א מייסטער-האפטיגער אינטערוויא מיטן מייסד הקרעטשמע "קרעמער"

[משזר]

שמערי בערי, איין מאל צירוק איז אייביג צוריק, לאמער האפן וועסט אונז נישט דיסעפאוינטען.

[משה יענקל]

א לינק צום אלט שטאט פליז

נו?! קיינער קען נישט אהערלייגן דער לינק צום היימישע קרעטשמע [סיי אויף היידפארק און סיי די שפעטערדיגע זעלבסשטענדיגע]!!!

http://www.bhol.co.il/forums/forum.asp?forum_id=11045

אן אלטע אינטערוויו מיט'ן מייסד:
http://www.bhol.co.il/forums/topic.asp? ... m_id=11045

קען עס איינער אריין פעיסטן?

[מומחה עצום]

איך ווייס נישט צו מען מעג עס דא פעיסטן אבער קודם זאל זיין:

service_03

אן Interview מיט מר. קרעמער
אויפן פארשלאג און מיט די פולע ערלויבעניש, פון דעם אינטעלעגאנטן אדלמאן מר. קרעמער, עפנען מיר דעם אשכול וועלכע וועט זיין אויסגעשטעלט אין פאָרעם פון אן Interview .

אין אמת'ן וואלטן מיר זיך געדארפט צום ערשטן באציען צו אונזערע פראגן וועלכע מיר האבן געשטעלט אין דעם פריערדיגן אשכול, בנוגע דעם פורום, נאר היות אין משך פון די צייט איז אונז אויפן געדאנק געקומען פאשידענע אינטערסאנטע טעאריעס בנוגע אין כלליות'דיגן געשפרעך פון הייד פארק, דעריבער וועלן מיר זיך ערשט אפגעבן מיט די ענינים, צו די פארגעניגן פון די ליינער, (עכ"פ אזוי האפן מיר...)

1. ווי מיר האבן פארשטאנען פון אייער תגובה, האט איר אדאנק הייד פארק אנגעקניפט פערזענדליכע פריינדשאפט מיט פילע גולשים. וואלט געווען גאר אינטערסאנט צו הערן פון אזא איינעם ווי איר אייער מיינונג אין פאלגענדן נושא.

נאך וואס איר האט שוין אנגעקניפט מיטן גולש, און איר זענט שוין באקאנט אין זיינע תכונות/געדאנקען/מיינונגען א.א.וו., קריגט איר דאדורך א משמעות אין דעם ניק וואס ער האט זיך אויסגעקליבן?

ס'הייסט אזוי, מיר פארשטייען אז בעת א גולש קלויבט זיך א ניק, זיכט ער די ערשטע מרמז צו זיין דעם נאמען זיינעם אינעם ניק, אדער פרובירט ער מרמז זיין די פרנסה אדער די פאך וואס ער פארמאגט, אבער מיר רעדן פון די אלע אנדערע ניקים, נאכדעם וואס איר קענט שוין דעם גולש פערזענדליך זעט איר אינעם ניק א משמעות פון דעם מענטש, און איר הויבט אן צו פארשטיין פארוואס דער גולש האט געקליבן דייקא דעם ניק?

דערווייל אויף היינט – און מיר קוקן ארויס אויף אייער תוכנדיקער תשובה. א דאנק

קרעמער:
א גוטן אווענד מר. סערוויס03, און א פרייליכן זאת חנוכה אייך אלע;

איך וואלט אייך געקענט אפענטפערן על רגל אחת (אויף איין פוס), איר זאלט שוין קענען פאראויס גיין מיטן קומענדיגן פראגע. אבער איך גלייב אז איר וועט זיין מער צופרידן ווען איך וועל זיך אראפזעצן איבער די ערשטע פראגע, דאס גוט צולייגן און באארבעטן און ענטפערן דערויף כפי שידי מגעת.

איך האף אי"ה מארגן אווענט צו האבן ארויפגעלייגט דא דעם ענטפער.

קרעמער:
ענטפער: איר האט זייער גוט פארשטאנען, מיר האבן אדאנק היידפארק אנגעקניפט אסאך פערזענליכע פריינטשאפטן מיט פיינע אידן איבער דער גארער וועלט. ווען מיר האבן דאס ערשטע מאל אריינשפאצירט אין דעם פארק (מיט בערך דריי און א האלב יאר צוריק) האבן מיר נישט גע'חלומ'ט און נישט פלאנירט זיך צו באקענן מיט א נפש חי', מתחילה האבן מיר אפילו געקלערט אז דאס איז אן אוממעגליכע זאך בכלל, ווייל איטליכער פון די שרייבער פרובירט דאך צו זיין ווי מער פארהוילן, מען פארמאסקירט זיך אונטער איין אדער מערערע ניקס (פסעוודאנים), און מען געט זייער אכט אז קיין איבריגע אינפארמאציע זאל נישט ארויסרינען, אפטמאל שטעלן די שרייבער אן א פנים כאילו זיי וואוינען אין איין געגנט אדער א צווייטע, אדער נעמען זיי דירעקט א שטעלונג אין א געוויסע נושא אנדערש ווי זייער נויגונג איז אין עכטן לעבן, אבי צו פארדרייען דעם קאפ פאר די וואס פרובירן זיי נאכפאלגן און צוזאמשטעלן אויף זיי א פראפייל. אבער דער מציאות האט זיך גאר אנדערש אויסגעשטעלט, און די סיבות דערצו זענען פילפאכיג.

