ריזיגע היסטארישע פראצענטן.

זענען די טייל פון כלל ישראל די טייל פון היימישע אידן וואס זענען נישט פארבינדן מיט רעגירונגס פראגראמען, און זענען ביזנעסלייט און בעסערע פארדינער נישט בארעטיגט צו וועלן פארן קאנדידאט וואס זאגט ער וועט צוריקדרייען די פראגראם וואס רייסט שווערע טויזענטערס פון זייער ערליך פארדינטע געלטער?

און ווער רעדט נאך פון די "ווירדן" אישוס. עס איז שווער און נישט די פלאץ אריינצוגיין אין די פרטים ווי פארשטענדליך, אבער די פאקט איז אז דאס לאנד אמעריקע – פונקט ווי די וועלט – גליטשט זיך ליידער מיט א גאר שנעלע טעמפא אריין אין שאול תחתית.

די טויש אין געזעץ וואס קומט פאר אין די פאראייניגטע שטאטן די לעצטערע יארן איז גאר גאר עקסטרעם צו נידריקייט פונעם העכסטן פארנעם.

די פאקט איז אז די רעכטע אין לאנד זענען עטוואס בעסער אין דעם געביט, און אפגעזעהן זייער פרעזענליכע אויפירונג, און זייער פערזענליכע ווירדן, וועלן זיי אריינשטעלן ריכטער און איינפירן געזעצען וואס זענען מער אין איינקלאנג מיט להבדיל די תורה ווירדן.

אפגעזעהן וואס א מענטש ווי דאנעלד טראמפ איז אין פערזענליכן לעבן, לויפט ער אבער אין א פארטיי ווי ער "מוז" איינשטעלן רעכטע פאלעסי, און רעכטע ריכטער, עכ"פ מער רעכטס ווי פרוי קלינטאן וואס לויפט לכתחילה אין א פארטיי וואס שטופט דאס פארקערטע.

אלזא אפגעזעהן וואס דאנאלד טראמפ איז אין פערזענליכן לעבן, און אפגעזעהן וואס זיינע מיינונגען זענען אין די פארשידענע אישוס, די פאקט איז אז לויפענדיג אין די פארטיי וועט ער דארפן שטיצן די רעכט געשטימטע מיינונגען, עכ"פ זיכער מער רעכט געשטימט ווי פרוי קלינטאן אין איר פארטיי.

צו איך וואלט נישט בעסער געווען אז די פארטיי ערוועלטער זאל זיין א ארענטליכע אין פערזענליכן לעבן? זיכער יא! צו וואלט נישט בעסער געווען די פארטיי ערוועלטער זאל האבן אין פערזענליכע געפיל רעכטע אנשואונגן אין סאציאלע אישוס? זיכער יא!

אבער פרוי קלינטאן איז דאך זיכער א שטארקע שטיצער פון לינקע אישוס, און זי וועט האבן איר פארטיי וואס וויל די זעלבע און וועלן איר העלפן און זאגאר צווינגען צו שטיצן די סארט אישוס אפילו זי וואלט פאר זיך געהאלטן פארקערט.

די פאקט איז אז אין די קומענדע עטליכע יאר וועלן וויירשיינליך ווערן געטוישט מער ווי איין בענקל אויפן סופרים געריכט אין די פאראייניגטע שטאטן. און מיט א קלינטאן פאר פרעזידענט איז נישט קיין פראגע אז לינקע – וויירשיינליך עקסטרעם לינקע – וועלן געשטעלט ווערן אויפן געריכט, וואס וועלן רוקן דאס לאנד עקסטרעם לינק סאציאל.

עקסטער וואס א לינקע געריכט קען אסור'ן זאכן ווי שחיטה און מילה אזוי ווי מען זעהט ביי די עקסטרעם לינקע אייראפישע לענדער. און עקסטער וואס א לינקע קאורט וועט שטופן לינקע געזעצן וואס וועלן שטארק שאטן פאר ביזנעס, איז באצוג צו רעגולאציעס און רעגירונגס באגרעניצונגען.

