2 נקודות למחשבה,
1#, עס איז דא אסאך סגולות אויפן אידישן מארקעט, אסאך סגולות קומען אין גייען, אסאך סגולות בלייבן מפורסם א לאנגע תקופה, די צד השווה פון אלע סגולות איז, אז עס העלפט דעם מענטש פון זיין פראבלעם, שידוכים, גיטע קינדער, פרנסה, געזונט, וכדומה.
די מהלך וויאזוי א איד דארף אנקוקן סגולות, איז אזוי, דער גוטער באשעפער שיקט נישט קיין פראבלעמען אומזיסט, עס איז אלעס לטוב, אדער אפצוקומען, אדער מעורר צו זיין, אדער להרבות שכרו (למ"ד יש יסורין בלא עוון), אדער לנסיון.
אידען האבן אלס געוואוסט אז תשובה תפלה וצדקה מעבירין את רוע הגזרה, ווען מ'האט א צרה רח"ל, גיסט מען זיך אויס דאס הארץ פאר השי"ת, מטיילט מער צדקה, און מ'מאכט קבלות טובות.
דערנאך איז דא אזאך ווי א סגולה, ד.מ. אז היות מלכותא דשמיא כעין מלכות דארעא, עס איז דא א מידת הדין, שלעכטע מלאכים, די סגולות ארבעטן קעגן זיי, (כ'פארשטיי עס נישט פונקטליך, יבא מי שדעתו רחבה ויסבירנו), אבער דאס איז די טפל, די עיקר איז תשובה תפלה וצדקה.
איינער וואס האט א צרה ל"ע, און הייבט אן צינדן א ליכט לע"נ ר' מנחם מענדל ב"ר יוסף זי"ע, אבער איז גארנישט משנה זיין דאווענען, תהלים זאגן, לימוד התורה, שמירת עיניים, בין אדם לחבירו, האט געמיס'ט די פוינט, דער באשעפער שיקט נישט קיינע יסורים צוליב'ן נישט זאגן פרק שירה, א איד איז נישט קראנק געווארן צוליב נישט אנטוהן די סגולה רינגל, קיינער האט נישט פארלוירן זיין פרנסה צוליב נישט שיקן ח"י רוטטל אויפן ציון הרשב"י, מיר גלייבן אינעם פסוק (איכה ג') מה יתאונן אדם חי, גבר על חטאיו, און ווי די רמב"ן סוף פרשת בא שרייבט אז יסוד הדת איז צו גלייבן אז דורך מצוות ומע"ט קומט גוטס, וההיפך בהיפך, און מ'טאר נישט טוהן דעם טפל (סגולה), און איבערלאזן די עיקר (מצוות ומע"ט).
דאס איז אויך וואס איך קלער בנוגע די גליונות פון לימוד אוהח"ק, אידן און אלע דורות האבן זיך געווייקט אין אוה"ח, אבער די וועג וויאזוי די גליון לייגט אראפ די מעשיות מאכט פילען כאילו דאס איז די עיקר וואס השי"ת וויל פון דיר, איינמאל די הייבסט אן לערנען, האסטו ממלא געווען די תביעה וואס השי"ת האט פון דיר געפאדערט, און די צרה גייט אוועק. פון די אנדערע זייט קען זיין אז איינער וואס לערנט בקביעות אוהח"ק, לא ימלט עס זאל נישט טוישן זיין מהלך המחשבה, ער הייבט אן לעבן מער מיטן אייבערשטן, וממילא איז עס ווי איינער נעמט זיך אונטער בעת צר צו לערנען מער ספרי מוסר, וואס איז זיכער איינע פון די שטערקסטע קבלות טובות וואס א מענטש קען מאכן, און צוגאב האט עס די כח פון א סגולה, ממילא איז עס יא א עיקר.
דאס איז בנוגע סגולות בכלליות, בנוגע אמירת תהלים איז דא נאך א נקודה:
2#, עס זענען שוין דא אשכולות איבער קאמערשעלייזד אידישקייט, "איך צאל וויפיל די ווילסט, נאר שטעל מיר צי א רעדי מנורה מיט די קנויטן און אויל", פארן אויף פסח אין האטעללס, קויפן רעדי געקניפטע ציצית, און נאך.