מיר זענען שוין פארקראכן, די שאלה אייערע איז דאך כלל נישט איבער די קוואנטיטעט אדער קוואליטעט פון אונזערע באקאנטשאפטן, אדער וויאזוי דאס איז צושטאנד געקומען, אלזא לאמיר זיך צוריקקערן צו אייער פראגע, און פרובירן דאס פארענטפערן ווי ווייט מעגליך.

איר פרעגט: נאך וואס איר האט שוין אנגעקניפט מיטן גולש, און איר זענט שוין באקאנט אין זיינע תכונות/געדאנקען/מיינונגען א.א.וו., קריגט איר דאדורך א משמעות אין דעם ניק וואס ער האט זיך אויסגעקליבן? ס'הייסט אזוי, מיר פארשטייען אז בעת א גולש קלויבט זיך א ניק, זיכט ער די ערשטע מרמז צו זיין דעם נאמען זיינעם אינעם ניק, אדער פרובירט ער מרמז זיין די פרנסה אדער די פאך וואס ער פארמאגט, אבער מיר רעדן פון די אלע אנדערע ניקים, נאכדעם וואס איר קענט שוין דעם גולש פערזענדליך זעט איר אינעם ניק א משמעות פון דעם מענטש, און איר הויבט אן צו פארשטיין פארוואס דער גולש האט געקליבן דייקא דעם ניק?

איז אזוי, איך ווייס נישט פון וואנעט איר האט גענומען דעם הנחה אז א גולש זוכט מרמז צו זיין דעם נאמען זיינעם אינעם ניק, אדרבה, ווי איך פארשטיי זוכט מען ווי מער צו דערווייטערן דעם ניק פונעם אידישן נאמען (זעהט מער וועגן דעם אין דעם אשכול "פשט אין מיין ניק", סיי דא אין די קרעטשמע און סיי אין חדשות אנ"ש, זייער ווינציג שרייבן דארט אז דאס האט א שייכות מיט זייער אמת'ע נאמען), ווען איך האב געפרעגט איינעם וואס רופט זיך דאהי "משה'לע" אויב צווישן זיינע נעמען אדער זיינע נאנטע פאמיליע מיטגלידער געפונט זיך אט דער נאמען, האט ער מיר געזאגט אז דער נאמען געפונט זיך נישט ביי אים און נישט ביי זיין משפחה במשך די לעצטע 13 (יש אומרים 18) דורות...

אויך דאס וואס איר שרייבט אז מען פרובירט מרמז זיין די פרנסה אדער פאך וואס מען פארמאגט, אפשר וואלט איר מיר מסביר געווען וואספארא "סערוויס" איר טוט? און וואס דאס האט צוטאן מיטן נומער "03"?

דער ענטפער אויף אייער פראגע איז דערפאר: ניין! א ניק פון א מענטש האט געווענליך נישט קיין שייכות מיט זיין מהות, "יענטאאש" איז נישט קיין יענטא, "התאחדות" איז נישט איינגעשטעלט אין דעם רבני'שן פאראיין, "נאט-טו-ביזי" איז נישט אומפארנומען, און "הרחמן" איז שוין גאר נישט קיין דערבארעמדיגער.

וואס יא (אלא-וואָדעֶן אויף דזשארגאן)?

א ניק איז א זאך וואס מען ברויך האבן כדי צו קענען שרייבען אויף היידפארק, אבער טייל ווערן פארפרוירן ווען זיי פילן אויס די אפליקאציע און ברויכן זיך אויסקלייבן א ניק, וואס אין די וועלט זאלן זיי אריינשרייבן? וויל ער שרייבן "באטשי" איז שוין דא, "זיידיאנטשי" שוין פארנומען, אפילו "באבע-צירל" האט זיך לעצטנס אנגעריקט אויפן פארק נאכן ענדיגן אוועקפאקן די דישעס...

