- unnamed (24).jpg (36.25 KiB) געזען 1390 מאל
קרעדיט: די צייטונג
ווערט פארענטפערט אלע פראגן אן אויסנאם!
די רעגירונג וועט צושיקן
טויזענטער צו יעדן
אמעריקאנער
מען האט זיך שוין ענדליך פארגליכן אין וואשינגטאן איבער דעם ריזיגן רעטונג פּראגראם וואס וועט דערגרייכן צו העכער צוויי טריליאן דאלאר, מיט די האפענונג צו ראטעווען אמעריקע פון א קאטאסטראפישע דעפּרעסיע, אבער פון א הויפּט אינטערעסע פאר יעדן אמעריקאנער איז דאס געלט וואס מען וועט צושיקן פאר יעדן איינעם, די טויזנטערס וואס וועלן אוודאי גוט קומען פאר די מענטשן, און אוודאי פאר אחינו בני ישראל ווען מען זארגט זיך ווי אזוי צו דעקן די קאסטן פון די צרכי החג.
דאנערשטאג האט מען געהערט אז א שטוינענדע 3.3 מיליאן אמעריקאנער האבן פאריגע וואך איינגעגעבן צום ערשטן מאל פאר אנאפּלוימענט בענעפיטן, און מען גלויבט אז מען וועט אויך אין די איצטיגע וואך האבן אן אויסטערלישע הויכע צאל נייע אפּליקאנטן, קען מען מיט דעם פארשטיין פארוואס עס איז אזוי קריטיש וויכטיג אז מען וועט אריינבאקומען דאס געלט פון די רעגירונג ביז אין א פּאר וואכן, וועט דאס אביסל ראטעווען דעם מצב.
פאלגענד איז א שטיקל אויפקלערונג ווי אזוי דאס וועט ארבעטן:
מען האט באשטעטיגט $1,200 פאר יעדן ערוואקסענעם, וואס האט א יערליכן איינקונפט נישט מער פון $75,000. אויב די רעדע איז פון א פּארפאלק וואס שיקט אריין א דזשוינט טעקס ריטוירן, איז די מאקסימום $150,000, וואס ווען מען האלט אונטער דעם מאקסימום מיינט דאס אז יעדער פון זיי באקומט באזונדער $1,200 פון די רעגירונג.
באזונדער וועט מען צושיקן נאך $500 פאר יעדן קינד ביז צו די 17 יאר.
אויב מען פארדינט מער פון $75,000, וועט מען שניידן דעם טשעק ביז צו די $99,000 איינקונפט א יאר (פּער אינדיווידועל). דער טשעק וועט זיין $5 ווינציגער פאר יעדע $100 וואס מען פארדינט מער ווי $75,000. דער ציל פון די טשעקס איז, ארויסצוהעלפן פאר די דורכשניטליכע אמעריקאנער, און נישט פאר די רייכסטע לייט.
אינדיווידועלע מענטשן וואס האבן אריינגעשיקט זייער טעקס ריטוירן אונטער די קאטעגאריע פון "העד אוו האוזהאלד", וואס דאס טרעפט זיך געווענליך ביי א טאטע אדער א מאמע וואס האט קינדער און דאס ווייב-מאן לעבט שוין נישט, איז אויך בארעכטיגט צו $1,200 ביז צו פארדינסטן פון $112,500 א יאר, און דערנאך שניידט מען די סומע ביז צו פארדינסטן פון $136,500.
ווי אזוי ווייסט די רעגירונג וואו צו שיקן דאס געלט?
אויב מען האט שוין אריינגעשיקט דעם טעקס ריטוירן פאר 19', וועט די איי. אר. עס. נוצן די "דירעקט דעפּאזיט" אינפארמאציע אויף דעם טעקס ריטוירן אריינצושיקן דאס געלט אין יענעם באנק אקאונט. אויב איר האט געשלאסן יענעם אקאונט אדער אז איר האט נישט אנגעגעבן א דירעקט דעפּאזיט אינפארמאציע, וועט מען אייך ארויסשיקן א טשעק.
אויב איר האט נאכנישט אריינגעשיקט דעם טעקס ריטוירן פאר 19', וועט מען נוצן דעם טעקס ריטוירן פון 18' און אזוי מאכן דעם חשבון צי מען איז בארעכטיגט צו א טשעק, און וויפיל, און וואו צו שיקן דאס געלט.
פאקטיש איז דער איינקונפט געוואנדן אויף וויפיל מען פארדינט אין איצטיגן קאלענדער יאר, 20', וואס אויב עמיצער האט געהאט מזל און איז נתעשר געווארן איצט, אז די פארדינסטן זענען געשטיגן העכער די פריער דערמאנטע מאקסימום פארדינסטן אויפ'ן יאר, וועט אזא מענטש מוזן צוריקצאלן די בענעפיטן ביים אויסשטעלן דעם טעקס ריטוירן פאר 20', וואס מיינט אז ער האט כאטש געהאט א פרייע הלוואה ביז אפּריל 15, 21'...