די פאקט איז אז די לעצטערע יארן זענען דוקא די רעכטע וואס זענען פרא-באשיצן פאר רעליגיע, און די לינקע קעמפען קעגען רעליגיע ווי נאר זיי קענען. אנגעהויבן ביי ארונטעררייסן די "אומרעכט" וואס עס קומט פאר אין די היימישע געמיינדעס אין באזוץ צו "פרויען" – פרוי קלינטאן האט זיך אפילו שארף אויסגעדרוקט פערזענליך איבער די אישא ווען עס איז געווארן א רידעריי אין ארץ ישראל אבער דעם –, קעגן די "אינטערדריקונג" פונעם יוגענט צוליב אונזער דרך הלימוד פון די מוסדות, ביזן זוכן אראפצונעמען די ווארט "ג-ט" פונעם "פלעדזש אוו עלידזשענס" פונעם "דאלאר", און די עשרת הדיברות פון די גריכט הייזער, מנורות אין פאבליק ערטער און להבדיל אלף אלפי הבדלות אנדערע רעליגיעזע סימבאלן.

דאס קוקט אויס ווי "קלייניקייטן" אפשר, אבער עס ווייזט אויף די פיינטשאפט וואס די לינקע האבן צו רעליגיע אין אלגעמיין, און צו "אלטרע ארטעדאקס" רעליגיע ספעציעל.

אלזא! ווי איך האב אנגעהויבן, איך קום נישט דא זאגן פאר אנדערע אז זיי זאלן וועלן פאר איין קאנדידאט קעגן א צווייטן, יעדער זאל טאן ווי ער פארשטייט און ווי זיינע מורה דרך באפעלן, איך האב נאר געוואלט אביסעלע פארציילן די "צווייטע זייט מטבע" און אויפדעקן אז אנדערע וואס ווילן דוקא יא שטופן איין געוויסע קאנדידאט פארקויפן אסאך און ברייטע ליגענטס איבער דעם אנדערן קאנדידאט.

"דאנאלד טראמפ האט די שטיצע פון די עקסטרעמע ווייסע".

עס איז מיר א ווינדער, אז די אלע יארן וואס די עקסטרעם לינקע, די וויסטע לינקע אנטיסעמיטן וואס האבן פיינט און העצן קעגן אמעריקאנער אידן אונטער די שלייער פון זיך אננעמען פאר די פאלעסטינע האט עס די שרייבער נישט געשטערט!

און עס שטערט אים נאך היינט אויך נישט!

יא, א קעיס קען געמאכט ווערן אז א טייל פון די אנטעסעמעטיזעם קעגן אידן איז צוליב מדינת ישראל, אבער צו איז דען נישטא א אלגעמיינע שנאה צו אידן ביי די לינקע באהאלטן אין אינטי-מד"י? זיכער יא.

די פאקט איז אז אין יעדע פאול, אין יעדע אוניווערסיטעט אין יעדע ארענע ווי עס קומט ארויף די "אידן פראגע" זענען די לינקע ליבעראלע איבערוועגענד אנטיי-אידן ווי די רעכטע. און דאס איז ווייט פון באגרעניצט צו מד"י אישוס. און אפילו מיט מד"י אישוס איז דא גענוג אנטיסעמיטן וואס נוצן פשוט אויס די אישא צו קענען פראקטעצירן זייער פיינטשאפט צו אידן אין אלגעמיין אויף א "שיינעם" אופן.

ווער זענען די עי-סי-על-יו, אויב נישט די לינקע ליבעראלן, ליידער אסאך צווישן זיי פרייע אידן, און די גרופע איז פארנומען צו יעדע צייט צו העצן קעגן רעליגיע אין אלגעמיין און אסאך קעגן רעליגיעזע אידן ספעציעל.
צו ווייל עס שטעלט זיך ארויס אז א וויכטיגע אישא ווי גרעניץ זיכערהייט איז עפעס וואס די עקסטרעם רעכטע שטיצן, זאל מען לאזן די גרעניץ אפען? צו ווייל די עקסטרעם רעכטע עסן פרישטאג, מיטאג און נאכטמאל זאלן מיר אלע אצינד אנהייבן פאסטן?

די פאקט איז אז די שרייבער זענען פשוט אריינגעפאלן אין די "טרעפ" פון די עקסטרעמע רעכטע!