מאנכע האבן נישט קיין פראבלעם דערמיט, זיי פאררופן זיך אויף אלטע כאראקטערן, ווי "נבוכדנאצר" "מלך בבל" א.א.וו. מענטשן פון יענע אדער אנדערע תקופות, אנדערע פאררופן זיך גאר מיט היינטיגע ערפינדונגען ווי "בענעדיקט16" וואס נישט לאנג נאכדעם וואס דער פויבסט האט זיך אויסגעקליבן דעם ניק, איז עס אויך ערשינען דא אויפן פארק.

טייל ווידעראום כאפן א בליק אויף אלעס וואס ליגט ארום זיי, מערקן זיי א "שירעם" רופן זיי זיך "שירעם", מערקן זיי "שעלף-פאפיר" רופן זיי זיך אט אויף דעם נאמען, איינער האט געשריבן אמאל אז ער האט ארויסגעקוקט פון פענסטער און געזען א "לאמבער" יארד טראק פארביי פארן איז ער געבליבן מיטן ניק "לאמבער"!

דא אין די קרעטשמע – זינט מיר האבן זיך אריבערגעצויגן צום דערפל – איז פאר אסאך גולשים לייכטער געווארן צו טרעפן א ניק, זיי ברויכן נישט מער ווי זיך אויסקלייבן איינער פון די צענדליגער באקאנטע דארפס נעמען ווי "חיים חייקל" "נחמן נטע" אדער גאר דער "גראף", אדער פאררופט זיך אויפן נאמען פון די קרעטשמע דינער "יאנאש" "באר-טענדער" וכדומה. אדער על שם איינער פון די הונדערטער סארט משקאות וואס פליסן ווי וואסער ביי אונז אין קרעטשמע (צווישן די ציילן זיך:"קאניאק101" [וואס איז – אגב – זייער נישט גוט אויסגעלייגט... די ריכטיגע אויסלייג פון קאניאק אויף ענגליש איז COGNAC], "שנאפס" [עליו השלום?], "יין שרף", "פארברענגן" און אנדערע), אנדערע פאררופן זיך על שם איינס פון די מאכלים וואס ווערן פארטיילט אלס צובייס (פון דארט נעמט זיך: "סעמאן-פיש", "סושי123" און אזוי ווייטער).

אן אינטערסאנטע ערשיינונג איז כדאי נאטירט צו ווערן, וואס צוליב איין ניק וואס האט אמאל אריינגעבלאנדזשעט דא אין די קרעטשמע, האבן זיך זיינע קינדער און אייניקלעך אריינגעריקט דא אין די מאסן, דאס איז די באקאנטע "הרחמן" פאמיליע וועלכע האבן אריינגעוואנדערט דא אין די קרעטשמע נאר אדאנק זייער אלטער פאטער/זיידע/עלטער זיידע (ווער געדענקט אים נאך?) "אב הרחמן", דער גרינדער פון די נאבעלע "הרחמן" דינאסטיע. היינט פארמאגן מיר שוין דא זיינע בני שלשים ורבעים: זיין זוהן: "הרחמן", זיין אייניקל "בן הרחמן", זיין אור-אייניקל "נין הרחמן" און ווער ווייסט וואס עס ערווארט אונז נאך פון זיי...

לאמיר אבער נישט אינגאנצן אוועקמאכן אייער טעאריע, עס זענען זיכער פארהאנען ניקס וואס רעפלעקטירן דעם פערזאן, איך גלייב אז "נאטורליך" איז כשמו כן הוא, ער שרייבט וואס ער טראכט און זאגט וואס ער קלערט, און דאס איז נישט מער ווי נאטורליך. "געשמאקער" איז גאנץ געשמאק, און... "קרעמער" איז "קרעמער".

service_03

ערשט א דאנק אייך מר. קרעמער פארן אוועק נעמען פון אייער צייט און זיך אפגעבן מיט אונזערע פראגען. א באזונדער דאנק פאר אייך וואס איר האט זיך גענומען די מיה און געענטפערט מיט א לענגערער באשרייבונג, און נישט בלויז אונז אפגעפטרט מיט קורצע נאטיצן.

אייער באלערנדער ענטפער, וועלכער קומט פון עקספערטיזים אין דער נושא, ענטהאלט אין זיך פילע לערנונגען און וויסנשאפטן. דער קורצער תגובה אייערער, וואס כאטש ער איז אין שריפט אויסגעצויגן ליגט אבער דערין באהאלטן גאר מערקוועדיגע נקודות. ער ענטדעקט אן עולם חדש, א נייער קוק, וועלכע ווארפן אָן גאר אַן אנדער בליק אויף דעם גאנצן היידפארק געשפרעך, וואס ווערן געפירט צווישן די גולשים. און מיר קענען אייך זאגן: אז פון דעם בלויזען איינע, קורצע, תוכנדיקער תגובה אייערער, וואלטן מיר געקענט פארארדענען א באזונדערער אינטערוויו! אזוי רייך און באלערנד איז דאס.