"זאגן תהלים" איז נאך פון די זאכן וואס מיר פלאגן זיך נאך אליינס צו זאגן, בכל עת מצוא, צו שובבים, יעדע תענית, פורים צופריה, שב"ק צופריה אדער נאכמיטאג, אפגעררעדט די הייליגע טעג וואס מ'הייבט אן פון עיו"כ קטן ביז הושענא רבה, בכל עת צרה איז מען מרבה בתהלים, אפילו אונז קען מיר נישט די טייטש געהעריג, פונדעסטוועגן פילט מען אזא נאנטקייט, אזא דערהויבנקייט, ובפרט ווען מהאלט ביי א קאפיטל וואס מ'פארשטייט יא, איי עד אנה ה' תשכחינו נצח, הבט ימין וראה ואין לי מכיר, עד מתי אלקים יחרף צר, ס'צוגיסט זיך אין די ביינער, און צומאל גליטשט זיך ארויס א טרערעלע, און ווען מ'שטעלט זיך אויף איז מען אנדערש ווי פארדעם, און מ'האפט אז מ'האט אלעס גוט אויסגעבעטן.
ס'איז אין לשער וויפיל די ספרים שרייבן איבערן גרויסקייט פון תהלים זאגן, טוהט א קוק אין נודע ביהודה ווען ער געט א תיקון תשובה פאר איינעם, שרייבט ער "וידבק מאד בשירות ותשבחות של דוד המלך ע"ה, שזה דבר גדול להלהיב בלב האדם אהבת הבורא ב"ה וכו' ובאתר דליעול ירקא, ליעול בשרא וכוורי, הם שירותיו של דוד שבוודאי מועילים" אט איז א לינק
http://hebrewbooks.org/pdfpager.aspx?re ... =&pgnum=40צו נעמען אזא זאך און קאמערשעלייזן, טוהט וויי, בעקיפין הערט זיך דאס "די דארפסט זיך שוין נישט פלאגן אין זאגן אליינס תהלים, מיר וועלן עס שוין טוהן פאר דיר" [בפרט אז דאס איז אין סטייל היינטיגע צייטן], פ"וו נעמט מען אוועק די ביסל וואס מיר פלאגן זיך נאך יא, ובפרט אז די עיקר מעלה של תהלים איז דאס אז דער נברא איז שופך שיח לפני יוצרו, אז ער גיט עס איבער פאר א צווייטן פעלט דאך דער עיקר,
ווען א איד איז א מעמבער און תהלים כולל, אויך זאגט ער יעדן טאג 5 קאפיטלעך נאכן דאווענען, און ער האט געהאט א ישועה, פון וואס קומט עס? איך זאג פון זיינע 5 קאפיטלעך, [כמדומה אז רוב ספרים וואס רעדן וועגן תהלים, רעדן אליינס צו זאגן].
אוודאי וועט א ערוואקסענע מענטש נישט סטאפן צו זאגן תהלים צוליב וואס ער איז א מעמבער און תהלים כולל, אבער פאר די בחורים און אינגלעך שאפט זיך דעם איינדרוק, אז די עלטסטע און הייליגסטע סגולה ביי כלל ישראל, איז פונקט אזוי גוט אויב די ווערסט א מעמבער און תהלים כולל [אפשר נאכמער, ווייל דארט איז עס א מנין, יעדן טאג, גאנץ תהלים, משא"כ דו אליינס איז נישט גאנץ תהלים יעדן טאג].
דאס איז וויאזוי אסאך ליינערס באטראכטן דעם וועכענטליכן מעשה, אבער די ארויסגעבער ווילן עס נישט קאמערשעלייזן, זיי ווילן ס"ה מאכן געלט, און דאס איז די בעסטע וועג, איך ווייס טאקע נישט קיין אנדערע עצה.