זיי ווייסן אז דאנאלד טראמפ שטיצט זיי נישט. ער האט אזוי געזאגט אין מערערע אויפטריטן זייער קלאר. וואס יי ווילן אבער איז, אז "די וועלט" "די מידיע" זאל האלטן און גלייבן אז טראמפ שטיצט זיי! און אזוי וועלן זיי זיך קענען אויפטאן אז "פופציג פראצענט אמעריקע" שטיצט א קאנדידאט וואס שטיצט אונז!

און די מידיע, און די שרייבער פון די בריווען וואס רופן צו שטיצן קלינטאן און נוצן די אישא פון די עקסטרעמיסטן העלפן זיי גאר ארויס!

אנשטאט ארויס ברענגן אז עס איז שקר, און אפילו עס זאל זיין אמת נישט לאזן די עקסטרעמיסטן דאס "נוצן" טיען זיי דאס פארקערטע, און העלפן זיי גאר ארויס.

"איז אבער יא דא עפעס א סיבה צו שטימען פאר קלינטאן"?

אז עס איז דא א מידת הכרת הטוב מיט דעם וועל איך זיך פארשטייט זיך נישט מחולק זיין, און אויב האלטן די עסקנים אז צוליב דעם דארפן מיר וועלן פאר פרוי קלינטאן, ווער בין איך צו זאגן פארקערט.

אז די שרייבער וואס ווילן מען זאל וועלן פאר קלינטאן ברענגן ארויס א פונקט אז עס וועט "שלעכט אויסקוקן" פאר די גאס, ארומיגע אז מיר זאלן וועלן פאר דאנעלד טראמפ, איז אויך א הערבארע טענה.

אבער עס זאל זיין קלאר אז דאס זענען טאקע די איינציגסטע צוויי לעגיטימע סיבות צו שטיצן פרוי קלינטאן איבער דאנאלד טראמפ, און דאס גאנצע איבריגע איז פשוט דעמאגאגיע, איינגעפאקט אין ליגענטס, איינגעטינקען אין גזמאות, און איבערגעדעקט מיט איינפאך-ליידיגע רייך געשריבענע ווערטער און אויסדרוקן.
עס איז קאמיש און היפאקריטיש ווי טאקע מיט די באשולדיגונגען וואס די שרייבער באשולדיגען טראמפ, מיט אט די זאכען פראבירן זיי אויפצוטרייבן שטיצע פאר זיין קעגנער!

עס איז נאך דא אסאך צו שרייבן, מיר האבן אפילו נישט אנגערירט די קורופציע און גרינגשעצונג קעגן געזעץ וואס פרוי קלינטאן האט געוויזן. די פילע אויספארשונגען וואס זענען שוין געווען קעגן איר, און וועלן וויירשיינליך ווייטער זיין קעגן איר, און וועט אריינשלעפן דאס לאנד אין א יארן לאנג פאליטישע בלאטע.

אויך האב איך נישט אנגערירט די "איראן-דיל" ווייל דאס איז שטארק דעבאטירבאר, און איז צופיל אריינגעמישט די געפילן בנוגע מד"י.

אבער דאס איז שוין אויך צו לאנג.... און אויף דערווייל וועל איך זיך דא אפשטעלן.

---------
דיסקלעימער - די רעאדאקציע נעמט נישט קיין אחריות אויף די מיינונג און אנשויאונגען פון דעם שרייבער.

[בוחר בשירי זמרה]

אלעס בנוגע שטימע, באלאנגט דא

[טשאלענט]

אלעס בנוגע שטימע, באלאנגט דא

[אויסגערעכנט]

חילי א סופער דזשאב. נחשון שכוח פארן ברענגען.

נישט דא איינער וואס קען אפווענדן חילי יעצט, אלע דיטעלס קלאא ווי די טאג

[פרידן]

וואס איך קלער, אין חילי פעדער,
שכח זייער שיין שטארק אין גוט

[מילכיגער]

חילי א סופער דזשאב. נחשון שכוח פארן ברענגען.

נישט דא איינער וואס קען אפווענדן חילי יעצט, אלע דיטעלס קלאא ווי די טאג

איך גראדע קען יא... און ס'איז אפילו נישט אזוי שווער ווי דו מיינסט...