און באמת, אפשר טאקע? אפשר זאלן מיר טאקע שטעלן אויף אייערע ווערטער אונזערע ווייטערדיקע טריט, ס'הייסט בעארבעטן און אויסברייטרן - ווי איר רופט דאס א לאנגס און א ברייטס - בלויז די געוויסע חידושים און נקודות וואס מיר האבן נארוואס געלערנט פון אייער קורץ-לאנגער תגובה?. דער באשלוס אבער פירט אונז צו אן אויספיר, אז צוליב די אינטערעסע פון די פילע ליינער און אנשויערס, איז אפשר מער צוציענד צו גיין פאראויס מיט אונזערע פראגן, און ווי די שרייבער פארענדיקן אלס ביי אט אזא פאל... ועוד חזון, מיר וועלן זיך צוריק קערן באהאנדלען די ענינים בל"נ אין המשך פון דעם אינטערוויו.

היות מיר זענען פריש אין דער ערפינדונג פון רעדן מיט א מענשט אנאנים, וועלן מיר זיך ערלויבן מקדים צו זיין א פראגע איידער מיר גייען ווייטער אן מיטן אינטערוויו. לויט וויפיל איר ווייסט, איז דאס טאקע אזוי? בלייבט דאס טאקע אנאנים? אויב דער גולש איז אנטשלאסן נישט ארויסגעבן זיין Identity בלייבט דאס טאקע אין געהיים?


אצינד צוריק צו דער אינטערוויו:

2. עס וואלט געווען אינטערסאנט צו הערן פון אזא איינעם ווי איר אייער מיינונג. וואס האלט איר, נאך וואס איז א גולש איז שוין אנטשלאסן צו עפענען א ניק, ווי ער זאל האבן די מעגליכקייט מגיב צו זיין, איז דער ערשטער תגובה זיינער מיט א רואיגקייט אדער טוט ער דאס מיט א געוויסע איינגעהאלטענע נערוועזקייט.

וואס מיר מיינען צו פרעגן איז צוויי פאכיג:
1] מיר פארשטייען דאס ווען צוויי מענטשן רעדן און עס ריקט זיך אריין א כתוב שלישי, נארמאל איז דער דריטער נישט מגיב, נעמט נישט קיין שטעלונג, ווילאנג ער איז נישט זיכער אין זיינע ווערטער, ווייל ער פארשטייט אליין אז זיינע ווערטער וועלן סטעמפלען און אפשפיגלען זיין מהות. פארשטייט זיך אליין - עכ"פ אין אונזערע אויגן - אז ביי אזעלכע סארט געשפרעכן, ווי דער חותם אויפן מענטש קען נישט חל זיין מחמת איר אנאנים, גיבסט נישט דער אויבנדערמאנטער כלל.
איז אונזער פראגע: צו בעת דער גולש איז שוין אנטשלאסן צו זיין א מגיב, איז ער שוין באלד ביי זיין ערשטע תגובה בארואיגט אין טיפעניש פון זיין געוויסן אז ער רעד אנאנים און כמובן איז ער דערפאר נישט מקפיד אזוי אין זיינע געדאנקען, מיינונגען אדער ווערטער?. ס'הייסט אין אנדערע ווערטער ער חשבונ'ט נישט אזויפיל פאר ער קלאפט אראפ א תגובה?

אויב נישט. נאך וויפיל תגובות זעצט זיך דער געדאנק איין ביי אים אין געוויסן?

2] אונזער פראגע איז כולל נאך אן אינטערסאנטע זאך. צו שפירן זיך רוב גולשים באלד ביי די ערשטע תגובה זייערער גענוג רואיג באלד צו עפענען א פרישן אשכול, צו ביים אנהויב - מחמת דער אויבנדערמאנטער געדאנק וואס איז נאך נישט געזעצט אין טיפעניש פון זיין געוויסן - וועט ער צוליב דעם בלויז מגיב זיין אין א עקזעסטירנדער אשכול?

3] אויך זענען אונזערע ווערטער כולל נאך א פראגע: ווי א שטייגער, ווי ווייט, דער מענטש היט אויפן כבוד פון זיין ניק. ס'הייסט מיר פארשטייען דאס אין משך פון די צייט זעצט זיך פארן מענטש אין געדאנק אז א געשפרעך מיט א חבר זיינעם אין פארק איז קיין פארגלייך צו א פנים-אל-פנים געשפרעך, די פראגע איז נאר, צו עכ"פ למחצה לשליש ולרביע רעכנט זיך דער מענטש יא מיט'ן כבוד הניק?. צו חשבונ'ט אויף כבוד הניק איידער ער קלאפט א תגובה צו ער פייפט זיך אן? - ווי מען רופט דאס אין די רעדוועדיקע שפראך –

מיר וועלן זיך דערווייל אפשטעלן, דוכט זיך עס איז גענוג אויף היינט – און ווידער קוקן מיר ארויס אויף אייער פערלדיקע תגובה.

