כ'לייען און לייען, און איך האב הנאה צו זען וויאזוי דער עולם באנעמט זיך צו אן אונטערנעמונג פון עטליכע יחידים וואס זייער גאנצע ציל איז אויפצוהאלטן א סייט אז אידן זאל קענען הנאה האבן. (אויסער וואס די נייע ווידיאו פראדוסער פון באבוב צאלט אונז אונטערן טיש.... איינער קען מיר זאגן וואו די טיש איז?)
איצט שטעלט זיך א שווערע שאלה, אויב זאל דאס זיין דער ציל, אם כן, (דא דרייעט מען מיט די פינגער אויף אראפ) זענען דאך דא אידן וואס האבן הנאה פון פאלעמיקס, לעבן פון היציגע דעבאטעס, שעפן חיות פון פאליטיק ביי היימישע קרייזן. נו, דארף מען דאך זיי אויך צושטעלן א פלאטפארמע אין היימישע קרעטשמע וואס איז סטאנציאנירט אין 'אידישע' וועלט...
כ'גיי נישט פארענפערן די שאלה, ווייל פאר די וואס האבן די שאלה, וועט קיין תירוץ נישט העלפן. וואס איך וועל יא טון איז, ארויסברענגן די עטליכע נקודות, וואס איז שוין פארווארפן געווען דא ביני כותלי התגובות.
1) אידישע וועלט, איז געבויעט געווארן אויף די פארומס פון היימישע קרעטשמע, וואס איז אמאל געווען אין היידפארק.
היידפארק שוין נאך וואס עס איז מגויר געווארן, דהיינו, נאך וואס מסורת האט איבערגענומען די היימישע פארומים למיניהם, איז געווארן א פלאץ וואס יעדער האט געקענט זאגן וואס זיין הארץ האט אים ערלויבט אויף סיי וועלכען גדול, און אויף סיי וועלכע חסידות.
פארשטייט זיך אז כלל ישראל האט גענוג פון יעדן קרייז אויף היידפארק, איז עס געווארן פון פשוט'ע פארומס, שלאכט-פעלדער. ווען עמיציר האט געוואלט זיך ארומרייסן מיט זיין צד שכנגד, האט ער געשריבן א 'גוטס' אויף היידפארק, און בומסס, יענער איז צעקראכט געווארן, פיין פאר אים. עס האט נישט גענומען צו לאנג, און עס איז געקומען א קאנטער אטאקע, אבער אזאנס וואס קיינער האט זיך נישט גע'חלומ'ט, און אויף דעם איז געווארן א דעבאטע, ווער האט וועמען בעסער אריינגעפליקט.
זענען געווען אפאר אידן, וואס האבן שוין געבראכן פון די טינופות נאך אין בית המדרש ביי די דעבאטעס. האבן זיי יעדעס מאל אריינקומענדיג אין היידפארק, אפילו נאר צו לייענען א נארמאלע אידישע אדער גוי'אישע נייעס, זיך מיטגענומען א לעוואר, ער זאל האבן וואו אויסצוברעכן די טינופות וואס וועט זיך אומווילנדיג (זאל עס אזוי הייסן) אריינכאפן אין די אשכולות וואס זענען שוין יא נארמאלע נייעס.
ביז עס האבן זיך ערקלערט אפאר אידן, אז מ'קען נישט מער, און אויף דעם האט זיך היימישע קרעטשמע ארויפגעכאפט. מ'האט אין היימישע קרעטשמע געקענט רעדן פון אלע נייעסן אויף דער וועלט, אבער, עס טאר נישט זיין היציג. אויך, טאר זיך עס נישט רעדן פון קיין שום אידישע פאליטיק. און אזוי איז מען געפארן על מי מנוחות, ביז ארענדאר האט זיך בארעכנט, פארוואס זיך מוטשען מיט לייגן תגובות אויף הייד פארק (איינער געדענקט נאך די 'אנא המתן' עפאכע?) איך עפן ענק אויף א PHPBB בלא בלא, און מ'וועט זיך נישט דארפן מער מוטשען.