איין פשוט ווערטל איז גענוג דערפאר. "אז ס'שווימט ווי א קאטשקע, און ס'קוואקעט ווי א קאטשקע און ס'קוקט אויס ענליך צו א קאטשקע, דאן איז עס א קאטשקע". 100 שורות מיט געקינצלטע פראזן קענען נישט אפווענדן וואס די אויגן זעהן. טאמער איז די אלע בריוון צו וואס דער חשוב'ער שרייבער באציט זיך דעמאגאגיע דאן איז די בריוו בבחינת מכבה אש בתבן. הגם טראמפ האט מחדש געווען די נייע מין שקר אין דעם קאמפיין ווי מ'קען מכחיש זיין שמש בצהריים מיינט נאכנישט אז ווייל איינער וויל יעצט אפלייקענען אלעס וואס די אויגן זעהט מוז איך יעצט פראוון וואס מיינע אויגן זעהען.

אבער לכבוד ידידי מאז ר' אריבער וועט מען מאריך זיין מער צו די פוינט, צו איז דאנאלד א אנטיסעמיט? מיר זענען אידן און מיר דערקענען וואס מיינט איינער וואס האט אונז פיינט. ווען מיר זעהן אז איינעם'ס טאכטער האט חתונה מיט א איד איז דאס פאר אונז א ראי' פלוס נאך קלארע פרוף אז ער איז נישט פערזענעליך קיין אנטיסעמיט. אבער צו ער האט פיינט שווארצע? דאס דארף מען פרעגן די שווארצע אליין. האט ער פיינט היספאנישע? דאס דארף מען פרעגן זיי אליינס וואס זיי פילן. ווען ד"ט באקומט ~1% שטיצע ביי שווארצע און ווען ה"ק האט מיט 63%! מער שטיצע ביי לאטינאס דאן מיינט דאס אז זיי האלטן אים פאר א שונא זייערער. און אט דאס איז די פוינט פון דעם היינטיגן שרייבער וועם ירוחם האט געברענגט און וועם לכתחלה צילט דא, ס'מאכט נישט אויס אז "עכט אמת'דיג" ווייסן מיר דעם אמת אז ער האט ליב די שווארצע אהבת נפש און די ספאנישע כאהבת דוד ויונתן, ביי די זאכן איז פערסעפשן ריאליטי. אין די גאס (דהיינו ביי אלע דעמאקראטן און ביי האלב רעפובליקאנער אויב נישט מער) איז די פאקט קלאר אז דאנאלד טראמפ איז אנטי אימגראנטן און אנטי מינאריטעטן וואס וויל צוריקברענגן די "גלאררייכע צייטן" ווען מ'האט געקענט געהעריג באקריוודען מינאריטעטן.

יא, קענסט שרייען ביז די ביזט בלוי אז די מידיא איז שולדיג, און אז די דעמאגאגן בלא בלא בלא, ס'מאכט נישט אויס צום חשבון קיין כהוא זה. דו וואוינסט צווישן גוים מינאריטעטן וואס זייער פערסעפשן און זייער ריאליטי (גראדע איז דאס די אמת אבער דאס איז ביסייד די פוינט) איז אז א וואט פאר טראמפ איז א וואוט פאר זיי טשעפענען, ווער ס'טוט דאס האט די אחריות פון אויפרייצן שנאת ישראל. און דאס איז פראסט און פשוט ריאליטי.

לגבי די אנדערע פוינט פון היפאקריטסווע ווען אידן זענען "אלס א כלל" גאר שטארק נהנה פון פראגראמען און דאן וואטן זיי קעגן די פאליטישנס וואס פייטן דערפאר, האט מען ביז יעצט געהאט א תירוץ אז אידן זענען פשוט מורא'דיג שטארק פאר מאראלישע ווירדן וואס די קאנסערוואטיוון שטייען דערפאר. אפגעזען צו אמת צו נישט איז דאס געווען א גוטע תירוץ, אבער יעצט? ווען מ'האנדלט מיט א ים חזיר און נידריגער פארשוין? ווי גייט מען זיך אויפהייבן דאס פנים פאר בושה? איז דאס פארוואס אידן שטייען? ווייטער, פערסעפשן איז ריאליטי. ס'מאכט נישט אויס אז דו קענסט טענה'ן אז קלינטאן איז ערגער וכו' ווען דאס איז די פערסעפשן ביי דיינע שכנים און ביי די פאליטישענס מיט וועם דו האנדלסט.