א גוטע נאכט אייך אלע.

קרעמער:
ערשטנס וועל איך זיך ערלויבן צו מאכן דעם באקאנטן זיפץ וואס מר. בוש ירום הודו האט ארויסגעלאזט ביי דעם 2004 פרעזידענטליכע דעבאטע, ווען דער מאדערעיטאר האט געפרעגט עטוואס א לענגערע שאלה, קרעכצנדיג דערביי:

WHAT A LOADED QUESTION...

אבער מיר וועלן אייך אי"ה ענטפערן, גיבט אונז נאר א טאג אדער צוויי, עס איז פארט א אנגעפולטע פראגע.
service_03

מיר שפירן א פליכט אויסצודריקן אונזער אנטשולדיגונג. אויב שפירט איר אז מיר זענען איבער געגאנגען די גרעניצן, דאן זייט אונז מודיע מיר זאלן דא קענען פאררעכטן קומענדיגן מאל.

אונזער איצטיגער פראגע איז - ווי איר זעט אליין - אין קורצן איין פראגע, אויסגעברייטערט אין דריי, אבער דער תוכן איז נאר איינע. דאס איז די אורזאך פארוואס מיר האבן זיך ערלויבט אז דער שריפט אויסקוק פון די פראגע זאל זיין לאנג.

אויך האבן מיר פארשטאנען, אז צוליב די פארגעניגן פון די ליינער איז דער פראגע ווערט א לענגערער באשרייבונג. מעגליך אז נישט.

[מומחה עצום]

קרעמער:
איך אנטשולדיג מיר זייער פאר די שפעטיגונג פון מיין ענטפער, איך האב געמיינט אז איך וועל האבן מער צייט. איך האף אי"ה אויף מוצאי שבת ארויפצולייגן דעם ענטפער בעזהשי"ת.

איך האב זיך מיישב געווען, אט האט איר מיין ענטפער:

איך ברענג אראפ אייער לשון, און איך שרייב אריין די ענטפערס צווישן אייערע שורות.

סערוויס03: ערשט א דאנק אייך מר. קרעמער פארן אוועק נעמען פון אייער צייט און זיך אפגעבן מיט אונזערע פראגען. א באזונדער דאנק פאר אייך וואס איר האט זיך גענומען די מיה און געענטפערט מיט א לענגערער באשרייבונג, און נישט בלויז אונז אפגע'פטר'ט מיט קורצע נאטיצן.
קרעמער: נישטא פארוואס, עס איז מיר א פארגעניגן צו ענטפערן אויף אייערע פראגן (אין ענגליש זאגט זיך עס בעסער: מי"י פלעזשע"ר).

דער פאלגענדער שטיקל האט מיר אביסל צומישט, ליינט מיט אויפמערקזאמקייט -

סערוויס03: אייער באלערנדער ענטפער, וועלכער קומט פון עקספערטיזים אין דער נושא, ענטהאלט אין זיך פילע לערנונגען און וויסנשאפטן. דער קורצער תגובה אייערער, וואס כאטש ער איז אין שריפט אויסגעצויגן ליגט אבער דערין באהאלטן גאר מערקוועדיגע נקודות. ער ענטדעקט אן עולם חדש, א נייער קוק, וועלכע ווארפן אָן גאר אַן אנדער בליק אויף דעם גאנצן היידפארק געשפרעך, וואס ווערן געפירט צווישן די גולשים. און מיר קענען אייך זאגן: אז פון דעם בלויזען איינע, קורצע, תוכנדיקער תגובה אייערער, וואלטן מיר געקענט פארארדענען א באזונדערער אינטערוויו! אזוי רייך און באלערנד איז דאס.

קרעמער: העלפט מיר ארויס – מר. סערוויס03 – צו פארשטיין אייערע רייד, איר הייבט אן אז דער תגובה איז א 'קורצער', דאן ווערט ער פלוצים 'אויסגעצויגן' לויט אייך, וואס דאס באדייט אז עס איז עטוואס מער א לענגערע תגובה ווי איר האט געוואלט ליינען, דאן מאכט איר ווידער א 180 דעגרי דריי (י"ו טויר"ן) און איר שרייבט ווידער אז עס איז א 'קורצע' תוכנ'דיגע תגובה, אתמהה, איך ווינדער זיך וואס קלערט איר באמת? איז עס געווען קורץ? לאנג? פונקט גוט?

סערוויס03: און באמת, אפשר טאקע? אפשר זאלן מיר טאקע שטעלן אויף אייערע ווערטער אונזערע ווייטערדיקע טריט, ס'הייסט בעארבעטן און אויסברייטרן - ווי איר רופט דאס א לאנגס און א ברייטס - בלויז די געוויסע חידושים און נקודות וואס מיר האבן נארוואס געלערנט פון אייער קורץ-לאנגער תגובה?.