ביי PHPBB איז שוין געווען פנים חדשות, מ'האט געהאט א מעגליכקייט צו מאכן פארומים, און מ'האט צובאקומען א געוואלד מיט אופציעס. (דעמאלט האט מען געשמועסט אין מקוה, אז מ'גיימיר רופן היידפארק צו דין תורה, ווייל אזוי ווי מיר האבן געפענט, האבן זיי צובאקומען די אלע אופציעס.... כ'געדענק ווי זארעכ האצעך אפילו אונטערגעשמייכלט יעמאלט) און אזוי איז געבוירן געווארן פילע פליגלעך צו אונזער אזוי וואויל-בארימטע היימישע קרעטשמע. פון דארט האט ארענדאר זיך בארעכנט, נו, לאמיר עפענען א געהעריגע סייט, וואס זאל זיין אנגעהוקט צו די פארומס. און אזוי איז געבוירן געווארן אידישע וועלט, אזוי אז יעדער איד וואס איז א דאנק זיין JOB אנגעקומען צו די אינטערנעט, זאל ער האבן וואו זיך אראפצולייגן די קאפ, אן דעם וואס ער זאל דארפן קייען די עקלדיגע סיסטעם פאליטיק און היציגע דעבאטעס וואס קומען פאר אין אלע שולן -ליידער- יעדן מאנטאג און דאנערשטאג, און פאר א נויט אויך שבת..
מיט די אלע פליגלעך, זענען אויך צוגעקומען בינען, און מ'האט פרובירט צו שטעכן פון אלע זייטן, אבער דאנקען גאט, א דאנק די מיה פון אלע מנהלים - קאלעגעס האבן מיר אלעס דורכגעשוויצט, און מ'האלטן מיר וואו מיר האלטן.
אבער פארגעסט נישט,
דא רעדט מען שטיל, רואיג, איידל. קיינער זוכט נישט דא קיינע טעמעס צו שטעכן קיין מענטשן, און ווי אויך נישט צו מוחה זיין אויף עוולות וואס דארפן פארשריגן ווערן. יעדער פארשטייט אז אפילו מ'דארף שרייען פוי אויף די ציונים ביי א פראטעסט, טוט מען עס נישט שבת ביים טיש. איי מ'דארף דאך מוחה זיין?! א גוטע קשיא, נאך אלץ זינגט מען ביים שבת טיש שיינע ניגונים לכבוד שבת קודש. ממילא קען עס בלייבן אין איינקלאנג פון 'אידישע' וועלט.
2) די מנהלים דא, ארבעטן נישט פאר קיין געלט. און די אחראים אויך נישט. כ'קען זאגן איין זאך, מיר מעקן נישט קיין תגובה אומגעטראכט. ביי יעדע תגובה וואס מיר מעקן טראכטן מיר, וואס וואלט איך געוואלט מ'זאל טון אויב וואלט איך געשריבן 'שלא ברצון' אזא תגובה. אבער נישט אלעמאל (און געווענדליך נישט) קען מען זיך רעכענען מיט אייגענע געפילן. אבער אין באטראכט נעמט מען עס.
ווי געשריבן אויבן, עס איז נישט מעגליך צו שיקן אן אישית ביי יעדע געמעקעכץ. - מערצעשעם, ווען איך און אלע קאלעגעס וועלן מאכן 1200 דאלער א וואך פון היימישע קרעטשמע, (נו, איינער וויל שיקן געלט? נע, נישט דאס האט מען געמיינט. ס'גענוג...) וועט נישט געמעקט ווערן קיין תגובה אן קיין אישית. - אלזא, זייט נישט ברוגז אויב פעלט אייך א תגובה, בפרט אויב האט איר בשעת'ן שרייבן שוין געהאט אן הוה אמינא אז עס גייט אראפגיין. אויב פארשטייט איר באמת נישט, ווענד זיך צו סיי וועלכען מנהל אדער אחראי פונ'ם פארום אין אישית. און געווענדליך ביז א טאג, וועט איר קריגן אן ענפער. און יאפס, עס קען האבן פאסירט א טעות אויך.
3) כ'גיי ארויסגעבן א סוד, וואס איך ווייס אז אלע מיינע מנהלים קאלעגעס וועלן ברוגז זיין, אבער אויב ווילן זיי, קענען זיי דאס מעקן.....
גארטעלט אייך אן, זייט שטארק, ווייל עס קומט א גוטס:
דא זענען פארהאנען אלע תקנות פון היימישע קרעטשמע פארומס, אזוי אז קיינער דארף נישט פרעגן, אההה כאנישט געוואוסט וואס מ'מעג און וואס נישט. א סוד הא?
