אנעים זמירות האט געשריבן:
פיהל אירע, ואני הק' בתוכם, האבען געהאלטען אז עס איז א רחמנות אויפ'ן קינד אזוי צו לעבען און זיך מוטשען מיט יסורים. איי די עלטערען ווילען איהר יא האלטען ביים לעבען, נו דאס מיינט נישט אז פאר'ן קינד איז עס א טובה. אין דעם חלק איז דער געריכט געוועהן גערעכט, אז זי איז נישט געוועהן פעהיג אויף גארנישט, ניטאמאל האט זי געוואוסט אז זי עקזיסטירט, אבער געלעבט נעבעך א שרעקליכע חיי צער מיט מערערע סיזשערס א טאג.
אמת אז די עלטערען האבען געבלוטיגט, אבער זייער צער איז באמת געוועהן אויפ'ן מציאות וואס האט זיך געשאפען שוין צוויי יאר צוריק ביים געבורט, נישט אויפ'ן יעצטיגען פסק. ווייל אלטע ע"ה איז שוין בעיסיקלי אוועק באלד ביים געבורט.
איך האב גארנישט מגיב געוועהן אויף די גאנצע פרשה, ווייל איך האב נישט קיין שום מיינונג אין די עצם מעשה, איך ווייס נישט קיין פרטים וואס די מצב פון דעם קינד איז געוועהן, איז ביי מיר פשוט אז איך קען נישט נעמען קיין שטעלונג, און אויך ווייל ס'טרעט מיר זייער צו די גאנצע מעשה ווי איר וועט שוין זעהן.
נאר אויף דיינע ווערטער טייערער @אנעים זמירות וויל איך מגיב זיין.
מיר האט דער הייליגער באשעפער געשאנקען א קינד, וואס ליגט אין בעט, און קען גארנישט טון, קיינער ווייסט נישט צו איר מח ארבעט בכלל, און אויב יא, וואס עס קען און וואס נישט, און האט פארשידענע יסורים און מכאובים, אזוי איז דאס שוין זינט די געבורט.
מיר און מיין טייערע פרוי איז קיינמאל חס ושלום נישט בייגעפאלן אפילו אין א וויסטע חלום אז דאס לעבן פון דעם קינד האט נישט קיין ווערט, חס ושלום! דאס קינד איז א חלק אלוקי ממעל, איך גלייב מיט אמונה שלימה אז יעדע סעקונדע וואס זי איז אויף די וועלט, ברענגט זי פאר די וועלט א געוואלדיגע מתנה, איך ווייס נישט פינקטליך וואס, אבער איך גלייב דאס מיט מיין גאנצע הארץ, די רגע וואס זי וועט שוין גארנישט צו געבן פאר די בריאה, וועט איר די הייליגע באשעפער צוריק נעמען, דאס איז די זעלבע מיט מיר, מיט אלע אידן, אלע גוים, און אלע באשעפענישן, איך גלייב אז ס'איז דא א גרויסער באשעפער וואס פירט זיין וועלט, און יעדע רגע וואס א באשעפעניש לעבט דא און גיבט נאך א אטעם, איז פשט אז דער אייבישטער האט אריינגעגעבן דעם אטעם ווייל דער באשעפעניש גיבט נאך עפעס צו פאר די בריאה.
ווען איך גיי באזיכן מיין קינד, קוק איך איר אן, און טראכט וואסערע מתנה זי איז, איך בין זיכער אז זי ברענגט א געוואלדיגע אור פאר די וועלט וואס קיין איין אנדערע באשעפעניש קען נישט.
ווען איינער זאל מיר זאגן אזוינע ווערטער ווי אז ס'איז א רחמנות אויף דעם קינד אז ס'לעבט, און אז דאס קינד איז שוין בעצם געשטארבען נאך ביים געבורט, וואלט דאס פארגאסן מיין בלוט, און וואלט געוועהן א געוואלדיגע צער פאר מיר.
און בכלל ווייזט דאס אז מען איז נישט מחשיב א באשעפעניש וואס דער אייבישטער איז דער וואס איז מחליט אויף יעדע אטעם אז יא, מיין וועלטל אינטען ברויך נאך דעם קינד, דאס קינד געבט נאך צו עפעס פאר מיין בריאה.
אשר כל כן, אפגעזעהן צו דו ביסט גערעכט אדער נישט, איז דאס געוואלדיגע יסורים פאר א טאטע צו זעהן אזוינע דיבורים, ס'קען זיין אז הרב פיקסלער ליינט דא, און פארגיסט טייכן טרערן פון צער, און דאס איז בנוסף צו די ביטערע צער פון קובר זיין א קינד.
איך האב נישט קיין שווער הארץ אויף דיר טייערער @אנעים זמירות, און איך בין דיר זייער מחשיב, און איך ווייס אז אויב ביסטו נאך דא מיט אונז, איז פשט אז דו ברענגסט א געוואלדיגע מתנה פאר די בריאה וואס קיינער אנדערש קען נישט, נישט צוליב דיינע מעשים, נאר צוליב דיין עצם עקזיסטענץ.
אויב וועלן מיינע ווערטער אויפטוהן עפעס גוטס, זאל עס זיין לזכות פון מיין קינד, און לזכות די צובראכענע פיקסלער פארפאלק.