קרעמער: אוי וויי, עס שיינט ווי איר זענט שוין אליין צומישט געווארן, איר ווייסט שוין אליין נישט אויב עס איז א קורצע אדער א לאנגע תגובה. הגם מיר געפונען אין חז"ל א "דרך ארוכה וקצרה", אבער איינס דערפון איז בכמות בעת דער צווייטער איז באיכות, למשל א קורצע וועג וואס איז פול מיט דערנער רופט זיך א "דרך קצרה וארוכה", ווייל ער איז קורץ בכמות אבער לאנג באיכות, ווידער א לאנגע וועג וואס איז אויסגעטראטן און מען קען גיין דערויף מיט א רואיגקייט, ווערט אנגערופן א "דרך ארוכה וקצרה", נעמליך ער איז לאנג בכמות אבער קורץ באיכות, אבער וואס איז דער פשט פון א "קורצע-לאנגע" תגובה? איז ער קורץ אדער לאנג? קורץ בכמות און לאנג באיכות אדער גאר פארקערט, ביטע זייט מסביר אייערע רייד.

סערוויס03: דער באשלוס אבער פירט אונז צו אן אויספיר, אז צוליב די אינטערעסע פון די פילע ליינער און אנשויערס, איז אפשר מער צוציענד צו גיין פאראויס מיט אונזערע פראגן, און ווי די שרייבער פארענדיקן אלס ביי אט אזא פאל... ועוד חזון, מיר וועלן זיך צוריק קערן באהאנדלען די ענינים בל"נ אין המשך פון דעם אינטערוויו.

קרעמער: ווער עס איז באקאנט אין "אינטערוויו'ס" ווייסט אז ווען דער פרעגער שטעלט א פראגע אין אן ענין, און דער געפרעגטער ענטפערט אים אפ מיט א לאנגע ענטפער וואס דער פרעגער שפירט אז ער קען אריינווארפן א פראגע-צוויי קלארער צו מאכן דעם ערשטן ענטפער, פריידט ער זיך דערצו כמוצא שלל רב, ווייל אזוי ברויך ער נישט פארדרייען דעם נושא און אויפברענגן א ווילד פרעמדן שמועס, נאר מען זאגט: "דאס וואס איר זאגט כך וכך, אפשר קען איך אייך בעטן איר זאלט דאס בעסער ערקלערן" וכדומה.

דאכט זיך מיר אז די סיבה פארוואס איר האט באשלאסן אנדערש צו טאן, איז ווייל (אנדערש ווי ביי מינדליכע (מיט די מויל גערעדט) אינטערוויו'ס וואו די שאלות קומען ספאנטאן) אייער קומענדיגע סעריע פראגן איז שוין געווען גרייט, און האבן נאר געווארט אויף א געלעגנהייט פארגעלייגט צו ווערן, און האט נישט דירעקט צוטאן מיט די טובה פון די ליינער, פארריכט מיר אויב איך האב געגרייזט דערמיט.

סערוויס03: היות מיר זענען פריש אין דער ערפינדונג פון רעדן מיט א מענשט אנאנים, וועלן מיר זיך ערלויבן מקדים צו זיין א פראגע איידער מיר גייען ווייטער אן מיטן אינטערוויו.

קרעמער: וואס מיינט דאס "א פראגע איידער מיר גייען ווייטער אן מיטן אינטערוויו"? וואס איז אן אינטערוויו אויב נישט א סעריע פראגן? שוין, לאמיר נישט אזויפיל מדקדק זיין אין אייערע רייד, סוף כל סוף זענט איר נאר דער אינטערוויוער, נישט דער אויסגעפרעגטער.

סערוויס03: לויט וויפיל איר ווייסט, איז דאס טאקע אזוי? בלייבט דאס טאקע אנאנים? אויב דער גולש איז אנטשלאסן נישט ארויסגעבן זיין Identity בלייבט דאס טאקע אין געהיים?

קרעמער: דער קורצער ענטפער אויף די פראגע איז: יא!

איך וועל מסביר זיין: עס איז נישטא קיין שום וועג וויאזוי א גולש קען געוואויר ווערן אייער אידענטיטעט אויב איר זענט אנטשלאסן דאס צו האלטן אין געהיים! דאס פארלאנגט אבער א געוואלדיגע מאס איינגעהאלטענקייט פון אייער זייט, איר ברויכט זייער אכט געבן נישט ארויסצוגעבן קיין ברעקל אינפארמאציע, נאר אזוי קענט איר היטן אייער אידענטיטעט!