א שטיצע פאר ד"ט פון היימישע געגנטער וועט זיין זייער אנזעהבאר אלס א אינזל אינמיטן ניו יארק סיטי. פאליטישנס וועלן זיך בלי ספק ברעכן קאפ צו פארשטיין וואס פונקטליך מאטיוועט די אידן, וואס איז ראנג מיט מענטשן וואס שטיצן אזא פארשוין. און איך וויל נישט טראכטן די פאנטענשל תירוצים!!

(ובדרך אגב, נאך א פוינט וואס איז זייער ווייטאגליך אבער האמת ניתן להאמר. די "איינציגע דעמאגראפיק" ווי ד"ט איז שטארק לויט אלע פאולס איז "נאן-קאלעזש ווייסע" דהיינו די אומוויסנדע פויערים!!! ס'וועט זיכער זיין ווער פון אונזערע שונאים מבית ומחוץ וואס וועלן פרובירן צו מאכן א לינק ודי.)

פארפאלן, אונזערע שטימען מאכן סייווי נישט אויס און די איינציגע זאך איז נאר די מעסעזש. די ריאליטי איז אז עסקנים ואישי צבור (ביידע סאטמארע קהלות פלוס נאך וואס איך געדענק נישט יעצט) הייסן שטימען פאר איר פאר אט די סיבות. צו חילי'ס קרעדיט הייסט ער טאקע יעדעם פאלגן זיינע עסקנים, אבער מיר קענען עס נעמען א סטעפ ווייטער און דערפון פארשטיין זייער ריזענינג אויך. ס'מאכט נישט אויס וואס א יחיד האלט פערזענליך נאר וואס די "בעלעט קוועשן" איז. לאמיר זאגן אז איינער האלט אז די מוסלים אישו איז טראמפ גערעכט, איז דאס אבער וואס ער וויל אז די נייעס זאל באריכטן אז אין חרדי'שע יישובים וואט מען קעגן מוסלימס? אלס איזראעל? זאל דער וואס וויל טראמפ -אן זיך נארן- טראכטן וואס איז די מעסעזש למעשה -נאכאמאל, פעיר אדער נישט- וואס די נייעס און פאליטישנס גייען נעמען פון א טראמפ שטיצע אין חרד'ישע געגנטער.

לייגט אלע פריוואטע שיטות אין א זייט!!! טעיק וואן פאר די טים!!! וואט פאר די וועג וואס וועט נישט מאכן קיין חשש שנאת ישראל ביי אונזערע טיר ביי טיר שכנים און ערוויילטע!!! (העכסטנס האט אינזין אז אין דעם זכות זאל טראמפ געווינען...)

א גוטע נאכט און הצלחה!

[שאהן הענניטי]

יישר לכתחילה און מילכיגער

[להודיע]

מילכיגער שיין געזאגט. ונראים דבריך מדבריו.

[בן נון]

שוין לאנג נישט געליינט אן ארטיקל אזוי צו די זאך!

לכתחילה, מיר בענקן זיך.

[בן נון]

מיליכיגער, ווען אבאמא האט געוואונען רוב שווארצע שטימען האסטו אויך געזאגט ראמני איז אנטי-שווארצע?


איך פארשטיי אז אבאמא איז א שווארצער, אבער קלינטאן וואלט סייווי געוואונען רוב שווארצע שטימען. נישט קיין חילוק ווער עס וואלט געלאפן קעגן איר. מען האט זיך אפילו געווערטלט אז א שאד די ערשטע שווארצע פרעזידענט (ביל קלינטאן) האט נישט געהאט שווארצע הויט.

[אברך]

לכתחילה שרייבט ריאליטעט און מילכיגער שרייבט פערספעקטיוו און ביידע האבן שטארקע נקודות.

פאר מיר איז די פוינט פון הכרת הטוב די שטערקסטע זאך, אויב וואוט איך נישט פאר דעם וואס האט מיר געהאלפן אינעם עבר וויאזוי קען איך בעטן טובות פון סיי וועלכן פאלעטישן אינעם עתיד.

[בן נון]

עס איז א שטארקע פאוינט, אבער נישט די שטערקסטע.

ווייל אויב יענער האט שוין 3 מאל געטוישט זיין מיינונג זייט דעמאלטס קען יענער אסאך אפטון אין די קומענדיגע פאר יאר.