אן אנדערע "שווערע שאלה" איז, די וואס האבן פארדינט מער פונעם ערלויבטן מאקסימום אין 18' און 19', אבער האבן פארלוירן זייערע דזשאבס, זיי שטייען איצט אן פּרנסה. ליידער וועלן די מענטשן נישט קענען באקומען די טשעקס זאפארט, נאר זיי וועלן באקומען דעם ריבעיט ווען זיי וועלן אויסשטעלן זייער טרעקס ריטוירן פאר 20', כאטש עס איז מעגליך אז דער טרעזשורי דעפּארטמענט וועט יא אויפשטעלן עפּעס א פּראגראם פאר די נצרכים, וואס זיי זענען דאך ממש פון די קאטעגאריע פאר וועמען דער פּראגראם איז געצילט געווארן, צו ראטעווען זיי.
דארף מען צאלן שטייערן?
ניין, די ספּעציעלע "ריבעיט" איז פריי פון שטייערן.
ווען וועט דאס געלט אנהויבן קומען?
פּרעזידענט סעקרעטאר מינוטשין האט געשטעלט אלס א ציל אז דאס געלט זאל אנהויבן ארויסגעשיקט ווערן אין די וואך פון פּסח. דאס איז א שטארק-אמביציעזער ציל, און עס קען זיין אז עס וועט אביסל לענגער דויערן. מען געדענקט אז ווען די רעגירונג האט געשיקט טשעקס ביי דעם פינאנץ קריזיס אין 08', איז דאס געלט ארויסגעגאנגען אין "גרופּעס" און עס האט געדויערט ארום 8 וואכן פאר די לעצטע מענטשן צו באקומען די טשעקס.
וויפיל אמעריקאנער וועלן באקומען דאס געלט?
מען שאצט אז ארום 125 מיליאן אמעריקאנער וועלן באקומען געלט, וואס איז ארום 83 פּראצענט פון די שטייערצאלער.
ווער וועט נישט באקומען א טשעק?
די הויפּט קאטעגאריעס וואס זענען אויסגעשלאסן זענען די רייכע, אויסלענדער וואס האבן נישט קיין גרין קארד, און "דעפּענדענטס" וואס קענען פאררעכנט ווערן אויפ'ן טעקס ריטוירן פון עמיצן אנדערש.
וואס טוט זיך מיט מענטשן וואס באקומען סאשעל סעקיוריטי?
מענטשן וואס האבן סאשעל סעקיוריטי זענען אויך בארעכטיגט צו די ספּעציעלע געלטער ווי לאנג זייער פולער איינקונפט איז נישט מער פונעם מאקסימום. סאשעל סעקיוריטי געניסער וואס פארדינען זייער ווייניג און זענען פּטור פון אריינשיקן א טעקס ריטוירן, וועלן אויך באקומען דאס געלט ווייל ווען זיי באקומען דעם יערליכן סאשעל סעקיוריטי בענעפיט סטעיטמענט, האט דאך די פעדעראלע רעגירונג דעם חשבון פון זייערע איינקונפטן און מען וועט קענען אריינשיקן דאס געלט פאר זיי אזוי ווי מען שיקט זיי יעדן חודש די סאשעל סעקיוריטי.
מענטשן מיט דיסעביליטי זענען אויך בארעכטיגט צו דעם ספּעציעלן געלט.
וועט קומען נאך געלט זומער?
פילייכט. פּרעזידענט טראמפּ האט געזאגט אז ער האלט נישט ביים אויסשליסן אז מען זאל נאכאמאל טיילן טשעקס, אבער דאס וועט זיין בלויז אויב די עקאנאמיע וועט נאך אלץ אונטערהינקען ביז צום זומער און דאס זאל בארעכטיגן נאך טשעקס. פארשטייט זיך, אז דער פּרעזידענט וועט אויך נעמען אין חשבון ווי אזוי זיין ווידערערוויילונג קאמפּיין וועט דאן אויסזען, און דאס זעלבע וועט וואל חשבונות אויך דיקטירן ווי אזוי די סענאטארן און קאנגרעסלייט וועלן דאן האנדלען.
ביז דערווייל, האט הנאה פון דעם געלט וואס "דער רייכער פעטער פון וואשינגטאן" שיקט אייך צו לכבוד יו"ט...
Copyright © 2020 , All rights reserved.
www.tzeitung.comThis email was sent to
why did I get this? unsubscribe from this list update subscription preferences
News Report · 1281 49th St. · Brooklyn, NY 11219 · USA