פון מיין עקספיריענס ווייס איך אבער אז עס פארלאנגט א געוואלדיגע עקשנות פון אייער זייט, איך וועל מיטטיילן מיט אייך איין ביישפיל וואס פון דעם וועט איר זיך איבערצייגן אין די ווארהייט פון מיינע רייד: מיט עטליכע מאנאטן צוריק האב איך אנגעקניפט א פריינטליכע שמועס אין תיבה אישית מיט איינער פון די חשוב'ע גולשים דא אין די קרעטשמע, די פריינטשאפט האט זיך געפלאכטן און געצויגן א לענגערע צייט, מיר פלעגן שמועסן אויף גוגעל-טאלק, זיך שיקן אי-מעיל און אזוי ווייטער.

נאך א שטיקל צייט האבן שטיקלעך אינפארמאציע אנגעהויבן ארויסרינען פון צווישן אונזערע ווערטער, מיר האבן זיך אויסגעטוישט די וויכטיגע אינפארמאציע ווי צום ביישפיל "וואוינערטער" "יארגאנג (בערך)" און אזוי ווייטער. מיר זענען געווארן גאנץ היימיש איינער מיטן צווייטן, אבער דאן האט מיר מיין מיטשמועסער געמאלדן מיט קלארע ווערטער אז צוליב געוויסע סיבות איז ער נישט אויסן זיך אינגאנצן אויפצודעקן, איך האב אים זייער גוט פארשטאנען, און זיך צוגעשטעלט צום פאקט.

עס לויפט נישט אדורך קיין לאנגע צייט און איינמאל – אינמיטן א העפטיגע גוגעל געשפרעך – שרייבט ער מיר אומגראכטן: זעץ זיך אראפ... איך פאלג אים, און ווארט פאר דאס קומענדיגע, אבער עס איז קיינמאל נישט געקומען! איך פרעג אים: מעיקרא מאי קסבר ולבסוף מאי קסבר, האט איר געוואלט שרייבן עפעס וואס קען מיר צושאקלען אדער נישט? שרייבט ער מיר א טאג שפעטער: איך האב געהאט א גרויסע נסיון דיר מיטצוטיילן מיין פולע אידענטיטעט, עס האט אט אט געהאלטן ביים ארויסקומען אויף דיין קאמפיוטער-סקרין, אבער איך האב זיך מיישב געווען... עס איז מיר שווער געווען אבער איך האב זיך איינגעהאלטן! בייגעשטאנען דעם נסיון!

סערוויס03: אצינד צוריק צו דער אינטערוויו:

2. עס וואלט געווען אינטערסאנט צו הערן פון אזא איינעם ווי איר אייער מיינונג. וואס האלט איר, נאך וואס א גולש איז שוין אנטשלאסן צו עפענען א ניק, וואו ער זאל האבן די מעגליכקייט מגיב צו זיין, איז דער ערשטער תגובה זיינער מיט א רואיגקייט אדער טוט ער דאס מיט א געוויסע איינגעהאלטענע נערוועזקייט.

קרעמער: דאס ברויכט איר פרעגן פון די גולשים וואס האבן נארוואס געעפענט זייער ניק, איך געדענק שוין אינגאנצן נישט דעם געפיל וואס א מגיב האט ביי די ערשטע תגובה. (אגב; איידער איר פרעגט דעם פרישן גולש די שאלה, מאכט זיכער אז דאס איז נישט נאך איינע פון מיינע ניקס...).

סערוויס03: וואס מיר מיינען צו פרעגן איז צוויי פאכיג:
1] מיר פארשטייען דאס ווען צוויי מענטשן רעדן און עס ריקט זיך אריין א כתוב שלישי, נארמאל איז דער דריטער נישט מגיב, נעמט נישט קיין שטעלונג, ווילאנג ער איז נישט זיכער אין זיינע ווערטער, ווייל ער פארשטייט אליין אז זיינע ווערטער וועלן סטעמפלען און אפשפיגלען זיין מהות.

קרעמער: אזוי גאר? איך ווייס נישט אין וועלכן לענדל איר דרייט זיך, אבער אין מיינע געגנטער איז זייער איינגעפירט אז דריטע און פערדע מענטשן זאלן זיך אריינמישן אין א פריוואטע שמועס וואס איך האלט אפ מיט מיין חבר. יעצט קלער איך אז דאס איז גאר די סיבה פארוואס איר האט אריינגעריקט דעם ווארט "נארמאל" אין אייער הקדמה, ווייל היינט לעבן מיר טאקע אין אן אומציוויליזירטן 'שבעה דברים בגולם'דיגן וועלט.