[אויסגערעכנט]

איך וויל נאר וויסן פארוואס ווען ביל קלינטאן האט געזאגט די זעלבע ווי טראמפ, האט ער באקומען א סטענדינג אוועישען, און טראמפ איז א אנטיסעמיט.

[שמאטע]

טענקס לכתחילה. א פיינע עדיטאריעל!

מילכיגער. האסט מגיב געווען מיט די ראנג ברילן...

חילי האט נישט אינדארסט דאנאלד טראמפ איבער הילערי קלינטאן.
די גאנצע תגובה איז בלויז "טו סעט די רעקארד סטרעיט" ווי מען רופט עס. און אנווייזען אז "יענע בריוו", און באצוג צו די טאלקינג פאונטס פונעם בריוו. און די עקיוזעשענס איז הויל דעמאגאגיע, און מיסאינפארמאציע.

סאו. ווען דו קומסט מיט די טענה אז "די שווארצע האבן פיינט טראמפ"... "לאטינאוס זענען באליידיגט פון טראמפ". דאס איז אינגאנצען נישט קיין אפ@פרעג צו לכתחילה'ס פוינט. ווייל "דו" אליינס ווייסט דאך נישט צו די שווארצע האבן טאקע פיינט טראמפ אדער די לאטינאוס האבן פיינט טראמפ. און איך וועל דיר זאגאר ברענגען פון די טראמפ ראליס ווי ער האט פולע שווארצע, לאטינאוס, פרויען סופארטערס!! זיי האבן אים בכלל נישט "פיינט"!!... זיי שפירן זיך בכלל נישט באדרויערט פון א טראמפ פרעזידענסי!! ווער האט דיר פארקויפט אז די "שווארצע אלס א כלל" האסן טראמפ??!!! ווער האט דיר פארקויפט אז פרויען אין אלגעמיין האסן טראמפ???. ווער זאגט אז די לאטינאוס זענען גערעגט אויף טראמפ???
שטותים והבלים! און אין בעסטען פאל "אויפגעבלאזענע דעמאגאגיע!!

נאו. בנוגע פארוועמען צו וועלען נאוועמבער אכט. יא, האסט א זייער שטארקע פוינט!
ניו יארקע אידן ברויכן צייגן הכרת הטוב פאר די פאליטישען פון אונזער שטאט וואס האט - לויט די עסקנים - אסאך ארויסגעהאלפן חרדישע אידן!! ברור כשמש!

אבער מיש נישט אויס אז דערפאר ווערט לכתחילה'ס הוכחות איבער די פאלטשע טראמפ באשולדיגונג אפגעפרעגט.
ער קען נאכאלס זיין א נארמאלע מענטש. נישט זיין קיין ראסיסט. און מיטדעם אלעם זאלן מיר ברויכן וועלען פאר קלינטאן צוליב הכרת הטוב. (ספעשעל אויב ס'מאכט סייווי נישט אויס.....).

[מי יודע]

חילי א סופער דזשאב. נחשון שכוח פארן ברענגען.

נישט דא איינער וואס קען אפווענדן חילי יעצט, אלע דיטעלס קלאא ווי די טאג

[זאכליך]

Wow לכתחילה אריבער האט מיר אויסגעכאפט די ווערטער פון מויל. איך קען נאר אגריען מיט א יעדע ווארט!

אגב, קוקט אויס ווי די גייסט שטומען פאר טראמפ, וועלקאם טו די טראמפ טרעין!!...

איך געדענק נאך ווען מיר האבן זיך ארומגע'טענה'ט איבער טראמפ, יעצט קענען מיר שוין שלום מאכן...

וויכי איז פאר טראמפ חילי איז פאר טראמפ, קוקט אויס אז די אלע וואס האבן אונז איבערגעלאזט אינמיטן די עלעקשאן גייען למעשה פאר טראמפ, סיילענט מעדזשארעטי...

[בן נון]

ווי איך געדענק איז לכתחילה נישט צו א גרויסע אנהענגער פון טראמפ. ווען ער איז נאך דא געווען פלעג איך זיך אביסל ארומטענהנען מיט אים.

מיט זיין יעצטיגע בריוו האט ער נאר געוואלט אפענטפערן אפאר פאונטס פון די אנדערע בריוו. עס מיינט נאכנישט אז ער שטיצט טראמפ.

[אויסגערעכנט]

איבער די שווארצע האט מען שוין גענפערט דא.

און איבער דעם אז די גאס וועט זען אז אין די היימישע געגנט קומט טראמפ שטארק אריין, האב איך נייעס פאר דיר אז אין אסאך געגענטער גייט ער אריינקומען שטארק.

און אז די גאס גייט זאגן אז די אידן זענען נישט עדדזשעקעדעד, זאל איך לאזן איינעם ווערן פרעזידענט ווען זי גייט אריינלאזן סיריע רעפיודזשיס מיט א מעגליכקייט פון טעראריסטן און מיין לעבן וועט זיין אין געפאר?

[יונה]

ביידע רעדן זייער צו דער זאך, גיי מיר נישט שטימן פאר קיינעם...

[זאכליך]

ווי איך געדענק איז לכתחילה נישט צו א גרויסע אנהענגער פון טראמפ. ווען ער איז נאך דא געווען פלעג איך זיך אביסל ארומטענהנען מיט אים.

מיט זיין יעצטיגע בריוו האט ער נאר געוואלט אפענטפערן אפאר פאונטס פון די אנדערע בריוו. עס מיינט נאכנישט אז ער שטיצט טראמפ.

ווען ער שרייבט פון די חוקה נארישקייט קענסטו קלאר זעהן אז זיין שטומע גייט נישט פאר קלינטאן.

מיין השערה איז אז (כמעט) אלע וואס זענען אנטלאפן אינמיטן די עלעקשאן'ס איז עס ווייל זיי האבן געטוישט מיינונג לטובת טראמפ און זיי האבן נישט געוויסט וויאזוי עס צו מעלדן.

ע"ע בון נון...

[גיי שוין גיי]

און מיר טוען גראטאלירן חילי׳ן פארן טרעפן א וועג ווייטער צו שרייבן דא (נאר ווען ער קען זיך נישט איינהאלטן) אן דארפן אריבערגיין דעם 20,000 תגובה סינדראם.


נאר חילי האט געקענט אויפקומען מיט אזא וועג ארויס.

[ירוחם]

שיטת הג"ר אביגדור מיללער, ממש וויאזוי מילכיגער האט געשריבן

[נחשון בן עמינדב]

חילי, במחילת כבודך אבער דיינע פוינטס זענען אביסל מיסליעדינג.

דו פרעגסט א קשי׳, ענטפערסט א תירוץ און דו ווענדסט עס אפ און מיט דעם פראווסטו דיין פוינט.

פרעגסט, צו טראמפ איז א ראסיסט און די תירוץ האט געזאלט זיין אז יא - וויבאלד ער איז קעגן אימיגראציע, ווייזטו אויף אז יעדער איז קעגן אימיגראציע און ער איז גערעכט מיט דעם.

דאנאלד טראמפ איז נישט קיין ראסיסט וויבאלד ער איז קעגן אימיגראציע, איך זאג נישט אז ער ׳איז׳ א ראסיסט, אבער לאמיר אנעמען פאר א רגע אז ער איז יא, איז עס נישט וויבאלד ער איז אנטי אימיגראציע.

די סימפטאם פון ראסיזם איז ווען מען טוט פראפיילען אדער סטעראטייפן מענטשן בעיסד אויף זייער עטנישע אדער רעליגיעזע אנשויאונגען, און עס איז נישט קיין נפק״מ צו ׳באמת׳ האט ער א פוינט. היטלער איז נישט געווען א ראסיסט וויבאלד ער האט געזאגט ׳ליגנט׳ אז אידן זענען שווינדלערס, לו יצוייר אז אידן העטן ווען טאקע געווען שווינדלערס וואלט ער נאך אלס געווען ראסיסט, וויבאלד סטעראוטייפן א געמיינדע אדער גרופע איז ׳ראסיזם׳.

יעצט, ווען טראמפ זאגט אז ׳מעקסיקאנע זענען ׳******׳ איז ער א ראסיסט, ווען ער זאגט אז ׳מוסלמענע זענען טעראריסטן׳ איז ער א ראסיסט, ווען ער האט זיך אפגעהאלטן צו פארדינגען זיינע דירות פאר שווארצע ווערט דאס אנגערופן ראסיזם און די ליסטע גאוס אן.