סערוויס03: פארשטייט זיך אליין - עכ"פ אין אונזערע אויגן - אז ביי אזעלכע סארט געשפרעכן, ווי דער חותם אויפן מענטש קען נישט חל זיין מחמת איר אנאנים, גיבסט נישט דער אויבנדערמאנטער כלל.
איז אונזער פראגע: צו בעת דער גולש איז שוין אנטשלאסן צו זיין א מגיב, איז ער שוין באלד ביי זיין ערשטע תגובה בארואיגט אין טיפעניש פון זיין געוויסן אז ער רעד אנאנים און כמובן איז ער דערפאר נישט מקפיד אזוי אין זיינע געדאנקען, מיינונגען אדער ווערטער?. ס'הייסט אין אנדערע ווערטער ער חשבונ'ט נישט אזויפיל פאר ער קלאפט אראפ א תגובה?

אויב נישט. נאך וויפיל תגובות זעצט זיך דער געדאנק איין ביי אים אין געוויסן?

קרעמער: דער אמת איז פונקט פארקערט, ווי מער תגובות אלץ מער אומרואיג שפירט מען זיך, קלערנדיג: ווער ווייסט וויפיל אינפארמאציע איך האב שוין אומווילענדיג געלאזט ארויסרינען צווישן די שורות פון מיינע תגובות, דאן פאלט אים ביי א געניאלע איינפאל אין געדאנק, אז די לעזונג דערצו וועט גאר זיין דורכן עפענען א נייע ניק, און ניק גוררת ניק ביז ער דערזעט זיך מיט מער ניק'ס ווי יתרו'ס נעמען און זעהט נישט דעם וועג ארויס פונעם פלאנטער.

סערוויס03:2] אונזער פראגע איז כולל נאך אן אינטערסאנטע זאך. צו שפירן זיך רוב גולשים באלד ביי די ערשטע תגובה זייערער גענוג רואיג באלד צו עפענען א פרישן אשכול, צו ביים אנהויב - מחמת דער אויבנדערמאנטער געדאנק וואס איז נאך נישט געזעצט אין טיפעניש פון זיין געוויסן - וועט ער צוליב דעם בלויז מגיב זיין אין א עקזעסטירנדער אשכול?

קרעמער: אינטערסאנט אז איר פרעגט דאס, ווייל מיר האבן שוין באמערקט אויף עטליכע קאלעגען דא אז זיי ערלויבן זיך נישט צו גרינדן נייע אשכולות. אנפרעגנדיג אמאל איינעם פון זיי אויף די סיבה דערצו, האב איך באקומען א מאדנע תשובה: עס איז אזא סארט פארעם פון לייקענונג (דינייע"ל בלעז), ווילאנג מען שרייבט נאר תגובות שפירט מען נישט אז מען איז "א שרייבער אויף היידפארק", אבער ווען עס קומט צו גרינדן אן אשכול שפירט מען "אוי וויי, יעדער וועט זעהן מיין ניק אויפן פאדערשטן בלעטל פון די קרעטשמע, וואו וועל איך זיך אהינטאן"???

סערוויס03: 3] אויך זענען אונזערע ווערטער כולל נאך א פראגע: ווי א שטייגער, ווי ווייט, דער מענטש היט אויפן כבוד פון זיין ניק. ס'הייסט מיר פארשטייען דאס אין משך פון די צייט זעצט זיך פארן מענטש אין געדאנק אז א געשפרעך מיט א חבר זיינעם אין פארק איז קיין פארגלייך צו א פנים-אל-פנים געשפרעך, די פראגע איז נאר, צו עכ"פ למחצה לשליש ולרביע רעכנט זיך דער מענטש יא מיט'ן כבוד הניק?. צו חשבונ'ט ער אויף כבוד הניק איידער ער קלאפט א תגובה צו ער פייפט זיך אן? - ווי מען רופט דאס אין די רעדוועדיקע שפראך –

קרעמער: דאס ווענדט זיך, פונקט ווי אין עכטן לעבן זענען די מענטשן פארשידנארטיג ווען עס האנדלט זיך אין די כבוד פון זייער פערזאנע, איינער וועט קלערן איידער ער רעדט, דער אנדערער וועט אויסווארטן ביז נאך די ווערטער זענען שוין ארויס פון זיין מויל איבערצוקלערן אויב ער ווייסט אפילו פון וואס די געשפרעך באשטייט... איינער וועט נאר אריינרעדן ווען מען פרעגט אים, אדער ווען ער האלט אז ער האט עפעס אינפארמאציע אין די טעמע וואס ווערט ארומגערעדט, דער צווייטער וועט אריינפרעגן פון כאמישאסערבישוואט בעת דער עולם רעדט פון חמשה עשר באב, דאס זעלבע גילטעט ביי תגובות אויף היידפארק.

סערוויס03: מיר וועלן זיך דערווייל אפשטעלן, דוכט זיך עס איז גענוג אויף היינט – און ווידער קוקן מיר ארויס אויף אייער פערלדיקע תגובה.

א גוטע נאכט אייך אלע.

קרעמער: א גוט שבת אייך אלע!!!