עס איז נישט קיין נפק״מ צו עס איז אמת אדער ליגנט, צו באצייכענען א געמיינדע מיט די עוולות פון אינדעווידואלע ווערט דעפינירט אלס ראסיזם.

נאך א פוינט, דו שרייבסט אז ער האט גענוצט אימיגראנטן אלס ארבעטער און דאס ברויך זיין א ראיה אז ער גלייכט אימיגראנטן. איך גלייב אבער אז דו גייסט עגריען אז די ׳נאציס׳ זענען יא געווען ראסיסטן און אנטיסעמיטן אפילו זיי האבן גענוצט אידן צו בויען זייער לופטוואפע. אקעי, נישט אז איך גלייך צו די צוויי, אבער עס איז זייער א שלעכטע פוינט.

צו טראמפ איז אומפולסיוו אין פראקטיק, איך ווייס נישט. נאר אזויפיל ווייס איך אז א באזעסענע ביזנעסמאן גייט נישט פיר מאל באנקראט. צו איס אים געלונגען די וויץ? יא, עס איז געלונגען און די סיבה פארוואס עס איז ׳געלונגען׳ איז טאקע וויבאלד ער איז ׳אומפולסיוו׳ ער איז א מענטש וואס שפרינגט, ער טראכט נישט צופיל נאר טוט זאכן גלייך ספאנטאן, קענסט עס זען ביי זיינע טוויטס, זיינע סטעיטמענטס און זיין טשעפטער עלעווען פיילונג פעיפערס.

צו איז זיין ׳אומפולסיוו׳ א מעלה פאר פרעזידענסי, דאס לאז איך איבער פאר די וויילער צו מחליט זיין.

צום שלוס, ניין טראמפ איז נישט קיין גאסן משוגענער אבער איז יא א שטארקע סעלף סענטערד עגאאיסט, פארמאגט נארסיסטישע אפדרוקן און א בולי.

אביסל האומווארק

נאכאמאל, איך נעם נישט קיין שטעלע צו ער ׳איז׳ א ראסיסט, אבער די פלעיוואר, טעיסט און שמעק פארמאגט ער.

[ירוחם]

דער וואס ווייסט וואס א dog whistle איז און האלט מיט וויאזוי די נאציס, ווייסע סופרעמיסטן און אלט-רייט באטראכטן טראמפ האט נישט קיין ספק אז א שטימע פאר טראמפ איז א שטימע וועלכע געט מאראלישע שטיצע פאר ראסיזם, אנטיסעמיטיזם און שאר מרעין בישין אין אמעריקע.

פון פעפע די פראש, ביז טראמפ'ס קלאוזינג עד, פון די געלע שטערן מיעם, ביז זיינע אלט רייט באציאונגן ווי סטיוו בענאן ועוד, און די ליסטע גאוס אן ענד אן.

טראמפ זעלבסט איז מעגליך א צדיק און אן איש תם, נישט דאס איז מיין פוינט בכלל.

[לאן אתה הולך]

שכח חילי, ענדליך איז דא איינער מיט א פעדער וואס קען ענטפערן.

מילכיגער, מיט דיין לאגיק האט מען שוין ארויפגעצווינגען אזויפיל ליגנטס אויף די גאנצע וועלט. קודם שטעלט מען אראפ א narrative אין נאכדעם ווער ס'גייט נישט אין שפאן באשייגעצט מען אדער לאכט מען יענעם ארויס פין סאסייעטי, עיין ערך עוועלאשין, נארישקייט, גלאביל ווארמינג, ועוד. אויב זאל מען אננעמען די לאגיק קען יעדער ליגנער ארויפצווינגען זיין מיינונג.

דיין טענה (נישט נאר דיין) איבער קאלעדזש עדזשיוקעיטעט איז אזא מין דזשאוק, ווי קומען ניינציג פראצענט קאלעדזש עדזשיוקעיטעט אן? זיי באצאלן הונדערט טויזענט דאלאר צי לערנען 'ליבערעל ארט', מ'הוליעט ארום פאר פינף יאר, אין נאכדעם האט מען א אפיס דזשאב פאר א גאנץ לעבן.